9. பிண்ட³பாதபாரிஸுத்³தி⁴ஸுத்தம்

438. ஏவம் மே ஸுதம் – ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² ஆயஸ்மா ஸாரிபுத்தோ ஸாயன்ஹஸமயம் படிஸல்லானா வுட்டி²தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் ஸாரிபுத்தம் ப⁴க³வா ஏதத³வோச –

‘‘விப்பஸன்னானி கோ² தே, ஸாரிபுத்த, இந்த்³ரியானி, பரிஸுத்³தோ⁴ ச²விவண்ணோ பரியோதா³தோ. கதமேன கோ² த்வம், ஸாரிபுத்த, விஹாரேன ஏதரஹி ப³ஹுலம் விஹரஸீ’’தி? ‘‘ஸுஞ்ஞதாவிஹாரேன கோ² அஹம், ப⁴ந்தே, ஏதரஹி ப³ஹுலம் விஹராமீ’’தி. ‘‘ஸாது⁴, ஸாது⁴, ஸாரிபுத்த! மஹாபுரிஸவிஹாரேன கிர த்வம், ஸாரிபுத்த, ஏதரஹி ப³ஹுலம் விஹரஸி. மஹாபுரிஸவிஹாரோ ஏஸோ [ஹேஸ (ஸீ. ஸ்யா. கம். பீ.)], ஸாரிபுத்த, யதி³த³ம் – ஸுஞ்ஞதா. தஸ்மாதிஹ, ஸாரிபுத்த, பி⁴க்கு² ஸசே ஆகங்கே²ய்ய – ‘ஸுஞ்ஞதாவிஹாரேன ப³ஹுலம் [ஏதரஹி ப³ஹுலம் (ஸீ. பீ.)] விஹரேய்ய’ந்தி, தேன, ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘யேன சாஹம் மக்³கே³ன கா³மம் பிண்டா³ய பாவிஸிம், யஸ்மிஞ்ச பதே³ஸே பிண்டா³ய அசரிம், யேன ச மக்³கே³ன கா³மதோ பிண்டா³ய படிக்கமிம், அத்தி² நு கோ² மே தத்த² சக்கு²விஞ்ஞேய்யேஸு ரூபேஸு ச²ந்தோ³ வா ராகோ³ வா தோ³ஸோ வா மோஹோ வா படிக⁴ம் வாபி சேதஸோ’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘யேன சாஹம் மக்³கே³ன கா³மம் பிண்டா³ய பாவிஸிம், யஸ்மிஞ்ச பதே³ஸே பிண்டா³ய அசரிம், யேன ச மக்³கே³ன கா³மதோ பிண்டா³ய படிக்கமிம், அத்தி² மே தத்த² சக்கு²விஞ்ஞேய்யேஸு ரூபேஸு ச²ந்தோ³ வா ராகோ³ வா தோ³ஸோ வா மோஹோ வா படிக⁴ம் வாபி சேதஸோ’தி, தேன, ஸாரிபுத்த, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘யேன சாஹம் மக்³கே³ன கா³மம் பிண்டா³ய பாவிஸிம், யஸ்மிஞ்ச பதே³ஸே பிண்டா³ய அசரிம், யேன ச மக்³கே³ன கா³மதோ பிண்டா³ய படிக்கமிம், நத்தி² மே தத்த² சக்கு²விஞ்ஞேய்யேஸு ரூபேஸு ச²ந்தோ³ வா ராகோ³ வா தோ³ஸோ வா மோஹோ வா படிக⁴ம் வாபி சேதஸோ’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

439. ‘‘புன சபரம், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘யேன சாஹம் மக்³கே³ன கா³மம் பிண்டா³ய பாவிஸிம், யஸ்மிஞ்ச பதே³ஸே பிண்டா³ய அசரிம், யேன ச மக்³கே³ன கா³மதோ பிண்டா³ய படிக்கமிம், அத்தி² நு கோ² மே தத்த² ஸோதவிஞ்ஞேய்யேஸு ஸத்³தே³ஸு…பே… கா⁴னவிஞ்ஞேய்யேஸு க³ந்தே⁴ஸு… ஜிவ்ஹாவிஞ்ஞேய்யேஸு ரஸேஸு … காயவிஞ்ஞேய்யேஸு போ²ட்ட²ப்³பே³ஸு… மனோவிஞ்ஞேய்யேஸு த⁴ம்மேஸு ச²ந்தோ³ வா ராகோ³ வா தோ³ஸோ வா மோஹோ வா படிக⁴ம் வாபி சேதஸோ’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘யேன சாஹம் மக்³கே³ன கா³மம் பிண்டா³ய பாவிஸிம், யஸ்மிஞ்ச பதே³ஸே பிண்டா³ய அசரிம், யேன ச மக்³கே³ன கா³மதோ பிண்டா³ய படிக்கமிம், அத்தி² மே தத்த² மனோவிஞ்ஞேய்யேஸு த⁴ம்மேஸு ச²ந்தோ³ வா ராகோ³ வா தோ³ஸோ வா மோஹோ வா படிக⁴ம் வாபி சேதஸோ’தி, தேன, ஸாரிபுத்த, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘யேன சாஹம் மக்³கே³ன கா³மம் பிண்டா³ய பாவிஸிம், யஸ்மிஞ்ச பதே³ஸே பிண்டா³ய அசரிம், யேன ச மக்³கே³ன கா³மதோ பிண்டா³ய படிக்கமிம், நத்தி² மே தத்த² மனோவிஞ்ஞேய்யேஸு த⁴ம்மேஸு ச²ந்தோ³ வா ராகோ³ வா தோ³ஸோ வா மோஹோ வா படிக⁴ம் வாபி சேதஸோ’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

440. ‘‘புன சபரம், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘பஹீனா நு கோ² மே பஞ்ச காமகு³ணா’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘அப்பஹீனா கோ² மே பஞ்ச காமகு³ணா’தி, தேன, ஸாரிபுத்த, பி⁴க்கு²னா பஞ்சன்னம் காமகு³ணானம் பஹானாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘பஹீனா கோ² மே பஞ்ச காமகு³ணா’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

441. ‘‘புன சபரம், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘பஹீனா நு கோ² மே பஞ்ச நீவரணா’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘அப்பஹீனா கோ² மே பஞ்ச நீவரணா’தி, தேன, ஸாரிபுத்த, பி⁴க்கு²னா பஞ்சன்னம் நீவரணானம் பஹானாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘பஹீனா கோ² மே பஞ்ச நீவரணா’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

442. ‘‘புன சபரம், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘பரிஞ்ஞாதா நு கோ² மே பஞ்சுபாதா³னக்க²ந்தா⁴’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘அபரிஞ்ஞாதா கோ² மே பஞ்சுபாதா³னக்க²ந்தா⁴’தி, தேன, ஸாரிபுத்த, பி⁴க்கு²னா பஞ்சன்னம் உபாதா³னக்க²ந்தா⁴னம் பரிஞ்ஞாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘பரிஞ்ஞாதா கோ² மே பஞ்சுபாதா³னக்க²ந்தா⁴’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

443. ‘‘புன சபரம், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘பா⁴விதா நு கோ² மே சத்தாரோ ஸதிபட்டா²னா’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘அபா⁴விதா கோ² மே சத்தாரோ ஸதிபட்டா²னா’தி, தேன, ஸாரிபுத்த, பி⁴க்கு²னா சதுன்னம் ஸதிபட்டா²னானம் பா⁴வனாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘பா⁴விதா கோ² மே சத்தாரோ ஸதிபட்டா²னா’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

444. ‘‘புன சபரம், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘பா⁴விதா நு கோ² மே சத்தாரோ ஸம்மப்பதா⁴னா’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘அபா⁴விதா கோ² மே சத்தாரோ ஸம்மப்பதா⁴னா’தி, தேன, ஸாரிபுத்த, பி⁴க்கு²னா சதுன்னம் ஸம்மப்பதா⁴னானம் பா⁴வனாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘பா⁴விதா கோ² மே சத்தாரோ ஸம்மப்பதா⁴னா’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

445. ‘‘புன சபரம், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘பா⁴விதா நு கோ² மே சத்தாரோ இத்³தி⁴பாதா³’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘அபா⁴விதா கோ² மே சத்தாரோ இத்³தி⁴பாதா³’தி, தேன, ஸாரிபுத்த, பி⁴க்கு²னா சதுன்னம் இத்³தி⁴பாதா³னம் பா⁴வனாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘பா⁴விதா கோ² மே சத்தாரோ இத்³தி⁴பாதா³’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

446. ‘‘புன சபரம், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘பா⁴விதானி நு கோ² மே பஞ்சிந்த்³ரியானீ’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘அபா⁴விதானி கோ² மே பஞ்சிந்த்³ரியானீ’தி, தேன, ஸாரிபுத்த, பி⁴க்கு²னா பஞ்சன்னம் இந்த்³ரியானம் பா⁴வனாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘பா⁴விதானி கோ² மே பஞ்சிந்த்³ரியானீ’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

447. ‘‘புன சபரம், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘பா⁴விதானி நு கோ² மே பஞ்ச ப³லானீ’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘அபா⁴விதானி கோ² மே பஞ்ச ப³லானீ’தி, தேன, ஸாரிபுத்த, பி⁴க்கு²னா பஞ்சன்னம் ப³லானம் பா⁴வனாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘பா⁴விதானி கோ² மே பஞ்ச ப³லானீ’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

448. ‘‘புன சபரம், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘பா⁴விதா நு கோ² மே ஸத்த போ³ஜ்ஜ²ங்கா³’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘அபா⁴விதா கோ² மே ஸத்த போ³ஜ்ஜ²ங்கா³’தி, தேன, ஸாரிபுத்த, பி⁴க்கு²னா ஸத்தன்னம் போ³ஜ்ஜ²ங்கா³னம் பா⁴வனாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘பா⁴விதா கோ² மே ஸத்த போ³ஜ்ஜ²ங்கா³’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

449. ‘‘புன சபரம், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘பா⁴விதோ நு கோ² மே அரியோ அட்ட²ங்கி³கோ மக்³கோ³’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘அபா⁴விதோ கோ² மே அரியோ அட்ட²ங்கி³கோ மக்³கோ³’தி, தேன, ஸாரிபுத்த, பி⁴க்கு²னா அரியஸ்ஸ அட்ட²ங்கி³கஸ்ஸ மக்³க³ஸ்ஸ பா⁴வனாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘பா⁴விதோ கோ² மே அரியோ அட்ட²ங்கி³கோ மக்³கோ³’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

450. ‘‘புன சபரம், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘பா⁴விதா நு கோ² மே ஸமதோ² ச விபஸ்ஸனா சா’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘அபா⁴விதா கோ² மே ஸமதோ² ச விபஸ்ஸனா சா’தி, தேன, ஸாரிபுத்த, பி⁴க்கு²னா ஸமத²விபஸ்ஸனானம் பா⁴வனாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘பா⁴விதா கோ² மே ஸமதோ² ச விபஸ்ஸனா சா’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

451. ‘‘புன சபரம், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ம் – ‘ஸச்சி²கதா நு கோ² மே விஜ்ஜா ச விமுத்தி சா’தி? ஸசே, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘அஸச்சி²கதா கோ² மே விஜ்ஜா ச விமுத்தி சா’தி, தேன, ஸாரிபுத்த, பி⁴க்கு²னா விஜ்ஜாய விமுத்தியா ஸச்சி²கிரியாய வாயமிதப்³ப³ம். ஸசே பன, ஸாரிபுத்த, பி⁴க்கு² பச்சவேக்க²மானோ ஏவம் ஜானாதி – ‘ஸச்சி²கதா கோ² மே விஜ்ஜா ச விமுத்தி சா’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

452. ‘‘யே ஹி கேசி, ஸாரிபுத்த, அதீதமத்³தா⁴னம் ஸமணா வா ப்³ராஹ்மணா வா பிண்ட³பாதம் பரிஸோதே⁴ஸும், ஸப்³பே³ தே ஏவமேவ பச்சவேக்கி²த்வா பச்சவேக்கி²த்வா பிண்ட³பாதம் பரிஸோதே⁴ஸும். யேபி ஹி கேசி, ஸாரிபுத்த, அனாக³தமத்³தா⁴னம் ஸமணா வா ப்³ராஹ்மணா வா பிண்ட³பாதம் பரிஸோதே⁴ஸ்ஸந்தி, ஸப்³பே³ தே ஏவமேவ பச்சவேக்கி²த்வா பச்சவேக்கி²த்வா பிண்ட³பாதம் பரிஸோதே⁴ஸ்ஸந்தி. யேபி ஹி கேசி, ஸாரிபுத்த, ஏதரஹி ஸமணா வா ப்³ராஹ்மணா வா பிண்ட³பாதம் பரிஸோதே⁴ந்தி, ஸப்³பே³ தே ஏவமேவ பச்சவேக்கி²த்வா பச்சவேக்கி²த்வா பிண்ட³பாதம் பரிஸோதே⁴ந்தி. தஸ்மாதிஹ, ஸாரிபுத்த [வோ ஸாரிபுத்த ஏவம் ஸிக்கி²தப்³ப³ம் (ஸீ. பீ.)], ‘பச்சவேக்கி²த்வா பச்சவேக்கி²த்வா பிண்ட³பாதம் பரிஸோதே⁴ஸ்ஸாமா’தி – ஏவஞ்ஹி வோ, ஸாரிபுத்த, ஸிக்கி²தப்³ப³’’ந்தி.

இத³மவோச ப⁴க³வா. அத்தமனோ ஆயஸ்மா ஸாரிபுத்தோ ப⁴க³வதோ பா⁴ஸிதம் அபி⁴னந்தீ³தி.

பிண்ட³பாதபாரிஸுத்³தி⁴ஸுத்தம் நிட்டி²தம் நவமம்.