12. ஆளவகஸுத்தம்

246. ஏவம் மே ஸுதம் – ஏகம் ஸமயம் ப⁴க³வா ஆளவியம் விஹரதி ஆளவகஸ்ஸ யக்க²ஸ்ஸ ப⁴வனே. அத² கோ² ஆளவகோ யக்கோ² யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் ஏதத³வோச – ‘‘நிக்க²ம, ஸமணா’’தி. ‘‘ஸாதா⁴வுஸோ’’தி ப⁴க³வா நிக்க²மி. ‘‘பவிஸ, ஸமணா’’தி. ‘‘ஸாதா⁴வுஸோ’’தி ப⁴க³வா பாவிஸி. து³தியம்பி கோ² ஆளவகோ யக்கோ² ப⁴க³வந்தம் ஏதத³வோச – ‘‘நிக்க²ம, ஸமணா’’தி. ‘‘ஸாதா⁴வுஸோ’’தி ப⁴க³வா நிக்க²மி. ‘‘பவிஸ, ஸமணா’’தி. ‘‘ஸாதா⁴வுஸோ’’தி ப⁴க³வா பாவிஸி. ததியம்பி கோ² ஆளவகோ யக்கோ² ப⁴க³வந்தம் ஏதத³வோச – ‘‘நிக்க²ம, ஸமணா’’தி. ‘‘ஸாதா⁴வுஸோ’’தி ப⁴க³வா நிக்க²மி. ‘‘பவிஸ, ஸமணா’’தி. ‘‘ஸாதா⁴வுஸோ’’தி ப⁴க³வா பாவிஸி. சதுத்த²ம்பி கோ² ஆளவகோ யக்கோ² ப⁴க³வந்தம் ஏதத³வோச – ‘‘நிக்க²ம, ஸமணா’’தி. ‘‘ந க்²வாஹம் தம், ஆவுஸோ, நிக்க²மிஸ்ஸாமி. யம் தே கரணீயம் தம் கரோஹீ’’தி. ‘‘பஞ்ஹம் தம், ஸமண, புச்சி²ஸ்ஸாமி. ஸசே மே ந ப்³யாகரிஸ்ஸஸி, சித்தம் வா தே கி²பிஸ்ஸாமி, ஹத³யம் வா தே பா²லேஸ்ஸாமி, பாதே³ஸு வா க³ஹேத்வா பாரக³ங்கா³ய கி²பிஸ்ஸாமீ’’தி. ‘‘ந க்²வாஹம் தம், ஆவுஸோ, பஸ்ஸாமி ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய, யே மே சித்தம் வா கி²பேய்ய ஹத³யம் வா பா²லேய்ய, பாதே³ஸு வா க³ஹேத்வா பாரக³ங்கா³ய கி²பேய்ய. அபி ச த்வம், ஆவுஸோ, புச்ச² யதா³ கங்க²ஸீ’’தி [(அத² கோ² ஆளவகோ யக்கோ² ப⁴க³வந்தம் கா³தா²ய அஜ்ஜ²பா⁴ஸி.) (ஸீ.)].

‘‘கிம்ஸூத⁴ வித்தம் புரிஸஸ்ஸ ஸேட்ட²ம், கிம்ஸு ஸுசிண்ணம் ஸுக²மாவஹாதி;

கிம்ஸு ஹவே ஸாது³தரம் ரஸானம், கத²ம்ஜீவிம் ஜீவிதமாஹு ஸேட்ட²’’ந்தி.

‘‘ஸத்³தீ⁴த⁴ வித்தம் புரிஸ்ஸ ஸேட்ட²ம், த⁴ம்மோ ஸுசிண்ணோ ஸுக²மாவஹாதி;

ஸச்சம் ஹவே ஸாது³தரம் ரஸானம், பஞ்ஞாஜீவிம் ஜீவிதமாஹு ஸேட்ட²’’ந்தி.

‘‘கத²ம்ஸு தரதி ஓக⁴ம், கத²ம்ஸு தரதி அண்ணவம்;

கத²ம்ஸு து³க்க²மச்சேதி, கத²ம்ஸு பரிஸுஜ்ஜ²தீ’’தி.

‘‘ஸத்³தா⁴ய தரதி ஓக⁴ம், அப்பமாதே³ன அண்ணவம்;

வீரியேன து³க்க²மச்சேதி, பஞ்ஞாய பரிஸுஜ்ஜ²தீ’’தி.

‘‘கத²ம்ஸு லப⁴தே பஞ்ஞம், கத²ம்ஸு விந்த³தே த⁴னம்;

கத²ம்ஸு கித்திம் பப்போதி, கத²ம் மித்தானி க³ந்த²தி;

அஸ்மா லோகா பரம் லோகம், கத²ம் பேச்ச ந ஸோசதீ’’தி.

‘‘ஸத்³த³ஹானோ அரஹதம், த⁴ம்மம் நிப்³பா³னபத்தியா;

ஸுஸ்ஸூஸம் [ஸுஸ்ஸூஸா (ஸீ. பீ.)] லப⁴தே பஞ்ஞம், அப்பமத்தோ விசக்க²ணோ.

‘‘பதிரூபகாரீ து⁴ரவா, உட்டா²தா விந்த³தே த⁴னம்;

ஸச்சேன கித்திம் பப்போதி, த³த³ம் மித்தானி க³ந்த²தி;

அஸ்மா லோகா பரம் லோகம், ஏவம் பேச்ச ந ஸோசதி.

‘‘யஸ்ஸேதே சதுரோ த⁴ம்மா, ஸத்³த⁴ஸ்ஸ க⁴ரமேஸினோ;

ஸச்சம் த³ம்மோ தி⁴தி சாகோ³, ஸ வே பேச்ச ந ஸோசதி.

‘‘இங்க⁴ அஞ்ஞேபி புச்ச²ஸ்ஸு, புதூ² ஸமணப்³ராஹ்மணே;

யதி³ ஸச்சா த³ம்மா சாகா³, க²ந்த்யா பி⁴ய்யோத⁴ விஜ்ஜதீ’’தி.

‘‘கத²ம் நு தா³னி புச்சே²ய்யம், புதூ² ஸமணப்³ராஹ்மணே;

யோஹம் [ஸோஹம் (ஸீ.), ஸ்வாஹம் (க.)] அஜ்ஜ பஜானாமி, யோ அத்தோ² ஸம்பராயிகோ.

‘‘அத்தா²ய வத மே பு³த்³தோ⁴, வாஸாயாளவிமாக³மா [மாக³தோ (பீ. க.)];

யோஹம் [ஸோஹம் (ஸீ.)] அஜ்ஜ பஜானாமி, யத்த² தி³ன்னம் மஹப்ப²லம்.

‘‘ஸோ அஹம் விசரிஸ்ஸாமி, கா³மா கா³மம் புரா புரம்;

நமஸ்ஸமானோ ஸம்பு³த்³த⁴ம், த⁴ம்மஸ்ஸ ச ஸுத⁴ம்மத’’ந்தி.

யக்க²ஸம்யுத்தம் ஸமத்தம்.