5. நக²ஸிகா²ஸுத்தம்

97. ஸாவத்தி²னிதா³னம். ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘அத்தி² நு கோ², ப⁴ந்தே, கிஞ்சி ரூபம் யம் ரூபம் நிச்சம் து⁴வம் ஸஸ்ஸதம் அவிபரிணாமத⁴ம்மம் ஸஸ்ஸதிஸமம் ததே²வ ட²ஸ்ஸதி? அத்தி² நு கோ², ப⁴ந்தே, காசி வேத³னா யா வேத³னா நிச்சா து⁴வா ஸஸ்ஸதா அவிபரிணாமத⁴ம்மா ஸஸ்ஸதிஸமம் ததே²வ ட²ஸ்ஸதி? அத்தி² நு கோ², ப⁴ந்தே, காசி ஸஞ்ஞா…பே… கேசி ஸங்கா²ரா, யே ஸங்கா²ரா நிச்சா து⁴வா ஸஸ்ஸதா அவிபரிணாமத⁴ம்மா ஸஸ்ஸதிஸமம் ததே²வ ட²ஸ்ஸந்தி? அத்தி² நு கோ², ப⁴ந்தே, கிஞ்சி விஞ்ஞாணம், யம் விஞ்ஞாணம் நிச்சம் து⁴வம் ஸஸ்ஸதம் அவிபரிணாமத⁴ம்மம் ஸஸ்ஸதிஸமம் ததே²வ ட²ஸ்ஸதீ’’தி? ‘‘நத்தி² கோ², பி⁴க்கு², கிஞ்சி ரூபம், யம் ரூபம் நிச்சம் து⁴வம் ஸஸ்ஸதம் அவிபரிணாமத⁴ம்மம் ஸஸ்ஸதிஸமம் ததே²வ ட²ஸ்ஸதி. நத்தி² கோ², பி⁴க்கு², காசி வேத³னா… காசி ஸஞ்ஞா… கேசி ஸங்கா²ரா…பே… கிஞ்சி விஞ்ஞாணம், யம் விஞ்ஞாணம் நிச்சம் து⁴வம் ஸஸ்ஸதம் அவிபரிணாமத⁴ம்மம் ஸஸ்ஸதிஸமம் ததே²வ ட²ஸ்ஸதீ’’தி.

அத² கோ² ப⁴க³வா பரித்தம் நக²ஸிகா²யம் பம்ஸும் ஆரோபேத்வா தம் பி⁴க்கு²ம் ஏதத³வோச – ‘‘ஏத்தகம்பி கோ², பி⁴க்கு², ரூபம் நத்தி² நிச்சம் து⁴வம் ஸஸ்ஸதம் அவிபரிணாமத⁴ம்மம் ஸஸ்ஸதிஸமம் ததே²வ ட²ஸ்ஸதி. ஏத்தகம் சேபி, பி⁴க்கு², ரூபம் அப⁴விஸ்ஸ நிச்சம் து⁴வம் ஸஸ்ஸதம் அவிபரிணாமத⁴ம்மம், நயித³ம் ப்³ரஹ்மசரியவாஸோ பஞ்ஞாயேத² ஸம்மா து³க்க²க்க²யாய. யஸ்மா ச கோ², பி⁴க்கு², ஏத்தகம்பி ரூபம் நத்தி² நிச்சம் து⁴வம் ஸஸ்ஸதம் அவிபரிணாமத⁴ம்மம், தஸ்மா ப்³ரஹ்மசரியவாஸோ பஞ்ஞாயதி ஸம்மா து³க்க²க்க²யாய’’.

‘‘ஏத்தகாபி கோ², பி⁴க்கு², வேத³னா நத்தி² நிச்சா து⁴வா ஸஸ்ஸதா அவிபரிணாமத⁴ம்மா ஸஸ்ஸதிஸமம் ததே²வ ட²ஸ்ஸதி. ஏத்தகா சேபி, பி⁴க்கு², வேத³னா அப⁴விஸ்ஸ நிச்சா து⁴வா ஸஸ்ஸதா அவிபரிணாமத⁴ம்மா, ந யித³ம் ப்³ரஹ்மசரியவாஸோ பஞ்ஞாயேத² ஸம்மா து³க்க²க்க²யாய. யஸ்மா ச கோ², பி⁴க்கு², ஏத்தகாபி வேத³னா நத்தி² நிச்சா து⁴வா ஸஸ்ஸதா அவிபரிணாமத⁴ம்மா, தஸ்மா ப்³ரஹ்மசரியவாஸோ பஞ்ஞாயதி ஸம்மா து³க்க²க்க²யாய.

‘‘ஏத்தகாபி கோ², பி⁴க்கு², ஸஞ்ஞா நத்தி²…பே… ஏத்தகாபி கோ², பி⁴க்கு², ஸங்கா²ரா நத்தி² நிச்சா து⁴வா ஸஸ்ஸதா அவிபரிணாமத⁴ம்மா ஸஸ்ஸதிஸமம் ததே²வ ட²ஸ்ஸந்தி. ஏத்தகா சேபி, பி⁴க்கு², ஸங்கா²ரா அப⁴விஸ்ஸம்ஸு நிச்சா து⁴வா ஸஸ்ஸதா அவிபரிணாமத⁴ம்மா, ந யித³ம் ப்³ரஹ்மசரியவாஸோ பஞ்ஞாயேத² ஸம்மா து³க்க²க்க²யாய. யஸ்மா ச கோ², பி⁴க்கு², ஏத்தகாபி ஸங்கா²ரா நத்தி² நிச்சா து⁴வா ஸஸ்ஸதா அவிபரிணாமத⁴ம்மா, தஸ்மா ப்³ரஹ்மசரியவாஸோ பஞ்ஞாயதி ஸம்மா து³க்க²க்க²யாய.

‘‘ஏத்தகம்பி கோ², பி⁴க்கு², விஞ்ஞாணம் நத்தி² நிச்சம் து⁴வம் ஸஸ்ஸதம் அவிபரிணாமத⁴ம்மம் ஸஸ்ஸதிஸமம் ததே²வ ட²ஸ்ஸதி. ஏத்தகம்பி கோ², பி⁴க்கு², விஞ்ஞாணம் அப⁴விஸ்ஸ நிச்சம் து⁴வம் ஸஸ்ஸதம் அவிபரிணாமத⁴ம்மம், ந யித³ம் ப்³ரஹ்மசரியவாஸோ பஞ்ஞாயேத² ஸம்மா து³க்க²க்க²யாய. யஸ்மா ச கோ², பி⁴க்கு², ஏத்தகம்பி விஞ்ஞாணம் நத்தி² நிச்சம் து⁴வம் ஸஸ்ஸதம் அவிபரிணாமத⁴ம்மம், தஸ்மா ப்³ரஹ்மசரியவாஸோ பஞ்ஞாயதி ஸம்மா து³க்க²க்க²யாய.

‘‘தம் கிம் மஞ்ஞஸி, பி⁴க்கு², ரூபம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘வேத³னா… ஸஞ்ஞா… ஸங்கா²ரா… விஞ்ஞாணம் நிச்சம் வா அனிச்சம் வா’’தி? ‘‘அனிச்சம் ப⁴ந்தே’’…பே… ‘‘தஸ்மாதிஹ…பே… ஏவம் பஸ்ஸம்…பே… நாபரம் இத்த²த்தாயாதி பஜானாதீ’’தி. பஞ்சமம்.