7. உபாதா³பரிதஸ்ஸனாஸுத்தம்

7. ஸாவத்தி²னிதா³னம். ‘‘உபாதா³பரிதஸ்ஸனஞ்ச வோ, பி⁴க்க²வே, தே³ஸேஸ்ஸாமி அனுபாதா³அபரிதஸ்ஸனஞ்ச. தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி, கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘கத²ஞ்ச, பி⁴க்க²வே, உபாதா³பரிதஸ்ஸனா ஹோதி? இத⁴, பி⁴க்க²வே, அஸ்ஸுதவா புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபம் அத்ததோ ஸமனுபஸ்ஸதி, ரூபவந்தம் வா அத்தானம்; அத்தனி வா ரூபம், ரூபஸ்மிம் வா அத்தானம். தஸ்ஸ தம் ரூபம் விபரிணமதி அஞ்ஞதா² ஹோதி. தஸ்ஸ ரூபவிபரிணாமஞ்ஞதா²பா⁴வா ரூபவிபரிணாமானுபரிவத்தி விஞ்ஞாணம் ஹோதி. தஸ்ஸ ரூபவிபரிணாமானுபரிவத்திஜா பரிதஸ்ஸனா த⁴ம்மஸமுப்பாதா³ சித்தம் பரியாதா³ய திட்ட²ந்தி. சேதஸோ பரியாதா³னா உத்தாஸவா ச ஹோதி விகா⁴தவா ச அபேக்க²வா ச உபாதா³ய ச பரிதஸ்ஸதி.

‘‘வேத³னம் அத்ததோ ஸமனுபஸ்ஸதி, வேத³னாவந்தம் வா அத்தானம்; அத்தனி வா வேத³னம், வேத³னாய வா அத்தானம். தஸ்ஸ ஸா வேத³னா விபரிணமதி அஞ்ஞதா² ஹோதி. தஸ்ஸ வேத³னாவிபரிணாமஞ்ஞதா²பா⁴வா வேத³னாவிபரிணாமானுபரிவத்தி விஞ்ஞாணம் ஹோதி. தஸ்ஸ வேத³னாவிபரிணாமானுபரிவத்திஜா பரிதஸ்ஸனா த⁴ம்மஸமுப்பாதா³ சித்தம் பரியாதா³ய திட்ட²ந்தி. சேதஸோ பரியாதா³னா உத்தாஸவா ச ஹோதி விகா⁴தவா ச அபேக்க²வா ச உபாதா³ய ச பரிதஸ்ஸதி.

‘‘ஸஞ்ஞம் அத்ததோ ஸமனுபஸ்ஸதி…பே… ஸங்கா²ரே அத்ததோ ஸமனுபஸ்ஸதி, ஸங்கா²ரவந்தம் வா அத்தானம்; அத்தனி வா ஸங்கா²ரே, ஸங்கா²ரேஸு வா அத்தானம். தஸ்ஸ தே ஸங்கா²ரா விபரிணமந்தி அஞ்ஞதா² ஹோந்தி. தஸ்ஸ ஸங்கா²ரவிபரிணாமஞ்ஞதா²பா⁴வா ஸங்கா²ரவிபரிணாமானுபரிவத்தி விஞ்ஞாணம் ஹோதி. தஸ்ஸ ஸங்கா²ரவிபரிணாமானுபரிவத்திஜா பரிதஸ்ஸனா த⁴ம்மஸமுப்பாதா³ சித்தம் பரியாதா³ய திட்ட²ந்தி. சேதஸோ பரியாதா³னா உத்தாஸவா ச ஹோதி விகா⁴தவா ச அபேக்க²வா ச உபாதா³ய ச பரிதஸ்ஸதி.

‘‘விஞ்ஞாணம் அத்ததோ ஸமனுபஸ்ஸதி, விஞ்ஞாணவந்தம் வா அத்தானம்; அத்தனி வா விஞ்ஞாணம், விஞ்ஞாணஸ்மிம் வா அத்தானம். தஸ்ஸ தம் விஞ்ஞாணம் விபரிணமதி அஞ்ஞதா² ஹோதி. தஸ்ஸ விஞ்ஞாணவிபரிணாமஞ்ஞதா²பா⁴வா விஞ்ஞாணவிபரிணாமானுபரிவத்தி விஞ்ஞாணம் ஹோதி. தஸ்ஸ விஞ்ஞாணவிபரிணாமானுபரிவத்திஜா பரிதஸ்ஸனா த⁴ம்மஸமுப்பாதா³ சித்தம் பரியாதா³ய திட்ட²ந்தி. சேதஸோ பரியாதா³னா உத்தாஸவா ச ஹோதி விகா⁴தவா ச அபேக்க²வா ச உபாதா³ய ச பரிதஸ்ஸதி. ஏவம் கோ², பி⁴க்க²வே, உபாதா³பரிதஸ்ஸனா ஹோதி.

‘‘கத²ஞ்ச, பி⁴க்க²வே, அனுபாதா³அபரிதஸ்ஸனா ஹோதி? இத⁴, பி⁴க்க²வே, ஸுதவா அரியஸாவகோ அரியானம் த³ஸ்ஸாவீ அரியத⁴ம்மஸ்ஸ கோவிதோ³ அரியத⁴ம்மே ஸுவினீதோ, ஸப்புரிஸானம் த³ஸ்ஸாவீ ஸப்புரிஸத⁴ம்மஸ்ஸ கோவிதோ³ ஸப்புரிஸத⁴ம்மே ஸுவினீதோ ந ரூபம் அத்ததோ ஸமனுபஸ்ஸதி, ந ரூபவந்தம் வா அத்தானம்; ந அத்தனி வா ரூபம், ந ரூபஸ்மிம் வா அத்தானம். தஸ்ஸ தம் ரூபம் விபரிணமதி அஞ்ஞதா² ஹோதி. தஸ்ஸ ரூபவிபரிணாமஞ்ஞதா²பா⁴வா ந ரூபவிபரிணாமானுபரிவத்தி விஞ்ஞாணம் ஹோதி. தஸ்ஸ ந ரூபவிபரிணாமானுபரிவத்திஜா பரிதஸ்ஸனா த⁴ம்மஸமுப்பாதா³ சித்தம் பரியாதா³ய திட்ட²ந்தி. சேதஸோ அபரியாதா³னா ந சேவுத்தாஸவா [ந சேவ உத்தாஸவா (பீ. க.)] ஹோதி ந ச விகா⁴தவா ந ச அபேக்க²வா, அனுபாதா³ய ச ந பரிதஸ்ஸதி.

‘‘ந வேத³னம் அத்ததோ ஸமனுபஸ்ஸதி, ந வேத³னாவந்தம் வா அத்தானம்; ந அத்தனி வா வேத³னம், ந வேத³னாய வா அத்தானம். தஸ்ஸ ஸா வேத³னா விபரிணமதி அஞ்ஞதா² ஹோதி. தஸ்ஸ வேத³னாவிபரிணாமஞ்ஞதா²பா⁴வா ந வேத³னாவிபரிணாமானுபரிவத்தி விஞ்ஞாணம் ஹோதி. தஸ்ஸ ந வேத³னாவிபரிணாமானுபரிவத்திஜா பரிதஸ்ஸனா த⁴ம்மஸமுப்பாதா³ சித்தம் பரியாதா³ய திட்ட²ந்தி. சேதஸோ அபரியாதா³னா ந சேவுத்தாஸவா ஹோதி ந ச விகா⁴தவா ந ச அபேக்க²வா, அனுபாதா³ய ச ந பரிதஸ்ஸதி.

‘‘ந ஸஞ்ஞம்…பே… ந ஸங்கா²ரே அத்ததோ ஸமனுபஸ்ஸதி, ந ஸங்கா²ரவந்தம் வா அத்தானம்; ந அத்தனி வா ஸங்கா²ரே, ந ஸங்கா²ரேஸு வா அத்தானம். தஸ்ஸ தே ஸங்கா²ரா விபரிணமந்தி அஞ்ஞதா² ஹோந்தி. தஸ்ஸ ஸங்கா²ரவிபரிணாமஞ்ஞதா²பா⁴வா ந ஸங்கா²ரவிபரிணாமானுபரிவத்தி விஞ்ஞாணம் ஹோதி. தஸ்ஸ ந ஸங்கா²ரவிபரிணாமானுபரிவத்திஜா பரிதஸ்ஸனா த⁴ம்மஸமுப்பாதா³ சித்தம் பரியாதா³ய திட்ட²ந்தி. சேதஸோ அபரியாதா³னா ந சேவுத்தாஸவா ஹோதி ந ச விகா⁴தவா ந ச அபேக்க²வா, அனுபாதா³ய ச ந பரிதஸ்ஸதி.

‘‘ந விஞ்ஞாணம் அத்ததோ ஸமனுபஸ்ஸதி, ந விஞ்ஞாணவந்தம் வா அத்தானம்…பே… தஸ்ஸ தம் விஞ்ஞாணம் விபரிணமதி அஞ்ஞதா² ஹோதி. தஸ்ஸ விஞ்ஞாணவிபரிணாமஞ்ஞதா²பா⁴வா ந விஞ்ஞாணவிபரிணாமானுபரிவத்தி விஞ்ஞாணம் ஹோதி. தஸ்ஸ ந விஞ்ஞாணவிபரிணாமானுபரிவத்திஜா பரிதஸ்ஸனா த⁴ம்மஸமுப்பாதா³ சித்தம் பரியாதா³ய திட்ட²ந்தி. சேதஸோ அபரியாதா³னா ந சேவுத்தாஸவா ஹோதி ந ச விகா⁴தவா ந ச அபேக்க²வா, அனுபாதா³ய ச ந பரிதஸ்ஸதி. ஏவம் கோ², பி⁴க்க²வே, அனுபாதா³ அபரிதஸ்ஸனம் ஹோதீ’’தி. ஸத்தமம்.