4. நதும்ஹாகம்வக்³கோ³

1. நதும்ஹாகம்ஸுத்தம்

33. ஸாவத்தி²னிதா³னம். ‘‘யம், பி⁴க்க²வே, ந தும்ஹாகம், தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதி. கிஞ்ச, பி⁴க்க²வே, ந தும்ஹாகம்? ரூபம், பி⁴க்க²வே, ந தும்ஹாகம், தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதி. வேத³னா ந தும்ஹாகம், தம் பஜஹத². ஸா வோ பஹீனா ஹிதாய ஸுகா²ய ப⁴விஸ்ஸதி. ஸஞ்ஞா ந தும்ஹாகம்… ஸங்கா²ரா ந தும்ஹாகம், தே பஜஹத². தே வோ பஹீனா ஹிதாய ஸுகா²ய ப⁴விஸ்ஸந்தி. விஞ்ஞாணம் ந தும்ஹாகம், தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதி’’.

‘‘ஸேய்யதா²பி, பி⁴க்க²வே, யம் இமஸ்மிம் ஜேதவனே திணகட்ட²ஸாகா²பலாஸம் தம் ஜனோ ஹரேய்ய வா ட³ஹேய்ய வா யதா²பச்சயம் வா கரேய்ய. அபி நு தும்ஹாகம் ஏவமஸ்ஸ – ‘அம்ஹே ஜனோ ஹரதி வா ட³ஹதி வா யதா²பச்சயம் வா கரோதீ’’’தி? ‘‘நோ ஹேதம், ப⁴ந்தே’’. ‘‘தம் கிஸ்ஸ ஹேது’’? ‘‘ந ஹி நோ ஏதம், ப⁴ந்தே, அத்தா வா அத்தனியம் வா’’தி. ‘‘ஏவமேவ கோ², பி⁴க்க²வே, ரூபம் ந தும்ஹாகம், தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதி. வேத³னா ந தும்ஹாகம், தம் பஜஹத². ஸா வோ பஹீனா ஹிதாய ஸுகா²ய ப⁴விஸ்ஸதி. ஸஞ்ஞா ந தும்ஹாகம்… ஸங்கா²ரா ந தும்ஹாகம்… விஞ்ஞாணம் ந தும்ஹாகம், தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதீ’’தி. பட²மம்.

2. து³தியனதும்ஹாகம்ஸுத்தம்

34. ஸாவத்தி²னிதா³னம். ‘‘யம், பி⁴க்க²வே, ந தும்ஹாகம், தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதி. கிஞ்ச, பி⁴க்க²வே, ந தும்ஹாகம்? ரூபம், பி⁴க்க²வே, ந தும்ஹாகம், தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதி. வேத³னா ந தும்ஹாகம்… ஸஞ்ஞா ந தும்ஹாகம்… ஸங்கா²ரா ந தும்ஹாகம்… விஞ்ஞாணம் ந தும்ஹாகம், தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதி. யம், பி⁴க்க²வே, ந தும்ஹாகம் தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதீ’’தி. து³தியம்.

3. அஞ்ஞதரபி⁴க்கு²ஸுத்தம்

35. ஸாவத்தி²னிதா³னம். அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘ஸாது⁴ மே, ப⁴ந்தே, ப⁴க³வா ஸம்கி²த்தேன த⁴ம்மம் தே³ஸேது; யமஹம் ப⁴க³வதோ த⁴ம்மம் ஸுத்வா ஏகோ வூபகட்டோ², அப்பமத்தோ ஆதாபீ பஹிதத்தோ விஹரேய்ய’’ந்தி. ‘‘யம் கோ², பி⁴க்கு², அனுஸேதி, தேன ஸங்க²ம் க³ச்ச²தி; யம் நானுஸேதி, ந தேன ஸங்க²ம் க³ச்ச²தீ’’தி. ‘‘அஞ்ஞாதம், ப⁴க³வா; அஞ்ஞாதம், ஸுக³தா’’தி.

‘‘யதா² கத²ம் பன த்வம், பி⁴க்கு², மயா ஸம்கி²த்தேன பா⁴ஸிதஸ்ஸ வித்தா²ரேன அத்த²ம் ஆஜானாஸீ’’தி? ‘‘ரூபம் சே, ப⁴ந்தே, அனுஸேதி தேன ஸங்க²ம் க³ச்ச²தி. வேத³னம் சே அனுஸேதி தேன ஸங்க²ம் க³ச்ச²தி. ஸஞ்ஞம் சே அனுஸேதி தேன ஸங்க²ம் க³ச்ச²தி. ஸங்கா²ரே சே அனுஸேதி தேன ஸங்க²ம் க³ச்ச²தி. விஞ்ஞாணம் சே அனுஸேதி தேன ஸங்க²ம் க³ச்ச²தி. ரூபம் சே, ப⁴ந்தே, நானுஸேதி ந தேன ஸங்க²ம் க³ச்ச²தி. வேத³னம் சே… ஸஞ்ஞம் சே… ஸங்கா²ரே சே… விஞ்ஞாணம் சே நானுஸேதி ந தேன ஸங்க²ம் க³ச்ச²தி. இமஸ்ஸ க்²வாஹம், ப⁴ந்தே, ப⁴க³வதா ஸம்கி²த்தேன பா⁴ஸிதஸ்ஸ ஏவம் வித்தா²ரேன அத்த²ம் ஆஜானாமீ’’தி.

‘‘ஸாது⁴ ஸாது⁴, பி⁴க்கு²! ஸாது⁴ கோ² த்வம், பி⁴க்கு², மயா ஸம்கி²த்தேன பா⁴ஸிதஸ்ஸ வித்தா²ரேன அத்த²ம் ஆஜானாஸி. ரூபம் சே, பி⁴க்கு², அனுஸேதி தேன ஸங்க²ம் க³ச்ச²தி. வேத³னம் சே… ஸஞ்ஞம் சே… ஸங்கா²ரே சே… விஞ்ஞாணம் சே அனுஸேதி தேன ஸங்க²ம் க³ச்ச²தி. ரூபம் சே, பி⁴க்கு², நானுஸேதி ந தேன ஸங்க²ம் க³ச்ச²தி. வேத³னம் சே… ஸஞ்ஞம் சே… ஸங்கா²ரே சே… விஞ்ஞாணம் சே நானுஸேதி ந தேன ஸங்க²ம் க³ச்ச²தி. இமஸ்ஸ கோ², பி⁴க்கு², மயா ஸம்கி²த்தேன, பா⁴ஸிதஸ்ஸ ஏவம் வித்தா²ரேன அத்தோ² த³ட்ட²ப்³போ³’’தி.

அத² கோ² ஸோ பி⁴க்கு² ப⁴க³வதோ பா⁴ஸிதம் அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி.

அத² கோ² ஸோ பி⁴க்கு² ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி தத³னுத்தரம் – ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’’தி அப்³ப⁴ஞ்ஞாஸி. அஞ்ஞதரோ ச பன ஸோ பி⁴க்கு² அரஹதம் அஹோஸீதி. ததியம்.

4. து³தியஅஞ்ஞதரபி⁴க்கு²ஸுத்தம்

36. ஸாவத்தி²னிதா³னம். அத² கோ² அஞ்ஞதரோ பி⁴க்கு² யேன ப⁴க³வா…பே… ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘ஸாது⁴ மே, ப⁴ந்தே, ப⁴க³வா ஸம்கி²த்தேன த⁴ம்மம் தே³ஸேது யமஹம் ப⁴க³வதோ த⁴ம்மம் ஸுத்வா ஏகோ வூபகட்டோ² அப்பமத்தோ ஆதாபீ பஹிதத்தோ விஹரேய்ய’’ந்தி. ‘‘யம் கோ², பி⁴க்கு², அனுஸேதி தம் அனுமீயதி; யம் அனுமீயதி தேன ஸங்க²ம் க³ச்ச²தி. யம் நானுஸேதி ந தம் அனுமீயதி; யம் நானுமீயதி ந தேன ஸங்க²ம் க³ச்ச²தீ’’தி. ‘‘அஞ்ஞாதம், ப⁴க³வா; அஞ்ஞாதம், ஸுக³தா’’தி.

‘‘யதா² கத²ம் பன த்வம், பி⁴க்கு², மயா ஸம்கி²த்தேன பா⁴ஸிதஸ்ஸ வித்தா²ரேன அத்த²ம் ஆஜானாஸீ’’தி? ‘‘ரூபம் சே, ப⁴ந்தே, அனுஸேதி தம் அனுமீயதி; யம் அனுமீயதி தேன ஸங்க²ம் க³ச்ச²தி. வேத³னம் சே அனுஸேதி… ஸஞ்ஞம் சே அனுஸேதி… ஸங்கா²ரே சே அனுஸேதி… விஞ்ஞாணம் சே அனுஸேதி தம் அனுமீயதி; யம் அனுமீயதி தேன ஸங்க²ம் க³ச்ச²தி. ரூபம் சே, ப⁴ந்தே, நானுஸேதி ந தம் அனுமீயதி; யம் நானுமீயதி ந தேன ஸங்க²ம் க³ச்ச²தி. வேத³னம் சே நானுஸேதி… ஸஞ்ஞம் சே நானுஸேதி… ஸங்கா²ரே சே நானுஸேதி… விஞ்ஞாணம் சே நானுஸேதி ந தம் அனுமீயதி; யம் நானுமீயதி ந தேன ஸங்க²ம் க³ச்ச²தி. இமஸ்ஸ க்²வாஹம், ப⁴ந்தே, ப⁴க³வதா ஸம்கி²த்தேன பா⁴ஸிதஸ்ஸ ஏவம் வித்தா²ரேன அத்த²ம் ஆஜானாமீ’’தி.

‘‘ஸாது⁴ ஸாது⁴, பி⁴க்கு²! ஸாது⁴ கோ² த்வம், பி⁴க்கு², மயா ஸம்கி²த்தேன பா⁴ஸிதஸ்ஸ வித்தா²ரேன அத்த²ம் ஆஜானாஸி. ரூபம் சே, பி⁴க்கு², அனுஸேதி தம் அனுமீயதி; யம் அனுமீயதி தேன ஸங்க²ம் க³ச்ச²தி. வேத³னம் சே, பி⁴க்கு²… ஸஞ்ஞம் சே, பி⁴க்கு²… ஸங்கா²ரே சே, பி⁴க்கு²… விஞ்ஞாணம் சே, பி⁴க்கு², அனுஸேதி தம் அனுமீயதி; யம் அனுமீயதி தேன ஸங்க²ம் க³ச்ச²தி. ரூபம் சே, பி⁴க்கு², நானுஸேதி ந தம் அனுமீயதி; யம் நானுமீயதி ந தேன ஸங்க²ம் க³ச்ச²தி. வேத³னம் சே நானுஸேதி… ஸஞ்ஞம் சே நானுஸேதி… ஸங்கா²ரே சே நானுஸேதி… விஞ்ஞாணம் சே நானுஸேதி ந தம் அனுமீயதி; யம் நானுமீயதி ந தேன ஸங்க²ம் க³ச்ச²தி. இமஸ்ஸ கோ², பி⁴க்கு², மயா ஸம்கி²த்தேன பா⁴ஸிதஸ்ஸ ஏவம் வித்தா²ரேன அத்தோ² த³ட்ட²ப்³போ³’’தி…பே… அஞ்ஞதரோ ச பன ஸோ பி⁴க்கு² அரஹதம் அஹோஸீதி. சதுத்த²ம்.

5. ஆனந்த³ஸுத்தம்

37. ஸாவத்தி²னிதா³னம். அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் ஆனந்த³ம் ப⁴க³வா ஏதத³வோச –

‘‘ஸசே தம், ஆனந்த³, ஏவம் புச்சே²ய்யும் – ‘கதமேஸம், ஆவுஸோ ஆனந்த³, த⁴ம்மானம் உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ [டி²தானம் (ஸ்யா. கம். பீ. க.)] அஞ்ஞத²த்தம் பஞ்ஞாயதீ’தி? ஏவம் புட்டோ² த்வம், ஆனந்த³, கிந்தி ப்³யாகரேய்யாஸீ’’தி? ‘‘ஸசே மம், ப⁴ந்தே, ஏவம் புச்சே²ய்யும் – ‘கதமேஸம், ஆவுஸோ ஆனந்த³, த⁴ம்மானம் உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதீ’தி? ஏவம் புட்டோ²ஹம், ப⁴ந்தே, ஏவம் ப்³யாகரேய்யம் – ‘ரூபஸ்ஸ கோ², ஆவுஸோ, உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதி. வேத³னாய… ஸஞ்ஞாய… ஸங்கா²ரானம்… விஞ்ஞாணஸ்ஸ உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதி. இமேஸம் கோ², ஆவுஸோ, த⁴ம்மானம் உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதீ’தி. ஏவம் புட்டோ²ஹம், ப⁴ந்தே, ஏவம் ப்³யாகரேய்ய’’ந்தி.

‘‘ஸாது⁴ ஸாது⁴, ஆனந்த³! ரூபஸ்ஸ கோ², ஆனந்த³, உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதி. வேத³னாய… ஸஞ்ஞாய… ஸங்கா²ரானம்… விஞ்ஞாணஸ்ஸ உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதி. இமேஸம் கோ², ஆனந்த³, த⁴ம்மானம் உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதீதி. ஏவம் புட்டோ² த்வம், ஆனந்த³, ஏவம் ப்³யாகரேய்யாஸீ’’தி. பஞ்சமம்.

6. து³தியஆனந்த³ஸுத்தம்

38. ஸாவத்தி²னிதா³னம். ஏகமந்தம் நிஸின்னம் கோ² ஆயஸ்மந்தம் ஆனந்த³ம் ப⁴க³வா ஏதத³வோச –

‘‘ஸசே தம், ஆனந்த³, ஏவம் புச்சே²ய்யும் – ‘கதமேஸம், ஆவுஸோ ஆனந்த³, த⁴ம்மானம் உப்பாதோ³ பஞ்ஞாயித்த², வயோ பஞ்ஞாயித்த², டி²தஸ்ஸ அஞ்ஞத²த்தம் பஞ்ஞாயித்த²? கதமேஸம் த⁴ம்மானம் உப்பாதோ³ பஞ்ஞாயிஸ்ஸதி, வயோ பஞ்ஞாயிஸ்ஸதி, டி²தஸ்ஸ அஞ்ஞத²த்தம் பஞ்ஞாயிஸ்ஸதி? கதமேஸம் த⁴ம்மானம் உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதீ’தி? ஏவம் புட்டோ² த்வம், ஆனந்த³, கிந்தி ப்³யாகரேய்யாஸீ’’தி? ‘‘ஸசே மம், ப⁴ந்தே, ஏவம் புச்சே²ய்யும் – ‘கதமேஸம், ஆவுஸோ ஆனந்த³, த⁴ம்மானம் உப்பாதோ³ பஞ்ஞாயித்த², வயோ பஞ்ஞாயித்த², டி²தஸ்ஸ அஞ்ஞத²த்தம் பஞ்ஞாயித்த²? கதமேஸம் த⁴ம்மானம் உப்பாதோ³ பஞ்ஞாயிஸ்ஸதி, வயோ பஞ்ஞாயிஸ்ஸதி, டி²தஸ்ஸ அஞ்ஞத²த்தம் பஞ்ஞாயிஸ்ஸதி? கதமேஸம் த⁴ம்மானம் உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதீ’தி? ஏவம் புட்டோ²ஹம், ப⁴ந்தே, ஏவம் ப்³யாகரேய்யம் – ‘யம் கோ², ஆவுஸோ, ரூபம் அதீதம் நிருத்³த⁴ம் விபரிணதம்; தஸ்ஸ உப்பாதோ³ பஞ்ஞாயித்த², வயோ பஞ்ஞாயித்த², டி²தஸ்ஸ அஞ்ஞத²த்தம் பஞ்ஞாயித்த². யா வேத³னா அதீதா நிருத்³தா⁴ விபரிணதா; தஸ்ஸா உப்பாதோ³ பஞ்ஞாயித்த², வயோ பஞ்ஞாயித்த², டி²தாய அஞ்ஞத²த்தம் பஞ்ஞாயித்த². யா ஸஞ்ஞா… யே ஸங்கா²ரா அதீதா நிருத்³தா⁴ விபரிணதா; தேஸம் உப்பாதோ³ பஞ்ஞாயித்த², வயோ பஞ்ஞாயித்த², டி²தஸ்ஸ அஞ்ஞத²த்தம் பஞ்ஞாயித்த². யம் விஞ்ஞாணம் அதீதம் நிருத்³த⁴ம் விபரிணதம்; தஸ்ஸ உப்பாதோ³ பஞ்ஞாயித்த², வயோ பஞ்ஞாயித்த², டி²தஸ்ஸ அஞ்ஞத²த்தம் பஞ்ஞாயித்த². இமேஸம் கோ², ஆவுஸோ, த⁴ம்மானம் உப்பாதோ³ பஞ்ஞாயித்த², வயோ பஞ்ஞாயித்த², டி²தஸ்ஸ அஞ்ஞத²த்தம் பஞ்ஞாயித்த²’’’.

‘‘யம் கோ², ஆவுஸோ, ரூபம் அஜாதம் அபாதுபூ⁴தம்; தஸ்ஸ உப்பாதோ³ பஞ்ஞாயிஸ்ஸதி, வயோ பஞ்ஞாயிஸ்ஸதி, டி²தஸ்ஸ அஞ்ஞத²த்தம் பஞ்ஞாயிஸ்ஸதி. யா வேத³னா அஜாதா அபாதுபூ⁴தா; தஸ்ஸா உப்பாதோ³ பஞ்ஞாயிஸ்ஸதி, வயோ பஞ்ஞாயிஸ்ஸதி, டி²தாய அஞ்ஞத²த்தம் பஞ்ஞாயிஸ்ஸதி. யா ஸஞ்ஞா…பே… யே ஸங்கா²ரா அஜாதா அபாதுபூ⁴தா; தேஸம் உப்பாதோ³ பஞ்ஞாயிஸ்ஸதி, வயோ பஞ்ஞாயிஸ்ஸதி, டி²தஸ்ஸ அஞ்ஞத²த்தம் பஞ்ஞாயிஸ்ஸதி. யம் விஞ்ஞாணம் அஜாதம் அபாதுபூ⁴தம்; தஸ்ஸ உப்பாதோ³ பஞ்ஞாயிஸ்ஸதி, வயோ பஞ்ஞாயிஸ்ஸதி, டி²தஸ்ஸ அஞ்ஞத²த்தம் பஞ்ஞாயிஸ்ஸதி. இமேஸம் கோ², ஆவுஸோ, த⁴ம்மானம் உப்பாதோ³ பஞ்ஞாயிஸ்ஸதி, வயோ பஞ்ஞாயிஸ்ஸதி, டி²தஸ்ஸ அஞ்ஞத²த்தம் பஞ்ஞாயிஸ்ஸதி.

‘‘யம் கோ², ஆவுஸோ, ரூபம் ஜாதம் பாதுபூ⁴தம்; தஸ்ஸ உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதி. யா வேத³னா ஜாதா பாதுபூ⁴தா…பே… யா ஸஞ்ஞா… யே ஸங்கா²ரா ஜாதா பாதுபூ⁴தா; தேஸம் உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதி. யம் விஞ்ஞாணம் ஜாதம் பாதுபூ⁴தம் தஸ்ஸ உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதி. இமேஸம் கோ², ஆவுஸோ, த⁴ம்மானம் உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதீ’தி. ஏவம் புட்டோ²ஹம், ப⁴ந்தே, ஏவம் ப்³யாகரேய்ய’’ந்தி.

‘‘ஸாது⁴, ஸாது⁴, ஆனந்த³! யம் கோ², ஆனந்த³, ரூபம் அதீதம் நிருத்³த⁴ம் விபரிணதம்; தஸ்ஸ உப்பாதோ³ பஞ்ஞாயித்த², வயோ பஞ்ஞாயித்த², டி²தஸ்ஸ அஞ்ஞத²த்தம் பஞ்ஞாயித்த². யா வேத³னா … யா ஸஞ்ஞா… யே ஸங்கா²ரா… யம் விஞ்ஞாணம் அதீதம் நிருத்³த⁴ம் விபரிணதம்; தஸ்ஸ உப்பாதோ³ பஞ்ஞாயித்த², வயோ பஞ்ஞாயித்த², டி²தஸ்ஸ அஞ்ஞத²த்தம் பஞ்ஞாயித்த². இமேஸம் கோ², ஆனந்த³, த⁴ம்மானம் உப்பாதோ³ பஞ்ஞாயித்த², வயோ பஞ்ஞாயித்த², டி²தஸ்ஸ அஞ்ஞத²த்தம் பஞ்ஞாயித்த².

‘‘யம் கோ², ஆனந்த³, ரூபம் அஜாதம் அபாதுபூ⁴தம்; தஸ்ஸ உப்பாதோ³ பஞ்ஞாயிஸ்ஸதி, வயோ பஞ்ஞாயிஸ்ஸதி, டி²தஸ்ஸ அஞ்ஞத²த்தம் பஞ்ஞாயிஸ்ஸதி. யா வேத³னா… யா ஸஞ்ஞா… யே ஸங்கா²ரா… யம் விஞ்ஞாணம் அஜாதம் அபாதுபூ⁴தம்; தஸ்ஸ உப்பாதோ³ பஞ்ஞாயிஸ்ஸதி, வயோ பஞ்ஞாயிஸ்ஸதி, டி²தஸ்ஸ அஞ்ஞத²த்தம் பஞ்ஞாயிஸ்ஸதி. இமேஸம் கோ², ஆனந்த³, த⁴ம்மானம் உப்பாதோ³ பஞ்ஞாயிஸ்ஸதி, வயோ பஞ்ஞாயிஸ்ஸதி, டி²தஸ்ஸ அஞ்ஞத²த்தம் பஞ்ஞாயிஸ்ஸதி.

‘‘யம் கோ², ஆனந்த³, ரூபம் ஜாதம் பாதுபூ⁴தம்; தஸ்ஸ உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதி. யா வேத³னா ஜாதா பாதுபூ⁴தா… யா ஸஞ்ஞா… யே ஸங்கா²ரா… யம் விஞ்ஞாணம் ஜாதம் பாதுபூ⁴தம்; தஸ்ஸ உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதி. இமேஸம் கோ², ஆனந்த³, த⁴ம்மானம் உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதீதி. ஏவம் புட்டோ² த்வம், ஆனந்த³, ஏவம் ப்³யாகரேய்யாஸீ’’தி. ச²ட்ட²ம்.

7. அனுத⁴ம்மஸுத்தம்

39. ஸாவத்தி²னிதா³னம். ‘‘த⁴ம்மானுத⁴ம்மப்படிபன்னஸ்ஸ, பி⁴க்க²வே, பி⁴க்கு²னோ அயமனுத⁴ம்மோ ஹோதி யம் ரூபே நிப்³பி³தா³ப³ஹுலோ [நிப்³பி³தா³ப³ஹுலம் (பீ. க.)] விஹரேய்ய, வேத³னாய நிப்³பி³தா³ப³ஹுலோ விஹரேய்ய, ஸஞ்ஞா நிப்³பி³தா³ப³ஹுலோ விஹரேய்ய, ஸங்கா²ரேஸு நிப்³பி³தா³ப³ஹுலோ விஹரேய்ய, விஞ்ஞாணே நிப்³பி³தா³ப³ஹுலோ விஹரேய்ய. யோ ரூபே நிப்³பி³தா³ப³ஹுலோ விஹரந்தோ, வேத³னாய… ஸஞ்ஞாய… ஸங்கா²ரேஸு நிப்³பி³தா³ப³ஹுலோ விஹரந்தோ, விஞ்ஞாணே நிப்³பி³தா³ப³ஹுலோ விஹரந்தோ ரூபம் பரிஜானாதி, வேத³னம்… ஸஞ்ஞம்… ஸங்கா²ரே… விஞ்ஞாணம் பரிஜானாதி, ஸோ ரூபம் பரிஜானம், வேத³னம்… ஸஞ்ஞம்… ஸங்கா²ரே… விஞ்ஞாணம் பரிஜானம் பரிமுச்சதி ரூபம்ஹா, பரிமுச்சதி வேத³னா, பரிமுச்சதி ஸஞ்ஞாய, பரிமுச்சதி ஸங்கா²ரேஹி, பரிமுச்சதி விஞ்ஞாணம்ஹா, பரிமுச்சதி ஜாதியா ஜராமரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, பரிமுச்சதி து³க்க²ஸ்மாதி வதா³மீ’’தி. ஸத்தமம்.

8. து³தியஅனுத⁴ம்மஸுத்தம்

40. ஸாவத்தி²னிதா³னம். ‘‘த⁴ம்மானுத⁴ம்மப்படிபன்னஸ்ஸ, பி⁴க்க²வே, பி⁴க்கு²னோ அயமனுத⁴ம்மோ ஹோதி யம் ரூபே அனிச்சானுபஸ்ஸீ விஹரேய்ய…பே… பரிமுச்சதி து³க்க²ஸ்மாதி வதா³மீ’’தி. அட்ட²மம்.

9. ததியஅனுத⁴ம்மஸுத்தம்

41. ஸாவத்தி²னிதா³னம். ‘‘த⁴ம்மானுத⁴ம்மப்படிபன்னஸ்ஸ, பி⁴க்க²வே, பி⁴க்கு²னோ அயமனுத⁴ம்மோ ஹோதி யம் ரூபே து³க்கா²னுபஸ்ஸீ விஹரேய்ய…பே… பரிமுச்சதி து³க்க²ஸ்மாதி வதா³மீ’’தி. நவமம்.

10. சதுத்த²அனுத⁴ம்மஸுத்தம்

42. ஸாவத்தி²னிதா³னம். ‘‘த⁴ம்மானுத⁴ம்மப்படிபன்னஸ்ஸ, பி⁴க்க²வே, பி⁴க்கு²னோ அயமனுத⁴ம்மோ ஹோதி யம் ரூபே அனத்தானுபஸ்ஸீ விஹரேய்ய, வேத³னாய… ஸஞ்ஞாய… ஸங்கா²ரேஸு… விஞ்ஞாணே அனத்தானுபஸ்ஸீ விஹரேய்ய. யோ ரூபே அனத்தானுபஸ்ஸீ விஹரந்தோ…பே… ரூபம் பரிஜானாதி, வேத³னம்… ஸஞ்ஞம்… ஸங்கா²ரே… விஞ்ஞாணம் பரிஜானாதி, ஸோ ரூபம் பரிஜானம், வேத³னம்… ஸஞ்ஞம்… ஸங்கா²ரே… விஞ்ஞாணம் பரிஜானம் பரிமுச்சதி ரூபம்ஹா, பரிமுச்சதி வேத³னாய, பரிமுச்சதி ஸஞ்ஞாய, பரிமுச்சதி ஸங்கா²ரேஹி, பரிமுச்சதி விஞ்ஞாணம்ஹா, பரிமுச்சதி ஜாதியா ஜராமரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, பரிமுச்சதி து³க்க²ஸ்மாதி வதா³மீ’’தி. த³ஸமம்.

நதும்ஹாகம்வக்³கோ³ சதுத்தோ².

தஸ்ஸுத்³தா³னம் –

நதும்ஹாகேன த்³வே வுத்தா, பி⁴க்கூ²ஹி அபரே து³வே;

ஆனந்தே³ன ச த்³வே வுத்தா, அனுத⁴ம்மேஹி த்³வே து³காதி.