2. அய்யிகாஸுத்தம்

133. ஸாவத்தி²னிதா³னம். ஏகமந்தம் நிஸின்னம் கோ² ராஜானம் பஸேனதி³ம் கோஸலம் ப⁴க³வா ஏதத³வோச – ‘‘ஹந்த³, குதோ நு த்வம், மஹாராஜ, ஆக³ச்ச²ஸி தி³வாதி³வஸ்ஸா’’தி?

‘‘அய்யிகா மே, ப⁴ந்தே, காலங்கதா ஜிண்ணா வுட்³டா⁴ மஹல்லிகா அத்³த⁴க³தா வயோஅனுப்பத்தா வீஸவஸ்ஸஸதிகா ஜாதியா. அய்யிகா கோ² பன மே, ப⁴ந்தே, பியா ஹோதி மனாபா. ஹத்தி²ரதனேன சேபாஹம், ப⁴ந்தே, லபே⁴ய்யம் ‘மா மே அய்யிகா காலமகாஸீ’தி, ஹத்தி²ரதனம்பாஹம் த³தே³ய்யம் – ‘மா மே அய்யிகா காலமகாஸீ’தி. அஸ்ஸரதனேன சேபாஹம், ப⁴ந்தே, லபே⁴ய்யம் ‘மா மே அய்யிகா காலமகாஸீ’தி, அஸ்ஸரதனம்பாஹம் த³தே³ய்யம் – ‘மா மே அய்யிகா காலமகாஸீ’தி. கா³மவரேன சேபாஹம் ப⁴ந்தே, லபே⁴ய்யம் ‘மா மே அய்யிகா காலமகாஸீ’தி, கா³மவரம்பாஹம் த³தே³ய்யம் – ‘மா மே அய்யிகா காலமகாஸீ’தி. ஜனபத³பதே³ஸேன [ஜனபதே³ன (ஸீ. ஸ்யா. பீ.)] சேபாஹம், ப⁴ந்தே, லபே⁴ய்யம் ‘மா மே அய்யிகா காலமகாஸீ’தி, ஜனபத³பதே³ஸம்பாஹம் த³தே³ய்யம் – ‘மா மே அய்யிகா காலமகாஸீ’தி. ‘ஸப்³பே³ ஸத்தா, மஹாராஜ, மரணத⁴ம்மா மரணபரியோஸானா மரணம் அனதீதா’தி. ‘அச்ச²ரியம், ப⁴ந்தே, அப்³பு⁴தம், ப⁴ந்தே! யாவஸுபா⁴ஸிதமித³ம், ப⁴ந்தே, ப⁴க³வதா – ஸப்³பே³ ஸத்தா மரணத⁴ம்மா மரணபரியோஸானா மரணம் அனதீதா’’’தி.

‘‘ஏவமேதம், மஹாராஜ, ஏவமேதம், மஹாராஜ! ஸப்³பே³ ஸத்தா மரணத⁴ம்மா மரணபரியோஸானா மரணம் அனதீதா. ஸேய்யதா²பி, மஹாராஜ, யானி கானிசி கும்ப⁴காரபா⁴ஜனானி ஆமகானி சேவ பக்கானி ச ஸப்³பா³னி தானி பே⁴த³னத⁴ம்மானி பே⁴த³னபரியோஸானானி பே⁴த³னம் அனதீதானி; ஏவமேவ கோ², மஹாராஜ, ஸப்³பே³ ஸத்தா மரணத⁴ம்மா மரணபரியோஸானா மரணம் அனதீதா’’தி. இத³மவோச…பே…

‘‘ஸப்³பே³ ஸத்தா மரிஸ்ஸந்தி, மரணந்தஞ்ஹி ஜீவிதம்;

யதா²கம்மம் க³மிஸ்ஸந்தி, புஞ்ஞபாபப²லூபகா³;

நிரயம் பாபகம்மந்தா, புஞ்ஞகம்மா ச ஸுக்³க³திம்.

‘‘தஸ்மா கரேய்ய கல்யாணம், நிசயம் ஸம்பராயிகம்;

புஞ்ஞானி பரலோகஸ்மிம், பதிட்டா² ஹோந்தி பாணின’’ந்தி.