1. நகுலபிதுஸுத்தம்

1. ஏவம் மே ஸுதம் – ஏகம் ஸமயம் ப⁴க³வா ப⁴க்³கே³ஸு விஹரதி ஸுஸுமாரகி³ரே [ஸும்ஸுமாரகி³ரே (ஸீ. ஸ்யா. கம். பீ.)] பே⁴ஸகளாவனே மிக³தா³யே. அத² கோ² நகுலபிதா க³ஹபதி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² நகுலபிதா க³ஹபதி ப⁴க³வந்தம் ஏதத³வோச –

‘‘அஹமஸ்மி, ப⁴ந்தே, ஜிண்ணோ வுட்³டோ⁴ மஹல்லகோ அத்³த⁴க³தோ வயோஅனுப்பத்தோ ஆதுரகாயோ அபி⁴க்க²ணாதங்கோ. அனிச்சத³ஸ்ஸாவீ கோ² பனாஹம், ப⁴ந்தே, ப⁴க³வதோ மனோபா⁴வனீயானஞ்ச பி⁴க்கூ²னம். ஓவத³து மம், ப⁴ந்தே, ப⁴க³வா; அனுஸாஸது மம், ப⁴ந்தே, ப⁴க³வா; யம் மமஸ்ஸ தீ³க⁴ரத்தம் ஹிதாய ஸுகா²யா’’தி.

‘‘ஏவமேதம், க³ஹபதி, ஏவமேதம், க³ஹபதி! ஆதுரோ ஹாயம், க³ஹபதி, காயோ அண்ட³பூ⁴தோ பரியோனத்³தோ⁴. யோ ஹி, க³ஹபதி, இமம் காயம் பரிஹரந்தோ முஹுத்தம்பி ஆரோக்³யம் படிஜானேய்ய, கிமஞ்ஞத்ர பா³ல்யா? தஸ்மாதிஹ தே, க³ஹபதி, ஏவம் ஸிக்கி²தப்³ப³ம் – ‘ஆதுரகாயஸ்ஸ மே ஸதோ சித்தம் அனாதுரம் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³’’ந்தி.

அத² கோ² நகுலபிதா க³ஹபதி ப⁴க³வதோ பா⁴ஸிதம் அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மந்தம் ஸாரிபுத்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² நகுலபிதரம் க³ஹபதிம் ஆயஸ்மா ஸாரிபுத்தோ ஏதத³வோச – ‘‘விப்பஸன்னானி கோ² தே, க³ஹபதி, இந்த்³ரியானி; பரிஸுத்³தோ⁴ முக²வண்ணோ பரியோதா³தோ. அலத்த² நோ அஜ்ஜ ப⁴க³வதோ ஸம்முகா² த⁴ம்மிம் கத²ம் ஸவனாயா’’தி?

‘‘கத²ஞ்ஹி நோ ஸியா, ப⁴ந்தே! இதா³னாஹம், ப⁴ந்தே, ப⁴க³வதா த⁴ம்மியா கதா²ய அமதேன அபி⁴ஸித்தோ’’தி. ‘‘யதா² கத²ம் பன த்வம், க³ஹபதி, ப⁴க³வதா த⁴ம்மியா கதா²ய அமதேன அபி⁴ஸித்தோ’’தி? ‘‘இதா⁴ஹம், ப⁴ந்தே, யேன ப⁴க³வா தேனுபஸங்கமிம்; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம். ஏகமந்தம் நிஸின்னோ க்²வாஹம், ப⁴ந்தே, ப⁴க³வந்தம் ஏதத³வோசம் – ‘அஹமஸ்மி, ப⁴ந்தே, ஜிண்ணோ வுட்³டோ⁴ மஹல்லகோ அத்³த⁴க³தோ வயோஅனுப்பத்தோ ஆதுரகாயோ அபி⁴க்க²ணாதங்கோ. அனிச்சத³ஸ்ஸாவீ கோ² பனாஹம், ப⁴ந்தே, ப⁴க³வதோ மனோபா⁴வனீயானஞ்ச பி⁴க்கூ²னம். ஓவத³து மம், ப⁴ந்தே, ப⁴க³வா; அனுஸாஸது மம், ப⁴ந்தே, ப⁴க³வா; யம் மமஸ்ஸ தீ³க⁴ரத்தம் ஹிதாய ஸுகா²யா’’’தி.

‘‘ஏவம் வுத்தே, மம், ப⁴ந்தே, ப⁴க³வா ஏதத³வோச – ‘ஏவமேதம், க³ஹபதி, ஏவமேதம், க³ஹபதி! ஆதுரோ ஹாயம், க³ஹபதி, காயோ அண்ட³பூ⁴தோ பரியோனத்³தோ⁴. யோ ஹி, க³ஹபதி, இமம் காயம் பரிஹரந்தோ முஹுத்தம்பி ஆரோக்³யம் படிஜானேய்ய, கிமஞ்ஞத்ர பா³ல்யா? தஸ்மாதிஹ தே க³ஹபதி, ஏவம் ஸிக்கி²தப்³ப³ம் – ஆதுரகாயஸ்ஸ மே ஸதோ சித்தம் அனாதுரம் ப⁴விஸ்ஸதீதி. ஏவஞ்ஹி தே, க³ஹபதி, ஸிக்கி²தப்³ப³’ந்தி. ஏவம் க்²வாஹம், ப⁴ந்தே, ப⁴க³வதா த⁴ம்மியா கதா²ய அமதேன அபி⁴ஸித்தோ’’தி.

‘‘ந ஹி பன தம், க³ஹபதி, படிபா⁴ஸி ப⁴க³வந்தம் [தம் ப⁴க³வந்தம் (ஸீ.)] உத்தரிம் படிபுச்சி²தும் – ‘கித்தாவதா நு கோ², ப⁴ந்தே, ஆதுரகாயோ சேவ ஹோதி ஆதுரசித்தோ ச, கித்தாவதா ச பன ஆதுரகாயோ ஹி கோ² ஹோதி நோ ச ஆதுரசித்தோ’’’தி? ‘‘தூ³ரதோபி கோ² மயம், ப⁴ந்தே, ஆக³ச்சே²ய்யாம ஆயஸ்மதோ ஸாரிபுத்தஸ்ஸ ஸந்திகே ஏதஸ்ஸ பா⁴ஸிதஸ்ஸ அத்த²மஞ்ஞாதும். ஸாது⁴ வதாயஸ்மந்தம்யேவ ஸாரிபுத்தம் படிபா⁴து ஏதஸ்ஸ பா⁴ஸிதஸ்ஸ அத்தோ²’’தி.

‘‘தேன ஹி, க³ஹபதி, ஸுணாஹி, ஸாது⁴கம் மனஸி கரோஹி; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² நகுலபிதா க³ஹபதி ஆயஸ்மதோ ஸாரிபுத்தஸ்ஸ பச்சஸ்ஸோஸி. ஆயஸ்மா ஸாரிபுத்தோ ஏதத³வோச –

‘‘கத²ஞ்ச, க³ஹபதி, ஆதுரகாயோ சேவ ஹோதி, ஆதுரசித்தோ ச? இத⁴, க³ஹபதி, அஸ்ஸுதவா புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபம் அத்ததோ ஸமனுபஸ்ஸதி, ரூபவந்தம் வா அத்தானம்; அத்தனி வா ரூபம், ரூபஸ்மிம் வா அத்தானம். ‘அஹம் ரூபம், மம ரூப’ந்தி பரியுட்ட²ட்டா²யீ ஹோதி. தஸ்ஸ ‘அஹம் ரூபம், மம ரூப’ந்தி பரியுட்ட²ட்டா²யினோ தம் ரூபம் விபரிணமதி அஞ்ஞதா² ஹோதி. தஸ்ஸ ரூபவிபரிணாமஞ்ஞதா²பா⁴வா உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா.

‘‘வேத³னம் அத்ததோ ஸமனுபஸ்ஸதி, வேத³னாவந்தம் வா அத்தானம்; அத்தனி வா வேத³னம், வேத³னாய வா அத்தானம். ‘அஹம் வேத³னா, மம வேத³னா’தி பரியுட்ட²ட்டா²யீ ஹோதி. தஸ்ஸ ‘அஹம் வேத³னா, மம வேத³னா’தி பரியுட்ட²ட்டா²யினோ, ஸா வேத³னா விபரிணமதி அஞ்ஞதா² ஹோதி. தஸ்ஸ வேத³னாவிபரிணாமஞ்ஞதா²பா⁴வா உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா.

‘‘ஸஞ்ஞம் அத்ததோ ஸமனுபஸ்ஸதி, ஸஞ்ஞாவந்தம் வா அத்தானம்; அத்தனி வா ஸஞ்ஞம், ஸஞ்ஞாய வா அத்தானம். ‘அஹம் ஸஞ்ஞா, மம ஸஞ்ஞா’தி பரியுட்ட²ட்டா²யீ ஹோதி. தஸ்ஸ ‘அஹம் ஸஞ்ஞா, மம ஸஞ்ஞா’தி பரியுட்ட²ட்டா²யினோ, ஸா ஸஞ்ஞா விபரிணமதி அஞ்ஞதா² ஹோதி. தஸ்ஸ ஸஞ்ஞாவிபரிணாமஞ்ஞதா²பா⁴வா உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா.

‘‘ஸங்கா²ரே அத்ததோ ஸமனுபஸ்ஸதி, ஸங்கா²ரவந்தம் வா அத்தானம்; அத்தனி வா ஸங்கா²ரே, ஸங்கா²ரேஸு வா அத்தானம். ‘அஹம் ஸங்கா²ரா, மம ஸங்கா²ரா’தி பரியுட்ட²ட்டா²யீ ஹோதி. தஸ்ஸ ‘அஹம் ஸங்கா²ரா, மம ஸங்கா²ரா’தி பரியுட்ட²ட்டா²யினோ, தே ஸங்கா²ரா விபரிணமந்தி அஞ்ஞதா² ஹோந்தி. தஸ்ஸ ஸங்கா²ரவிபரிணாமஞ்ஞதா²பா⁴வா உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா.

‘‘விஞ்ஞாணம் அத்ததோ ஸமனுபஸ்ஸதி, விஞ்ஞாணவந்தம் வா அத்தானம்; அத்தனி வா விஞ்ஞாணம், விஞ்ஞாணஸ்மிம் வா அத்தானம். ‘அஹம் விஞ்ஞாணம், மம விஞ்ஞாண’ந்தி பரியுட்ட²ட்டா²யீ ஹோதி. தஸ்ஸ ‘அஹம் விஞ்ஞாணம், மம விஞ்ஞாண’ந்தி பரியுட்ட²ட்டா²யினோ, தம் விஞ்ஞாணம் விபரிணமதி அஞ்ஞதா² ஹோதி. தஸ்ஸ விஞ்ஞாணவிபரிணாமஞ்ஞதா²பா⁴வா உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா. ஏவம் கோ², க³ஹபதி, ஆதுரகாயோ சேவ ஹோதி ஆதுரசித்தோ ச.

‘‘கத²ஞ்ச, க³ஹபதி, ஆதுரகாயோ ஹி கோ² ஹோதி நோ ச ஆதுரசித்தோ? இத⁴, க³ஹபதி, ஸுதவா அரியஸாவகோ அரியானம் த³ஸ்ஸாவீ அரியத⁴ம்மஸ்ஸ கோவிதோ³ அரியத⁴ம்மே ஸுவினீதோ ஸப்புரிஸானம் த³ஸ்ஸாவீ ஸப்புரிஸத⁴ம்மஸ்ஸ கோவிதோ³ ஸப்புரிஸத⁴ம்மே ஸுவினீதோ ந ரூபம் அத்ததோ ஸமனுபஸ்ஸதி, ந ரூபவந்தம் வா அத்தானம்; ந அத்தனி வா ரூபம், ந ரூபஸ்மிம் வா அத்தானம். ‘அஹம் ரூபம், மம ரூப’ந்தி ந பரியுட்ட²ட்டா²யீ ஹோதி. தஸ்ஸ ‘அஹம் ரூபம், மம ரூப’ந்தி அபரியுட்ட²ட்டா²யினோ, தம் ரூபம் விபரிணமதி அஞ்ஞதா² ஹோதி. தஸ்ஸ ரூபவிபரிணாமஞ்ஞதா²பா⁴வா நுப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா.

‘‘ந வேத³னம் அத்ததோ ஸமனுபஸ்ஸதி, ந வேத³னாவந்தம் வா அத்தானம்; ந அத்தனி வா வேத³னம், ந வேத³னாய வா அத்தானம். ‘அஹம் வேத³னா, மம வேத³னா’தி ந பரியுட்ட²ட்டா²யீ ஹோதி. தஸ்ஸ ‘அஹம் வேத³னா, மம வேத³னா’தி அபரியுட்ட²ட்டா²யினோ, ஸா வேத³னா விபரிணமதி அஞ்ஞதா² ஹோதி. தஸ்ஸ வேத³னாவிபரிணாமஞ்ஞதா²பா⁴வா நுப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா.

‘‘ந ஸஞ்ஞம் அத்ததோ ஸமனுபஸ்ஸதி, ந ஸஞ்ஞாவந்தம் வா அத்தானம்; ந அத்தனி வா ஸஞ்ஞம், ந ஸஞ்ஞாய வா அத்தானம். ‘அஹம் ஸஞ்ஞா, மம ஸஞ்ஞா’தி ந பரியுட்ட²ட்டா²யீ ஹோதி. தஸ்ஸ ‘அஹம் ஸஞ்ஞா, மம ஸஞ்ஞா’தி அபரியுட்ட²ட்டா²யினோ, ஸா ஸஞ்ஞா விபரிணமதி அஞ்ஞதா² ஹோதி. தஸ்ஸ ஸஞ்ஞாவிபரிணாமஞ்ஞதா²பா⁴வா நுப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா.

``ந ஸங்கா²ரே அத்ததோ ஸமனுபஸ்ஸதி, ந ஸங்கா²ரவந்தம் வா அத்தானம்; ந அத்தனி வா ஸங்கா²ரே, ந ஸங்கா²ரேஸு வா அத்தானம். ‘அஹம் ஸங்கா²ரா, மம ஸங்கா²ரா’தி ந பரியுட்ட²ட்டா²யீ ஹோதி. தஸ்ஸ ‘அஹம் ஸங்கா²ரா, மம ஸங்கா²ரா’தி அபரியுட்ட²ட்டா²யினோ, தே ஸங்கா²ரா விபரிணமந்தி அஞ்ஞதா² ஹோந்தி. தஸ்ஸ ஸங்கா²ரவிபரிணாமஞ்ஞதா²பா⁴வா நுப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா.

‘‘ந விஞ்ஞாணம் அத்ததோ ஸமனுபஸ்ஸதி, ந விஞ்ஞாணவந்தம் வா அத்தானம்; ந அத்தனி வா விஞ்ஞாணம், ந விஞ்ஞாணஸ்மிம் வா அத்தானம். ‘அஹம் விஞ்ஞாணம், மம விஞ்ஞாண’ந்தி ந பரியுட்ட²ட்டா²யீ ஹோதி. தஸ்ஸ ‘அஹம் விஞ்ஞாணம், மம விஞ்ஞாண’ந்தி அபரியுட்ட²ட்டா²யினோ, தம் விஞ்ஞாணம் விபரிணமதி அஞ்ஞதா² ஹோதி. தஸ்ஸ விஞ்ஞாணவிபரிணாமஞ்ஞதா²பா⁴வா நுப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா. ஏவம் கோ², க³ஹபதி, ஆதுரகாயோ ஹோதி நோ ச ஆதுரசித்தோ’’தி.

இத³மவோச ஆயஸ்மா ஸாரிபுத்தோ. அத்தமனோ நகுலபிதா க³ஹபதி ஆயஸ்மதோ ஸாரிபுத்தஸ்ஸ பா⁴ஸிதம் அபி⁴னந்தீ³தி. பட²மம்.