3. ஞாணவத்து²ஸுத்தம்

33. ஸாவத்தி²யம்…பே… ‘‘சதுசத்தாரீஸம் வோ, பி⁴க்க²வே, ஞாணவத்தூ²னி தே³ஸேஸ்ஸாமி, தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘கதமானி [கதமானி ச (ஸ்யா. கம். பீ. க.)], பி⁴க்க²வே, சதுசத்தாரீஸம் ஞாணவத்தூ²னி? ஜராமரணே ஞாணம், ஜராமரணஸமுத³யே ஞாணம், ஜராமரணனிரோதே⁴ ஞாணம், ஜராமரணனிரோத⁴கா³மினியா படிபதா³ய ஞாணம்; ஜாதியா ஞாணம், ஜாதிஸமுத³யே ஞாணம், ஜாதினிரோதே⁴ ஞாணம், ஜாதினிரோத⁴கா³மினியா படிபதா³ய ஞாணம்; ப⁴வே ஞாணம், ப⁴வஸமுத³யே ஞாணம், ப⁴வனிரோதே⁴ ஞாணம், ப⁴வனிரோத⁴கா³மினியா படிபதா³ய ஞாணம்; உபாதா³னே ஞாணம், உபாதா³னஸமுத³யே ஞாணம், உபாதா³னனிரோதே⁴ ஞாணம், உபாதா³னனிரோத⁴கா³மினியா படிபதா³ய ஞாணம்; தண்ஹாய ஞாணம், தண்ஹாஸமுத³யே ஞாணம், தண்ஹானிரோதே⁴ ஞாணம், தண்ஹானிரோத⁴கா³மினியா படிபதா³ய ஞாணம்; வேத³னாய ஞாணம், வேத³னாஸமுத³யே ஞாணம், வேத³னானிரோதே⁴ ஞாணம், வேத³னானிரோத⁴கா³மினியா படிபதா³ய ஞாணம்; ப²ஸ்ஸே ஞாணம்…பே… ஸளாயதனே ஞாணம்… நாமரூபே ஞாணம்… விஞ்ஞாணே ஞாணம்… ஸங்கா²ரேஸு ஞாணம், ஸங்கா²ரஸமுத³யே ஞாணம், ஸங்கா²ரனிரோதே⁴ ஞாணம், ஸங்கா²ரனிரோத⁴கா³மினியா படிபதா³ய ஞாணம். இமானி வுச்சந்தி, பி⁴க்க²வே, சதுசத்தாரீஸம் ஞாணவத்தூ²னி.

‘‘கதமஞ்ச, பி⁴க்க²வே, ஜராமரணம்? யா தேஸம் தேஸம் ஸத்தானம் தம்ஹி தம்ஹி ஸத்தனிகாயே ஜரா ஜீரணதா க²ண்டி³ச்சம் பாலிச்சம் வலித்தசதா ஆயுனோ ஸம்ஹானி இந்த்³ரியானம் பரிபாகோ, அயம் வுச்சதி ஜரா. யா தேஸம் தேஸம் ஸத்தானம் தம்ஹா தம்ஹா ஸத்தனிகாயா சுதி சவனதா பே⁴தோ³ அந்தரதா⁴னம் மச்சு மரணம் காலகிரியா க²ந்தா⁴னம் பே⁴தோ³ களேவரஸ்ஸ நிக்கே²போ. இத³ம் வுச்சதி மரணம். இதி அயஞ்ச ஜரா, இத³ஞ்ச மரணம்; இத³ம் வுச்சதி, பி⁴க்க²வே, ஜராமரணம்.

‘‘ஜாதிஸமுத³யா ஜராமரணஸமுத³யோ; ஜாதினிரோதா⁴ ஜராமரணனிரோதோ⁴; அயமேவ அரியோ அட்ட²ங்கி³கோ மக்³கோ³ ஜராமரணனிரோத⁴கா³மினீ படிபதா³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴.

‘‘யதோ கோ², பி⁴க்க²வே, அரியஸாவகோ ஏவம் ஜராமரணம் பஜானாதி, ஏவம் ஜராமரணஸமுத³யம் பஜானாதி, ஏவம் ஜராமரணனிரோத⁴ம் பஜானாதி, ஏவம் ஜராமரணனிரோத⁴கா³மினிம் படிபத³ம் பஜானாதி, இத³மஸ்ஸ த⁴ம்மே ஞாணம். ஸோ இமினா த⁴ம்மேன தி³ட்டே²ன விதி³தேன அகாலிகேன பத்தேன பரியோகா³ள்ஹேன அதீதானாக³தேன யம் நேதி.

‘‘யே கோ² கேசி அதீதமத்³தா⁴னம் ஸமணா வா ப்³ராஹ்மணா வா ஜராமரணம் அப்³ப⁴ஞ்ஞம்ஸு, ஜராமரணஸமுத³யம் அப்³ப⁴ஞ்ஞம்ஸு, ஜராமரணனிரோத⁴ம் அப்³ப⁴ஞ்ஞம்ஸு, ஜராமரணனிரோத⁴கா³மினிம் படிபத³ம் அப்³ப⁴ஞ்ஞம்ஸு, ஸப்³பே³ தே ஏவமேவ அப்³ப⁴ஞ்ஞம்ஸு, ஸேய்யதா²பாஹம் ஏதரஹி.

‘‘யேபி ஹி கேசி அனாக³தமத்³தா⁴னம் ஸமணா வா ப்³ராஹ்மணா வா ஜராமரணம் அபி⁴ஜானிஸ்ஸந்தி, ஜராமரணஸமுத³யம் அபி⁴ஜானிஸ்ஸந்தி, ஜராமரணனிரோத⁴ம் அபி⁴ஜானிஸ்ஸந்தி, ஜராமரணனிரோத⁴கா³மினிம் படிபத³ம் அபி⁴ஜானிஸ்ஸந்தி, ஸப்³பே³ தே ஏவமேவ அபி⁴ஜானிஸ்ஸந்தி, ஸேய்யதா²பாஹம் ஏதரஹீதி. இத³மஸ்ஸ அன்வயே ஞாணம்.

‘‘யதோ கோ², பி⁴க்க²வே, அரியஸாவகஸ்ஸ இமானி த்³வே ஞாணானி பரிஸுத்³தா⁴னி ஹோந்தி பரியோதா³தானி – த⁴ம்மே ஞாணஞ்ச அன்வயே ஞாணஞ்ச. அயம் வுச்சதி, பி⁴க்க²வே, அரியஸாவகோ தி³ட்டி²ஸம்பன்னோ இதிபி, த³ஸ்ஸனஸம்பன்னோ இதிபி, ஆக³தோ இமம் ஸத்³த⁴ம்மம் இதிபி, பஸ்ஸதி இமம் ஸத்³த⁴ம்மம் இதிபி, ஸேக்கே²ன ஞாணேன ஸமன்னாக³தோ இதிபி, ஸேக்கா²ய விஜ்ஜாய ஸமன்னாக³தோ இதிபி, த⁴ம்மஸோதம் ஸமாபன்னோ இதிபி, அரியோ நிப்³பே³தி⁴கபஞ்ஞோ இதிபி, அமதத்³வாரம் ஆஹச்ச திட்ட²தி இதிபீதி.

‘‘கதமா ச, பி⁴க்க²வே, ஜாதி…பே… கதமோ ச, பி⁴க்க²வே, ப⁴வோ… கதமஞ்ச, பி⁴க்க²வே, உபாதா³னம்… கதமா ச, பி⁴க்க²வே தண்ஹா… கதமா ச, பி⁴க்க²வே, வேத³னா… கதமோ ச, பி⁴க்க²வே, ப²ஸ்ஸோ… கதமஞ்ச, பி⁴க்க²வே, ஸளாயதனம்… கதமஞ்ச, பி⁴க்க²வே, நாமரூபம் … கதமஞ்ச, பி⁴க்க²வே, விஞ்ஞாணம்… கதமே ச, பி⁴க்க²வே, ஸங்கா²ரா? தயோமே, பி⁴க்க²வே, ஸங்கா²ரா – காயஸங்கா²ரோ, வசீஸங்கா²ரோ, சித்தஸங்கா²ரோதி. இமே வுச்சந்தி, பி⁴க்க²வே, ஸங்கா²ரா.

‘‘அவிஜ்ஜாஸமுத³யா ஸங்கா²ரஸமுத³யோ; அவிஜ்ஜானிரோதா⁴ ஸங்கா²ரனிரோதோ⁴; அயமேவ அரியோ அட்ட²ங்கி³கோ மக்³கோ³ ஸங்கா²ரனிரோத⁴கா³மினீ படிபதா³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴.

‘‘யதோ கோ², பி⁴க்க²வே, அரியஸாவகோ ஏவம் ஸங்கா²ரே பஜானாதி, ஏவம் ஸங்கா²ரஸமுத³யம் பஜானாதி, ஏவம் ஸங்கா²ரனிரோத⁴ம் பஜானாதி, ஏவம் ஸங்கா²ரனிரோத⁴கா³மினிம் படிபத³ம் பஜானாதி, இத³மஸ்ஸ த⁴ம்மே ஞாணம். ஸோ இமினா த⁴ம்மேன தி³ட்டே²ன விதி³தேன அகாலிகேன பத்தேன பரியோகா³ள்ஹேன அதீதானாக³தேன யம் நேதி.

‘‘யே கோ² கேசி அதீதமத்³தா⁴னம் ஸமணா வா ப்³ராஹ்மணா வா ஸங்கா²ரே அப்³ப⁴ஞ்ஞம்ஸு, ஸங்கா²ரஸமுத³யம் அப்³ப⁴ஞ்ஞம்ஸு, ஸங்கா²ரனிரோத⁴ம் அப்³ப⁴ஞ்ஞம்ஸு, ஸங்கா²ரனிரோத⁴கா³மினிம் படிபத³ம் அப்³ப⁴ஞ்ஞம்ஸு, ஸப்³பே³ தே ஏவமேவ அப்³ப⁴ஞ்ஞம்ஸு, ஸேய்யதா²பாஹம் ஏதரஹி.

‘‘யேபி ஹி கேசி அனாக³தமத்³தா⁴னம் ஸமணா வா ப்³ராஹ்மணா வா ஸங்கா²ரே அபி⁴ஜானிஸ்ஸந்தி, ஸங்கா²ரஸமுத³யம் அபி⁴ஜானிஸ்ஸந்தி, ஸங்கா²ரனிரோத⁴ம் அபி⁴ஜானிஸ்ஸந்தி, ஸங்கா²ரனிரோத⁴கா³மினிம் படிபத³ம் அபி⁴ஜானிஸ்ஸந்தி, ஸப்³பே³ தே ஏவமேவ அபி⁴ஜானிஸ்ஸந்தி, ஸேய்யதா²பாஹம் ஏதரஹி. இத³மஸ்ஸ அன்வயே ஞாணம்.

‘‘யதோ கோ², பி⁴க்க²வே, அரியஸாவகஸ்ஸ இமானி த்³வே ஞாணானி பரிஸுத்³தா⁴னி ஹோந்தி பரியோதா³தானி – த⁴ம்மே ஞாணஞ்ச அன்வயே ஞாணஞ்ச. அயம் வுச்சதி, பி⁴க்க²வே, அரியஸாவகோ தி³ட்டி²ஸம்பன்னோ இதிபி, த³ஸ்ஸனஸம்பன்னோ இதிபி, ஆக³தோ இமம் ஸத்³த⁴ம்மம் இதிபி, பஸ்ஸதி இமம் ஸத்³த⁴ம்மம் இதிபி, ஸேக்கே²ன ஞாணேன ஸமன்னாக³தோ இதிபி, ஸேக்கா²ய விஜ்ஜாய ஸமன்னாக³தோ இதிபி, த⁴ம்மஸோதம் ஸமாபன்னோ இதிபி, அரியோ நிப்³பே³தி⁴கபஞ்ஞோ இதிபி, அமதத்³வாரம் ஆஹச்ச திட்ட²தி இதிபீ’’தி. ததியம்.