10. ஸுஸிமஸுத்தம்

70. ஏவம் மே ஸுதம் – ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ப⁴க³வா ஸக்கதோ ஹோதி க³ருகதோ மானிதோ பூஜிதோ அபசிதோ லாபீ⁴ சீவர-பிண்ட³பாத-ஸேனாஸன-கி³லானப்பச்சய-பே⁴ஸஜ்ஜபரிக்கா²ரானம். பி⁴க்கு²ஸங்கோ⁴பி ஸக்கதோ ஹோதி க³ருகதோ மானிதோ பூஜிதோ அபசிதோ லாபீ⁴ சீவர-பிண்ட³பாத-ஸேனாஸனகி³லானப்பச்சய-பே⁴ஸஜ்ஜபரிக்கா²ரானம். அஞ்ஞதித்தி²யா பன பரிப்³பா³ஜகா அஸக்கதா ஹோந்தி அக³ருகதா அமானிதா அபூஜிதா அனபசிதா, ந லாபி⁴னோ சீவர-பிண்ட³பாத-ஸேனாஸனகி³லானப்பச்சய-பே⁴ஸஜ்ஜபரிக்கா²ரானம்.

தேன கோ² பன ஸமயேன ஸுஸிமோ [ஸுஸீமோ (ஸீ. க.)] பரிப்³பா³ஜகோ ராஜக³ஹே படிவஸதி மஹதியா பரிப்³பா³ஜகபரிஸாய ஸத்³தி⁴ம். அத² கோ² ஸுஸிமஸ்ஸ பரிப்³பா³ஜகஸ்ஸ பரிஸா ஸுஸிமம் பரிப்³பா³ஜகம் ஏதத³வோசும் – ‘‘ஏஹி த்வம், ஆவுஸோ ஸுஸிம, ஸமணே கோ³தமே ப்³ரஹ்மசரியம் சர. த்வம் த⁴ம்மம் பரியாபுணித்வா அம்ஹே வாசேய்யாஸி [வாசேஸ்ஸஸி (பீ. க.)]. தம் மயம் த⁴ம்மம் பரியாபுணித்வா கி³ஹீனம் பா⁴ஸிஸ்ஸாம. ஏவம் மயம்பி ஸக்கதா ப⁴விஸ்ஸாம க³ருகதா மானிதா பூஜிதா அபசிதா லாபி⁴னோ சீவர-பிண்ட³பாதஸேனாஸன-கி³லானப்பச்சய-பே⁴ஸஜ்ஜபரிக்கா²ரான’’ந்தி. ‘‘ஏவமாவுஸோ’’தி கோ² ஸுஸிமோ பரிப்³பா³ஜகோ ஸகாய பரிஸாய படிஸ்ஸுணித்வா யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மதா ஆனந்தே³ன ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஸுஸிமோ பரிப்³பா³ஜகோ ஆயஸ்மந்தம் ஆனந்த³ம் ஏதத³வோச – ‘‘இச்சா²மஹம், ஆவுஸோ ஆனந்த³, இமஸ்மிம் த⁴ம்மவினயே ப்³ரஹ்மசரியம் சரிது’’ந்தி.

அத² கோ² ஆயஸ்மா ஆனந்தோ³ ஸுஸிமம் பரிப்³பா³ஜகம் ஆதா³ய யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘அயம், ப⁴ந்தே, ஸுஸிமோ பரிப்³பா³ஜகோ ஏவமாஹ – ‘இச்சா²மஹம், ஆவுஸோ ஆனந்த³, இமஸ்மிம் த⁴ம்மவினயே ப்³ரஹ்மசரியம் சரிது’’ந்தி. ‘‘தேனஹானந்த³, ஸுஸிமம் பப்³பா³ஜேதா²’’தி. அலத்த² கோ² ஸுஸிமோ பரிப்³பா³ஜகோ ப⁴க³வதோ ஸந்திகே பப்³ப³ஜ்ஜம், அலத்த² உபஸம்பத³ம்.

தேன கோ² பன ஸமயேன ஸம்ப³ஹுலேஹி பி⁴க்கூ²ஹி ப⁴க³வதோ ஸந்திகே அஞ்ஞா ப்³யாகதா ஹோதி – ‘‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமா’’தி. அஸ்ஸோஸி கோ² ஆயஸ்மா ஸுஸிமோ – ‘‘ஸம்ப³ஹுலேஹி கிர பி⁴க்கூ²ஹி ப⁴க³வதோ ஸந்திகே அஞ்ஞா ப்³யாகதா – ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாமா’’தி. அத² கோ² ஆயஸ்மா ஸுஸிமோ யேன தே பி⁴க்கூ² தேனுபஸங்கமி; உபஸங்கமித்வா தேஹி பி⁴க்கூ²ஹி ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஸுஸிமோ தே பி⁴க்கூ² ஏதத³வோச – ‘‘ஸச்சம் கிராயஸ்மந்தேஹி ப⁴க³வதோ ஸந்திகே அஞ்ஞா ப்³யாகதா – ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாமா’’தி? ‘‘ஏவமாவுஸோ’’தி.

‘‘அபி பன [அபி நு (ஸீ. ஸ்யா. கம்.) ஏவமுபரிபி] தும்ஹே ஆயஸ்மந்தோ ஏவம் ஜானந்தா ஏவம் பஸ்ஸந்தா அனேகவிஹிதம் இத்³தி⁴வித⁴ம் பச்சனுபோ⁴த² – ஏகோபி ஹுத்வா ப³ஹுதா⁴ ஹோத², ப³ஹுதா⁴பி ஹுத்வா ஏகோ ஹோத²; ஆவிபா⁴வம், திரோபா⁴வம், திரோகுட்டம் திரோபாகாரம் திரோபப்³ப³தம் அஸஜ்ஜமானா க³ச்ச²த², ஸேய்யதா²பி ஆகாஸே; பத²வியாபி உம்முஜ்ஜனிமுஜ்ஜம் கரோத², ஸேய்யதா²பி உத³கே; உத³கேபி அபி⁴ஜ்ஜமானே க³ச்ச²த², ஸேய்யதா²பி பத²வியம்; ஆகாஸேபி பல்லங்கேன கமத², ஸேய்யதா²பி பக்கீ² ஸகுணோ; இமேபி சந்தி³மஸூரியே ஏவம்மஹித்³தி⁴கே ஏவம்மஹானுபா⁴வே பாணினா பரிமஸத² பரிமஜ்ஜத², யாவ ப்³ரஹ்மலோகாபி காயேன வஸம் வத்தேதா²’’தி? ‘‘நோ ஹேதம், ஆவுஸோ’’.

‘‘அபி பன தும்ஹே ஆயஸ்மந்தோ ஏவம் ஜானந்தா ஏவம் பஸ்ஸந்தா தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய உபோ⁴ ஸத்³தே³ ஸுணாத² தி³ப்³பே³ ச மானுஸே ச யே தூ³ரே ஸந்திகே சா’’தி? ‘‘நோ ஹேதம், ஆவுஸோ’’.

‘‘அபி பன தும்ஹே ஆயஸ்மந்தோ ஏவம் ஜானந்தா ஏவம் பஸ்ஸந்தா பரஸத்தானம் பரபுக்³க³லானம் சேதஸா சேதோ பரிச்ச பஜானாத² – ஸராக³ம் வா சித்தம் ஸராக³ம் சித்தந்தி பஜானாத²; வீதராக³ம் வா சித்தம் வீதராக³ம் சித்தந்தி பஜானாத²; ஸதோ³ஸம் வா சித்தம் ஸதோ³ஸம் சித்தந்தி பஜானாத²; வீததோ³ஸம் வா சித்தம் வீததோ³ஸம் சித்தந்தி பஜானாத²; ஸமோஹம் வா சித்தம் ஸமோஹம் சித்தந்தி பஜானாத²; வீதமோஹம் வா சித்தம் வீதமோஹம் சித்தந்தி பஜானாத²; ஸம்கி²த்தம் வா சித்தம் ஸம்கி²த்தம் சித்தந்தி பஜானாத²; விக்கி²த்தம் வா சித்தம் விக்கி²த்தம் சித்தந்தி பஜானாத²; மஹக்³க³தம் வா சித்தம் மஹக்³க³தம் சித்தந்தி பஜானாத²; அமஹக்³க³தம் வா சித்தம் அமஹக்³க³தம் சித்தந்தி பஜானாத²; ஸஉத்தரம் வா சித்தம் ஸஉத்தரம் சித்தந்தி பஜானாத²; அனுத்தரம் வா சித்தம் அனுத்தரம் சித்தந்தி பஜானாத²; ஸமாஹிதம் வா சித்தம் ஸமாஹிதம் சித்தந்தி பஜானாத²; அஸமாஹிதம் வா சித்தம் அஸமாஹிதம் சித்தந்தி பஜானாத²; விமுத்தம் வா சித்தம் விமுத்தம் சித்தந்தி பஜானாத²; அவிமுத்தம் வா சித்தம் அவிமுத்தம் சித்தந்தி பஜானாதா²’’தி? ‘‘நோ ஹேதம், ஆவுஸோ’’.

‘‘அபி பன தும்ஹே ஆயஸ்மந்தோ ஏவம் ஜானந்தா ஏவம் பஸ்ஸந்தா அனேகவிஹிதம் புப்³பே³னிவாஸம் அனுஸ்ஸரத², ஸேய்யதி²த³ம் – ஏகம்பி ஜாதிம் த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ த³ஸபி ஜாதியோ வீஸம்பி ஜாதியோ திம்ஸம்பி ஜாதியோ சத்தாரீஸம்பி ஜாதியோ பஞ்ஞாஸம்பி ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி, அனேகேபி ஸம்வட்டகப்பே அனேகேபி விவட்டகப்பே அனேகேபி ஸம்வட்டவிவட்டகப்பே – ‘அமுத்ராஸிம் ஏவம்னாமோ ஏவம்கோ³த்தோ ஏவம்வண்ணோ ஏவமாஹாரோ ஏவம்ஸுக²து³க்க²படிஸம்வேதீ³ ஏவமாயுபரியந்தோ, ஸோ ததோ சுதோ அமுத்ர உத³பாதி³ம்; தத்ராபாஸிம் ஏவம்னாமோ ஏவம்கோ³த்தோ ஏவம்வண்ணோ ஏவமாஹாரோ ஏவம்ஸுக²து³க்க²படிஸம்வேதீ³ ஏவமாயுபரியந்தோ, ஸோ ததோ சுதோ இதூ⁴பபன்னோ’தி. இதி ஸாகாரம் ஸஉத்³தே³ஸம் அனேகவிஹிதம் புப்³பே³னிவாஸம் அனுஸ்ஸரதா²’’தி? ‘‘நோ ஹேதம், ஆவுஸோ’’.

‘‘அபி பன தும்ஹே ஆயஸ்மந்தோ ஏவம் ஜானந்தா ஏவம் பஸ்ஸந்தா தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸத² சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே, ஸுக³தே து³க்³க³தே யதா²கம்மூபகே³ ஸத்தே பஜானாத² – ‘இமே வத போ⁴ந்தோ ஸத்தா காயது³ச்சரிதேன ஸமன்னாக³தா வசீது³ச்சரிதேன ஸமன்னாக³தா மனோது³ச்சரிதேன ஸமன்னாக³தா, அரியானம் உபவாத³கா மிச்சா²தி³ட்டி²கா மிச்சா²தி³ட்டி²கம்மஸமாதா³னா, தே காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபன்னா; இமே வா பன போ⁴ந்தோ ஸத்தா காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன ஸமன்னாக³தா, அரியானம் அனுபவாத³கா ஸம்மாதி³ட்டி²கா ஸம்மாதி³ட்டி²கம்மஸமாதா³னா தே காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபன்னா’தி, இதி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸத² சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே, ஸுக³தே து³க்³க³தே யதா²கம்மூபகே³ ஸத்தே பஜானாதா²’’தி? ‘‘நோ ஹேதம், ஆவுஸோ’’.

‘‘அபி பன தும்ஹே ஆயஸ்மந்தோ ஏவம் ஜானந்தா ஏவம் பஸ்ஸந்தா யே தே ஸந்தா விமோக்கா² அதிக்கம்ம ரூபே ஆருப்பா, தே காயேன பு²ஸித்வா விஹரதா²’’தி? ‘‘நோ ஹேதம், ஆவுஸோ’’.

‘‘ஏத்த² தா³னி ஆயஸ்மந்தோ இத³ஞ்ச வேய்யாகரணம் இமேஸஞ்ச த⁴ம்மானம் அஸமாபத்தி; இத³ம் நோ, ஆவுஸோ, கத²’’ந்தி? ‘‘பஞ்ஞாவிமுத்தா கோ² மயம், ஆவுஸோ ஸுஸிமா’’தி.

‘‘ந க்²வாஹம் இமஸ்ஸ ஆயஸ்மந்தானம் ஸம்கி²த்தேன பா⁴ஸிதஸ்ஸ வித்தா²ரேன அத்த²ம் ஆஜானாமி. ஸாது⁴ மே ஆயஸ்மந்தோ ததா² பா⁴ஸந்து யதா²ஹம் இமஸ்ஸ ஆயஸ்மந்தானம் ஸம்கி²த்தேன பா⁴ஸிதஸ்ஸ வித்தா²ரேன அத்த²ம் ஆஜானேய்ய’’ந்தி. ‘‘ஆஜானேய்யாஸி வா த்வம், ஆவுஸோ ஸுஸிம, ந வா த்வம் ஆஜானேய்யாஸி அத² கோ² பஞ்ஞாவிமுத்தா மய’’ந்தி.

அத² கோ² ஆயஸ்மா ஸுஸிமோ உட்டா²யாஸனா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஸுஸிமோ யாவதகோ தேஹி பி⁴க்கூ²ஹி ஸத்³தி⁴ம் அஹோஸி கதா²ஸல்லாபோ தம் ஸப்³ப³ம் ப⁴க³வதோ ஆரோசேஸி. ‘‘புப்³பே³ கோ², ஸுஸிம, த⁴ம்மட்டி²திஞாணம், பச்சா² நிப்³பா³னே ஞாண’’ந்தி.

‘‘ந க்²வாஹம், ப⁴ந்தே, இமஸ்ஸ ப⁴க³வதா [ப⁴க³வதோ (பீ.)] ஸம்கி²த்தேன பா⁴ஸிதஸ்ஸ வித்தா²ரேன அத்த²ம் ஆஜானாமி. ஸாது⁴ மே, ப⁴ந்தே, ப⁴க³வா ததா² பா⁴ஸது யதா²ஹம் இமஸ்ஸ ப⁴க³வதா ஸம்கி²த்தேன பா⁴ஸிதஸ்ஸ வித்தா²ரேன அத்த²ம் ஆஜானேய்ய’’ந்தி. ‘‘ஆஜானேய்யாஸி வா த்வம், ஸுஸிம, ந வா த்வம் ஆஜானேய்யாஸி, அத² கோ² த⁴ம்மட்டி²திஞாணம் புப்³பே³, பச்சா² நிப்³பா³னே ஞாணம்’’.

‘‘தம் கிம் மஞ்ஞஸி, ஸுஸிம, ரூபம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘யம் பனானிச்சம் து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதம், ப⁴ந்தே’’. ‘‘வேத³னா நிச்சா வா அனிச்சா வா’’தி? ‘‘அனிச்சா, ப⁴ந்தே’’. ‘‘யம் பனானிச்சம், து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதம், ப⁴ந்தே’’. ‘‘ஸஞ்ஞா நிச்சா வா அனிச்சா வா’’தி? ‘‘அனிச்சா, ப⁴ந்தே’’…பே… ‘‘ஸங்கா²ரா நிச்சா வா அனிச்சா வா’’தி? ‘‘அனிச்சா, ப⁴ந்தே’’. ‘‘யம் பனானிச்சம் து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதம், ப⁴ந்தே’’. ‘‘விஞ்ஞாணம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘யம் பனானிச்சம் து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதம், ப⁴ந்தே’’.

‘‘தஸ்மாதிஹ, ஸுஸிம, யம் கிஞ்சி ரூபம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் ரூபம் நேதம் மம நேஸோஹமஸ்மி ந மேஸோ அத்தாதி; ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். யா காசி வேத³னா அதீதானாக³தபச்சுப்பன்னா அஜ்ஜ²த்தம் வா ப³ஹித்³தா⁴ வா ஓளாரிகா வா ஸுகு²மா வா ஹீனா வா பணீதா வா யா தூ³ரே ஸந்திகே வா, ஸப்³பா³ வேத³னா நேதம் மம நேஸோஹமஸ்மி ந மேஸோ அத்தாதி; ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். யா காசி ஸஞ்ஞா…பே… யே கேசி ஸங்கா²ரா அதீதானாக³தபச்சுப்பன்னா அஜ்ஜ²த்தம் வா ப³ஹித்³தா⁴ வா ஓளாரிகா வா ஸுகு²மா வா ஹீனா வா பணீதா வா யே தூ³ரே ஸந்திகே வா, ஸப்³பே³ ஸங்கா²ரா நேதம் மம நேஸோஹமஸ்மி ந மேஸோ அத்தாதி; ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். யம் கிஞ்சி விஞ்ஞாணம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் விஞ்ஞாணம் நேதம் மம நேஸோஹமஸ்மி ந மேஸோ அத்தாதி; ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம்.

‘‘ஏவம் பஸ்ஸம், ஸுஸிம, ஸுதவா அரியஸாவகோ ரூபஸ்மிம்பி நிப்³பி³ந்த³தி, வேத³னாயபி நிப்³பி³ந்த³தி, ஸஞ்ஞாயபி நிப்³பி³ந்த³தி, ஸங்கா²ரேஸுபி நிப்³பி³ந்த³தி, விஞ்ஞாணஸ்மிம்பி நிப்³பி³ந்த³தி. நிப்³பி³ந்த³ம் விரஜ்ஜதி, விராகா³ விமுச்சதி, விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதி.

‘‘‘ஜாதிபச்சயா ஜராமரண’ந்தி, ஸுஸிம, பஸ்ஸஸீ’’தி? ‘‘ஏவம், ப⁴ந்தே’’. ‘‘‘ப⁴வபச்சயா ஜாதீ’தி, ஸுஸிம, பஸ்ஸஸீ’’தி? ‘‘ஏவம், ப⁴ந்தே’’. ‘‘‘உபாதா³னபச்சயா ப⁴வோ’தி, ஸுஸிம, பஸ்ஸஸீ’’தி? ‘‘ஏவம், ப⁴ந்தே’’. ‘‘‘தண்ஹாபச்சயா உபாதா³ன’ந்தி, ஸுஸிம, பஸ்ஸஸீ’’தி? ‘‘ஏவம், ப⁴ந்தே’’. ‘‘வேத³னாபச்சயா தண்ஹாதி… ப²ஸ்ஸபச்சயா வேத³னாதி… ஸளாயதனபச்சயா ப²ஸ்ஸோதி… நாமரூபபச்சயா ஸளாயதனந்தி… விஞ்ஞாணபச்சயா நாமரூபந்தி… ஸங்கா²ரபச்சயா விஞ்ஞாணந்தி… அவிஜ்ஜாபச்சயா ஸங்கா²ராதி, ஸுஸிம, பஸ்ஸஸீ’’தி? ‘‘ஏவம், ப⁴ந்தே’’.

‘‘‘ஜாதினிரோதா⁴ ஜராமரணனிரோதோ⁴’தி, ஸுஸிம, பஸ்ஸஸீ’’தி? ‘‘ஏவம், ப⁴ந்தே’’. ‘‘‘ப⁴வனிரோதா⁴ ஜாதினிரோதோ⁴’தி ஸுஸிம, பஸ்ஸஸீ’’தி? ‘‘ஏவம், ப⁴ந்தே’’. ‘‘உபாதா³னனிரோதா⁴ ப⁴வனிரோதோ⁴தி… தண்ஹானிரோதா⁴ உபாதா³னனிரோதோ⁴தி… வேத³னானிரோதா⁴ தண்ஹானிரோதோ⁴தி… ப²ஸ்ஸனிரோதா⁴ வேத³னானிரோதோ⁴தி… ஸளாயதனனிரோதா⁴ ப²ஸ்ஸனிரோதோ⁴தி… நாமரூபனிரோதா⁴ ஸளாயதனனிரோதோ⁴தி… விஞ்ஞாணனிரோதா⁴ நாமரூபனிரோதோ⁴தி… ஸங்கா²ரனிரோதா⁴ விஞ்ஞாணனிரோதோ⁴தி… அவிஜ்ஜானிரோதா⁴ ஸங்கா²ரனிரோதோ⁴தி, ஸுஸிம, பஸ்ஸஸீ’’தி? ‘‘ஏவம், ப⁴ந்தே’’.

‘‘அபி பன த்வம், ஸுஸிம, ஏவம் ஜானந்தோ ஏவம் பஸ்ஸந்தோ அனேகவிஹிதம் இத்³தி⁴வித⁴ம் பச்சனுபோ⁴ஸி – ஏகோபி ஹுத்வா ப³ஹுதா⁴ ஹோஸி, ப³ஹுதா⁴பி ஹுத்வா ஏகோ ஹோஸி; ஆவிபா⁴வம், திரோபா⁴வம், திரோகுட்டம் திரோபாகாரம் திரோபப்³ப³தம் அஸஜ்ஜமானோ க³ச்ச²ஸி, ஸேய்யதா²பி ஆகாஸே; பத²வியாபி உம்முஜ்ஜனிமுஜ்ஜம் கரோஸி, ஸேய்யதா²பி உத³கே; உத³கேபி அபி⁴ஜ்ஜமானோ க³ச்ச²ஸி, ஸேய்யதா²பி பத²வியம்; ஆகாஸேபி பல்லங்கேன கமஸி, ஸேய்யதா²பி பக்கீ² ஸகுணோ; இமேபி சந்தி³மஸூரியே ஏவம்மஹித்³தி⁴கே ஏவம்மஹானுபா⁴வே பாணினா பரிமஸஸி பரிமஜ்ஜஸி, யாவ ப்³ரஹ்மலோகாபி காயேன வஸம் வத்தேஸீ’’தி? ‘‘நோ ஹேதம், ப⁴ந்தே’’.

‘‘அபி பன த்வம், ஸுஸிம, ஏவம் ஜானந்தோ ஏவம் பஸ்ஸந்தோ தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய உபோ⁴ ஸத்³தே³ ஸுணஸி தி³ப்³பே³ ச மானுஸே ச யே தூ³ரே ஸந்திகே சா’’தி? ‘‘நோ ஹேதம், ப⁴ந்தே’’.

‘‘அபி பன த்வம், ஸுஸிம, ஏவம் ஜானந்தோ ஏவம் பஸ்ஸந்தோ பரஸத்தானம் பரபுக்³க³லானம் சேதஸா சேதோ பரிச்ச பஜானாஸி – ஸராக³ம் வா சித்தம் ஸராக³ம் சித்தந்தி பஜானாஸி…பே… விமுத்தம் வா சித்தம் விமுத்தம் சித்தந்தி பஜானாஸீ’’தி? ‘‘நோ ஹேதம், ப⁴ந்தே’’.

‘‘அபி பன த்வம், ஸுஸிம, ஏவம் ஜானந்தோ ஏவம் பஸ்ஸந்தோ அனேகவிஹிதம் புப்³பே³னிவாஸம் அனுஸ்ஸரஸி, ஸேய்யதி²த³ம் – ஏகம்பி ஜாதிம்…பே… இதி ஸாகாரம் ஸஉத்³தே³ஸம் அனேகவிஹிதம் புப்³பே³னிவாஸம் அனுஸ்ஸரஸீ’’தி? ‘‘நோ ஹேதம், ப⁴ந்தே’’.

‘‘அபி பன த்வம், ஸுஸிம, ஏவம் ஜானந்தோ ஏவம் பஸ்ஸந்தோ தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸஸி சவமானே…பே… யதா²கம்மூபகே³ ஸத்தே பஜானாஸீ’’தி? ‘‘நோ ஹேதம், ப⁴ந்தே’’.

‘‘அபி பன த்வம், ஸுஸிம, ஏவம் ஜானந்தோ ஏவம் பஸ்ஸந்தோ யே தே ஸந்தா விமோக்கா² அதிக்கம்ம ரூபே, ஆருப்பா தே காயேன பு²ஸித்வா விஹரஸீ’’தி? ‘‘நோ ஹேதம், ப⁴ந்தே’’.

‘‘ஏத்த² தா³னி, ஸுஸிம, இத³ஞ்ச வேய்யாகரணம் இமேஸஞ்ச த⁴ம்மானம் அஸமாபத்தி, இத³ம் நோ, ஸுஸிம, கத²’’ந்தி?

அத² கோ² ஆயஸ்மா ஸுஸிமோ ப⁴க³வதோ பாதே³ஸு ஸிரஸா நிபதித்வா ப⁴க³வந்தம் ஏதத³வோச – ‘‘அச்சயோ மம், ப⁴ந்தே, அச்சக³மா யதா²பா³லம் யதா²மூள்ஹம் யதா²அகுஸலம், ய்வாஹம் ஏவம் ஸ்வாக்கா²தே த⁴ம்மவினயே த⁴ம்மத்தே²னகோ பப்³ப³ஜிதோ. தஸ்ஸ மே, ப⁴ந்தே, ப⁴க³வா அச்சயம் அச்சயதோ படிக்³க³ண்ஹாது ஆயதிம் ஸம்வராயா’’தி.

‘‘தக்³க⁴ த்வம், ஸுஸிம, அச்சயோ அச்சக³மா யதா²பா³லம் யதா²மூள்ஹம் யதா²அகுஸலம், யோ த்வம் ஏவம் ஸ்வாக்கா²தே த⁴ம்மவினயே த⁴ம்மத்தே²னகோ பப்³ப³ஜிதோ. ஸேய்யதா²பி, ஸுஸிம, சோரம் ஆகு³சாரிம் க³ஹேத்வா ரஞ்ஞோ த³ஸ்ஸேய்யும் – ‘அயம் தே, தே³வ, சோரோ ஆகு³சாரீ, இமஸ்ஸ யம் இச்ச²ஸி தம் த³ண்ட³ம் பணேஹீ’தி. தமேனம் ராஜா ஏவம் வதே³ய்ய – ‘க³ச்ச²த², போ⁴, இமம் புரிஸம் த³ள்ஹாய ரஜ்ஜுயா பச்சா²பா³ஹம் கா³ள்ஹப³ந்த⁴னம் ப³ந்தி⁴த்வா கு²ரமுண்ட³ம் கரித்வா க²ரஸ்ஸரேன பணவேன ரதி²யாய ரதி²யம் ஸிங்கா⁴டகேன ஸிங்கா⁴டகம் பரினேத்வா த³க்கி²ணேன த்³வாரேன நிக்கா²மேத்வா த³க்கி²ணதோ நக³ரஸ்ஸ ஸீஸம் சி²ந்த³தா²’தி. தமேனம் ரஞ்ஞோ புரிஸா த³ள்ஹாய ரஜ்ஜுயா பச்சா²பா³ஹம் கா³ள்ஹப³ந்த⁴னம் ப³ந்தி⁴த்வா கு²ரமுண்ட³ம் கரித்வா க²ரஸ்ஸரேன பணவேன ரதி²யாய ரதி²யம் ஸிங்கா⁴டகேன ஸிங்கா⁴டகம் பரினேத்வா த³க்கி²ணேன த்³வாரேன நிக்கா²மேத்வா த³க்கி²ணதோ நக³ரஸ்ஸ ஸீஸம் சி²ந்தே³ய்யும். தம் கிம் மஞ்ஞஸி, ஸுஸிம, அபி நு ஸோ புரிஸோ ததோனிதா³னம் து³க்க²ம் தோ³மனஸ்ஸம் படிஸம்வேதி³யேதா²’’தி? ‘‘ஏவம், ப⁴ந்தே’’.

‘‘யம் கோ² ஸோ, ஸுஸிம, புரிஸோ ததோனிதா³னம் து³க்க²ம் தோ³மனஸ்ஸம் படிஸம்வேதி³யேத² [படிஸம்வேதி³யேத² வா, ந வா படிஸம்வேதி³யேத² (க.)]. யா ஏவம் ஸ்வாக்கா²தே த⁴ம்மவினயே த⁴ம்மத்தே²னகஸ்ஸ பப்³ப³ஜ்ஜா, அயம் ததோ து³க்க²விபாகதரா ச கடுகவிபாகதரா ச, அபி ச வினிபாதாய ஸம்வத்ததி. யதோ ச கோ² த்வம், ஸுஸிம, அச்சயம் அச்சயதோ தி³ஸ்வா யதா²த⁴ம்மம் படிகரோஸி தம் தே மயம் படிக்³க³ண்ஹாம. வுத்³தி⁴ ஹேஸா, ஸுஸிம, அரியஸ்ஸ வினயே யோ அச்சயம் அச்சயதோ தி³ஸ்வா யதா²த⁴ம்மம் படிகரோதி, ஆயதிஞ்ச [ஆயதிம் (ஸ்யா. கம்.)] ஸம்வரம் ஆபஜ்ஜதீ’’தி. த³ஸமம்.

மஹாவக்³கோ³ ஸத்தமோ.

தஸ்ஸுத்³தா³னம் –

த்³வே அஸ்ஸுதவதா வுத்தா, புத்தமம்ஸேன சாபரம்;

அத்தி²ராகோ³ ச நக³ரம், ஸம்மஸம் நளகலாபியம்;

கோஸம்பீ³ உபயந்தி ச, த³ஸமோ ஸுஸிமேன சாதி [த³ஸமோ வுத்தோ ஸுஸீமேனாதி (ஸீ.)].