3. ஹாலித்³தி³கானிஸுத்தம்

3. ஏவம் மே ஸுதம் – ஏகம் ஸமயம் ஆயஸ்மா மஹாகச்சானோ அவந்தீஸு விஹரதி குரரக⁴ரே [குலக⁴ரே (க.)] பபாதே பப்³ப³தே. அத² கோ² ஹாலித்³தி³கானி [ஹாலித்³த³கானி (ஸீ.), ஹலித்³தி³கானி (ஸ்யா.)] க³ஹபதி யேனாயஸ்மா மஹாகச்சானோ தேனுபஸங்கமி; உபஸங்கமித்வா ஆயஸ்மந்தம் மஹாகச்சானம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஹாலித்³தி³கானி க³ஹபதி ஆயஸ்மந்தம் மஹாகச்சானம் ஏதத³வோச – ‘‘வுத்தமித³ம், ப⁴ந்தே, ப⁴க³வதா அட்ட²கவக்³கி³யே மாக³ண்டி³யபஞ்ஹே –

‘‘ஓகம் பஹாய அனிகேதஸாரீ,

கா³மே அகுப்³ப³ம் [அக்ருப்³ப³ம் (க.)] முனி ஸந்த²வானி [ஸந்த⁴வானி (க.)];

காமேஹி ரித்தோ அபுரக்க²ரானோ [அபுரேக்க²ரானோ (ஸீ. ஸுத்தனிபாதேபி) மோக்³க³ல்லானே 5-135 ஸுத்தம்பி ஓலோகேதப்³ப³ம்],

கத²ம் ந விக்³க³ய்ஹ ஜனேன கயிரா’’தி.

‘‘இமஸ்ஸ நு கோ², ப⁴ந்தே, ப⁴க³வதா ஸம்கி²த்தேன பா⁴ஸிதஸ்ஸ கத²ம் வித்தா²ரேன அத்தோ² த³ட்ட²ப்³போ³’’தி?

‘‘ரூபதா⁴து கோ², க³ஹபதி, விஞ்ஞாணஸ்ஸ ஓகோ. ரூபதா⁴துராக³வினிப³ந்த⁴ஞ்ச [… வினிப³த்³த⁴ஞ்ஜ (பீ. ஸீ. அட்ட².)] பன விஞ்ஞாணம் ‘ஓகஸாரீ’தி வுச்சதி. வேத³னாதா⁴து கோ², க³ஹபதி, விஞ்ஞாணஸ்ஸ ஓகோ. வேத³னாதா⁴துராக³வினிப³ந்த⁴ஞ்ச பன விஞ்ஞாணம் ‘ஓகஸாரீ’தி வுச்சதி. ஸஞ்ஞாதா⁴து கோ², க³ஹபதி, விஞ்ஞாணஸ்ஸ ஓகோ. ஸஞ்ஞாதா⁴துராக³வினிப³ந்த⁴ஞ்ச பன விஞ்ஞாணம் ‘ஓகஸாரீ’தி வுச்சதி. ஸங்கா²ரதா⁴து கோ², க³ஹபதி, விஞ்ஞாணஸ்ஸ ஓகோ. ஸங்கா²ரதா⁴துராக³வினிப³ந்த⁴ஞ்ச பன விஞ்ஞாணம் ‘ஓகஸாரீ’தி வுச்சதி. ஏவம் கோ², க³ஹபதி, ஓகஸாரீ ஹோதி.

‘‘கத²ஞ்ச, க³ஹபதி, அனோகஸாரீ ஹோதி? ரூபதா⁴துயா கோ², க³ஹபதி, யோ ச²ந்தோ³ யோ ராகோ³ யா நந்தீ³ [நந்தி³ (ஸீ. ஸ்யா. கம். பீ.)] யா தண்ஹா யே உபயுபாதா³னா [உபாயுபாதா³னா (ஸீ. ஸ்யா. கம். பீ.)] சேதஸோ அதி⁴ட்டா²னாபி⁴னிவேஸானுஸயா தே ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வம்கதா [அனபா⁴வகதா (ஸீ. பீ.), அனபா⁴வம்க³தா (ஸ்யா. கம்.)] ஆயதிம் அனுப்பாத³த⁴ம்மா. தஸ்மா ததா²க³தோ ‘அனோகஸாரீ’தி வுச்சதி. வேத³னாதா⁴துயா கோ², க³ஹபதி… ஸஞ்ஞாதா⁴துயா கோ², க³ஹபதி… ஸங்கா²ரதா⁴துயா கோ², க³ஹபதி… விஞ்ஞாணதா⁴துயா கோ², க³ஹபதி, யோ ச²ந்தோ³ யோ ராகோ³ யா நந்தீ³ யா தண்ஹா யே உபயுபாதா³னா சேதஸோ அதி⁴ட்டா²னாபி⁴னிவேஸானுஸயா தே ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. தஸ்மா ததா²க³தோ ‘அனோகஸாரீ’தி வுச்சதி. ஏவம் கோ², க³ஹபதி, அனோகஸாரீ ஹோதி.

‘‘கத²ஞ்ச, க³ஹபதி, நிகேதஸாரீ ஹோதி? ரூபனிமித்தனிகேதவிஸாரவினிப³ந்தா⁴ கோ², க³ஹபதி, ‘நிகேதஸாரீ’தி வுச்சதி. ஸத்³த³னிமித்த…பே… க³ந்த⁴னிமித்த… ரஸனிமித்த… போ²ட்ட²ப்³ப³னிமித்த… த⁴ம்மனிமித்தனிகேதவிஸாரவினிப³ந்தா⁴ கோ², க³ஹபதி, ‘நிகேதஸாரீ’தி வுச்சதி. ஏவம் கோ², க³ஹபதி, நிகேதஸாரீ ஹோதி.

‘‘கத²ஞ்ச, க³ஹபதி, அனிகேதஸாரீ ஹோதி? ரூபனிமித்தனிகேதவிஸாரவினிப³ந்தா⁴ கோ², க³ஹபதி, ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. தஸ்மா ததா²க³தோ ‘அனிகேதஸாரீ’தி வுச்சதி. ஸத்³த³னிமித்த… க³ந்த⁴னிமித்த… ரஸனிமித்த… போ²ட்ட²ப்³ப³னிமித்த… த⁴ம்மனிமித்தனிகேதவிஸாரவினிப³ந்தா⁴ கோ², க³ஹபதி, ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. தஸ்மா ததா²க³தோ ‘அனிகேதஸாரீ’தி வுச்சதி. ஏவம் கோ², க³ஹபதி, அனிகேதஸாரீ ஹோதி.

‘‘கத²ஞ்ச, க³ஹபதி, கா³மே ஸந்த²வஜாதோ [ஸந்த⁴வஜாதோ (க.)] ஹோதி? இத⁴, க³ஹபதி, ஏகச்சோ கி³ஹீஹி [கி³ஹி (க.)] ஸம்ஸட்டோ² விஹரதி ஸஹனந்தீ³ ஸஹஸோகீ, ஸுகி²தேஸு ஸுகி²தோ, து³க்கி²தேஸு து³க்கி²தோ, உப்பன்னேஸு கிச்சகரணீயேஸு அத்தனா தேஸு யோக³ம் ஆபஜ்ஜதி. ஏவம் கோ², க³ஹபதி, கா³மே ஸந்த²வஜாதோ ஹோதி.

‘‘கத²ஞ்ச, க³ஹபதி, கா³மே ந ஸந்த²வஜாதோ ஹோதி? இத⁴, க³ஹபதி, பி⁴க்கு² கி³ஹீஹி [கி³ஹி (க.)] அஸம்ஸட்டோ² விஹரதி ந ஸஹனந்தீ³ ந ஸஹஸோகீ ந ஸுகி²தேஸு ஸுகி²தோ ந து³க்கி²தேஸு து³க்கி²தோ, உப்பன்னேஸு கிச்சகரணீயேஸு ந அத்தனா தேஸு யோக³ம் ஆபஜ்ஜதி. ஏவம் கோ², க³ஹபதி, கா³மே ந ஸந்த²வஜாதோ ஹோதி.

‘‘கத²ஞ்ச, க³ஹபதி, காமேஹி அரித்தோ ஹோதி? இத⁴, க³ஹபதி, ஏகச்சோ காமேஸு அவிக³தராகோ³ ஹோதி அவிக³தச²ந்தோ³ அவிக³தபேமோ அவிக³தபிபாஸோ அவிக³தபரிளாஹோ அவிக³ததண்ஹோ. ஏவம் கோ², க³ஹபதி, காமேஹி அரித்தோ ஹோதி.

‘‘கத²ஞ்ச, க³ஹபதி, காமேஹி ரித்தோ ஹோதி? இத⁴, க³ஹபதி, ஏகச்சோ காமேஸு விக³தராகோ³ ஹோதி விக³தச²ந்தோ³ விக³தபேமோ விக³தபிபாஸோ விக³தபரிளாஹோ விக³ததண்ஹோ. ஏவம் கோ², க³ஹபதி, காமேஹி ரித்தோ ஹோதி.

‘‘கத²ஞ்ச, க³ஹபதி, புரக்க²ரானோ ஹோதி? இத⁴, க³ஹபதி, ஏகச்சஸ்ஸ ஏவம் ஹோதி – ‘ஏவம்ரூபோ ஸியம் அனாக³தமத்³தா⁴னம், ஏவம்வேத³னோ ஸியம் அனாக³தமத்³தா⁴னம், ஏவம்ஸஞ்ஞோ ஸியம் அனாக³தமத்³தா⁴னம், ஏவம்ஸங்கா²ரோ ஸியம் அனாக³தமத்³தா⁴னம், ஏவம்விஞ்ஞாணோ ஸியம் அனாக³தமத்³தா⁴ன’ந்தி. ஏவம் கோ², க³ஹபதி, புரக்க²ரானோ ஹோதி.

‘‘கத²ஞ்ச, க³ஹபதி, அபுரக்க²ரானோ ஹோதி? இத⁴, க³ஹபதி, ஏகச்சஸ்ஸ ந ஏவம் ஹோதி – ‘ஏவம்ரூபோ ஸியம் அனாக³தமத்³தா⁴னம், ஏவம்வேத³னோ ஸியம் அனாக³தமத்³தா⁴னம், ஏவம்ஸஞ்ஞோ ஸியம் அனாக³தமத்³தா⁴னம், ஏவம்ஸங்கா²ரோ ஸியம் அனாக³தமத்³தா⁴னம், ஏவம்விஞ்ஞாணோ ஸியம் அனாக³தமத்³தா⁴ன’ந்தி. ஏவம் கோ², க³ஹபதி, அபுரக்க²ரானோ ஹோதி.

‘‘கத²ஞ்ச, க³ஹபதி, கத²ம் விக்³க³ய்ஹ ஜனேன கத்தா ஹோதி? இத⁴, க³ஹபதி, ஏகச்சோ ஏவரூபிம் கத²ம் கத்தா ஹோதி – ‘ந த்வம் இமம் த⁴ம்மவினயம் ஆஜானாஸி; அஹம் இமம் த⁴ம்மவினயம் ஆஜானாமி. கிம் த்வம் இமம் த⁴ம்மவினயம் ஆஜானிஸ்ஸஸி? மிச்சா²படிபன்னோ த்வமஸி; அஹமஸ்மி ஸம்மாபடிபன்னோ. புரே வசனீயம் பச்சா² அவச; பச்சா² வசனீயம் புரே அவச. ஸஹிதம் மே, அஸஹிதம் தே. அதி⁴சிண்ணம் தே விபராவத்தம். ஆரோபிதோ தே வாதோ³; சர வாத³ப்பமோக்கா²ய. நிக்³க³ஹிதோஸி; நிப்³பே³டே²ஹி வா ஸசே பஹோஸீ’தி. ஏவம் கோ², க³ஹபதி, கத²ம் விக்³க³ய்ஹ ஜனேன கத்தா ஹோதி.

‘‘கத²ஞ்ச, க³ஹபதி, கத²ம் ந விக்³க³ய்ஹ ஜனேன கத்தா ஹோதி? இத⁴, க³ஹபதி, பி⁴க்கு² ந ஏவரூபிம் கத²ம் கத்தா ஹோதி – ‘ந த்வம் இமம் த⁴ம்மவினயம் ஆஜானாஸி…பே… நிப்³பே³டே²ஹி வா ஸசே பஹோஸீ’தி. ஏவம் கோ², க³ஹபதி, கத²ம் ந விக்³க³ய்ஹ ஜனேன கத்தா ஹோதி.

‘‘இதி கோ², க³ஹபதி, யம் தம் வுத்தம் ப⁴க³வதா அட்ட²கவக்³கி³யே மாக³ண்டி³யபஞ்ஹே –

‘‘ஓகம் பஹாய அனிகேதஸாரீ,

கா³மே அகுப்³ப³ம் முனிஸந்த²வானி;

காமேஹி ரித்தோ அபுரக்க²ரானோ,

கத²ம் ந விக்³க³ய்ஹ ஜனேன கயிரா’’தி.

‘‘இமஸ்ஸ கோ², க³ஹபதி, ப⁴க³வதா ஸம்கி²த்தேன பா⁴ஸிதஸ்ஸ ஏவம் வித்தா²ரேன அத்தோ² த³ட்ட²ப்³போ³’’தி. ததியம்.