10. இந்த்³ரியபா⁴வனாஸுத்தம்

453. ஏவம் மே ஸுதம் – ஏகம் ஸமயம் ப⁴க³வா க³ஜங்க³லாயம் [கஜங்க³லாயம் (ஸீ. பீ.), கஜ்ஜங்க³லாயம் (ஸ்யா. கம்.)] விஹரதி ஸுவேளுவனே [வேளுவனே (ஸ்யா. கம்.), முகே²லுவனே (ஸீ. பீ.)]. அத² கோ² உத்தரோ மாணவோ பாராஸிவியந்தேவாஸீ [பாராஸரியந்தேவாஸீ (ஸீ. பீ.), பாராஸிரியந்தேவாஸீ (ஸ்யா. கம்.)] யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னம் கோ² உத்தரம் மாணவம் பாராஸிவியந்தேவாஸிம் ப⁴க³வா ஏதத³வோச – ‘‘தே³ஸேதி, உத்தர, பாராஸிவியோ ப்³ராஹ்மணோ ஸாவகானம் இந்த்³ரியபா⁴வன’’ந்தி? ‘‘தே³ஸேதி, போ⁴ கோ³தம, பாராஸிவியோ ப்³ராஹ்மணோ ஸாவகானம் இந்த்³ரியபா⁴வன’’ந்தி. ‘‘யதா² கத²ம் பன, உத்தர, தே³ஸேதி பாராஸிவியோ ப்³ராஹ்மணோ ஸாவகானம் இந்த்³ரியபா⁴வன’’ந்தி? ‘‘இத⁴, போ⁴ கோ³தம, சக்கு²னா ரூபம் ந பஸ்ஸதி, ஸோதேன ஸத்³த³ம் ந ஸுணாதி – ஏவம் கோ², போ⁴ கோ³தம, தே³ஸேதி பாராஸிவியோ ப்³ராஹ்மணோ ஸாவகானம் இந்த்³ரியபா⁴வன’’ந்தி. ‘‘ஏவம் ஸந்தே கோ², உத்தர, அந்தோ⁴ பா⁴விதிந்த்³ரியோ ப⁴விஸ்ஸதி, ப³தி⁴ரோ பா⁴விதிந்த்³ரியோ ப⁴விஸ்ஸதி; யதா² பாராஸிவியஸ்ஸ ப்³ராஹ்மணஸ்ஸ வசனம். அந்தோ⁴ ஹி, உத்தர, சக்கு²னா ரூபம் ந பஸ்ஸதி, ப³தி⁴ரோ ஸோதேன ஸத்³த³ம் ந ஸுணாதீ’’தி. ஏவம் வுத்தே, உத்தரோ மாணவோ பாராஸிவியந்தேவாஸீ துண்ஹீபூ⁴தோ மங்குபூ⁴தோ பத்தக்க²ந்தோ⁴ அதோ⁴முகோ² பஜ்ஜா²யந்தோ அப்படிபா⁴னோ நிஸீதி³.

அத² கோ² ப⁴க³வா உத்தரம் மாணவம் பாராஸிவியந்தேவாஸிம் துண்ஹீபூ⁴தம் மங்குபூ⁴தம் பத்தக்க²ந்த⁴ம் அதோ⁴முக²ம் பஜ்ஜா²யந்தம் அப்படிபா⁴னம் விதி³த்வா ஆயஸ்மந்தம் ஆனந்த³ம் ஆமந்தேஸி – ‘‘அஞ்ஞதா² கோ², ஆனந்த³, தே³ஸேதி பாராஸிவியோ ப்³ராஹ்மணோ ஸாவகானம் இந்த்³ரியபா⁴வனம், அஞ்ஞதா² ச பனானந்த³, அரியஸ்ஸ வினயே அனுத்தரா இந்த்³ரியபா⁴வனா ஹோதீ’’தி. ‘‘ஏதஸ்ஸ, ப⁴க³வா, காலோ; ஏதஸ்ஸ, ஸுக³த, காலோ யம் ப⁴க³வா அரியஸ்ஸ வினயே அனுத்தரம் இந்த்³ரியபா⁴வனம் தே³ஸேய்ய. ப⁴க³வதோ ஸுத்வா பி⁴க்கூ² தா⁴ரேஸ்ஸந்தீ’’தி. ‘‘தேனஹானந்த³, ஸுணாஹி, ஸாது⁴கம் மனஸி கரோஹி; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² ஆயஸ்மா ஆனந்தோ³ ப⁴க³வதோ பச்சஸ்ஸோஸி. ப⁴க³வா ஏதத³வோச –

454. ‘‘கத²ஞ்சானந்த³, அரியஸ்ஸ வினயே அனுத்தரா இந்த்³ரியபா⁴வனா ஹோதி? இதா⁴னந்த³, பி⁴க்கு²னோ சக்கு²னா ரூபம் தி³ஸ்வா உப்பஜ்ஜதி மனாபம், உப்பஜ்ஜதி அமனாபம், உப்பஜ்ஜதி மனாபாமனாபம். ஸோ ஏவம் பஜானாதி – ‘உப்பன்னம் கோ² மே இத³ம் மனாபம், உப்பன்னம் அமனாபம், உப்பன்னம் மனாபாமனாபம். தஞ்ச கோ² ஸங்க²தம் ஓளாரிகம் படிச்சஸமுப்பன்னம். ஏதம் ஸந்தம் ஏதம் பணீதம் யதி³த³ம் – உபேக்கா²’தி. தஸ்ஸ தம் உப்பன்னம் மனாபம் உப்பன்னம் அமனாபம் உப்பன்னம் மனாபாமனாபம் நிருஜ்ஜ²தி; உபேக்கா² ஸண்டா²தி. ஸேய்யதா²பி, ஆனந்த³, சக்கு²மா புரிஸோ உம்மீலேத்வா வா நிமீலேய்ய, நிமீலேத்வா வா உம்மீலேய்ய; ஏவமேவ கோ², ஆனந்த³, யஸ்ஸ கஸ்ஸசி ஏவம்ஸீக⁴ம் ஏவம்துவடம் ஏவம்அப்பகஸிரேன உப்பன்னம் மனாபம் உப்பன்னம் அமனாபம் உப்பன்னம் மனாபாமனாபம் நிருஜ்ஜ²தி, உபேக்கா² ஸண்டா²தி – அயம் வுச்சதானந்த³, அரியஸ்ஸ வினயே அனுத்தரா இந்த்³ரியபா⁴வனா சக்கு²விஞ்ஞேய்யேஸு ரூபேஸு.

455. ‘‘புன சபரம், ஆனந்த³, பி⁴க்கு²னோ ஸோதேன ஸத்³த³ம் ஸுத்வா உப்பஜ்ஜதி மனாபம், உப்பஜ்ஜதி அமனாபம், உப்பஜ்ஜதி மனாபாமனாபம். ஸோ ஏவம் பஜானாதி – ‘உப்பன்னம் கோ² மே இத³ம் மனாபம், உப்பன்னம் அமனாபம், உப்பன்னம் மனாபாமனாபம். தஞ்ச கோ² ஸங்க²தம் ஓளாரிகம் படிச்சஸமுப்பன்னம். ஏதம் ஸந்தம் ஏதம் பணீதம் யதி³த³ம் – உபேக்கா²’தி. தஸ்ஸ தம் உப்பன்னம் மனாபம் உப்பன்னம் அமனாபம் உப்பன்னம் மனாபாமனாபம் நிருஜ்ஜ²தி; உபேக்கா² ஸண்டா²தி. ஸேய்யதா²பி, ஆனந்த³, ப³லவா புரிஸோ அப்பகஸிரேனேவ அச்ச²ரம் [அச்ச²ரிகம் (ஸ்யா. கம். பீ. க.)] பஹரேய்ய; ஏவமேவ கோ², ஆனந்த³, யஸ்ஸ கஸ்ஸசி ஏவம்ஸீக⁴ம் ஏவம்துவடம் ஏவம்அப்பகஸிரேன உப்பன்னம் மனாபம் உப்பன்னம் அமனாபம் உப்பன்னம் மனாபாமனாபம் நிருஜ்ஜ²தி, உபேக்கா² ஸண்டா²தி – அயம் வுச்சதானந்த³, அரியஸ்ஸ வினயே அனுத்தரா இந்த்³ரியபா⁴வனா ஸோதவிஞ்ஞேய்யேஸு ஸத்³தே³ஸு.

456. ‘‘புன சபரம், ஆனந்த³, பி⁴க்கு²னோ கா⁴னேன க³ந்த⁴ம் கா⁴யித்வா உப்பஜ்ஜதி மனாபம், உப்பஜ்ஜதி அமனாபம், உப்பஜ்ஜதி மனாபாமனாபம். ஸோ ஏவம் பஜானாதி – ‘உப்பன்னம் கோ² மே இத³ம் மனாபம், உப்பன்னம் அமனாபம், உப்பன்னம் மனாபாமனாபம். தஞ்ச கோ² ஸங்க²தம் ஓளாரிகம் படிச்சஸமுப்பன்னம். ஏதம் ஸந்தம் ஏதம் பணீதம் யதி³த³ம் – உபேக்கா²’தி. தஸ்ஸ தம் உப்பன்னம் மனாபம் உப்பன்னம் அமனாபம் உப்பன்னம் மனாபாமனாபம் நிருஜ்ஜ²தி; உபேக்கா² ஸண்டா²தி. ஸேய்யதா²பி, ஆனந்த³, ஈஸகம்போணே [ஈஸகபோணே (ஸீ. ஸ்யா. கம். பீ.), ஈஸகப²ணே (ஸீ. அட்ட².), ‘‘மஜ்ஜே² உச்சம் ஹுத்வா’’தி டீகாய ஸம்ஸந்தி³தப்³பா³] பது³மபலாஸே [பது³மினிபத்தே (ஸீ. ஸ்யா. கம். பீ.)] உத³கபு²ஸிதானி பவத்தந்தி, ந ஸண்ட²ந்தி; ஏவமேவ கோ², ஆனந்த³, யஸ்ஸ கஸ்ஸசி ஏவம்ஸீக⁴ம் ஏவம்துவடம் ஏவம்அப்பகஸிரேன உப்பன்னம் மனாபம் உப்பன்னம் அமனாபம் உப்பன்னம் மனாபாமனாபம் நிருஜ்ஜ²தி, உபேக்கா² ஸண்டா²தி – அயம் வுச்சதானந்த³, அரியஸ்ஸ வினயே அனுத்தரா இந்த்³ரியபா⁴வனா கா⁴னவிஞ்ஞேய்யேஸு க³ந்தே⁴ஸு.

457. ‘‘புன சபரம், ஆனந்த³, பி⁴க்கு²னோ ஜிவ்ஹாய ரஸம் ஸாயித்வா உப்பஜ்ஜதி மனாபம், உப்பஜ்ஜதி அமனாபம், உப்பஜ்ஜதி மனாபாமனாபம். ஸோ ஏவம் பஜானாதி – ‘உப்பன்னம் கோ² மே இத³ம் மனாபம், உப்பன்னம் அமனாபம், உப்பன்னம் மனாபாமனாபம். தஞ்ச கோ² ஸங்க²தம் ஓளாரிகம் படிச்சஸமுப்பன்னம். ஏதம் ஸந்தம் ஏதம் பணீதம் யதி³த³ம் – உபேக்கா²’தி. தஸ்ஸ தம் உப்பன்னம் மனாபம் உப்பன்னம் அமனாபம் உப்பன்னம் மனாபாமனாபம் நிருஜ்ஜ²தி; உபேக்கா² ஸண்டா²தி. ஸேய்யதா²பி, ஆனந்த³, ப³லவா புரிஸோ ஜிவ்ஹக்³கே³ கே²ளபிண்ட³ம் ஸம்யூஹித்வா அப்பகஸிரேன வமேய்ய [ஸந்த⁴மேய்ய (க.)]; ஏவமேவ கோ², ஆனந்த³, யஸ்ஸ கஸ்ஸசி ஏவம்ஸீக⁴ம் ஏவம்துவடம் ஏவம்அப்பகஸிரேன உப்பன்னம் மனாபம் உப்பன்னம் அமனாபம் உப்பன்னம் மனாபாமனாபம் நிருஜ்ஜ²தி, உபேக்கா² ஸண்டா²தி – அயம் வுச்சதானந்த³, அரியஸ்ஸ வினயே அனுத்தரா இந்த்³ரியபா⁴வனா ஜிவ்ஹாவிஞ்ஞேய்யேஸு ரஸேஸு.

458. ‘‘புன சபரம், ஆனந்த³, பி⁴க்கு²னோ காயேன போ²ட்ட²ப்³ப³ம் பு²ஸித்வா உப்பஜ்ஜதி மனாபம், உப்பஜ்ஜதி அமனாபம், உப்பஜ்ஜதி மனாபாமனாபம். ஸோ ஏவம் பஜானாதி – ‘உப்பன்னம் கோ² மே இத³ம் மனாபம், உப்பன்னம் அமனாபம், உப்பன்னம் மனாபாமனாபம். தஞ்ச கோ² ஸங்க²தம் ஓளாரிகம் படிச்சஸமுப்பன்னம். ஏதம் ஸந்தம் ஏதம் பணீதம் யதி³த³ம் – உபேக்கா²’தி. தஸ்ஸ தம் உப்பன்னம் மனாபம் உப்பன்னம் அமனாபம் உப்பன்னம் மனாபாமனாபம் நிருஜ்ஜ²தி; உபேக்கா² ஸண்டா²தி. ஸேய்யதா²பி, ஆனந்த³, ப³லவா புரிஸோ ஸமிஞ்ஜிதம் வா பா³ஹம் பஸாரேய்ய, பஸாரிதம் வா பா³ஹம் ஸமிஞ்ஜேய்ய; ஏவமேவ கோ², ஆனந்த³, யஸ்ஸ கஸ்ஸசி ஏவம்ஸீக⁴ம் ஏவம்துவடம் ஏவம்அப்பகஸிரேன உப்பன்னம் மனாபம் உப்பன்னம் அமனாபம் உப்பன்னம் மனாபாமனாபம் நிருஜ்ஜ²தி, உபேக்கா² ஸண்டா²தி – அயம் வுச்சதானந்த³, அரியஸ்ஸ வினயே அனுத்தரா இந்த்³ரியபா⁴வனா காயவிஞ்ஞேய்யேஸு போ²ட்ட²ப்³பே³ஸு.

459. ‘‘புன சபரம், ஆனந்த³, பி⁴க்கு²னோ மனஸா த⁴ம்மம் விஞ்ஞாய உப்பஜ்ஜதி மனாபம், உப்பஜ்ஜதி அமனாபம், உப்பஜ்ஜதி மனாபாமனாபம். ஸோ ஏவம் பஜானாதி – ‘உப்பன்னம் கோ² மே இத³ம் மனாபம், உப்பன்னம் அமனாபம், உப்பன்னம் மனாபாமனாபம். தஞ்ச கோ² ஸங்க²தம் ஓளாரிகம் படிச்சஸமுப்பன்னம். ஏதம் ஸந்தம் ஏதம் பணீதம் யதி³த³ம் – உபேக்கா²’தி. தஸ்ஸ தம் உப்பன்னம் மனாபம் உப்பன்னம் அமனாபம் உப்பன்னம் மனாபாமனாபம் நிருஜ்ஜ²தி; உபேக்கா² ஸண்டா²தி. ஸேய்யதா²பி, ஆனந்த³, ப³லவா புரிஸோ தி³வஸம்ஸந்தத்தே [தி³வஸஸந்தேத்தே (ஸீ.)] அயோகடாஹே த்³வே வா தீணி வா உத³கபு²ஸிதானி நிபாதேய்ய. த³ந்தோ⁴, ஆனந்த³, உத³கபு²ஸிதானம் நிபாதோ, அத² கோ² நம் கி²ப்பமேவ பரிக்க²யம் பரியாதா³னம் க³ச்சே²ய்ய; ஏவமேவ கோ², ஆனந்த³, யஸ்ஸ கஸ்ஸசி ஏவம்ஸீக⁴ம் ஏவம்துவடம் ஏவம்அப்பகஸிரேன உப்பன்னம் மனாபம் உப்பன்னம் அமனாபம் உப்பன்னம் மனாபாமனாபம் நிருஜ்ஜ²தி, உபேக்கா² ஸண்டா²தி – அயம் வுச்சதானந்த³, அரியஸ்ஸ வினயே அனுத்தரா இந்த்³ரியபா⁴வனா மனோவிஞ்ஞேய்யேஸு த⁴ம்மேஸு. ஏவம் கோ², ஆனந்த³, அரியஸ்ஸ வினயே அனுத்தரா இந்த்³ரியபா⁴வனா ஹோதி.

460. ‘‘கத²ஞ்சானந்த³, ஸேகோ² ஹோதி பாடிபதோ³? இதா⁴னந்த³, பி⁴க்கு²னோ சக்கு²னா ரூபம் தி³ஸ்வா உப்பஜ்ஜதி மனாபம், உப்பஜ்ஜதி அமனாபம், உப்பஜ்ஜதி மனாபாமனாபம். ஸோ தேன உப்பன்னேன மனாபேன உப்பன்னேன அமனாபேன உப்பன்னேன மனாபாமனாபேன அட்டீயதி ஹராயதி ஜிகு³ச்ச²தி. ஸோதேன ஸத்³த³ம் ஸுத்வா…பே… கா⁴னேன க³ந்த⁴ம் கா⁴யித்வா…, ஜிவ்ஹாய ரஸம் ஸாயித்வா… காயேன போ²ட்ட²ப்³ப³ம் பு²ஸித்வா… மனஸா த⁴ம்மம் விஞ்ஞாய உப்பஜ்ஜதி மனாபம், உப்பஜ்ஜதி அமனாபம், உப்பஜ்ஜதி மனாபாமனாபம். ஸோ தேன உப்பன்னேன மனாபேன உப்பன்னேன அமனாபேன உப்பன்னேன மனாபாமனாபேன அட்டீயதி ஹராயதி ஜிகு³ச்ச²தி. ஏவம் கோ², ஆனந்த³, ஸேகோ² ஹோதி பாடிபதோ³.

461. ‘‘கத²ஞ்சானந்த³, அரியோ ஹோதி பா⁴விதிந்த்³ரியோ? இதா⁴னந்த³, பி⁴க்கு²னோ சக்கு²னா ரூபம் தி³ஸ்வா உப்பஜ்ஜதி மனாபம், உப்பஜ்ஜதி அமனாபம், உப்பஜ்ஜதி மனாபாமனாபம். ஸோ ஸசே ஆகங்க²தி – ‘படிகூலே [படிக்கூலே (ஸப்³ப³த்த²)] அப்படிகூலஸஞ்ஞீ விஹரேய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி – ‘அப்படிகூலே படிகூலஸஞ்ஞீ விஹரேய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி – ‘படிகூலே ச அப்படிகூலே ச அப்படிகூலஸஞ்ஞீ விஹரேய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி – ‘அப்படிகூலே ச படிகூலே ச படிகூலஸஞ்ஞீ விஹரேய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி – ‘படிகூலஞ்ச அப்படிகூலஞ்ச தது³ப⁴யம் அபி⁴னிவஜ்ஜேத்வா உபேக்க²கோ விஹரேய்யம் ஸதோ ஸம்பஜானோ’தி, உபேக்க²கோ தத்த² விஹரதி ஸதோ ஸம்பஜானோ.

462. ‘‘புன சபரம், ஆனந்த³, பி⁴க்கு²னோ ஸோதேன ஸத்³த³ம் ஸுத்வா…பே… கா⁴னேன க³ந்த⁴ம் கா⁴யித்வா… ஜிவ்ஹாய ரஸம் ஸாயித்வா… காயேன போ²ட்ட²ப்³ப³ம் பு²ஸித்வா… மனஸா த⁴ம்மம் விஞ்ஞாய உப்பஜ்ஜதி மனாபம், உப்பஜ்ஜதி அமனாபம், உப்பஜ்ஜதி மனாபாமனாபம். ஸோ ஸசே ஆகங்க²தி – ‘படிகூலே அப்படிகூலஸஞ்ஞீ விஹரேய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி – ‘அப்படிகூலே படிகூலஸஞ்ஞீ விஹரேய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி – ‘படிகூலே ச அப்படிகூலே ச அப்படிகூலஸஞ்ஞீ விஹரேய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி – ‘அப்படிகூலே ச படிகூலே ச படிகூலஸஞ்ஞீ விஹரேய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி – ‘படிகூலஞ்ச அப்படிகூலஞ்ச தது³ப⁴யம்பி அபி⁴னிவஜ்ஜேத்வா உபேக்க²கோ விஹரேய்யம் ஸதோ ஸம்பஜானோ’தி, உபேக்க²கோ தத்த² விஹரதி ஸதோ ஸம்பஜானோ. ஏவம் கோ², ஆனந்த³, அரியோ ஹோதி பா⁴விதிந்த்³ரியோ.

463. ‘‘இதி கோ², ஆனந்த³, தே³ஸிதா மயா அரியஸ்ஸ வினயே அனுத்தரா இந்த்³ரியபா⁴வனா, தே³ஸிதோ ஸேகோ² பாடிபதோ³, தே³ஸிதோ அரியோ பா⁴விதிந்த்³ரியோ. யம் கோ², ஆனந்த³, ஸத்தா²ரா கரணீயம் ஸாவகானம் ஹிதேஸினா அனுகம்பகேன அனுகம்பம் உபாதா³ய, கதம் வோ தம் மயா. ஏதானி, ஆனந்த³, ருக்க²மூலானி, ஏதானி ஸுஞ்ஞாகா³ரானி, ஜா²யதா²னந்த³, மா பமாத³த்த², மா பச்சா² விப்படிஸாரினோ அஹுவத்த². அயம் வோ அம்ஹாகம் அனுஸாஸனீ’’தி.

இத³மவோச ப⁴க³வா. அத்தமனோ ஆயஸ்மா ஆனந்தோ³ ப⁴க³வதோ பா⁴ஸிதம் அபி⁴னந்தீ³தி.

இந்த்³ரியபா⁴வனாஸுத்தம் நிட்டி²தம் த³ஸமம்.

ஸளாயதனவக்³கோ³ நிட்டி²தோ பஞ்சமோ.