2. அனிச்சவக்³கோ³

1. அனிச்சஸுத்தம்

12. ஏவம் மே ஸுதம் – ஸாவத்தி²யம். தத்ர கோ²…பே… ‘‘ரூபம், பி⁴க்க²வே, அனிச்சம், வேத³னா அனிச்சா, ஸஞ்ஞா அனிச்சா, ஸங்கா²ரா அனிச்சா, விஞ்ஞாணம் அனிச்சம். ஏவம் பஸ்ஸம், பி⁴க்க²வே, ஸுதவா அரியஸாவகோ ரூபஸ்மிம்பி நிப்³பி³ந்த³தி, வேத³னாயபி நிப்³பி³ந்த³தி, ஸஞ்ஞாயபி நிப்³பி³ந்த³தி, ஸங்கா²ரேஸுபி நிப்³பி³ந்த³தி, விஞ்ஞாணஸ்மிம்பி நிப்³பி³ந்த³தி. நிப்³பி³ந்த³ம் விரஜ்ஜதி; விராகா³ விமுச்சதி. விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதீ’’தி. பட²மம்.

2. து³க்க²ஸுத்தம்

13. ஸாவத்தி²னிதா³னம். ‘‘ரூபம், பி⁴க்க²வே, து³க்க²ம், வேத³னா து³க்கா², ஸஞ்ஞா து³க்கா², ஸங்கா²ரா து³க்கா², விஞ்ஞாணம் து³க்க²ம். ஏவம் பஸ்ஸம்…பே… நாபரம் இத்த²த்தாயாதி பஜானாதீ’’தி. து³தியம்.

3. அனத்தஸுத்தம்

14. ஸாவத்தி²னிதா³னம். ‘‘ரூபம், பி⁴க்க²வே, அனத்தா, வேத³னா அனத்தா, ஸஞ்ஞா அனத்தா, ஸங்கா²ரா அனத்தா, விஞ்ஞாணம் அனத்தா. ஏவம் பஸ்ஸம், பி⁴க்க²வே, ஸுதவா அரியஸாவகோ ரூபஸ்மிம்பி நிப்³பி³ந்த³தி, வேத³னாயபி நிப்³பி³ந்த³தி, ஸஞ்ஞாயபி நிப்³பி³ந்த³தி, ஸங்கா²ரேஸுபி நிப்³பி³ந்த³தி, விஞ்ஞாணஸ்மிம்பி நிப்³பி³ந்த³தி. நிப்³பி³ந்த³ம் விரஜ்ஜதி; விராகா³ விமுச்சதி. விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதீ’’தி. ததியம்.

4. யத³னிச்சஸுத்தம்

15. ஸாவத்தி²னிதா³னம். ‘‘ரூபம், பி⁴க்க²வே, அனிச்சம். யத³னிச்சம் தம் து³க்க²ம்; யம் து³க்க²ம் தத³னத்தா; யத³னத்தா தம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். வேத³னா அனிச்சா. யத³னிச்சம் தம் து³க்க²ம்; யம் து³க்க²ம் தத³னத்தா; யத³னத்தா தம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஸஞ்ஞா அனிச்சா…பே… ஸங்கா²ரா அனிச்சா… விஞ்ஞாணம் அனிச்சம். யத³னிச்சம் தம் து³க்க²ம்; யம் து³க்க²ம் தத³னத்தா; யத³னத்தா தம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஏவம் பஸ்ஸம்…பே… நாபரம் இத்த²த்தாயாதி பஜானாதீ’’தி. சதுத்த²ம்.

5. யம்து³க்க²ஸுத்தம்

16. ஸாவத்தி²னிதா³னம். ‘‘ரூபம், பி⁴க்க²வே, து³க்க²ம். யம் து³க்க²ம் தத³னத்தா; யத³னத்தா தம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். வேத³னா து³க்கா²… ஸஞ்ஞா து³க்கா²… ஸங்கா²ரா து³க்கா²… விஞ்ஞாணம் து³க்க²ம். யம் து³க்க²ம் தத³னத்தா; யத³னத்தா தம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஏவம் பஸ்ஸம்…பே… நாபரம் இத்த²த்தாயாதி பஜானாதீ’’தி. பஞ்சமம்.

6. யத³னத்தாஸுத்தம்

17. ஸாவத்தி²னிதா³னம். ‘‘ரூபம், பி⁴க்க²வே, அனத்தா. யத³னத்தா தம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். வேத³னா அனத்தா… ஸஞ்ஞா அனத்தா… ஸங்கா²ரா அனத்தா… விஞ்ஞாணம் அனத்தா. யத³னத்தா தம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஏவம் பஸ்ஸம்…பே… நாபரம் இத்த²த்தாயாதி பஜானாதீ’’தி. ச²ட்ட²ம்.

7. ஸஹேதுஅனிச்சஸுத்தம்

18. ஸாவத்தி²னிதா³னம். ‘‘ரூபம், பி⁴க்க²வே, அனிச்சம். யோபி ஹேது, யோபி பச்சயோ ரூபஸ்ஸ உப்பாதா³ய, ஸோபி அனிச்சோ. அனிச்சஸம்பூ⁴தம், பி⁴க்க²வே, ரூபம் குதோ நிச்சம் ப⁴விஸ்ஸதி! வேத³னா அனிச்சா. யோபி ஹேது, யோபி பச்சயோ வேத³னாய உப்பாதா³ய, ஸோபி அனிச்சோ. அனிச்சஸம்பூ⁴தா, பி⁴க்க²வே, வேத³னா குதோ நிச்சா ப⁴விஸ்ஸதி! ஸஞ்ஞா அனிச்சா… ஸங்கா²ரா அனிச்சா. யோபி ஹேது யோபி பச்சயோ ஸங்கா²ரானம் உப்பாதா³ய, ஸோபி அனிச்சோ. அனிச்சஸம்பூ⁴தா, பி⁴க்க²வே, ஸங்கா²ரா குதோ நிச்சா ப⁴விஸ்ஸந்தி! விஞ்ஞாணம் அனிச்சம். யோபி ஹேது யோபி பச்சயோ விஞ்ஞாணஸ்ஸ உப்பாதா³ய, ஸோபி அனிச்சோ. அனிச்சஸம்பூ⁴தம், பி⁴க்க²வே, விஞ்ஞாணம் குதோ நிச்சம் ப⁴விஸ்ஸதி! ஏவம் பஸ்ஸம்…பே… நாபரம் இத்த²த்தாயாதி பஜானாதீ’’தி. ஸத்தமம்.

8. ஸஹேதுது³க்க²ஸுத்தம்

19. ஸாவத்தி²னிதா³னம். ‘‘ரூபம், பி⁴க்க²வே, து³க்க²ம். யோபி ஹேது யோபி பச்சயோ ரூபஸ்ஸ உப்பாதா³ய, ஸோபி து³க்கோ². து³க்க²ஸம்பூ⁴தம், பி⁴க்க²வே, ரூபம் குதோ ஸுக²ம் ப⁴விஸ்ஸதி! வேத³னா து³க்கா²… ஸஞ்ஞா து³க்கா²… ஸங்கா²ரா து³க்கா²… விஞ்ஞாணம் து³க்க²ம். யோபி ஹேது யோபி பச்சயோ விஞ்ஞாணஸ்ஸ உப்பாதா³ய, ஸோபி து³க்கோ². து³க்க²ஸம்பூ⁴தம், பி⁴க்க²வே, விஞ்ஞாணம் குதோ ஸுக²ம் ப⁴விஸ்ஸதி! ஏவம் பஸ்ஸம்…பே… நாபரம் இத்த²த்தாயாதி பஜானாதீ’’தி. அட்ட²மம்.

9. ஸஹேதுஅனத்தஸுத்தம்

20. ஸாவத்தி²னிதா³னம். ‘‘ரூபம், பி⁴க்க²வே, அனத்தா. யோபி ஹேது யோபி பச்சயோ ரூபஸ்ஸ உப்பாதா³ய, ஸோபி அனத்தா. அனத்தஸம்பூ⁴தம், பி⁴க்க²வே, ரூபம் குதோ அத்தா ப⁴விஸ்ஸதி! வேத³னா அனத்தா… ஸஞ்ஞா அனத்தா… ஸங்கா²ரா அனத்தா… விஞ்ஞாணம் அனத்தா. யோபி ஹேது யோபி பச்சயோ விஞ்ஞாணஸ்ஸ உப்பாதா³ய, ஸோபி அனத்தா. அனத்தஸம்பூ⁴தம், பி⁴க்க²வே, விஞ்ஞாணம் குதோ அத்தா ப⁴விஸ்ஸதி! ஏவம் பஸ்ஸம்…பே… நாபரம் இத்த²த்தாயாதி பஜானாதீ’’தி. நவமம்.

10. ஆனந்த³ஸுத்தம்

21. ஸாவத்தி²யம் … ஆராமே. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘‘நிரோதோ⁴ நிரோதோ⁴’தி, ப⁴ந்தே, வுச்சதி. கதமேஸானம் கோ², ப⁴ந்தே, த⁴ம்மானம் நிரோதோ⁴ [நிரோதா⁴ (ஸீ. பீ.)] ‘நிரோதோ⁴’தி வுச்சதீ’’தி? ‘‘ரூபம் கோ², ஆனந்த³, அனிச்சம் ஸங்க²தம் படிச்சஸமுப்பன்னம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மம். தஸ்ஸ நிரோதோ⁴ [நிரோதா⁴ (ஸீ. பீ.)] ‘நிரோதோ⁴’தி வுச்சதி. வேத³னா அனிச்சா ஸங்க²தா படிச்சஸமுப்பன்னா க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மா. தஸ்ஸா நிரோதோ⁴ ‘நிரோதோ⁴’தி வுச்சதி. ஸஞ்ஞா… ஸங்கா²ரா அனிச்சா ஸங்க²தா படிச்சஸமுப்பன்னா க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மா. தேஸம் நிரோதோ⁴ ‘நிரோதோ⁴’தி வுச்சதி. விஞ்ஞாணம் அனிச்சம் ஸங்க²தம் படிச்சஸமுப்பன்னம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மம். தஸ்ஸ நிரோதோ⁴ ‘நிரோதோ⁴’தி வுச்சதி. இமேஸம் கோ², ஆனந்த³, த⁴ம்மானம் நிரோதோ⁴ ‘நிரோதோ⁴’தி வுச்சதீ’’தி. த³ஸமம்.

அனிச்சவக்³கோ³ து³தியோ.

தஸ்ஸுத்³தா³னம் –

அனிச்சம் து³க்க²ம் அனத்தா, யத³னிச்சாபரே தயோ;

ஹேதுனாபி தயோ வுத்தா, ஆனந்தே³ன ச தே த³ஸாதி.