2. து³தியபஞ்சவேரப⁴யஸுத்தம்

42. ஸாவத்தி²யம் விஹரதி…பே… ‘‘யதோ கோ², பி⁴க்க²வே, அரியஸாவகஸ்ஸ பஞ்ச ப⁴யானி வேரானி வூபஸந்தானி ஹோந்தி, சதூஹி ச ஸோதாபத்தியங்கே³ஹி ஸமன்னாக³தோ ஹோதி, அரியோ சஸ்ஸ ஞாயோ பஞ்ஞாய ஸுதி³ட்டோ² ஹோதி ஸுப்படிவித்³தோ⁴, ஸோ ஆகங்க²மானோ அத்தனாவ அத்தானம் ப்³யாகரேய்ய – ‘கீ²ணனிரயோம்ஹி கீ²ணதிரச்சா²னயோனி கீ²ணபேத்திவிஸயோ கீ²ணாபாயது³க்³க³திவினிபாதோ, ஸோதாபன்னோஹமஸ்மி அவினிபாதத⁴ம்மோ நியதோ ஸம்போ³தி⁴பராயனோ’’’தி.

‘‘கதமானி பஞ்ச ப⁴யானி வேரானி வூபஸந்தானி ஹோந்தி? யம், பி⁴க்க²வே, பாணாதிபாதீ …பே… யம், பி⁴க்க²வே, அதி³ன்னாதா³யீ…பே… யம், பி⁴க்க²வே, காமேஸுமிச்சா²சாரீ… யம், பி⁴க்க²வே, முஸாவாதீ³… யம், பி⁴க்க²வே, ஸுராமேரயமஜ்ஜபமாத³ட்டா²யீ…பே… இமானி பஞ்ச ப⁴யானி வேரானி வூபஸந்தானி ஹோந்தி.

‘‘கதமேஹி சதூஹி ஸோதாபத்தியங்கே³ஹி ஸமன்னாக³தோ ஹோதி? இத⁴, பி⁴க்க²வே, அரியஸாவகோ பு³த்³தே⁴…பே… த⁴ம்மே… ஸங்கே⁴… அரியகந்தேஹி ஸீலேஹி ஸமன்னாக³தோ ஹோதி. இமேஹி சதூஹி ஸோதாபத்தியங்கே³ஹி ஸமன்னாக³தோ ஹோதி.

‘‘கதமோ சஸ்ஸ அரியோ ஞாயோ பஞ்ஞாய ஸுதி³ட்டோ² ஹோதி ஸுப்படிவித்³தோ⁴? இத⁴, பி⁴க்க²வே, அரியஸாவகோ படிச்சஸமுப்பாத³ஞ்ஞேவ ஸாது⁴கம் யோனிஸோ மனஸி கரோதி…பே… அயமஸ்ஸ அரியோ ஞாயோ பஞ்ஞாய ஸுதி³ட்டோ² ஹோதி ஸுப்படிவித்³தோ⁴.

‘‘யதோ கோ², பி⁴க்க²வே, அரியஸாவகஸ்ஸ இமானி பஞ்ச ப⁴யானி வேரானி வூபஸந்தானி ஹோந்தி, இமேஹி ச சதூஹி ஸோதாபத்தியங்கே³ஹி ஸமன்னாக³தோ ஹோதி, அயஞ்சஸ்ஸ அரியோ ஞாயோ பஞ்ஞாய ஸுதி³ட்டோ² ஹோதி ஸுப்படிவித்³தோ⁴, ஸோ ஆகங்க²மானோ அத்தனாவ அத்தானம் ப்³யாகரேய்ய – ‘கீ²ணனிரயோம்ஹி கீ²ணதிரச்சா²னயோனி கீ²ணபேத்திவிஸயோ கீ²ணாபாயது³க்³க³திவினிபாதோ, ஸோதாபன்னோஹமஸ்மி அவினிபாதத⁴ம்மோ நியதோ ஸம்போ³தி⁴பராயனோ’’’தி. து³தியம்.