5. ஞாதிகஸுத்தம்

45. ஏவம் மே ஸுதம் – ஏகம் ஸமயம் ப⁴க³வா ஞாதிகே விஹரதி கி³ஞ்ஜகாவஸதே². அத² கோ² ப⁴க³வா ரஹோக³தோ படிஸல்லானோ இமம் த⁴ம்மபரியாயம் அபா⁴ஸி –

‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணம். திண்ணம் ஸங்க³தி ப²ஸ்ஸோ. ப²ஸ்ஸபச்சயா வேத³னா, வேத³னாபச்சயா தண்ஹா; தண்ஹாபச்சயா உபாதா³னம்…பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.

‘‘ஸோதஞ்ச படிச்ச ஸத்³தே³ ச…பே… கா⁴னஞ்ச படிச்ச க³ந்தே⁴ ச… ஜிவ்ஹஞ்ச படிச்ச ரஸே ச… காயஞ்ச படிச்ச போ²ட்ட²ப்³பே³ ச… மனஞ்ச படிச்ச த⁴ம்மே ச உப்பஜ்ஜதி மனோவிஞ்ஞாணம். திண்ணம் ஸங்க³தி ப²ஸ்ஸோ. ப²ஸ்ஸபச்சயா வேத³னா; வேத³னாபச்சயா தண்ஹா; தண்ஹாபச்சயா உபாதா³னம்…பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.

‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணம். திண்ணம் ஸங்க³தி ப²ஸ்ஸோ. ப²ஸ்ஸபச்சயா வேத³னா; வேத³னாபச்சயா தண்ஹா. தஸ்ஸாயேவ தண்ஹாய அஸேஸவிராக³னிரோதா⁴ உபாதா³னனிரோதோ⁴; உபாதா³னனிரோதா⁴ ப⁴வனிரோதோ⁴…பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதி.

‘‘ஸோதஞ்ச படிச்ச ஸத்³தே³ ச…பே… மனஞ்ச படிச்ச த⁴ம்மே ச உப்பஜ்ஜதி மனோவிஞ்ஞாணம். திண்ணம் ஸங்க³தி ப²ஸ்ஸோ. ப²ஸ்ஸபச்சயா வேத³னா; வேத³னாபச்சயா தண்ஹா. தஸ்ஸாயேவ தண்ஹாய அஸேஸவிராக³னிரோதா⁴ உபாதா³னனிரோதோ⁴; உபாதா³னனிரோதா⁴ ப⁴வனிரோதோ⁴…பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி.

தேன கோ² பன ஸமயேன அஞ்ஞதரோ பி⁴க்கு² ப⁴க³வதோ உபஸ்ஸுதி [உபஸ்ஸுதிம் (ஸீ. பீ.)] டி²தோ ஹோதி. அத்³த³ஸா கோ² ப⁴க³வா தம் பி⁴க்கு²ம் உபஸ்ஸுதி டி²தம். தி³ஸ்வான தம் பி⁴க்கு²ம் ஏதத³வோச – ‘‘அஸ்ஸோஸி நோ த்வம், பி⁴க்கு², இமம் த⁴ம்மபரியாய’’ந்தி? ‘‘ஏவம், ப⁴ந்தே’’தி. ‘‘உக்³க³ண்ஹாஹி த்வம், பி⁴க்கு², இமம் த⁴ம்மபரியாயம்; பரியாபுணாஹி த்வம், பி⁴க்கு², இமம் த⁴ம்மபரியாயம்; தா⁴ரேஹி த்வம், பி⁴க்கு², இமம் த⁴ம்மபரியாயம். அத்த²ஸம்ஹிதோ அயம் [அத்த²ஸம்ஹிதோயம் (ஸீ. ஸ்யா. கம்.), அத்த²ஸம்ஹிதாயம் (பீ. க.)], பி⁴க்கு², த⁴ம்மபரியாயோ ஆதி³ப்³ரஹ்மசரியகோ’’தி. பஞ்சமம்.