3. புத்தமம்ஸூபமஸுத்தம்

63. ஸாவத்தி²யம் …பே… ‘‘சத்தாரோமே, பி⁴க்க²வே, ஆஹாரா பூ⁴தானம் வா ஸத்தானம் டி²தியா ஸம்ப⁴வேஸீனம் வா அனுக்³க³ஹாய. கதமே சத்தாரோ? கப³ளீகாரோ ஆஹாரோ ஓளாரிகோ வா ஸுகு²மோ வா, ப²ஸ்ஸோ து³தியோ, மனோஸஞ்சேதனா ததியா, விஞ்ஞாணம் சதுத்த²ம். இமே கோ², பி⁴க்க²வே, சத்தாரோ ஆஹாரா பூ⁴தானம் வா ஸத்தானம் டி²தியா ஸம்ப⁴வேஸீனம் வா அனுக்³க³ஹாய’’.

‘‘கத²ஞ்ச, பி⁴க்க²வே, கப³ளீகாரோ ஆஹாரோ த³ட்ட²ப்³போ³? ஸேய்யதா²பி, பி⁴க்க²வே, த்³வே ஜாயம்பதிகா [ஜயம்பதிகா (ஸீ. பீ.) டீகா ஓலோகேதப்³பா³] பரித்தம் ஸம்ப³லம் ஆதா³ய கந்தாரமக்³க³ம் படிபஜ்ஜேய்யும். தேஸமஸ்ஸ ஏகபுத்தகோ பியோ மனாபோ. அத² கோ² தேஸம், பி⁴க்க²வே, த்³வின்னம் ஜாயம்பதிகானம் கந்தாரக³தானம் யா பரித்தா ஸம்ப³லமத்தா, ஸா பரிக்க²யம் பரியாதா³னம் க³ச்சே²ய்ய. ஸியா ச நேஸம் கந்தாராவஸேஸோ அனதிண்ணோ. அத² கோ² தேஸம், பி⁴க்க²வே, த்³வின்னம் ஜாயம்பதிகானம் ஏவமஸ்ஸ – ‘அம்ஹாகம் கோ² யா பரித்தா ஸம்ப³லமத்தா ஸா பரிக்கீ²ணா பரியாதி³ண்ணா [பரியாதி³ன்னா (ஸ்யா. கம்.)]. அத்தி² சாயம் கந்தாராவஸேஸோ அனித்திண்ணோ [அனித்தி²ண்ணோ (ஸ்யா. கம்.), அனதிண்ணோ (க.)]. யம்னூன மயம் இமம் ஏகபுத்தகம் பியம் மனாபம் வதி⁴த்வா வல்லூரஞ்ச ஸோண்டி³கஞ்ச கரித்வா புத்தமம்ஸானி கா²த³ந்தா ஏவம் தம் கந்தாராவஸேஸம் நித்த²ரேய்யாம, மா ஸப்³பே³வ தயோ வினஸ்ஸிம்ஹா’தி. அத² கோ² தே, பி⁴க்க²வே, த்³வே ஜாயம்பதிகா தம் ஏகபுத்தகம் பியம் மனாபம் வதி⁴த்வா வல்லூரஞ்ச ஸோண்டி³கஞ்ச கரித்வா புத்தமம்ஸானி கா²த³ந்தா ஏவம் தம் கந்தாராவஸேஸம் நித்த²ரேய்யும். தே புத்தமம்ஸானி சேவ கா²தே³ய்யும், உரே ச படிபிஸேய்யும் – ‘கஹம், ஏகபுத்தக, கஹம், ஏகபுத்தகா’தி.

‘‘தம் கிம் மஞ்ஞத², பி⁴க்க²வே, அபி நு தே த³வாய வா ஆஹாரம் ஆஹாரேய்யும், மதா³ய வா ஆஹாரம் ஆஹாரேய்யும், மண்ட³னாய வா ஆஹாரம் ஆஹாரேய்யும், விபூ⁴ஸனாய வா ஆஹாரம் ஆஹாரேய்யு’’ந்தி? ‘‘நோ ஹேதம், ப⁴ந்தே’’. ‘‘நனு தே, பி⁴க்க²வே, யாவதே³வ கந்தாரஸ்ஸ நித்த²ரணத்தா²ய ஆஹாரம் ஆஹாரேய்யு’’ந்தி? ‘‘ஏவம், ப⁴ந்தே’’. ‘‘ஏவமேவ க்²வாஹம், பி⁴க்க²வே, கப³ளீகாரோ ஆஹாரோ த³ட்ட²ப்³போ³’’தி வதா³மி. கப³ளீகாரே, பி⁴க்க²வே, ஆஹாரே பரிஞ்ஞாதே பஞ்சகாமகு³ணிகோ ராகோ³ பரிஞ்ஞாதோ ஹோதி. பஞ்சகாமகு³ணிகே ராகே³ பரிஞ்ஞாதே நத்தி² தம் ஸம்யோஜனம் யேன ஸம்யோஜனேன ஸம்யுத்தோ அரியஸாவகோ புன இமம் லோகம் ஆக³ச்சே²ய்ய.

‘‘கத²ஞ்ச, பி⁴க்க²வே, ப²ஸ்ஸாஹாரோ த³ட்ட²ப்³போ³? ஸேய்யதா²பி, பி⁴க்க²வே, கா³வீ நிச்சம்மா குட்டம் சே [குட்³ட³ஞ்சே (ஸீ. ஸ்யா. கம். பீ.)] நிஸ்ஸாய திட்டே²ய்ய. யே குட்டனிஸ்ஸிதா பாணா தே நம் கா²தே³ய்யும். ருக்க²ம் சே நிஸ்ஸாய திட்டே²ய்ய, யே ருக்க²னிஸ்ஸிதா பாணா தே நம் கா²தே³ய்யும். உத³கம் சே நிஸ்ஸாய திட்டே²ய்ய, யே உத³கனிஸ்ஸிதா பாணா தே நம் கா²தே³ய்யும். ஆகாஸம் சே நிஸ்ஸாய திட்டே²ய்ய, யே ஆகாஸனிஸ்ஸிதா பாணா தே நம் கா²தே³ய்யும். யம் யதே³வ ஹி ஸா, பி⁴க்க²வே, கா³வீ நிச்சம்மா நிஸ்ஸாய திட்டே²ய்ய, யே தன்னிஸ்ஸிதா [யே தன்னிஸ்ஸிதா தன்னிஸ்ஸிதா (ஸீ. ஸ்யா. கம். பீ.)] பாணா தே நம் கா²தே³ய்யும். ஏவமேவ க்²வாஹம், பி⁴க்க²வே, ‘‘ப²ஸ்ஸாஹாரோ த³ட்ட²ப்³போ³’’தி வதா³மி. ப²ஸ்ஸே, பி⁴க்க²வே, ஆஹாரே பரிஞ்ஞாதே திஸ்ஸோ வேத³னா பரிஞ்ஞாதா ஹோந்தி. தீஸு வேத³னாஸு பரிஞ்ஞாதாஸு அரியஸாவகஸ்ஸ நத்தி² கிஞ்சி உத்தரிகரணீயந்தி [உத்தரிம்கரணீயந்தி (ஸீ. பீ.)] வதா³மி.

‘‘கத²ஞ்ச, பி⁴க்க²வே, மனோஸஞ்சேதனாஹாரோ த³ட்ட²ப்³போ³? ஸேய்யதா²பி, பி⁴க்க²வே, அங்கா³ரகாஸு ஸாதி⁴கபோரிஸா புண்ணா அங்கா³ரானம் வீதச்சிகானம் வீததூ⁴மானம். அத² புரிஸோ ஆக³ச்சே²ய்ய ஜீவிதுகாமோ அமரிதுகாமோ ஸுக²காமோ து³க்க²ப்படிகூலோ. தமேனம் த்³வே ப³லவந்தோ புரிஸா நானாபா³ஹாஸு க³ஹேத்வா தம் அங்கா³ரகாஸும் உபகட்³டே⁴ய்யும். அத² கோ², பி⁴க்க²வே, தஸ்ஸ புரிஸஸ்ஸ ஆரகாவஸ்ஸ சேதனா ஆரகா பத்த²னா ஆரகா பணிதி⁴. தம் கிஸ்ஸ ஹேது? ஏவஞ்ஹி, பி⁴க்க²வே, தஸ்ஸ புரிஸஸ்ஸ ஹோதி – ‘இமம் சாஹம் அங்கா³ரகாஸும் பபதிஸ்ஸாமி, ததோனிதா³னம் மரணம் வா நிக³ச்சா²மி மரணமத்தம் வா து³க்க²’ந்தி. ஏவமேவ க்²வாஹம், பி⁴க்க²வே, ‘மனோஸஞ்சேதனாஹாரோ த³ட்ட²ப்³போ³’தி வதா³மி. மனோஸஞ்சேதனாய, பி⁴க்க²வே, ஆஹாரே பரிஞ்ஞாதே திஸ்ஸோ தண்ஹா பரிஞ்ஞாதா ஹோந்தி. தீஸு தண்ஹாஸு பரிஞ்ஞாதாஸு அரியஸாவகஸ்ஸ நத்தி² கிஞ்சி உத்தரிகரணீயந்தி வதா³மி.

‘‘கத²ஞ்ச, பி⁴க்க²வே, விஞ்ஞாணாஹாரோ த³ட்ட²ப்³போ³? ஸேய்யதா²பி, பி⁴க்க²வே, சோரம் ஆகு³சாரிம் க³ஹேத்வா ரஞ்ஞோ த³ஸ்ஸேய்யும் – ‘அயம் தே, தே³வ, சோரோ ஆகு³சாரீ, இமஸ்ஸ யம் இச்ச²ஸி தம் த³ண்ட³ம் பணேஹீ’தி. தமேனம் ராஜா ஏவம் வதே³ய்ய – ‘க³ச்ச²த², போ⁴, இமம் புரிஸம் புப்³ப³ண்ஹஸமயம் ஸத்திஸதேன ஹனதா²’தி. தமேனம் புப்³ப³ண்ஹஸமயம் ஸத்திஸதேன ஹனேய்யும். அத² ராஜா மஜ்ஜ²ன்ஹிகஸமயம் ஏவம் வதே³ய்ய – ‘அம்போ⁴, கத²ம் ஸோ புரிஸோ’தி? ‘ததே²வ, தே³வ, ஜீவதீ’தி. தமேனம் ராஜா ஏவம் வதே³ய்ய – ‘க³ச்ச²த², போ⁴, தம் புரிஸம் மஜ்ஜ²ன்ஹிகஸமயம் ஸத்திஸதேன ஹனதா²’தி. தமேனம் மஜ்ஜ²ன்ஹிகஸமயம் ஸத்திஸதேன ஹனேய்யும். அத² ராஜா ஸாயன்ஹஸமயம் ஏவம் வதே³ய்ய – ‘அம்போ⁴, கத²ம் ஸோ புரிஸோ’தி? ‘ததே²வ, தே³வ, ஜீவதீ’தி. தமேனம் ராஜா ஏவம் வதே³ய்ய – ‘க³ச்ச²த², போ⁴, தம் புரிஸம் ஸாயன்ஹஸமயம் ஸத்திஸதேன ஹனதா²’தி. தமேனம் ஸாயன்ஹஸமயம் ஸத்திஸதேன ஹனேய்யும். தம் கிம் மஞ்ஞத², பி⁴க்க²வே, அபி நு ஸோ புரிஸோ தி³வஸம் தீஹி ஸத்திஸதேஹி ஹஞ்ஞமானோ ததோனிதா³னம் து³க்க²ம் தோ³மனஸ்ஸம் படிஸம்வேதி³யேதா²’’தி? ‘‘ஏகிஸ்ஸாபி, ப⁴ந்தே, ஸத்தியா ஹஞ்ஞமானோ ததோனிதா³னம் து³க்க²ம் தோ³மனஸ்ஸம் படிஸம்வேதி³யேத²; கோ பன வாதோ³ தீஹி ஸத்திஸதேஹி ஹஞ்ஞமானோ’’தி! ‘‘ஏவமேவ க்²வாஹம், பி⁴க்க²வே, விஞ்ஞாணாஹாரோ த³ட்ட²ப்³போ³தி வதா³மி. விஞ்ஞாணே, பி⁴க்க²வே, ஆஹாரே பரிஞ்ஞாதே நாமரூபம் பரிஞ்ஞாதம் ஹோதி, நாமரூபே பரிஞ்ஞாதே அரியஸாவகஸ்ஸ நத்தி² கிஞ்சி உத்தரிகரணீயந்தி வதா³மீ’’தி. ததியம்.