11. ஸச்சவிப⁴ங்க³ஸுத்தம்

371. ஏவம் மே ஸுதம் – ஏகம் ஸமயம் ப⁴க³வா பா³ராணஸியம் விஹரதி இஸிபதனே மிக³தா³யே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘ததா²க³தேன, பி⁴க்க²வே, அரஹதா ஸம்மாஸம்பு³த்³தே⁴ன பா³ராணஸியம் இஸிபதனே மிக³தா³யே அனுத்தரம் த⁴ம்மசக்கம் பவத்திதம் அப்படிவத்தியம் ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மிம், யதி³த³ம் – சதுன்னம் அரியஸச்சானம் ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம். கதமேஸம் சதுன்னம்? து³க்க²ஸ்ஸ அரியஸச்சஸ்ஸ ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம், து³க்க²ஸமுத³யஸ்ஸ அரியஸச்சஸ்ஸ ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம், து³க்க²னிரோத⁴ஸ்ஸ அரியஸச்சஸ்ஸ ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம், து³க்க²னிரோத⁴கா³மினியா படிபதா³ய அரியஸச்சஸ்ஸ ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம். ததா²க³தேன, பி⁴க்க²வே, அரஹதா ஸம்மாஸம்பு³த்³தே⁴ன பா³ராணஸியம் இஸிபதனே மிக³தா³யே அனுத்தரம் த⁴ம்மசக்கம் பவத்திதம் அப்படிவத்தியம் ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மிம், யதி³த³ம் – இமேஸம் சதுன்னம் அரியஸச்சானம் ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம்.

‘‘ஸேவத², பி⁴க்க²வே, ஸாரிபுத்தமோக்³க³ல்லானே; ப⁴ஜத², பி⁴க்க²வே, ஸாரிபுத்தமோக்³க³ல்லானே. பண்டி³தா பி⁴க்கூ² அனுக்³கா³ஹகா ஸப்³ரஹ்மசாரீனம். ஸேய்யதா²பி, பி⁴க்க²வே, ஜனேதா [ஜனேத்தி (ஸீ. பீ.)], ஏவம் ஸாரிபுத்தோ; ஸேய்யதா²பி ஜாதஸ்ஸ ஆபாதே³தா, ஏவம் மோக்³க³ல்லானோ. ஸாரிபுத்தோ, பி⁴க்க²வே, ஸோதாபத்திப²லே வினேதி, மோக்³க³ல்லானோ உத்தமத்தே². ஸாரிபுத்தோ, பி⁴க்க²வே, பஹோதி சத்தாரி அரியஸச்சானி வித்தா²ரேன ஆசிக்கி²தும் தே³ஸேதும் பஞ்ஞாபேதும் பட்ட²பேதும் விவரிதும் விப⁴ஜிதும் உத்தானீகாது’’ந்தி. இத³மவோச ப⁴க³வா. இத³ம் வத்வான ஸுக³தோ உட்டா²யாஸனா விஹாரம் பாவிஸி.

372. தத்ர கோ² ஆயஸ்மா ஸாரிபுத்தோ அசிரபக்கந்தஸ்ஸ ப⁴க³வதோ பி⁴க்கூ² ஆமந்தேஸி – ‘‘ஆவுஸோ, பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஸாரிபுத்தஸ்ஸ பச்சஸ்ஸோஸும். ஆயஸ்மா ஸாரிபுத்தோ ஏதத³வோச –

‘‘ததா²க³தேன, ஆவுஸோ, அரஹதா ஸம்மாஸம்பு³த்³தே⁴ன பா³ராணஸியம் இஸிபதனே மிக³தா³யே அனுத்தரம் த⁴ம்மசக்கம் பவத்திதம் அப்படிவத்தியம் ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மிம், யதி³த³ம் – சதுன்னம் அரியஸச்சானம் ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம். கதமேஸம் சதுன்னம்? து³க்க²ஸ்ஸ அரியஸச்சஸ்ஸ ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம், து³க்க²ஸமுத³யஸ்ஸ அரியஸச்சஸ்ஸ ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம், து³க்க²னிரோத⁴ஸ்ஸ அரியஸச்சஸ்ஸ ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம், து³க்க²னிரோத⁴கா³மினியா படிபதா³ய அரியஸச்சஸ்ஸ ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம்.

373. ‘‘கதமஞ்சாவுஸோ, து³க்க²ம் அரியஸச்சம்? ஜாதிபி து³க்கா², ஜராபி து³க்கா², மரணம்பி து³க்க²ம், ஸோகபரிதே³வது³க்க²தோ³மனஸ்ஸுபாயாஸாபி து³க்கா², யம்பிச்ச²ம் ந லப⁴தி தம்பி து³க்க²ம்; ஸம்கி²த்தேன பஞ்சுபாதா³னக்க²ந்தா⁴ து³க்கா².

‘‘கதமா சாவுஸோ, ஜாதி? யா தேஸம் தேஸம் ஸத்தானம் தம்ஹி தம்ஹி ஸத்தனிகாயே ஜாதி ஸஞ்ஜாதி ஓக்கந்தி அபி⁴னிப்³ப³த்தி க²ந்தா⁴னம் பாதுபா⁴வோ ஆயதனானம் படிலாபோ⁴, அயம் வுச்சதாவுஸோ – ‘ஜாதி’’’.

‘‘கதமா சாவுஸோ, ஜரா? யா தேஸம் தேஸம் ஸத்தானம் தம்ஹி தம்ஹி ஸத்தனிகாயே ஜரா ஜீரணதா க²ண்டி³ச்சம் பாலிச்சம் வலித்தசதா ஆயுனோ ஸம்ஹானி இந்த்³ரியானம் பரிபாகோ, அயம் வுச்சதாவுஸோ – ‘ஜரா’’’.

‘‘கதமஞ்சாவுஸோ, மரணம்? யா தேஸம் தேஸம் ஸத்தானம் தம்ஹா தம்ஹா ஸத்தனிகாயா சுதி சவனதா பே⁴தோ³ அந்தரதா⁴னம் மச்சு மரணம் காலம்கிரியா க²ந்தா⁴னம் பே⁴தோ³ களேவரஸ்ஸ நிக்கே²போ ஜீவிதிந்த்³ரியஸ்ஸுபச்சே²தோ³, இத³ம் வுச்சதாவுஸோ – ‘மரணம்’’’.

‘‘கதமோ சாவுஸோ, ஸோகோ? யோ கோ², ஆவுஸோ, அஞ்ஞதரஞ்ஞதரேன ப்³யஸனேன ஸமன்னாக³தஸ்ஸ அஞ்ஞதரஞ்ஞதரேன து³க்க²த⁴ம்மேன பு²ட்ட²ஸ்ஸ ஸோகோ ஸோசனா ஸோசிதத்தம் அந்தோஸோகோ அந்தோபரிஸோகோ, அயம் வுச்சதாவுஸோ – ‘ஸோகோ’’’.

‘‘கதமோ சாவுஸோ, பரிதே³வோ? யோ கோ², ஆவுஸோ, அஞ்ஞதரஞ்ஞதரேன ப்³யஸனேன ஸமன்னாக³தஸ்ஸ அஞ்ஞதரஞ்ஞதரேன து³க்க²த⁴ம்மேன பு²ட்ட²ஸ்ஸ ஆதே³வோ பரிதே³வோ ஆதே³வனா பரிதே³வனா ஆதே³விதத்தம் பரிதே³விதத்தம், அயம் வுச்சதாவுஸோ – ‘பரிதே³வோ’’’.

‘‘கதமஞ்சாவுஸோ, து³க்க²ம்? யம் கோ², ஆவுஸோ, காயிகம் து³க்க²ம் காயிகம் அஸாதம் காயஸம்ப²ஸ்ஸஜம் து³க்க²ம் அஸாதம் வேத³யிதம், இத³ம் வுச்சதாவுஸோ – ‘து³க்க²ம்’’’.

‘‘கதமஞ்சாவுஸோ, தோ³மனஸ்ஸம்? யம் கோ², ஆவுஸோ, சேதஸிகம் து³க்க²ம் சேதஸிகம் அஸாதம் மனோஸம்ப²ஸ்ஸஜம் து³க்க²ம் அஸாதம் வேத³யிதம், இத³ம் வுச்சதாவுஸோ – ‘தோ³மனஸ்ஸம்’’’.

‘‘கதமோ சாவுஸோ, உபாயாஸோ? யோ கோ², ஆவுஸோ, அஞ்ஞதரஞ்ஞதரேன ப்³யஸனேன ஸமன்னாக³தஸ்ஸ அஞ்ஞதரஞ்ஞதரேன து³க்க²த⁴ம்மேன பு²ட்ட²ஸ்ஸ ஆயாஸோ உபாயாஸோ ஆயாஸிதத்தம் உபாயாஸிதத்தம், அயம் வுச்சதாவுஸோ – ‘உபாயாஸோ’’’.

‘‘கதமஞ்சாவுஸோ, யம்பிச்ச²ம் ந லப⁴தி தம்பி து³க்க²ம்? ஜாதித⁴ம்மானம், ஆவுஸோ, ஸத்தானம் ஏவம் இச்சா² உப்பஜ்ஜதி – ‘அஹோ வத, மயம் ந ஜாதித⁴ம்மா அஸ்ஸாம; ந ச, வத, நோ ஜாதி ஆக³ச்சே²ய்யா’தி. ந கோ² பனேதம் இச்சா²ய பத்தப்³ப³ம். இத³ம்பி – ‘யம்பிச்ச²ம் ந லப⁴தி தம்பி து³க்க²ம்’. ஜராத⁴ம்மானம், ஆவுஸோ, ஸத்தானம்…பே… ப்³யாதி⁴த⁴ம்மானம், ஆவுஸோ, ஸத்தானம்… மரணத⁴ம்மானம், ஆவுஸோ, ஸத்தானம்… ஸோகபரிதே³வது³க்க²தோ³மனஸ்ஸுபாயாஸத⁴ம்மானம், ஆவுஸோ, ஸத்தானம் ஏவம் இச்சா² உப்பஜ்ஜதி – ‘அஹோ வத, மயம் ந ஸோகபரிதே³வது³க்க²தோ³மனஸ்ஸுபாயாஸத⁴ம்மா அஸ்ஸாம; ந ச, வத, நோ ஸோகபரிதே³வது³க்க²தோ³மனஸ்ஸுபாயாஸா ஆக³ச்சே²ய்யு’ந்தி. ந கோ² பனேதம் இச்சா²ய பத்தப்³ப³ம். இத³ம்பி – ‘யம்பிச்ச²ம் ந லப⁴தி தம்பி து³க்க²ம்’’’.

‘‘கதமே சாவுஸோ, ஸம்கி²த்தேன பஞ்சுபாதா³னக்க²ந்தா⁴ து³க்கா²? ஸேய்யதி²த³ம் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴. இமே வுச்சந்தாவுஸோ – ‘ஸம்கி²த்தேன பஞ்சுபாதா³னக்க²ந்தா⁴ து³க்கா²’. இத³ம் வுச்சதாவுஸோ – ‘து³க்க²ம் அரியஸச்சம்’’’.

374. ‘‘கதமஞ்சாவுஸோ, து³க்க²ஸமுத³யம் [து³க்க²ஸமுத³யோ (ஸ்யா. கம்.)] அரியஸச்சம்? யாயம் தண்ஹா போனோப்³ப⁴விகா [போனோப⁴விகா (ஸீ. பீ.)] நந்தீ³ராக³ஸஹக³தா [நந்தி³ராக³ஸஹக³தா (ஸீ. ஸ்யா. கம். பீ.)] தத்ரதத்ராபி⁴னந்தி³னீ, ஸேய்யதி²த³ம் – காமதண்ஹா ப⁴வதண்ஹா விப⁴வதண்ஹா, இத³ம் வுச்சதாவுஸோ – ‘து³க்க²ஸமுத³யம் [து³க்க²ஸமுத³யோ (ஸ்யா. கம்.)] அரியஸச்சம்’’’.

‘‘கதமஞ்சாவுஸோ, து³க்க²னிரோத⁴ம் [து³க்க²னிரோதோ⁴ (ஸ்யா. கம்.)] அரியஸச்சம்? யோ தஸ்ஸாயேவ தண்ஹாய அஸேஸவிராக³னிரோதோ⁴ சாகோ³ படினிஸ்ஸக்³கோ³ முத்தி அனாலயோ, இத³ம் வுச்சதாவுஸோ – ‘து³க்க²னிரோத⁴ம் [து³க்க²னிரோதோ⁴ (ஸ்யா. கம்.)] அரியஸச்சம்’’’.

375. ‘‘கதமஞ்சாவுஸோ, து³க்க²னிரோத⁴கா³மினீ படிபதா³ அரியஸச்சம்? அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴.

‘‘கதமாசாவுஸோ, ஸம்மாதி³ட்டி²? யம் கோ², ஆவுஸோ, து³க்கே² ஞாணம், து³க்க²ஸமுத³யே ஞாணம், து³க்க²னிரோதே⁴ ஞாணம், து³க்க²னிரோத⁴கா³மினியா படிபதா³ய ஞாணம், அயம் வுச்சதாவுஸோ – ‘ஸம்மாதி³ட்டி²’’’.

‘‘கதமோ சாவுஸோ, ஸம்மாஸங்கப்போ? நேக்க²ம்மஸங்கப்போ, அப்³யாபாத³ஸங்கப்போ, அவிஹிம்ஸாஸங்கப்போ, அயம் வுச்சதாவுஸோ – ‘ஸம்மாஸங்கப்போ’’’.

‘‘கதமா சாவுஸோ, ஸம்மாவாசா? முஸாவாதா³ வேரமணீ, பிஸுணாய வாசாய வேரமணீ, ப²ருஸாய வாசாய வேரமணீ, ஸம்ப²ப்பலாபா வேரமணீ, அயம் வுச்சதாவுஸோ – ‘ஸம்மாவாசா’’’.

‘‘கதமோ சாவுஸோ, ஸம்மாகம்மந்தீ? பாணாதிபாதா வேரமணீ, அதி³ன்னாதா³னா வேரமணீ, காமேஸுமிச்சா²சாரா வேரமணீ, அயம் வுச்சதாவுஸோ – ‘ஸம்மாகம்மந்தோ’’’.

‘‘கதமோ சாவுஸோ, ஸம்மாஆஜீவோ? இதா⁴வுஸோ, அரியஸாவகோ மிச்சா²ஆஜீவம் பஹாய ஸம்மாஆஜீவேன ஜீவிகம் கப்பேதி, அயம் வுச்சதாவுஸோ – ‘ஸம்மாஆஜீவோ’’’.

‘‘கதமோ சாவுஸோ, ஸம்மாவாயாமோ? இதா⁴வுஸோ, பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி, உப்பன்னானம் பாபகானம் அகுஸலானம் த⁴ம்மானம் பஹானாய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி, அனுப்பன்னானம் குஸலானம் த⁴ம்மானம் உப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி, உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி, அயம் வுச்சதாவுஸோ – ‘ஸம்மாவாயாமோ’’’.

‘‘கதமா சாவுஸோ, ஸம்மாஸதி? இதா⁴வுஸோ, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம். வேத³னாஸு வேத³னானுபஸ்ஸீ விஹரதி…பே… சித்தே சித்தானுபஸ்ஸீ விஹரதி… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம், அயம் வுச்சதாவுஸோ – ‘ஸம்மாஸதி’’’.

‘‘கதமோ சாவுஸோ, ஸம்மாஸமாதி⁴? இதா⁴வுஸோ, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி, விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி, பீதியா ச விராகா³ உபேக்க²கோ ச விஹரதி…பே… ததியம் ஜா²னம்… விஹரதி, அயம் வுச்சதாவுஸோ – ‘ஸம்மாஸமாதி⁴’. இத³ம் வுச்சதாவுஸோ – ‘து³க்க²னிரோத⁴கா³மினீ படிபதா³ அரியஸச்சம்’’’.

‘‘ததா²க³தேனாவுஸோ, அரஹதா ஸம்மாஸம்பு³த்³தே⁴ன பா³ராணஸியம் இஸிபதனே மிக³தா³யே அனுத்தரம் த⁴ம்மசக்கம் பவத்திதம் அப்படிவத்தியம் ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மிம், யதி³த³ம் – இமேஸம் சதுன்னம் அரியஸச்சானம் ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்ம’’ந்தி.

இத³மவோச ஆயஸ்மா ஸாரிபுத்தோ. அத்தமனா தே பி⁴க்கூ² ஆயஸ்மதோ ஸாரிபுத்தஸ்ஸ பா⁴ஸிதம் அபி⁴னந்து³ந்தி.

ஸச்சவிப⁴ங்க³ஸுத்தம் நிட்டி²தம் ஏகாத³ஸமம்.