9. வாஸிஜடஸுத்தம்

101. ஸாவத்தி²னிதா³னம். ‘‘ஜானதோ அஹம், பி⁴க்க²வே, பஸ்ஸதோ ஆஸவானம் க²யம் வதா³மி, நோ அஜானதோ நோ அபஸ்ஸதோ. கிஞ்ச, பி⁴க்க²வே, ஜானதோ கிம் பஸ்ஸதோ ஆஸவானம் க²யோ ஹோதி? ‘இதி ரூபம், இதி ரூபஸ்ஸ ஸமுத³யோ, இதி ரூபஸ்ஸ அத்த²ங்க³மோ; இதி வேத³னா… இதி ஸஞ்ஞா… இதி ஸங்கா²ரா… இதி விஞ்ஞாணம், இதி விஞ்ஞாணஸ்ஸ ஸமுத³யோ, இதி விஞ்ஞாணஸ்ஸ அத்த²ங்க³மோ’தி – ஏவம் கோ², பி⁴க்க²வே, ஜானதோ ஏவம் பஸ்ஸதோ ஆஸவானம் க²யோ ஹோதி’’.

‘‘பா⁴வனானுயோக³ம் அனனுயுத்தஸ்ஸ, பி⁴க்க²வே, பி⁴க்கு²னோ விஹரதோ கிஞ்சாபி ஏவம் இச்சா² உப்பஜ்ஜேய்ய – ‘அஹோ வத மே அனுபாதா³ய ஆஸவேஹி சித்தம் விமுச்சேய்யா’தி, அத² க்²வஸ்ஸ நேவ அனுபாதா³ய ஆஸவேஹி சித்தம் விமுச்சதி. தம் கிஸ்ஸ ஹேது? ‘அபா⁴விதத்தா’ திஸ்ஸ வசனீயம். கிஸ்ஸ அபா⁴விதத்தா? அபா⁴விதத்தா சதுன்னம் ஸதிபட்டா²னானம், அபா⁴விதத்தா சதுன்னம் ஸம்மப்பதா⁴னானம், அபா⁴விதத்தா சதுன்னம் இத்³தி⁴பாதா³னம், அபா⁴விதத்தா பஞ்சன்னம் இந்த்³ரியானம், அபா⁴விதத்தா பஞ்சன்னம் ப³லானம், அபா⁴விதத்தா ஸத்தன்னம் போ³ஜ்ஜ²ங்கா³னம், அபா⁴விதத்தா அரியஸ்ஸ அட்ட²ங்கி³கஸ்ஸ மக்³க³ஸ்ஸ.

‘‘ஸேய்யதா²பி, பி⁴க்க²வே, குக்குடியா அண்டா³னி அட்ட² வா த³ஸ வா த்³வாத³ஸ வா. தானஸ்ஸு குக்குடியா ந ஸம்மா அதி⁴ஸயிதானி, ந ஸம்மா பரிஸேதி³தானி, ந ஸம்மா பரிபா⁴விதானி. கிஞ்சாபி தஸ்ஸா குக்குடியா ஏவம் இச்சா² உப்பஜ்ஜேய்ய – ‘அஹோ, வத மே குக்குடபோதகா பாத³னக²ஸிகா²ய வா முக²துண்ட³கேன வா அண்ட³கோஸம் பதா³லேத்வா ஸோத்தி²னா அபி⁴னிப்³பி⁴ஜ்ஜேய்யு’ந்தி, அத² கோ² அப⁴ப்³பா³வ தே குக்குடபோதகா பாத³னக²ஸிகா²ய வா முக²துண்ட³கேன வா அண்ட³கோஸம் பதா³லேத்வா ஸோத்தி²னா அபி⁴னிப்³பி⁴ஜ்ஜிதும். தம் கிஸ்ஸ ஹேது? ததா² ஹி பன, பி⁴க்க²வே, குக்குடியா அண்டா³னி அட்ட² வா த³ஸ வா த்³வாத³ஸ வா; தானி குக்குடியா ந ஸம்மா அதி⁴ஸயிதானி, ந ஸம்மா பரிஸேதி³தானி, ந ஸம்மா பரிபா⁴விதானி. ஏவமேவ கோ², பி⁴க்க²வே, பா⁴வனானுயோக³ம் அனனுயுத்தஸ்ஸ பி⁴க்கு²னோ விஹரதோ கிஞ்சாபி ஏவம் இச்சா² உப்பஜ்ஜேய்ய – ‘அஹோ, வத மே அனுபாதா³ய ஆஸவேஹி சித்தம் விமுச்சேய்யா’தி, அத² க்²வஸ்ஸ நேவ அனுபாதா³ய ஆஸவேஹி சித்தம் விமுச்சதி. தம் கிஸ்ஸ ஹேது? ‘அபா⁴விதத்தா’திஸ்ஸ வசனீயம். கிஸ்ஸ அபா⁴விதத்தா? அபா⁴விதத்தா சதுன்னம் ஸதிபட்டா²னானம்…பே… அட்ட²ங்கி³கஸ்ஸ மக்³க³ஸ்ஸ.

‘‘பா⁴வனானுயோக³ம் அனுயுத்தஸ்ஸ, பி⁴க்க²வே, பி⁴க்கு²னோ விஹரதோ கிஞ்சாபி ந ஏவம் இச்சா² உப்பஜ்ஜேய்ய – ‘அஹோ வத மே அனுபாதா³ய ஆஸவேஹி சித்தம் விமுச்சேய்யா’தி, அத² க்²வஸ்ஸ அனுபாதா³ய ஆஸவேஹி சித்தம் விமுச்சதி. தம் கிஸ்ஸ ஹேது? ‘பா⁴விதத்தா’திஸ்ஸ வசனீயம். கிஸ்ஸ பா⁴விதத்தா? பா⁴விதத்தா சதுன்னம் ஸதிபட்டா²னானம், பா⁴விதத்தா சதுன்னம் ஸம்மப்பதா⁴னானம், பா⁴விதத்தா சதுன்னம் இத்³தி⁴பாதா³னம், பா⁴விதத்தா பஞ்சன்னம் இந்த்³ரியானம், பா⁴விதத்தா பஞ்சன்னம் ப³லானம், பா⁴விதத்தா ஸத்தன்னம் போ³ஜ்ஜ²ங்கா³னம், பா⁴விதத்தா அரியஸ்ஸ அட்ட²ங்கி³கஸ்ஸ மக்³க³ஸ்ஸ.

‘‘ஸேய்யதா²பி, பி⁴க்க²வே, குக்குடியா அண்டா³னி அட்ட² வா த³ஸ வா த்³வாத³ஸ வா. தானஸ்ஸு குக்குடியா ஸம்மா அதி⁴ஸயிதானி, ஸம்மா பரிஸேதி³தானி, ஸம்மா பரிபா⁴விதானி. கிஞ்சாபி தஸ்ஸா குக்குடியா ந ஏவம் இச்சா² உப்பஜ்ஜேய்ய – ‘அஹோ வத மே குக்குடபோதகா பாத³னக²ஸிகா²ய வா முக²துண்ட³கேன வா அண்ட³கோஸம் பதா³லேத்வா ஸோத்தி²னா அபி⁴னிப்³பி⁴ஜ்ஜேய்யு’ந்தி, அத² கோ² ப⁴ப்³பா³வ தே குக்குடபோதகா பாத³னக²ஸிகா²ய வா முக²துண்ட³கேன வா அண்ட³கோஸம் பதா³லேத்வா ஸோத்தி²னா அபி⁴னிப்³பி⁴ஜ்ஜிதும். தம் கிஸ்ஸ ஹேது? ததா² ஹி பன, பி⁴க்க²வே, குக்குடியா அண்டா³னி அட்ட² வா த³ஸ வா த்³வாத³ஸ வா; தானஸ்ஸு குக்குடியா ஸம்மா அதி⁴ஸயிதானி, ஸம்மா பரிஸேதி³தானி, ஸம்மா பரிபா⁴விதானி. ஏவமேவ கோ², பி⁴க்க²வே, பா⁴வனானுயோக³ம் அனுயுத்தஸ்ஸ பி⁴க்கு²னோ விஹரதோ கிஞ்சாபி ந ஏவம் இச்சா² உப்பஜ்ஜேய்ய – ‘அஹோ வத மே அனுபாதா³ய ஆஸவேஹி சித்தம் விமுச்சேய்யா’தி, அத² க்²வஸ்ஸ அனுபாதா³ய ஆஸவேஹி சித்தம் விமுச்சதி. தம் கிஸ்ஸ ஹேது? ‘பா⁴விதத்தா’திஸ்ஸ வசனீயம். கிஸ்ஸ பா⁴விதத்தா? பா⁴விதத்தா சதுன்னம் ஸதிபட்டா²னானம்…பே… பா⁴விதத்தா அரியஸ்ஸ அட்ட²ங்கி³கஸ்ஸ மக்³க³ஸ்ஸ.

‘‘ஸேய்யதா²பி, பி⁴க்க²வே, பலக³ண்ட³ஸ்ஸ வா பலக³ண்ட³ந்தேவாஸிஸ்ஸ வா வாஸிஜடே தி³ஸ்ஸந்தேவ அங்கு³லிபதா³னி தி³ஸ்ஸதி அங்கு³ட்ட²பத³ம். நோ ச க்²வஸ்ஸ ஏவம் ஞாணம் ஹோதி – ‘ஏத்தகம் வத மே அஜ்ஜ வாஸிஜடஸ்ஸ கீ²ணம், ஏத்தகம் ஹிய்யோ, ஏத்தகம் பரே’தி. அத² க்²வஸ்ஸ கீ²ணே கீ²ணந்த்வேவ ஞாணம் ஹோதி. ஏவமேவ கோ², பி⁴க்க²வே, பா⁴வனானுயோக³ம் அனுயுத்தஸ்ஸ பி⁴க்கு²னோ விஹரதோ கிஞ்சாபி ந ஏவம் ஞாணம் ஹோதி – ‘ஏத்தகம் வத மே அஜ்ஜ ஆஸவானம் கீ²ணம், ஏத்தகம் ஹிய்யோ, ஏத்தகம் பரே’தி, அத² க்²வஸ்ஸ கீ²ணே கீ²ணந்த்வேவ ஞாணம் ஹோதி. ஸேய்யதா²பி, பி⁴க்க²வே, ஸாமுத்³தி³காய நாவாய வேத்தப³ந்த⁴னப³த்³தா⁴ய வஸ்ஸமாஸானி உத³கே பரியாதா³ய ஹேமந்திகேன த²லம் உக்கி²த்தாய வாதாதபபரேதானி வேத்தப³ந்த⁴னானி. தானி பாவுஸகேன மேகே⁴ன அபி⁴ப்பவுட்டா²னி அப்பகஸிரேனேவ படிப்பஸ்ஸம்ப⁴ந்தி பூதிகானி ப⁴வந்தி; ஏவமேவ கோ², பி⁴க்க²வே, பா⁴வனானுயோக³ம் அனுயுத்தஸ்ஸ பி⁴க்கு²னோ விஹரதோ அப்பகஸிரேனேவ ஸம்யோஜனானி படிப்பஸ்ஸம்ப⁴ந்தி பூதிகானி ப⁴வந்தீ’’தி. நவமம்.