10. தா⁴துவிப⁴ங்க³ஸுத்தம்

342. ஏவம் மே ஸுதம் – ஏகம் ஸமயம் ப⁴க³வா மக³தே⁴ஸு சாரிகம் சரமானோ யேன ராஜக³ஹம் தத³வஸரி; யேன ப⁴க்³க³வோ கும்ப⁴காரோ தேனுபஸங்கமி; உபஸங்கமித்வா ப⁴க்³க³வம் கும்ப⁴காரம் ஏதத³வோச – ‘‘ஸசே தே, ப⁴க்³க³வ, அக³ரு விஹரேமு ஆவேஸனே [விஹராமாவேஸனே (ஸீ. பீ.), விஹராம நிவேஸனே (ஸ்யா. கம்.), விஹரேமு நிவேஸனே (க.)] ஏகரத்த’’ந்தி. ‘‘ந கோ² மே, ப⁴ந்தே, க³ரு. அத்தி² சேத்த² பப்³ப³ஜிதோ பட²மம் வாஸூபக³தோ. ஸசே ஸோ அனுஜானாதி, விஹரத² [விஹர (ஸீ. பீ.)], ப⁴ந்தே, யதா²ஸுக²’’ந்தி.

தேன கோ² பன ஸமயேன புக்குஸாதி நாம குலபுத்தோ ப⁴க³வந்தம் உத்³தி³ஸ்ஸ ஸத்³தா⁴ய அகா³ரஸ்மா அனகா³ரியம் பப்³ப³ஜிதோ. ஸோ தஸ்மிம் கும்ப⁴காராவேஸனே [கும்ப⁴காரனிவேஸனே (ஸ்யா. கம். க.)] பட²மம் வாஸூபக³தோ ஹோதி. அத² கோ² ப⁴க³வா யேனாயஸ்மா புக்குஸாதி தேனுபஸங்கமி; உபஸங்கமித்வா ஆயஸ்மந்தம் புக்குஸாதிம் ஏதத³வோச – ‘‘ஸசே தே, பி⁴க்கு², அக³ரு விஹரேமு ஆவேஸனே ஏகரத்த’’ந்தி. ‘‘உருந்த³ம், ஆவுஸோ [ஊரூந்த³ம் (ஸீ. ஸ்யா. கம். பீ.), உரூத்³த⁴ம் (க.) தீ³. நி. 2 ஸக்கபஞ்ஹஸுத்தடீகா ஓலோகேதப்³பா³], கும்ப⁴காராவேஸனம். விஹரதாயஸ்மா யதா²ஸுக²’’ந்தி.

அத² கோ² ப⁴க³வா கும்ப⁴காராவேஸனம் பவிஸித்வா ஏகமந்தம் திணஸந்தா²ரகம் [திணஸந்த²ரிகம் (ஸீ.), திணஸந்த²ரகம் (ஸ்யா. கம்.)] பஞ்ஞாபேத்வா நிஸீதி³ பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. அத² கோ² ப⁴க³வா ப³ஹுதே³வ ரத்திம் நிஸஜ்ஜாய வீதினாமேஸி. ஆயஸ்மாபி கோ² புக்குஸாதி ப³ஹுதே³வ ரத்திம் நிஸஜ்ஜாய வீதினாமேஸி.

அத² கோ² ப⁴க³வதோ ஏதத³ஹோஸி – ‘‘பாஸாதி³கம் கோ² அயம் குலபுத்தோ இரியதி. யம்னூனாஹம் புச்சே²ய்ய’’ந்தி. அத² கோ² ப⁴க³வா ஆயஸ்மந்தம் புக்குஸாதிம் ஏதத³வோச – ‘‘கம்ஸி த்வம், பி⁴க்கு², உத்³தி³ஸ்ஸ பப்³ப³ஜிதோ? கோ வா தே ஸத்தா²? கஸ்ஸ வா த்வம் த⁴ம்மம் ரோசேஸீ’’தி? ‘‘அத்தா²வுஸோ, ஸமணோ கோ³தமோ ஸக்யபுத்தோ ஸக்யகுலா பப்³ப³ஜிதோ. தம் கோ² பன ப⁴க³வந்தம் கோ³தமம் ஏவம் கல்யாணோ கித்திஸத்³தோ³ அப்³பு⁴க்³க³தோ – ‘இதிபி ஸோ ப⁴க³வா அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா’தி. தாஹம் ப⁴க³வந்தம் உத்³தி³ஸ்ஸ பப்³ப³ஜிதோ. ஸோ ச மே ப⁴க³வா ஸத்தா². தஸ்ஸ சாஹம் ப⁴க³வதோ த⁴ம்மம் ரோசேமீ’’தி. ‘‘கஹம் பன, பி⁴க்கு², ஏதரஹி ஸோ ப⁴க³வா விஹரதி அரஹம் ஸம்மாஸம்பு³த்³தோ⁴’’தி. ‘‘அத்தா²வுஸோ, உத்தரேஸு ஜனபதே³ஸு ஸாவத்தி² நாம நக³ரம். தத்த² ஸோ ப⁴க³வா ஏதரஹி விஹரதி அரஹம் ஸம்மாஸம்பு³த்³தோ⁴’’தி. ‘‘தி³ட்ட²புப்³போ³ பன தே, பி⁴க்கு², ஸோ ப⁴க³வா; தி³ஸ்வா ச பன ஜானேய்யாஸீ’’தி? ‘‘ந கோ² மே, ஆவுஸோ, தி³ட்ட²புப்³போ³ ஸோ ப⁴க³வா; தி³ஸ்வா சாஹம் ந ஜானேய்ய’’ந்தி.

அத² கோ² ப⁴க³வதோ ஏதத³ஹோஸி – ‘‘மமஞ்ச க்²வாயம் [மம் த்வாயம் (ஸீ.), மமம் க்²வாயம் (ஸ்யா. கம்.), மம் க்²வாயம் (பீ.)] குலபுத்தோ உத்³தி³ஸ்ஸ பப்³ப³ஜிதோ. யம்னூனஸ்ஸாஹம் த⁴ம்மம் தே³ஸேய்ய’’ந்தி. அத² கோ² ப⁴க³வா ஆயஸ்மந்தம் புக்குஸாதிம் ஆமந்தேஸி – ‘‘த⁴ம்மம் தே, பி⁴க்கு², தே³ஸேஸ்ஸாமி. தம் ஸுணாஹி, ஸாது⁴கம் மனஸி கரோஹி; பா⁴ஸிஸ்ஸாமீ’’தி. ‘‘ஏவமாவுஸோ’’தி கோ² ஆயஸ்மா புக்குஸாதி ப⁴க³வதோ பச்சஸ்ஸோஸி. ப⁴க³வா ஏதத³வோச –

343. ‘‘‘ச²தா⁴துரோ [ச²த்³தா⁴துரோ (ஸீ.)] அயம், பி⁴க்கு², புரிஸோ ச²ப²ஸ்ஸாயதனோ அட்டா²ரஸமனோபவிசாரோ சதுராதி⁴ட்டா²னோ; யத்த² டி²தம் மஞ்ஞஸ்ஸவா நப்பவத்தந்தி, மஞ்ஞஸ்ஸவே கோ² பன நப்பவத்தமானே முனி ஸந்தோதி வுச்சதி. பஞ்ஞம் நப்பமஜ்ஜேய்ய, ஸச்சமனுரக்கே²ய்ய, சாக³மனுப்³ரூஹேய்ய, ஸந்திமேவ ஸோ ஸிக்கே²ய்யா’தி – அயமுத்³தே³ஸோ தா⁴துவிப⁴ங்க³ஸ்ஸ [ச²தா⁴துவிப⁴ங்க³ஸ்ஸ (ஸீ. ஸ்யா. கம். பீ.)].

344. ‘‘‘ச²தா⁴துரோ அயம், பி⁴க்கு², புரிஸோ’தி – இதி கோ² பனேதம் வுத்தம். கிஞ்சேதம் படிச்ச வுத்தம்? (ச²யிமா, பி⁴க்கு², தா⁴துயோ) [( ) நத்தி² ஸீ. பீ. போத்த²கேஸு] – பத²வீதா⁴து, ஆபோதா⁴து, தேஜோதா⁴து, வாயோதா⁴து, ஆகாஸதா⁴து, விஞ்ஞாணதா⁴து. ‘ச²தா⁴துரோ அயம், பி⁴க்கு², புரிஸோ’தி – இதி யம் தம் வுத்தம், இத³மேதம் படிச்ச வுத்தம்.

345. ‘‘‘ச²ப²ஸ்ஸாயதனோ அயம், பி⁴க்கு², புரிஸோ’தி – இதி கோ² பனேதம் வுத்தம். கிஞ்சேதம் படிச்ச வுத்தம்? சக்கு²ஸம்ப²ஸ்ஸாயதனம், ஸோதஸம்ப²ஸ்ஸாயதனம், கா⁴னஸம்ப²ஸ்ஸாயதனம், ஜிவ்ஹாஸம்ப²ஸ்ஸாயதனம், காயஸம்ப²ஸ்ஸாயதனம், மனோஸம்ப²ஸ்ஸாயதனம். ‘ச²ப²ஸ்ஸாயதனோ அயம், பி⁴க்கு², புரிஸோ’தி – இதி யம் தம் வுத்தம், இத³மேதம் படிச்ச வுத்தம்.

346. ‘‘‘அட்டா²ரஸமனோபவிசாரோ அயம், பி⁴க்கு², புரிஸோ’தி – இதி கோ² பனேதம் வுத்தம். கிஞ்சேதம் படிச்ச வுத்தம்? சக்கு²னா ரூபம் தி³ஸ்வா ஸோமனஸ்ஸட்டா²னீயம் ரூபம் உபவிசரதி, தோ³மனஸ்ஸட்டா²னீயம் ரூபம் உபவிசரதி, உபேக்கா²ட்டா²னீயம் ரூபம் உபவிசரதி; ஸோதேன ஸத்³த³ம் ஸுத்வா…பே… கா⁴னேன க³ந்த⁴ம் கா⁴யித்வா… ஜிவ்ஹாய ரஸம் ஸாயித்வா… காயேன போ²ட்ட²ப்³ப³ம் பு²ஸித்வா… மனஸா த⁴ம்மம் விஞ்ஞாய ஸோமனஸ்ஸட்டா²னீயம் த⁴ம்மம் உபவிசரதி, தோ³மனஸ்ஸட்டா²னீயம் த⁴ம்மம் உபவிசரதி, உபேக்கா²ட்டா²னீயம் த⁴ம்மம் உபவிசரதி – இதி ச² ஸோமனஸ்ஸுபவிசாரா, ச² தோ³மனஸ்ஸுபவிசாரா, ச² உபேக்கு²பவிசாரா. ‘அட்டா²ரஸமனோபவிசாரோ அயம், பி⁴க்கு², புரிஸோ’தி – இதி யம் தம் வுத்தம், இத³மேதம் படிச்ச வுத்தம்.

347. ‘‘‘சதுராதி⁴ட்டா²னோ அயம், பி⁴க்கு², புரிஸோ’தி – இதி கோ² பனேதம் வுத்தம். கிஞ்சேதம் படிச்ச வுத்தம்? பஞ்ஞாதி⁴ட்டா²னோ, ஸச்சாதி⁴ட்டா²னோ, சாகா³தி⁴ட்டா²னோ, உபஸமாதி⁴ட்டா²னோ. ‘சதுராதி⁴ட்டா²னோ அயம், பி⁴க்கு², புரிஸோ’தி – இதி யம் தம் வுத்தம் இத³மேதம் படிச்ச வுத்தம்.

348. ‘‘‘பஞ்ஞம் நப்பமஜ்ஜேய்ய, ஸச்சமனுரக்கே²ய்ய, சாக³மனுப்³ரூஹேய்ய, ஸந்திமேவ ஸோ ஸிக்கே²ய்யா’தி – இதி கோ² பனேதம் வுத்தம். கிஞ்சேதம் படிச்ச வுத்தம்? கத²ஞ்ச, பி⁴க்கு², பஞ்ஞம் நப்பமஜ்ஜதி? ச²யிமா, பி⁴க்கு², தா⁴துயோ – பத²வீதா⁴து, ஆபோதா⁴து, தேஜோதா⁴து, வாயோதா⁴து, ஆகாஸதா⁴து, விஞ்ஞாணதா⁴து.

349. ‘‘கதமா ச, பி⁴க்கு², பத²வீதா⁴து? பத²வீதா⁴து ஸியா அஜ்ஜ²த்திகா ஸியா பா³ஹிரா. கதமா ச, பி⁴க்கு², அஜ்ஜ²த்திகா பத²வீதா⁴து? யம் அஜ்ஜ²த்தம் பச்சத்தம் கக்க²ளம் க²ரிக³தம் உபாதி³ன்னம் [உபாதி³ண்ணம் (பீ. க.)], ஸேய்யதி²த³ம் – கேஸா லோமா நகா² த³ந்தா தசோ மம்ஸம் ந்ஹாரு அட்டி² அட்டி²மிஞ்ஜம் [அட்டி²மிஞ்ஜா (ஸீ. பீ.)] வக்கம் ஹத³யம் யகனம் கிலோமகம் பிஹகம் பப்பா²ஸம் அந்தம் அந்தகு³ணம் உத³ரியம் கரீஸம், யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் கக்க²ளம் க²ரிக³தம் உபாதி³ன்னம் – அயம் வுச்சதி, பி⁴க்கு², அஜ்ஜ²த்திகா பத²வீதா⁴து. யா சேவ கோ² பன அஜ்ஜ²த்திகா பத²வீதா⁴து யா ச பா³ஹிரா பத²வீதா⁴து பத²வீதா⁴துரேவேஸா. ‘தம் நேதம் மம நேஸோஹமஸ்மி ந மேஸோ அத்தா’தி – ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஏவமேதம் யதா²பூ⁴தம் ஸம்மப்பஞ்ஞாய தி³ஸ்வா பத²வீதா⁴துயா நிப்³பி³ந்த³தி, பத²வீதா⁴துயா சித்தம் விராஜேதி.

350. ‘‘கதமா ச, பி⁴க்கு², ஆபோதா⁴து? ஆபோதா⁴து ஸியா அஜ்ஜ²த்திகா ஸியா பா³ஹிரா. கதமா ச, பி⁴க்கு², அஜ்ஜ²த்திகா ஆபோதா⁴து? யம் அஜ்ஜ²த்தம் பச்சத்தம் ஆபோ ஆபோக³தம் உபாதி³ன்னம் ஸேய்யதி²த³ம் – பித்தம் ஸேம்ஹம் புப்³போ³ லோஹிதம் ஸேதோ³ மேதோ³ அஸ்ஸு வஸா கே²ளோ ஸிங்கா⁴ணிகா லஸிகா முத்தம், யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் ஆபோ ஆபோக³தம் உபாதி³ன்னம் – அயம் வுச்சதி, பி⁴க்கு², அஜ்ஜ²த்திகா ஆபோதா⁴து. யா சேவ கோ² பன அஜ்ஜ²த்திகா ஆபோதா⁴து யா ச பா³ஹிரா ஆபோதா⁴து ஆபோதா⁴துரேவேஸா. ‘தம் நேதம் மம, நேஸோஹமஸ்மி, ந மேஸோ அத்தா’தி – ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஏவமேதம் யதா²பூ⁴தம் ஸம்மப்பஞ்ஞாய தி³ஸ்வா ஆபோதா⁴துயா நிப்³பி³ந்த³தி, ஆபோதா⁴துயா சித்தம் விராஜேதி.

351. ‘‘கதமா ச, பி⁴க்கு², தேஜோதா⁴து? தேஜோதா⁴து ஸியா அஜ்ஜ²த்திகா ஸியா பா³ஹிரா. கதமா ச, பி⁴க்கு², அஜ்ஜ²த்திகா தேஜோதா⁴து? யம் அஜ்ஜ²த்தம் பச்சத்தம் தேஜோ தேஜோக³தம் உபாதி³ன்னம், ஸேய்யதி²த³ம் – யேன ச ஸந்தப்பதி, யேன ச ஜீரீயதி, யேன ச பரிட³ய்ஹதி, யேன ச அஸிதபீதகா²யிதஸாயிதம் ஸம்மா பரிணாமம் க³ச்ச²தி, யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் தேஜோ தேஜோக³தம் உபாதி³ன்னம் – அயம் வுச்சதி, பி⁴க்கு², அஜ்ஜ²த்திகா தேஜோதா⁴து. யா சேவ கோ² பன அஜ்ஜ²த்திகா தேஜோதா⁴து யா ச பா³ஹிரா தேஜோதா⁴து தேஜோதா⁴துரேவேஸா. ‘தம் நேதம் மம, நேஸோஹமஸ்மி, ந மேஸோ அத்தா’தி – ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஏவமேதம் யதா²பூ⁴தம் ஸம்மப்பஞ்ஞாய தி³ஸ்வா தேஜோதா⁴துயா நிப்³பி³ந்த³தி, தேஜோதா⁴துயா சித்தம் விராஜேதி.

352. ‘‘கதமா ச, பி⁴க்கு², வாயோதா⁴து? வாயோதா⁴து ஸியா அஜ்ஜ²த்திகா ஸியா பா³ஹிரா. கதமா ச, பி⁴க்கு², அஜ்ஜ²த்திகா வாயோதா⁴து? யம் அஜ்ஜ²த்தம் பச்சத்தம் வாயோ வாயோக³தம் உபாதி³ன்னம், ஸேய்யதி²த³ம் – உத்³த⁴ங்க³மா வாதா அதோ⁴க³மா வாதா குச்சி²ஸயா வாதா கோட்டா²ஸயா [கோட்ட²ஸயா (ஸீ. ஸ்யா. கம். பீ.)] வாதா அங்க³மங்கா³னுஸாரினோ வாதா அஸ்ஸாஸோ பஸ்ஸாஸோ இதி, யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் வாயோ வாயோக³தம் உபாதி³ன்னம் – அயம் வுச்சதி, பி⁴க்கு², அஜ்ஜ²த்திகா வாயோதா⁴து. யா சேவ கோ² பன அஜ்ஜ²த்திகா வாயோதா⁴து யா ச பா³ஹிரா வாயோதா⁴து வாயோதா⁴துரேவேஸா. ‘தம் நேதம் மம, நேஸோஹமஸ்மி, ந மேஸோ அத்தா’தி – ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஏவமேதம் யதா²பூ⁴தம் ஸம்மப்பஞ்ஞாய தி³ஸ்வா வாயோதா⁴துயா நிப்³பி³ந்த³தி, வாயோதா⁴துயா சித்தம் விராஜேதி.

353. ‘‘கதமா ச, பி⁴க்கு², ஆகாஸதா⁴து? ஆகாஸதா⁴து ஸியா அஜ்ஜ²த்திகா ஸியா பா³ஹிரா. கதமா ச, பி⁴க்கு², அஜ்ஜ²த்திகா ஆகாஸதா⁴து? யம் அஜ்ஜ²த்தம் பச்சத்தம் ஆகாஸம் ஆகாஸக³தம் உபாதி³ன்னம், ஸேய்யதி²த³ம் – கண்ணச்சி²த்³த³ம் நாஸச்சி²த்³த³ம் முக²த்³வாரம் யேன ச அஸிதபீதகா²யிதஸாயிதம் அஜ்ஜோ²ஹரதி, யத்த² ச அஸிதபீதகா²யிதஸாயிதம் ஸந்திட்ட²தி, யேன ச அஸிதபீதகா²யிதஸாயிதம் அதோ⁴பா⁴க³ம் [அதோ⁴பா⁴கா³ (ஸீ. ஸ்யா. கம். பீ.) தே³வதூ³தஸுத்தேன ஸமேதி] நிக்க²மதி, யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் ஆகாஸம் ஆகாஸக³தம் அக⁴ம் அக⁴க³தம் விவரம் விவரக³தம் அஸம்பு²ட்ட²ம் மம்ஸலோஹிதேஹி உபாதி³ன்னம் – அயம் வுச்சதி பி⁴க்கு² அஜ்ஜ²த்திகா ஆகாஸதா⁴து. யா சேவ கோ² பன அஜ்ஜ²த்திகா ஆகாஸதா⁴து யா ச பா³ஹிரா ஆகாஸதா⁴து ஆகாஸதா⁴துரேவேஸா. ‘தம் நேதம் மம, நேஸோஹமஸ்மி, ந மேஸோ அத்தா’தி – ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஏவமேதம் யதா²பூ⁴தம் ஸம்மப்பஞ்ஞாய தி³ஸ்வா ஆகாஸதா⁴துயா நிப்³பி³ந்த³தி, ஆகாஸதா⁴துயா சித்தம் விராஜேதி.

354. ‘‘அதா²பரம் விஞ்ஞாணம்யேவ அவஸிஸ்ஸதி பரிஸுத்³த⁴ம் பரியோதா³தம். தேன ச விஞ்ஞாணேன கிம் [தேன விஞ்ஞாணேன கிஞ்ச (ஸீ.)] விஜானாதி? ‘ஸுக²’ந்திபி விஜானாதி, ‘து³க்க²’ந்திபி விஜானாதி, ‘அது³க்க²மஸுக²’ந்திபி விஜானாதி. ஸுக²வேத³னியம், பி⁴க்கு², ப²ஸ்ஸம் படிச்ச உப்பஜ்ஜதி ஸுகா² வேத³னா. ஸோ ஸுக²ம் வேத³னம் வேத³யமானோ ‘ஸுக²ம் வேத³னம் வேத³யாமீ’தி பஜானாதி. ‘தஸ்ஸேவ ஸுக²வேத³னியஸ்ஸ ப²ஸ்ஸஸ்ஸ நிரோதா⁴ யம் தஜ்ஜம் வேத³யிதம் ஸுக²வேத³னியம் ப²ஸ்ஸம் படிச்ச உப்பன்னா ஸுகா² வேத³னா ஸா நிருஜ்ஜ²தி, ஸா வூபஸம்மதீ’தி பஜானாதி.

355. ‘‘து³க்க²வேத³னியம், பி⁴க்கு², ப²ஸ்ஸம் படிச்ச உப்பஜ்ஜதி து³க்கா² வேத³னா. ஸோ து³க்க²ம் வேத³னம் வேத³யமானோ ‘து³க்க²ம் வேத³னம் வேத³யாமீ’தி பஜானாதி. ‘தஸ்ஸேவ து³க்க²வேத³னியஸ்ஸ ப²ஸ்ஸஸ்ஸ நிரோதா⁴ யம் தஜ்ஜம் வேத³யிதம் து³க்க²வேத³னியம் ப²ஸ்ஸம் படிச்ச உப்பன்னா து³க்கா² வேத³னா ஸா நிருஜ்ஜ²தி, ஸா வூபஸம்மதீ’தி பஜானாதி.

356. ‘‘அது³க்க²மஸுக²வேத³னியம், பி⁴க்கு², ப²ஸ்ஸம் படிச்ச உப்பஜ்ஜதி அது³க்க²மஸுகா² வேத³னா. ஸோ அது³க்க²மஸுக²ம் வேத³னம் வேத³யமானோ ‘அது³க்க²மஸுக²ம் வேத³னம் வேத³யாமீ’தி பஜானாதி. ‘தஸ்ஸேவ அது³க்க²மஸுக²வேத³னியஸ்ஸ ப²ஸ்ஸஸ்ஸ நிரோதா⁴ யம் தஜ்ஜம் வேத³யிதம் அது³க்க²மஸுக²வேத³னியம் ப²ஸ்ஸம் படிச்ச உப்பன்னா அது³க்க²மஸுகா² வேத³னா ஸா நிருஜ்ஜ²தி, ஸா வூபஸம்மதீ’தி பஜானாதி.

357. ‘‘ஸேய்யதா²பி, பி⁴க்கு², த்³வின்னம் கட்டா²னம் ஸங்க⁴ட்டா [ஸம்ப²ஸ்ஸ (ஸீ. பீ.), ஸங்க⁴டா (ஸ்யா. கம்.)] ஸமோதா⁴னா உஸ்மா ஜாயதி, தேஜோ அபி⁴னிப்³ப³த்ததி, தேஸம்யேவ த்³வின்னம் கட்டா²னம் நானாபா⁴வா விக்கே²பா யா தஜ்ஜா உஸ்மா ஸா நிருஜ்ஜ²தி, ஸா வூபஸம்மதி; ஏவமேவ கோ², பி⁴க்கு², ஸுக²வேத³னியம் ப²ஸ்ஸம் படிச்ச உப்பஜ்ஜதி ஸுகா² வேத³னா. ஸோ ஸுக²ம் வேத³னம் வேத³யமானோ ‘ஸுக²ம் வேத³னம் வேத³யாமீ’தி பஜானாதி. ‘தஸ்ஸேவ ஸுக²வேத³னியஸ்ஸ ப²ஸ்ஸஸ்ஸ நிரோதா⁴ யம் தஜ்ஜம் வேத³யிதம் ஸுக²வேத³னியம் ப²ஸ்ஸம் படிச்ச உப்பன்னா ஸுகா² வேத³னா ஸா நிருஜ்ஜ²தி, ஸா வூபஸம்மதீ’தி பஜானாதி.

358. ‘‘து³க்க²வேத³னியம், பி⁴க்கு², ப²ஸ்ஸம் படிச்ச உப்பஜ்ஜதி து³க்கா² வேத³னா. ஸோ து³க்க²ம் வேத³னம் வேத³யமானோ ‘து³க்க²ம் வேத³னம் வேத³யாமீ’தி பஜானாதி. ‘தஸ்ஸேவ து³க்க²வேத³னியஸ்ஸ ப²ஸ்ஸஸ்ஸ நிரோதா⁴ யம் தஜ்ஜம் வேத³யிதம் து³க்க²வேத³னியம் ப²ஸ்ஸம் படிச்ச உப்பன்னா து³க்கா² வேத³னா ஸா நிருஜ்ஜ²தி, ஸா வூபஸம்மதீ’தி பஜானாதி.

359. ‘‘அது³க்க²மஸுக²வேத³னியம், பி⁴க்கு², ப²ஸ்ஸம் படிச்ச உப்பஜ்ஜதி அது³க்க²மஸுகா² வேத³னா. ஸோ அது³க்க²மஸுக²ம் வேத³னம் வேத³யமானோ ‘அது³க்க²மஸுக²ம் வேத³னம் வேத³யாமீ’தி பஜானாதி. ‘தஸ்ஸேவ அது³க்க²மஸுக²வேத³னியஸ்ஸ ப²ஸ்ஸஸ்ஸ நிரோதா⁴ யம் தஜ்ஜம் வேத³யிதம் அது³க்க²மஸுக²வேத³னியம் ப²ஸ்ஸம் படிச்ச உப்பன்னா அது³க்க²மஸுகா² வேத³னா ஸா நிருஜ்ஜ²தி, ஸா வூபஸம்மதீ’தி பஜானாதி.

360. ‘‘அதா²பரம் உபேக்கா²யேவ அவஸிஸ்ஸதி பரிஸுத்³தா⁴ பரியோதா³தா முது³ ச கம்மஞ்ஞா ச பப⁴ஸ்ஸரா ச. ஸேய்யதா²பி, பி⁴க்கு², த³க்கோ² ஸுவண்ணகாரோ வா ஸுவண்ணகாரந்தேவாஸீ வா உக்கம் ப³ந்தே⁴ய்ய, உக்கம் ப³ந்தி⁴த்வா உக்காமுக²ம் ஆலிம்பேய்ய, உக்காமுக²ம் ஆலிம்பேத்வா ஸண்டா³ஸேன ஜாதரூபம் க³ஹேத்வா உக்காமுகே² பக்கி²பேய்ய, தமேனம் காலேன காலம் அபி⁴த⁴மேய்ய, காலேன காலம் உத³கேன பரிப்போ²ஸேய்ய, காலேன காலம் அஜ்ஜு²பேக்கே²ய்ய, தம் ஹோதி ஜாதரூபம் [ஜாதரூபம் த⁴ந்தம் (ஸீ. பீ.)] ஸுத⁴ந்தம் நித்³த⁴ந்தம் நீஹடம் [நிஹதம் (ஸ்யா. கம். க.)] நின்னீதகஸாவம் [நிஹதகஸாவம் (க.)] முது³ ச கம்மஞ்ஞஞ்ச பப⁴ஸ்ஸரஞ்ச, யஸ்ஸா யஸ்ஸா ச பிளந்த⁴னவிகதியா ஆகங்க²தி – யதி³ பட்டிகாய [பவட்டிகாய (ஸீ. ஸ்யா.)] யதி³ குண்ட³லாய யதி³ கீ³வேய்யகாய யதி³ ஸுவண்ணமாலாய தஞ்சஸ்ஸ அத்த²ம் அனுபோ⁴தி; ஏவமேவ கோ², பி⁴க்கு², அதா²பரம் உபேக்கா²யேவ அவஸிஸ்ஸதி பரிஸுத்³தா⁴ பரியோதா³தா முது³ ச கம்மஞ்ஞா ச பப⁴ஸ்ஸரா ச.

361. ‘‘ஸோ ஏவம் பஜானாதி – ‘இமஞ்சே அஹம் உபேக்க²ம் ஏவம் பரிஸுத்³த⁴ம் ஏவம் பரியோதா³தம் ஆகாஸானஞ்சாயதனம் உபஸம்ஹரேய்யம், தத³னுத⁴ம்மஞ்ச சித்தம் பா⁴வேய்யம். ஏவம் மே அயம் உபேக்கா² தம்னிஸ்ஸிதா தது³பாதா³னா சிரம் தீ³க⁴மத்³தா⁴னம் திட்டே²ய்ய. இமஞ்சே அஹம் உபேக்க²ம் ஏவம் பரிஸுத்³த⁴ம் ஏவம் பரியோதா³தம் விஞ்ஞாணஞ்சாயதனம் உபஸம்ஹரேய்யம், தத³னுத⁴ம்மஞ்ச சித்தம் பா⁴வேய்யம். ஏவம் மே அயம் உபேக்கா² தம்னிஸ்ஸிதா தது³பாதா³னா சிரம் தீ³க⁴மத்³தா⁴னம் திட்டே²ய்ய. இமஞ்சே அஹம் உபேக்க²ம் ஏவம் பரிஸுத்³த⁴ம் ஏவம் பரியோதா³தம் ஆகிஞ்சஞ்ஞாயதனம் உபஸம்ஹரேய்யம், தத³னுத⁴ம்மஞ்ச சித்தம் பா⁴வேய்யம். ஏவம் மே அயம் உபேக்கா² தம்னிஸ்ஸிதா தது³பாதா³னா சிரம் தீ³க⁴மத்³தா⁴னம் திட்டே²ய்ய. இமஞ்சே அஹம் உபேக்க²ம் ஏவம் பரிஸுத்³த⁴ம் ஏவம் பரியோதா³தம் நேவஸஞ்ஞானாஸஞ்ஞாயதனம் உபஸம்ஹரேய்யம், தத³னுத⁴ம்மஞ்ச சித்தம் பா⁴வேய்யம். ஏவம் மே அயம் உபேக்கா² தம்னிஸ்ஸிதா தது³பாதா³னா சிரம் தீ³க⁴மத்³தா⁴னம் திட்டே²ய்யா’’’தி.

362. ‘‘ஸோ ஏவம் பஜானாதி – ‘இமஞ்சே அஹம் உபேக்க²ம் ஏவம் பரிஸுத்³த⁴ம் ஏவம் பரியோதா³தம் ஆகாஸானஞ்சாயதனம் உபஸம்ஹரேய்யம், தத³னுத⁴ம்மஞ்ச சித்தம் பா⁴வேய்யம்; ஸங்க²தமேதம். இமஞ்சே அஹம் உபேக்க²ம் ஏவம் பரிஸுத்³த⁴ம் ஏவம் பரியோதா³தம் விஞ்ஞாணஞ்சாயதனம் உபஸம்ஹரேய்யம், தத³னுத⁴ம்மஞ்ச சித்தம் பா⁴வேய்யம்; ஸங்க²தமேதம். இமஞ்சே அஹம் உபேக்க²ம் ஏவம் பரிஸுத்³த⁴ம் ஏவம் பரியோதா³தம் ஆகிஞ்சஞ்ஞாயதனம் உபஸம்ஹரேய்யம், தத³னுத⁴ம்மஞ்ச சித்தம் பா⁴வேய்யம்; ஸங்க²தமேதம். இமஞ்சே அஹம் உபேக்க²ம் ஏவம் பரிஸுத்³த⁴ம் ஏவம் பரியோதா³தம் நேவஸஞ்ஞானாஸஞ்ஞாயதனம் உபஸம்ஹரேய்யம், தத³னுத⁴ம்மஞ்ச சித்தம் பா⁴வேய்யம்; ஸங்க²தமேத’’’ந்தி.

‘‘ஸோ நேவ தம் அபி⁴ஸங்க²ரோதி, ந அபி⁴ஸஞ்சேதயதி ப⁴வாய வா விப⁴வாய வா. ஸோ அனபி⁴ஸங்க²ரோந்தோ அனபி⁴ஸஞ்சேதயந்தோ ப⁴வாய வா விப⁴வாய வா ந கிஞ்சி லோகே உபாதி³யதி, அனுபாதி³யம் ந பரிதஸ்ஸதி, அபரிதஸ்ஸம் பச்சத்தம்யேவ பரினிப்³பா³யதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதி.

363. ‘‘ஸோ ஸுக²ஞ்சே வேத³னம் வேதே³தி, ‘ஸா அனிச்சா’தி பஜானாதி, ‘அனஜ்ஜோ²ஸிதா’தி பஜானாதி, ‘அனபி⁴னந்தி³தா’தி பஜானாதி. து³க்க²ஞ்சே வேத³னம் வேதே³தி, ‘ஸா அனிச்சா’தி பஜானாதி, ‘அனஜ்ஜோ²ஸிதா’தி பஜானாதி, ‘அனபி⁴னந்தி³தா’தி பஜானாதி. அது³க்க²மஸுக²ஞ்சே வேத³னம் வேதே³தி, ‘ஸா அனிச்சா’தி பஜானாதி, ‘அனஜ்ஜோ²ஸிதா’தி பஜானாதி, ‘அனபி⁴னந்தி³தா’தி பஜானாதி.

364. ‘‘ஸோ ஸுக²ஞ்சே வேத³னம் வேதே³தி, விஸம்யுத்தோ நம் வேதே³தி; து³க்க²ஞ்சே வேத³னம் வேதே³தி, விஸம்யுத்தோ நம் வேதே³தி; அது³க்க²மஸுக²ஞ்சே வேத³னம் வேதே³தி, விஸம்யுத்தோ நம் வேதே³தி. ஸோ காயபரியந்திகம் வேத³னம் வேத³யமானோ ‘காயபரியந்திகம் வேத³னம் வேத³யாமீ’தி பஜானாதி, ஜீவிதபரியந்திகம் வேத³னம் வேத³யமானோ ‘ஜீவிதபரியந்திகம் வேத³னம் வேத³யாமீ’தி பஜானாதி, ‘காயஸ்ஸ பே⁴தா³ பரம் மரணா உத்³த⁴ம் ஜீவிதபரியாதா³னா இதே⁴வ ஸப்³ப³வேத³யிதானி அனபி⁴னந்தி³தானி ஸீதீப⁴விஸ்ஸந்தீ’தி பஜானாதி.

365. ‘‘ஸேய்யதா²பி, பி⁴க்கு², தேலஞ்ச படிச்ச வட்டிஞ்ச படிச்ச தேலப்பதீ³போ ஜா²யதி; தஸ்ஸேவ தேலஸ்ஸ ச வட்டியா ச பரியாதா³னா அஞ்ஞஸ்ஸ ச அனுபஹாரா [அனுபாஹாரா (ஸீ. பீ.), அனுபாதா³னா (க.)] அனாஹாரோ நிப்³பா³யதி; ஏவமேவ கோ², பி⁴க்கு², காயபரியந்திகம் வேத³னம் வேத³யமானோ ‘காயபரியந்திகம் வேத³னம் வேத³யாமீ’தி பஜானாதி, ஜீவிதபரியந்திகம் வேத³னம் வேத³யமானோ ‘ஜீவிதபரியந்திகம் வேத³னம் வேத³யாமீ’தி பஜானாதி, ‘காயஸ்ஸ பே⁴தா³ பரம் மரணா உத்³த⁴ம் ஜீவிதபரியாதா³னா இதே⁴வ ஸப்³ப³வேத³யிதானி அனபி⁴னந்தி³தானி ஸீதீப⁴விஸ்ஸந்தீ’தி பஜானாதி. தஸ்மா ஏவம் ஸமன்னாக³தோ பி⁴க்கு² இமினா பரமேன பஞ்ஞாதி⁴ட்டா²னேன ஸமன்னாக³தோ ஹோதி. ஏஸா ஹி, பி⁴க்கு², பரமா அரியா பஞ்ஞா யதி³த³ம் – ஸப்³ப³து³க்க²க்க²யே ஞாணம்.

366. ‘‘தஸ்ஸ ஸா விமுத்தி ஸச்சே டி²தா அகுப்பா ஹோதி. தஞ்ஹி, பி⁴க்கு², முஸா யம் மோஸத⁴ம்மம், தம் ஸச்சம் யம் அமோஸத⁴ம்மம் நிப்³பா³னம். தஸ்மா ஏவம் ஸமன்னாக³தோ பி⁴க்கு² இமினா பரமேன ஸச்சாதி⁴ட்டா²னேன ஸமன்னாக³தோ ஹோதி. ஏதஞ்ஹி, பி⁴க்கு², பரமம் அரியஸச்சம் யதி³த³ம் – அமோஸத⁴ம்மம் நிப்³பா³னம்.

367. ‘‘தஸ்ஸேவ கோ² பன புப்³பே³ அவித்³த³ஸுனோ உபதீ⁴ ஹோந்தி ஸமத்தா ஸமாதி³ன்னா. த்யாஸ்ஸ பஹீனா ஹோந்தி உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. தஸ்மா ஏவம் ஸமன்னாக³தோ பி⁴க்கு² இமினா பரமேன சாகா³தி⁴ட்டா²னேன ஸமன்னாக³தோ ஹோதி. ஏஸோ ஹி, பி⁴க்கு², பரமோ அரியோ சாகோ³ யதி³த³ம் – ஸப்³பூ³பதி⁴படினிஸ்ஸக்³கோ³.

368. ‘‘தஸ்ஸேவ கோ² பன புப்³பே³ அவித்³த³ஸுனோ அபி⁴ஜ்ஜா² ஹோதி ச²ந்தோ³ ஸாராகோ³. ஸ்வாஸ்ஸ பஹீனோ ஹோதி உச்சி²ன்னமூலோ தாலாவத்து²கதோ அனபா⁴வம்கதோ ஆயதிம் அனுப்பாத³த⁴ம்மோ. தஸ்ஸேவ கோ² பன புப்³பே³ அவித்³த³ஸுனோ ஆகா⁴தோ ஹோதி ப்³யாபாதோ³ ஸம்பதோ³ஸோ. ஸ்வாஸ்ஸ பஹீனோ ஹோதி உச்சி²ன்னமூலோ தாலாவத்து²கதோ அனபா⁴வம்கதோ ஆயதிம் அனுப்பாத³த⁴ம்மோ. தஸ்ஸேவ கோ² பன புப்³பே³ அவித்³த³ஸுனோ அவிஜ்ஜா ஹோதி ஸம்மோஹோ. ஸ்வாஸ்ஸ பஹீனோ ஹோதி உச்சி²ன்னமூலோ தாலாவத்து²கதோ அனபா⁴வம்கதோ ஆயதிம் அனுப்பாத³த⁴ம்மோ. தஸ்மா ஏவம் ஸமன்னாக³தோ பி⁴க்கு² இமினா பரமேன உபஸமாதி⁴ட்டா²னேன ஸமன்னாக³தோ ஹோதி. ஏஸோ ஹி, பி⁴க்கு², பரமோ அரியோ உபஸமோ யதி³த³ம் – ராக³தோ³ஸமோஹானம் உபஸமோ. ‘பஞ்ஞம் நப்பமஜ்ஜேய்ய, ஸச்சமனுரக்கே²ய்ய, சாக³மனுப்³ரூஹேய்ய, ஸந்திமேவ ஸோ ஸிக்கே²ய்யா’தி – இதி யம் தம் வுத்தம், இத³மேதம் படிச்ச வுத்தம்.

369. ‘‘‘யத்த² டி²தம் மஞ்ஞஸ்ஸவா நப்பவத்தந்தி, மஞ்ஞஸ்ஸவே கோ² பன நப்பவத்தமானே முனி ஸந்தோதி வுச்சதீ’தி – இதி கோ² பனேதம் வுத்தம். கிஞ்சேதம் படிச்ச வுத்தம்? ‘அஸ்மீ’தி, பி⁴க்கு², மஞ்ஞிதமேதம், ‘அயமஹமஸ்மீ’தி மஞ்ஞிதமேதம், ‘ப⁴விஸ்ஸ’ந்தி மஞ்ஞிதமேதம், ‘ந ப⁴விஸ்ஸ’ந்தி மஞ்ஞிதமேதம், ‘ரூபீ ப⁴விஸ்ஸ’ந்தி மஞ்ஞிதமேதம், ‘அரூபீ ப⁴விஸ்ஸ’ந்தி மஞ்ஞிதமேதம், ‘ஸஞ்ஞீ ப⁴விஸ்ஸ’ந்தி மஞ்ஞிதமேதம், ‘அஸஞ்ஞீ ப⁴விஸ்ஸ’ந்தி மஞ்ஞிதமேதம், ‘நேவஸஞ்ஞீனாஸஞ்ஞீ ப⁴விஸ்ஸ’ந்தி மஞ்ஞிதமேதம். மஞ்ஞிதம், பி⁴க்கு², ரோகோ³ மஞ்ஞிதம் க³ண்டோ³ மஞ்ஞிதம் ஸல்லம். ஸப்³ப³மஞ்ஞிதானம் த்வேவ, பி⁴க்கு², ஸமதிக்கமா முனி ஸந்தோதி வுச்சதி. முனி கோ² பன, பி⁴க்கு², ஸந்தோ ந ஜாயதி, ந ஜீயதி, ந மீயதி, ந குப்பதி, ந பிஹேதி. தஞ்ஹிஸ்ஸ, பி⁴க்கு², நத்தி² யேன ஜாயேத², அஜாயமானோ கிம் ஜீயிஸ்ஸதி, அஜீயமானோ கிம் மீயிஸ்ஸதி, அமீயமானோ கிம் குப்பிஸ்ஸதி, அகுப்பமானோ கிஸ்ஸ [கிம் (க.)] பிஹேஸ்ஸதி? ‘யத்த² டி²தம் மஞ்ஞஸ்ஸவா நப்பவத்தந்தி, மஞ்ஞஸ்ஸவே கோ² பன நப்பவத்தமானே முனி ஸந்தோதி வுச்சதீ’தி – இதி யம் தம் வுத்தம், இத³மேதம் படிச்ச வுத்தம். இமம் கோ² மே த்வம், பி⁴க்கு², ஸம்கி²த்தேன ச²தா⁴துவிப⁴ங்க³ம் தா⁴ரேஹீ’’தி.

370. அத² கோ² ஆயஸ்மா புக்குஸாதி – ‘‘ஸத்தா² கிர மே அனுப்பத்தோ, ஸுக³தோ கிர மே அனுப்பத்தோ ஸம்மாஸம்பு³த்³தோ⁴ கிர மே அனுப்பத்தோ’’தி உட்டா²யாஸனா ஏகம்ஸம் சீவரம் கத்வா ப⁴க³வதோ பாதே³ஸு ஸிரஸா நிபதித்வா ப⁴க³வந்தம் ஏதத³வோச – ‘‘அச்சயோ மம், ப⁴ந்தே, அச்சக³மா யதா²பா³லம் யதா²மூள்ஹம் யதா²அகுஸலம், யோஹம் ப⁴க³வந்தம் ஆவுஸோவாதே³ன ஸமுதா³சரிதப்³ப³ம் அமஞ்ஞிஸ்ஸம். தஸ்ஸ மே, ப⁴ந்தே, ப⁴க³வா அச்சயம் அச்சயதோ படிக்³க³ண்ஹாது ஆயதிம் ஸம்வராயா’’தி. ‘‘தக்³க⁴ த்வம், பி⁴க்கு², அச்சயோ அச்சக³மா யதா²பா³லம் யதா²மூள்ஹம் யதா²அகுஸலம், யம் மம் த்வம் ஆவுஸோவாதே³ன ஸமுதா³சரிதப்³ப³ம் அமஞ்ஞித்த². யதோ ச கோ² த்வம், பி⁴க்கு², அச்சயம் அச்சயதோ தி³ஸ்வா யதா²த⁴ம்மம் படிகரோஸி, தம் தே மயம் படிக்³க³ண்ஹாம. வுத்³தி⁴ஹேஸா, பி⁴க்கு², அரியஸ்ஸ வினயே யோ அச்சயம் அச்சயதோ தி³ஸ்வா யதா²த⁴ம்மம் படிகரோதி, ஆயதிம் ஸம்வரம் ஆபஜ்ஜதீ’’தி. ‘‘லபே⁴ய்யாஹம், ப⁴ந்தே, ப⁴க³வதோ ஸந்திகே உபஸம்பத³’’ந்தி. ‘‘பரிபுண்ணம் பன தே, பி⁴க்கு², பத்தசீவர’’ந்தி? ‘‘ந கோ² மே, ப⁴ந்தே, பரிபுண்ணம் பத்தசீவர’’ந்தி. ‘‘ந கோ², பி⁴க்கு², ததா²க³தா அபரிபுண்ணபத்தசீவரம் உபஸம்பாதே³ந்தீ’’தி.

அத² கோ² ஆயஸ்மா புக்குஸாதி ப⁴க³வதோ பா⁴ஸிதம் அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பத்தசீவரபரியேஸனம் பக்காமி. அத² கோ² ஆயஸ்மந்தம் புக்குஸாதிம் பத்தசீவரபரியேஸனம் சரந்தம் விப்³ப⁴ந்தா கா³வீ [ப⁴ந்தகா³வீ (ஸீ. பீ.), கா³வீ (ஸ்யா. கம்.)] ஜீவிதா வோரோபேஸி. அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் – ‘‘யோ ஸோ, ப⁴ந்தே, புக்குஸாதி நாம குலபுத்தோ ப⁴க³வதா ஸம்கி²த்தேன ஓவாதே³ன ஓவதி³தோ ஸோ காலங்கதோ. தஸ்ஸ கா க³தி, கோ அபி⁴ஸம்பராயோ’’தி? ‘‘பண்டி³தோ, பி⁴க்க²வே, புக்குஸாதி குலபுத்தோ பச்சபாதி³ த⁴ம்மஸ்ஸானுத⁴ம்மம், ந ச மம் த⁴ம்மாதி⁴கரணம் விஹேஸேஸி [விஹேடே²ஸி (ஸீ. ஸ்யா. கம்.) விஹேஸேதி (க.)]. புக்குஸாதி, பி⁴க்க²வே, குலபுத்தோ பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ தத்த² பரினிப்³பா³யீ அனாவத்தித⁴ம்மோ தஸ்மா லோகா’’தி.

இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதம் அபி⁴னந்து³ந்தி.

தா⁴துவிப⁴ங்க³ஸுத்தம் நிட்டி²தம் த³ஸமம்.