10. ததியசேதனாஸுத்தம்

40. ஸாவத்தி²யம் விஹரதி…பே… ‘‘யஞ்ச, பி⁴க்க²வே, சேதேதி யஞ்ச பகப்பேதி யஞ்ச அனுஸேதி ஆரம்மணமேதம் ஹோதி விஞ்ஞாணஸ்ஸ டி²தியா. ஆரம்மணே ஸதி பதிட்டா² விஞ்ஞாணஸ்ஸ ஹோதி. தஸ்மிம் பதிட்டி²தே விஞ்ஞாணே விரூள்ஹே நதி ஹோதி. நதியா ஸதி ஆக³திக³தி ஹோதி. ஆக³திக³தியா ஸதி சுதூபபாதோ ஹோதி. சுதூபபாதே ஸதி ஆயதிம் ஜாதிஜராமரணம் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி’’.

‘‘நோ சே, பி⁴க்க²வே, சேதேதி நோ சே பகப்பேதி அத² சே அனுஸேதி, ஆரம்மணமேதம் ஹோதி விஞ்ஞாணஸ்ஸ டி²தியா. ஆரம்மணே ஸதி பதிட்டா² விஞ்ஞாணஸ்ஸ ஹோதி. தஸ்மிம் பதிட்டி²தே விஞ்ஞாணே விரூள்ஹே நதி ஹோதி. நதியா ஸதி ஆக³திக³தி ஹோதி. ஆக³திக³தியா ஸதி சுதூபபாதோ ஹோதி. சுதூபபாதே ஸதி ஆயதிம் ஜாதிஜராமரணம் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.

‘‘யதோ ச கோ², பி⁴க்க²வே, நோ சேவ சேதேதி நோ ச பகப்பேதி நோ ச அனுஸேதி, ஆரம்மணமேதம் ந ஹோதி விஞ்ஞாணஸ்ஸ டி²தியா. ஆரம்மணே அஸதி பதிட்டா² விஞ்ஞாணஸ்ஸ ந ஹோதி. தத³ப்பதிட்டி²தே விஞ்ஞாணே அவிரூள்ஹே நதி ந ஹோதி. நதியா அஸதி ஆக³திக³தி ந ஹோதி. ஆக³திக³தியா அஸதி சுதூபபாதோ ந ஹோதி. சுதூபபாதே அஸதி ஆயதிம் ஜாதி ஜராமரணம் ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி. த³ஸமம்.

களாரக²த்தியவக்³கோ³ சதுத்தோ².

தஸ்ஸுத்³தா³னம் –

பூ⁴தமித³ம் களாரஞ்ச, து³வே ச ஞாணவத்தூ²னி;

அவிஜ்ஜாபச்சயா ச த்³வே, நதும்ஹா சேதனா தயோதி.