4. து³தியஸம்யோஜனஸுத்தம்

54. ஸாவத்தி²யம் விஹரதி …பே… ‘‘ஸேய்யதா²பி, பி⁴க்க²வே, தேலஞ்ச படிச்ச வட்டிஞ்ச படிச்ச தேலப்பதீ³போ ஜா²யேய்ய. தத்ர புரிஸோ காலேன காலம் தேலம் ஆஸிஞ்சேய்ய வட்டிம் உபஸம்ஹரேய்ய. ஏவஞ்ஹி ஸோ, பி⁴க்க²வே, தேலப்பதீ³போ ததா³ஹாரோ தது³பாதா³னோ சிரம் தீ³க⁴மத்³தா⁴னம் ஜலேய்ய. ஏவமேவ கோ², பி⁴க்க²வே, ஸம்யோஜனியேஸு த⁴ம்மேஸு அஸ்ஸாதா³னுபஸ்ஸினோ விஹரதோ தண்ஹா பவட்³ட⁴தி. தண்ஹாபச்சயா உபாதா³னம்…பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி’’.

‘‘ஸேய்யதா²பி, பி⁴க்க²வே, தேலஞ்ச படிச்ச வட்டிஞ்ச படிச்ச தேலப்பதீ³போ ஜா²யேய்ய. தத்ர புரிஸோ ந காலேன காலம் தேலம் ஆஸிஞ்சேய்ய ந வட்டிம் உபஸம்ஹரேய்ய. ஏவஞ்ஹி ஸோ, பி⁴க்க²வே, தேலப்பதீ³போ புரிமஸ்ஸ ச உபாதா³னஸ்ஸ பரியாதா³னா அஞ்ஞஸ்ஸ ச அனுபஹாரா அனாஹாரோ நிப்³பா³யேய்ய. ஏவமேவ கோ², பி⁴க்க²வே, ஸம்யோஜனியேஸு த⁴ம்மேஸு ஆதீ³னவானுபஸ்ஸினோ விஹரதோ தண்ஹா நிருஜ்ஜ²தி. தண்ஹானிரோதா⁴ உபாதா³னனிரோதோ⁴…பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி. சதுத்த²ம்.