11. அந்தவக்³கோ³

1. அந்தஸுத்தம்

103. ஸாவத்தி²னிதா³னம். ‘‘சத்தாரோமே, பி⁴க்க²வே, அந்தா. கதமே சத்தாரோ? ஸக்காயந்தோ, ஸக்காயஸமுத³யந்தோ, ஸக்காயனிரோத⁴ந்தோ, ஸக்காயனிரோத⁴கா³மினிப்படிபத³ந்தோ. கதமோ ச, பி⁴க்க²வே, ஸக்காயந்தோ? பஞ்சுபாதா³னக்க²ந்தா⁴திஸ்ஸ வசனீயம். கதமே பஞ்ச? ஸேய்யதி²த³ம் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴ – அயம் வுச்சதி, பி⁴க்க²வே, ஸக்காயந்தோ’’.

‘‘கதமோ ச, பி⁴க்க²வே, ஸக்காயஸமுத³யந்தோ? யாயம் தண்ஹா போனோப⁴விகா நந்தி³ராக³ஸஹக³தா தத்ரதத்ராபி⁴னந்தி³னீ, ஸேய்யதி²த³ம் – காமதண்ஹா, ப⁴வதண்ஹா, விப⁴வதண்ஹா. அயம் வுச்சதி, பி⁴க்க²வே, ஸக்காயஸமுத³யந்தோ.

‘‘கதமோ ச, பி⁴க்க²வே, ஸக்காயனிரோத⁴ந்தோ? யோ தஸ்ஸாயேவ தண்ஹாய அஸேஸவிராக³னிரோதோ⁴ சாகோ³ படினிஸ்ஸக்³கோ³ முத்தி அனாலயோ – அயம் வுச்சதி, பி⁴க்க²வே, ஸக்காயனிரோத⁴ந்தோ.

‘‘கதமோ ச, பி⁴க்க²வே, ஸக்காயனிரோத⁴கா³மினிப்படிபத³ந்தோ? அயமேவ அரியோ அட்ட²ங்கி³கோ மக்³கோ³. ஸேய்யதி²த³ம் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴. அயம் வுச்சதி, பி⁴க்க²வே, ஸக்காயனிரோத⁴கா³மினிப்படிபத³ந்தோ. இமே கோ², பி⁴க்க²வே, சத்தாரோ அந்தா’’தி. பட²மம்.

2. து³க்க²ஸுத்தம்

104. ஸாவத்தி²னிதா³னம். ‘‘து³க்க²ஞ்ச வோ, பி⁴க்க²வே, தே³ஸேஸ்ஸாமி து³க்க²ஸமுத³யஞ்ச து³க்க²னிரோத⁴ஞ்ச து³க்க²னிரோத⁴கா³மினிஞ்ச படிபத³ம். தம் ஸுணாத². கதமஞ்ச, பி⁴க்க²வே, து³க்க²ம்? பஞ்சுபாதா³னக்க²ந்தா⁴திஸ்ஸ வசனீயம். கதமே பஞ்ச? ஸேய்யதி²த³ம் – ரூபுபாதா³னக்க²ந்தோ⁴…பே… விஞ்ஞாணுபாதா³னக்க²ந்தோ⁴. இத³ம் வுச்சதி, பி⁴க்க²வே, து³க்க²ம். கதமோ ச, பி⁴க்க²வே, து³க்க²ஸமுத³யோ? யாயம் தண்ஹா போனோப⁴விகா…பே… காமதண்ஹா, ப⁴வதண்ஹா, விப⁴வதண்ஹா – அயம் வுச்சதி, பி⁴க்க²வே, து³க்க²ஸமுத³யோ. கதமோ ச, பி⁴க்க²வே, து³க்க²னிரோதோ⁴? யோ தஸ்ஸாயேவ தண்ஹாய அஸேஸவிராக³னிரோதோ⁴ சாகோ³ படினிஸ்ஸக்³கோ³ முத்தி அனாலயோ – அயம் வுச்சதி, பி⁴க்க²வே, து³க்க²னிரோதோ⁴. கதமா ச, பி⁴க்க²வே, து³க்க²னிரோத⁴கா³மினீ படிபதா³? அயமேவ அரியோ அட்ட²ங்கி³கோ மக்³கோ³. ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. அயம் வுச்சதி, பி⁴க்க²வே, து³க்க²னிரோத⁴கா³மினீ படிபதா³’’தி. து³தியம்.

3. ஸக்காயஸுத்தம்

105. ஸாவத்தி²னிதா³னம். ‘‘ஸக்காயஞ்ச வோ, பி⁴க்க²வே, தே³ஸேஸ்ஸாமி ஸக்காயஸமுத³யஞ்ச ஸக்காயனிரோத⁴ஞ்ச ஸக்காயனிரோத⁴கா³மினிஞ்ச படிபத³ம். தம் ஸுணாத². கதமோ ச, பி⁴க்க²வே, ஸக்காயோ? பஞ்சுபாதா³னக்க²ந்தா⁴திஸ்ஸ வசனீயம். கதமே பஞ்ச? ஸேய்யதி²த³ம் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴. அயம் வுச்சதி, பி⁴க்க²வே, ஸக்காயோ. கதமோ ச, பி⁴க்க²வே, ஸக்காயஸமுத³யோ? யாயம் தண்ஹா போனோப⁴விகா…பே… காமதண்ஹா, ப⁴வதண்ஹா, விப⁴வதண்ஹா – அயம் வுச்சதி, பி⁴க்க²வே, ஸக்காயஸமுத³யோ. கதமோ ச, பி⁴க்க²வே, ஸக்காயனிரோதோ⁴? யோ தஸ்ஸாயேவ தண்ஹாய…பே… அயம் வுச்சதி, பி⁴க்க²வே, ஸக்காயனிரோதோ⁴. கதமா ச, பி⁴க்க²வே, ஸக்காயனிரோத⁴கா³மினீ படிபதா³? அயமேவ அரியோ அட்ட²ங்கி³கோ மக்³கோ³. ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. அயம் வுச்சதி, பி⁴க்க²வே, ஸக்காயனிரோத⁴கா³மினீ படிபதா³’’தி. ததியம்.

4. பரிஞ்ஞேய்யஸுத்தம்

106. ஸாவத்தி²னிதா³னம். ‘‘பரிஞ்ஞேய்யே ச, பி⁴க்க²வே, த⁴ம்மே தே³ஸேஸ்ஸாமி பரிஞ்ஞஞ்ச பரிஞ்ஞாதாவிஞ்ச புக்³க³லம். தம் ஸுணாத². கதமே ச, பி⁴க்க²வே, பரிஞ்ஞேய்யா த⁴ம்மா? ரூபம், பி⁴க்க²வே, பரிஞ்ஞேய்யோ த⁴ம்மோ. வேத³னா…பே… ஸஞ்ஞா… ஸங்கா²ரா… விஞ்ஞாணம் பரிஞ்ஞேய்யோ த⁴ம்மோ. இமே வுச்சந்தி, பி⁴க்க²வே, பரிஞ்ஞேய்யா த⁴ம்மா. கதமா ச, பி⁴க்க²வே, பரிஞ்ஞா? ராக³க்க²யோ, தோ³ஸக்க²யோ, மோஹக்க²யோ – அயம் வுச்சதி, பி⁴க்க²வே, பரிஞ்ஞா. கதமோ ச, பி⁴க்க²வே, பரிஞ்ஞாதாவீ புக்³க³லோ? அரஹாதிஸ்ஸ வசனீயம். ய்வாயம் ஆயஸ்மா ஏவம்னாமோ ஏவம்கோ³த்தோ – அயம் வுச்சதி, பி⁴க்க²வே, பரிஞ்ஞாதாவீ புக்³க³லோ’’தி. சதுத்த²ம்.

5. ஸமணஸுத்தம்

107. ஸாவத்தி²னிதா³னம். ‘‘பஞ்சிமே, பி⁴க்க²வே, உபாதா³னக்க²ந்தா⁴. கதமே பஞ்ச? ஸேய்யதி²த³ம் – ரூபுபாதா³னக்க²ந்தோ⁴…பே… விஞ்ஞாணுபாதா³னக்க²ந்தோ⁴. யே ஹி கேசி, பி⁴க்க²வே, ஸமணா வா ப்³ராஹ்மணா வா இமேஸம் பஞ்சன்னம் உபாதா³னக்க²ந்தா⁴னம் அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானந்தி…பே… பஜானந்தி, ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. பஞ்சமம்.

6. து³தியஸமணஸுத்தம்

108. ஸாவத்தி²னிதா³னம். ‘‘பஞ்சிமே, பி⁴க்க²வே, உபாதா³னக்க²ந்தா⁴. கதமே பஞ்ச? ஸேய்யதி²த³ம் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴. யே ஹி கேசி, பி⁴க்க²வே, ஸமணா வா ப்³ராஹ்மணா வா இமேஸம் பஞ்சன்னம் உபாதா³னக்க²ந்தா⁴னம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானந்தி…பே… பஜானந்தி, ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. ச²ட்ட²ம்.

7. ஸோதாபன்னஸுத்தம்

109. ஸாவத்தி²னிதா³னம். ‘‘பஞ்சிமே, பி⁴க்க²வே, உபாதா³னக்க²ந்தா⁴. கதமே பஞ்ச? ஸேய்யதி²த³ம் – ரூபுபாதா³னக்க²ந்தோ⁴…பே… விஞ்ஞாணுபாதா³னக்க²ந்தோ⁴. யதோ கோ², பி⁴க்க²வே, அரியஸாவகோ இமேஸம் பஞ்சன்னம் உபாதா³னக்க²ந்தா⁴னம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானாதி. அயம் வுச்சதி, பி⁴க்க²வே, அரியஸாவகோ ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயனோ’’தி. ஸத்தமம்.

8. அரஹந்தஸுத்தம்

110. ஸாவத்தி²னிதா³னம். ‘‘பஞ்சிமே, பி⁴க்க²வே, உபாதா³னக்க²ந்தா⁴. கதமே பஞ்ச? ஸேய்யதி²த³ம் – ரூபுபாதா³னக்க²ந்தோ⁴…பே… விஞ்ஞாணுபாதா³னக்க²ந்தோ⁴. யதோ கோ², பி⁴க்க²வே, பி⁴க்கு² இமேஸம் பஞ்சன்னம் உபாதா³னக்க²ந்தா⁴னம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் விதி³த்வா அனுபாதா³விமுத்தோ ஹோதி. அயம் வுச்சதி, பி⁴க்க²வே, பி⁴க்கு² அரஹம் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸம்யோஜனோ ஸம்மத³ஞ்ஞாவிமுத்தோ’’தி. அட்ட²மம்.

9. ச²ந்த³ப்பஹானஸுத்தம்

111. ஸாவத்தி²னிதா³னம். ‘‘ரூபே, பி⁴க்க²வே, யோ ச²ந்தோ³ யோ ராகோ³ யா நந்தீ³ யா தண்ஹா, தம் பஜஹத². ஏவம் தம் ரூபம் பஹீனம் ப⁴விஸ்ஸதி உச்சி²ன்னமூலம் தாலாவத்து²கதம் அனபா⁴வம்கதம் ஆயதிம் அனுப்பாத³த⁴ம்மம். வேத³னாய…பே… ஸஞ்ஞாய… ஸங்கா²ரேஸு… விஞ்ஞாணே யோ ச²ந்தோ³ யோ ராகோ³ யா நந்தீ³ யா தண்ஹா, தம் பஜஹத². ஏவம் தம் விஞ்ஞாணம் பஹீனம் ப⁴விஸ்ஸதி உச்சி²ன்னமூலம் தாலாவத்து²கதம் அனபா⁴வம்கதம் ஆயதிம் அனுப்பாத³த⁴ம்ம’’ந்தி. நவமம்.

10. து³தியச²ந்த³ப்பஹானஸுத்தம்

112. ஸாவத்தி²னிதா³னம். ‘‘ரூபே, பி⁴க்க²வே, யோ ச²ந்தோ³ யோ ராகோ³ யா நந்தீ³ யா தண்ஹா யே உபயுபாதா³னா சேதஸோ அதி⁴ட்டா²னாபி⁴னிவேஸானுஸயா, தே பஜஹத². ஏவம் தம் ரூபம் பஹீனம் ப⁴விஸ்ஸதி உச்சி²ன்னமூலம்…பே… வேத³னாய… ஸஞ்ஞாய… ஸங்கா²ரேஸு யோ ச²ந்தோ³…பே… ஏவம் தே ஸங்கா²ரா பஹீனா ப⁴விஸ்ஸந்தி உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. விஞ்ஞாணே யோ ச²ந்தோ³ யோ ராகோ³ யா நந்தீ³ யா தண்ஹா யே உபயுபாதா³னா சேதஸோ அதி⁴ட்டா²னாபி⁴னிவேஸானுஸயா, தே பஜஹத². ஏவம் தம் விஞ்ஞாணம் பஹீனம் ப⁴விஸ்ஸதி உச்சி²ன்னமூலம் தாலாவத்து²கதம் அனபா⁴வம்கதம் ஆயதிம் அனுப்பாத³த⁴ம்ம’’ந்தி. த³ஸமம்.

அந்தவக்³கோ³ ஏகாத³ஸமோ.

தஸ்ஸுத்³தா³னம் –

அந்தோ து³க்க²ஞ்ச ஸக்காயோ, பரிஞ்ஞேய்யா ஸமணா து³வே;

ஸோதாபன்னோ அரஹா ச, து³வே ச ச²ந்த³ப்பஹானாதி.