7. நளகலாபீஸுத்தம்

67. ஏகம் ஸமயம் ஆயஸ்மா ச ஸாரிபுத்தோ ஆயஸ்மா ச மஹாகோட்டி²கோ [மஹாகோட்டி²தோ (ஸீ. ஸ்யா. கம். பீ.)] பா³ராணஸியம் விஹரந்தி இஸிபதனே மிக³தா³யே. அத² கோ² ஆயஸ்மா மஹாகோட்டி²கோ ஸாயன்ஹஸமயம் படிஸல்லானா வுட்டி²தோ யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மதா ஸாரிபுத்தேன ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா மஹாகோட்டி²கோ ஆயஸ்மந்தம் ஸாரிபுத்தம் ஏதத³வோச – ‘‘கிம் நு கோ², ஆவுஸோ ஸாரிபுத்த, ஸயம்கதம் ஜராமரணம், பரம்கதம் ஜராமரணம், ஸயம்கதஞ்ச பரம்கதஞ்ச ஜராமரணம், உதா³ஹு அஸயம்காரம் அபரம்காரம் அதி⁴ச்சஸமுப்பன்னம் ஜராமரண’’ந்தி? ‘‘ந கோ², ஆவுஸோ கோட்டி²க, ஸயம்கதம் ஜராமரணம், ந பரம்கதம் ஜராமரணம், ந ஸயம்கதஞ்ச பரம்கதஞ்ச ஜராமரணம், நாபி அஸயம்காரம் அபரம்காரம் அதி⁴ச்சஸமுப்பன்னம் ஜராமரணம். அபி ச, ஜாதிபச்சயா ஜராமரண’’ந்தி.

‘‘கிம் நு கோ², ஆவுஸோ ஸாரிபுத்த, ஸயம்கதா ஜாதி, பரம்கதா ஜாதி, ஸயம்கதா ச பரம்கதா ச ஜாதி, உதா³ஹு அஸயம்காரா அபரம்காரா அதி⁴ச்சஸமுப்பன்னா ஜாதீ’’தி? ‘‘ந கோ², ஆவுஸோ கோட்டி²க, ஸயம்கதா ஜாதி, ந பரம்கதா ஜாதி, ந ஸயம்கதா ச பரம்கதா ச ஜாதி, நாபி அஸயம்காரா அபரம்காரா அதி⁴ச்சஸமுப்பன்னா ஜாதி. அபி ச, ப⁴வபச்சயா ஜாதீ’’தி.

‘‘கிம் நு கோ², ஆவுஸோ ஸாரிபுத்த, ஸயம்கதோ ப⁴வோ…பே… ஸயம்கதம் உபாதா³னம்… ஸயம்கதா தண்ஹா… ஸயம்கதா வேத³னா… ஸயம்கதோ ப²ஸ்ஸோ… ஸயம்கதம் ஸளாயதனம்… ஸயம்கதம் நாமரூபம், பரம்கதம் நாமரூபம், ஸயம்கதஞ்ச பரம்கதஞ்ச நாமரூபம், உதா³ஹு அஸயம்காரம் அபரம்காரம் அதி⁴ச்சஸமுப்பன்னம் நாமரூப’’ந்தி? ‘‘ந கோ², ஆவுஸோ கோட்டி²க, ஸயம்கதம் நாமரூபம், ந பரம்கதம் நாமரூபம், ந ஸயம்கதஞ்ச பரம்கதஞ்ச நாமரூபம், நாபி அஸயம்காரம் அபரம்காரம், அதி⁴ச்சஸமுப்பன்னம் நாமரூபம். அபி ச, விஞ்ஞாணபச்சயா நாமரூப’’ந்தி.

‘‘கிம் நு கோ², ஆவுஸோ ஸாரிபுத்த, ஸயங்கதம் விஞ்ஞாணம், பரங்கதம் விஞ்ஞாணம், ஸயம்கதஞ்ச பரம்கதஞ்ச விஞ்ஞாணம், உதா³ஹு அஸயம்காரம் அபரம்காரம் அதி⁴ச்சஸமுப்பன்னம் விஞ்ஞாண’’ந்தி? ‘‘ந கோ², ஆவுஸோ கோட்டி²க, ஸயம்கதம் விஞ்ஞாணம், ந பரம்கதம் விஞ்ஞாணம் ந ஸயம்கதஞ்ச பரம்கதஞ்ச விஞ்ஞாணம், நாபி அஸயம்காரம் அபரம்காரம் அதி⁴ச்சஸமுப்பன்னம் விஞ்ஞாணம். அபி ச, நாமரூபபச்சயா விஞ்ஞாண’’ந்தி.

‘‘இதா³னேவ கோ² மயம் ஆயஸ்மதோ ஸாரிபுத்தஸ்ஸ பா⁴ஸிதம் ஏவம் ஆஜானாம – ‘ந க்²வாவுஸோ கோட்டி²க, ஸயம்கதம் நாமரூபம், ந பரம்கதம் நாமரூபம், ந ஸயம்கதஞ்ச பரம்கதஞ்ச நாமரூபம், நாபி அஸயம்காரம் அபரம்காரம் அதி⁴ச்சஸமுப்பன்னம் நாமரூபம். அபி ச, விஞ்ஞாணபச்சயா நாமரூப’’’ந்தி.

‘‘இதா³னேவ ச பன மயம் ஆயஸ்மதோ ஸாரிபுத்தஸ்ஸ பா⁴ஸிதம் ஏவம் ஆஜானாம – ‘ந க்²வாவுஸோ கோட்டி²க, ஸயம்கதம் விஞ்ஞாணம், ந பரம்கதம் விஞ்ஞாணம், ந ஸயம்கதஞ்ச பரம்கதஞ்ச விஞ்ஞாணம், நாபி அஸயம்காரம் அபரம்காரம் அதி⁴ச்சஸமுப்பன்னம் விஞ்ஞாணம். அபி ச, நாமரூபபச்சயா விஞ்ஞாண’’’ந்தி.

‘‘யதா² கத²ம் பனாவுஸோ ஸாரிபுத்த, இமஸ்ஸ பா⁴ஸிதஸ்ஸ அத்தோ² த³ட்ட²ப்³போ³’’தி? ‘‘தேனஹாவுஸோ, உபமம் தே கரிஸ்ஸாமி. உபமாயபிதே⁴கச்சே விஞ்ஞூ புரிஸா பா⁴ஸிதஸ்ஸ அத்த²ம் ஜானந்தி. ஸேய்யதா²பி, ஆவுஸோ, த்³வே நளகலாபியோ அஞ்ஞமஞ்ஞம் நிஸ்ஸாய திட்டே²ய்யும். ஏவமேவ கோ², ஆவுஸோ, நாமரூபபச்சயா விஞ்ஞாணம்; விஞ்ஞாணபச்சயா நாமரூபம்; நாமரூபபச்சயா ஸளாயதனம்; ஸளாயதனபச்சயா ப²ஸ்ஸோ…பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. தாஸம் சே, ஆவுஸோ, நளகலாபீனம் ஏகம் ஆகட்³டே⁴ய்ய, ஏகா பபதேய்ய; அபரம் சே ஆகட்³டே⁴ய்ய, அபரா பபதேய்ய. ஏவமேவ கோ², ஆவுஸோ, நாமரூபனிரோதா⁴ விஞ்ஞாணனிரோதோ⁴; விஞ்ஞாணனிரோதா⁴ நாமரூபனிரோதோ⁴; நாமரூபனிரோதா⁴ ஸளாயதனனிரோதோ⁴; ஸளாயதனனிரோதா⁴ ப²ஸ்ஸனிரோதோ⁴…பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி. ‘‘அச்ச²ரியம், ஆவுஸோ ஸாரிபுத்த; அப்³பு⁴தம், ஆவுஸோ ஸாரிபுத்த! யாவஸுபா⁴ஸிதம் சித³ம் ஆயஸ்மதா ஸாரிபுத்தேன. இத³ஞ்ச பன மயம் ஆயஸ்மதோ ஸாரிபுத்தஸ்ஸ பா⁴ஸிதம் இமேஹி ச²த்திம்ஸாய வத்தூ²ஹி அனுமோதா³ம – ‘ஜராமரணஸ்ஸ சே, ஆவுஸோ, பி⁴க்கு² நிப்³பி³தா³ய விராகா³ய நிரோதா⁴ய த⁴ம்மம் தே³ஸேதி, த⁴ம்மகதி²கோ பி⁴க்கூ²தி அலம் வசனாய. ஜராமரணஸ்ஸ சே, ஆவுஸோ, பி⁴க்கு² நிப்³பி³தா³ய விராகா³ய நிரோதா⁴ய படிபன்னோ ஹோதி, த⁴ம்மானுத⁴ம்மப்படிபன்னோ பி⁴க்கூ²தி அலம் வசனாய. ஜராமரணஸ்ஸ சே, ஆவுஸோ, பி⁴க்கு² நிப்³பி³தா³ விராகா³ நிரோதா⁴ அனுபாதா³ விமுத்தோ ஹோதி, தி³ட்ட²த⁴ம்மனிப்³பா³னப்பத்தோ பி⁴க்கூ²தி அலம் வசனாய. ஜாதியா சே… ப⁴வஸ்ஸ சே… உபாதா³னஸ்ஸ சே… தண்ஹாய சே… வேத³னாய சே… ப²ஸ்ஸஸ்ஸ சே… ஸளாயதனஸ்ஸ சே… நாமரூபஸ்ஸ சே… விஞ்ஞாணஸ்ஸ சே… ஸங்கா²ரானம் சே… அவிஜ்ஜாய சே, ஆவுஸோ, பி⁴க்கு² நிப்³பி³தா³ய விராகா³ய நிரோதா⁴ய த⁴ம்மம் தே³ஸேதி, த⁴ம்மகதி²கோ பி⁴க்கூ²தி அலம் வசனாய. அவிஜ்ஜாய சே, ஆவுஸோ, பி⁴க்கு² நிப்³பி³தா³ய விராகா³ய நிரோதா⁴ய படிபன்னோ ஹோதி, த⁴ம்மானுத⁴ம்மப்படிபன்னோ பி⁴க்கூ²தி அலம் வசனாய. அவிஜ்ஜாய சே, ஆவுஸோ, பி⁴க்கு² நிப்³பி³தா³ விராகா³ நிரோதா⁴ அனுபாதா³ விமுத்தோ ஹோதி, தி³ட்ட²த⁴ம்மனிப்³பா³னப்பத்தோ பி⁴க்கூ²தி அலம் வசனாயா’’’தி. ஸத்தமம்.