4. து³தியஞாணவத்து²ஸுத்தம்

34. ஸாவத்தி²யம் விஹரதி…பே… ‘‘ஸத்தஸத்தரி வோ, பி⁴க்க²வே, ஞாணவத்தூ²னி தே³ஸேஸ்ஸாமி. தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘கதமானி, பி⁴க்க²வே, ஸத்தஸத்தரி ஞாணவத்தூ²னி? ஜாதிபச்சயா ஜராமரணந்தி ஞாணம்; அஸதி ஜாதியா நத்தி² ஜராமரணந்தி ஞாணம்; அதீதம்பி அத்³தா⁴னம் ஜாதிபச்சயா ஜராமரணந்தி ஞாணம், அஸதி ஜாதியா நத்தி² ஜராமரணந்தி ஞாணம்; அனாக³தம்பி அத்³தா⁴னம் ஜாதிபச்சயா ஜராமரணந்தி ஞாணம், அஸதி ஜாதியா நத்தி² ஜராமரணந்தி ஞாணம்; யம்பிஸ்ஸ தம் த⁴ம்மட்டி²திஞாணம் தம்பி க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மந்தி ஞாணம்.

‘‘ப⁴வபச்சயா ஜாதீதி ஞாணம்…பே… உபாதா³னபச்சயா ப⁴வோதி ஞாணம்… தண்ஹாபச்சயா உபாதா³னந்தி ஞாணம்… வேத³னாபச்சயா தண்ஹாதி ஞாணம்… ப²ஸ்ஸபச்சயா வேத³னாதி ஞாணம்… ஸளாயதனபச்சயா ப²ஸ்ஸோதி ஞாணம்… நாமரூபபச்சயா ஸளாயதனந்தி ஞாணம்… விஞ்ஞாணபச்சயா நாமரூபந்தி ஞாணம்… ஸங்கா²ரபச்சயா விஞ்ஞாணந்தி ஞாணம்; அவிஜ்ஜாபச்சயா ஸங்கா²ராதி ஞாணம், அஸதி அவிஜ்ஜாய நத்தி² ஸங்கா²ராதி ஞாணம்; அதீதம்பி அத்³தா⁴னம் அவிஜ்ஜாபச்சயா ஸங்கா²ராதி ஞாணம், அஸதி அவிஜ்ஜாய நத்தி² ஸங்கா²ராதி ஞாணம்; அனாக³தம்பி அத்³தா⁴னம் அவிஜ்ஜாபச்சயா ஸங்கா²ராதி ஞாணம், அஸதி அவிஜ்ஜாய நத்தி² ஸங்கா²ராதி ஞாணம்; யம்பிஸ்ஸ தம் த⁴ம்மட்டி²திஞாணம் தம்பி க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மந்தி ஞாணம். இமானி வுச்சந்தி, பி⁴க்க²வே, ஸத்தஸத்தரி ஞாணவத்தூ²னீ’’தி. சதுத்த²ம்.