2. விப⁴ங்க³ஸுத்தம்

2. ஸாவத்தி²யம் விஹரதி…பே… ‘‘படிச்சஸமுப்பாத³ம் வோ, பி⁴க்க²வே, தே³ஸேஸ்ஸாமி விப⁴ஜிஸ்ஸாமி. தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘கதமோ ச, பி⁴க்க²வே, படிச்சஸமுப்பாதோ³? அவிஜ்ஜாபச்சயா, பி⁴க்க²வே, ஸங்கா²ரா; ஸங்கா²ரபச்சயா விஞ்ஞாணம்; விஞ்ஞாணபச்சயா நாமரூபம்; நாமரூபபச்சயா ஸளாயதனம்; ஸளாயதனபச்சயா ப²ஸ்ஸோ; ப²ஸ்ஸபச்சயா வேத³னா; வேத³னாபச்சயா தண்ஹா; தண்ஹாபச்சயா உபாதா³னம்; உபாதா³னபச்சயா ப⁴வோ; ப⁴வபச்சயா ஜாதி; ஜாதிபச்சயா ஜராமரணம் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.

‘‘கதமஞ்ச, பி⁴க்க²வே, ஜராமரணம்? யா தேஸம் தேஸம் ஸத்தானம் தம்ஹி தம்ஹி ஸத்தனிகாயே ஜரா ஜீரணதா க²ண்டி³ச்சம் பாலிச்சம் வலித்தசதா ஆயுனோ ஸம்ஹானி இந்த்³ரியானம் பரிபாகோ; அயம் வுச்சதி ஜரா. யா தேஸம் தேஸம் ஸத்தானம் தம்ஹா தம்ஹா ஸத்தனிகாயா சுதி சவனதா பே⁴தோ³ அந்தரதா⁴னம் மச்சு மரணம் காலகிரியா க²ந்தா⁴னம் பே⁴தோ³ களேவரஸ்ஸ நிக்கே²போ ( ) [(ஜீவிதிந்த்³ரியஸ்ஸ உபச்சே²தோ³) (ஸ்யா. கம்.) ஏவமுபரிபி, அட்ட²கதா²யம் பன ந தி³ஸ்ஸதி], இத³ம் வுச்சதி மரணம். இதி அயஞ்ச ஜரா, இத³ஞ்ச மரணம். இத³ம் வுச்சதி, பி⁴க்க²வே, ஜராமரணம்.

‘‘கதமா ச, பி⁴க்க²வே, ஜாதி? யா தேஸம் தேஸம் ஸத்தானம் தம்ஹி தம்ஹி ஸத்தனிகாயே ஜாதி ஸஞ்ஜாதி ஓக்கந்தி நிப்³ப³த்தி அபி⁴னிப்³ப³த்தி க²ந்தா⁴னம் பாதுபா⁴வோ ஆயதனானம் படிலாபோ⁴. அயம் வுச்சதி, பி⁴க்க²வே, ஜாதி.

‘‘கதமோ ச, பி⁴க்க²வே, ப⁴வோ? தயோ மே, பி⁴க்க²வே, ப⁴வா – காமப⁴வோ, ரூபப⁴வோ, அரூபப⁴வோ. அயம் வுச்சதி, பி⁴க்க²வே, ப⁴வோ.

‘‘கதமஞ்ச, பி⁴க்க²வே, உபாதா³னம்? சத்தாரிமானி, பி⁴க்க²வே, உபாதா³னானி – காமுபாதா³னம், தி³ட்டு²பாதா³னம், ஸீலப்³ப³துபாதா³னம், அத்தவாது³பாதா³னம். இத³ம் வுச்சதி, பி⁴க்க²வே, உபாதா³னம்.

‘‘கதமா ச, பி⁴க்க²வே, தண்ஹா? ச²யிமே, பி⁴க்க²வே, தண்ஹாகாயா – ரூபதண்ஹா, ஸத்³த³தண்ஹா, க³ந்த⁴தண்ஹா, ரஸதண்ஹா, போ²ட்ட²ப்³ப³தண்ஹா, த⁴ம்மதண்ஹா. அயம் வுச்சதி, பி⁴க்க²வே, தண்ஹா.

‘‘கதமா ச, பி⁴க்க²வே, வேத³னா? ச²யிமே, பி⁴க்க²வே, வேத³னாகாயா – சக்கு²ஸம்ப²ஸ்ஸஜா வேத³னா, ஸோதஸம்ப²ஸ்ஸஜா வேத³னா, கா⁴னஸம்ப²ஸ்ஸஜா வேத³னா, ஜிவ்ஹாஸம்ப²ஸ்ஸஜா வேத³னா, காயஸம்ப²ஸ்ஸஜா வேத³னா, மனோஸம்ப²ஸ்ஸஜா வேத³னா. அயம் வுச்சதி, பி⁴க்க²வே, வேத³னா.

‘‘கதமோ ச, பி⁴க்க²வே, ப²ஸ்ஸோ? ச²யிமே, பி⁴க்க²வே, ப²ஸ்ஸகாயா – சக்கு²ஸம்ப²ஸ்ஸோ, ஸோதஸம்ப²ஸ்ஸோ, கா⁴னஸம்ப²ஸ்ஸோ, ஜிவ்ஹாஸம்ப²ஸ்ஸோ, காயஸம்ப²ஸ்ஸோ, மனோஸம்ப²ஸ்ஸோ. அயம் வுச்சதி, பி⁴க்க²வே, ப²ஸ்ஸோ.

‘‘கதமஞ்ச, பி⁴க்க²வே, ஸளாயதனம்? சக்கா²யதனம், ஸோதாயதனம், கா⁴னாயதனம், ஜிவ்ஹாயதனம், காயாயதனம், மனாயதனம் – இத³ம் வுச்சதி, பி⁴க்க²வே, ஸளாயதனம்.

‘‘கதமஞ்ச, பி⁴க்க²வே, நாமரூபம்? வேத³னா, ஸஞ்ஞா, சேதனா, ப²ஸ்ஸோ, மனஸிகாரோ – இத³ம் வுச்சதி நாமம். சத்தாரோ ச மஹாபூ⁴தா, சதுன்னஞ்ச மஹாபூ⁴தானம் உபாதா³யரூபம். இத³ம் வுச்சதி ரூபம். இதி இத³ஞ்ச நாமம், இத³ஞ்ச ரூபம். இத³ம் வுச்சதி, பி⁴க்க²வே, நாமரூபம்.

‘‘கதமஞ்ச, பி⁴க்க²வே, விஞ்ஞாணம்? ச²யிமே, பி⁴க்க²வே, விஞ்ஞாணகாயா – சக்கு²விஞ்ஞாணம், ஸோதவிஞ்ஞாணம், கா⁴னவிஞ்ஞாணம், ஜிவ்ஹாவிஞ்ஞாணம், காயவிஞ்ஞாணம், மனோவிஞ்ஞாணம். இத³ம் வுச்சதி, பி⁴க்க²வே, விஞ்ஞாணம்.

‘‘கதமே ச, பி⁴க்க²வே, ஸங்கா²ரா? தயோமே, பி⁴க்க²வே, ஸங்கா²ரா – காயஸங்கா²ரோ, வசீஸங்கா²ரோ, சித்தஸங்கா²ரோ. இமே வுச்சந்தி, பி⁴க்க²வே, ஸங்கா²ரா.

‘‘கதமா ச, பி⁴க்க²வே, அவிஜ்ஜா? யம் கோ², பி⁴க்க²வே, து³க்கே² அஞ்ஞாணம், து³க்க²ஸமுத³யே அஞ்ஞாணம், து³க்க²னிரோதே⁴ அஞ்ஞாணம், து³க்க²னிரோத⁴கா³மினியா படிபதா³ய அஞ்ஞாணம். அயம் வுச்சதி, பி⁴க்க²வே, அவிஜ்ஜா.

‘‘இதி கோ², பி⁴க்க²வே, அவிஜ்ஜாபச்சயா ஸங்கா²ரா; ஸங்கா²ரபச்சயா விஞ்ஞாணம்…பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. அவிஜ்ஜாய த்வேவ அஸேஸவிராக³னிரோதா⁴ ஸங்கா²ரனிரோதோ⁴; ஸங்கா²ரனிரோதா⁴ விஞ்ஞாணனிரோதோ⁴…பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி. து³தியம்.