10. சூளபுண்ணமஸுத்தம்

91. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி புப்³பா³ராமே மிகா³ரமாதுபாஸாதே³. தேன கோ² பன ஸமயேன ப⁴க³வா தத³ஹுபோஸதே² பன்னரஸே புண்ணாய புண்ணமாய ரத்தியா பி⁴க்கு²ஸங்க⁴பரிவுதோ அப்³போ⁴காஸே நிஸின்னோ ஹோதி. அத² கோ² ப⁴க³வா துண்ஹீபூ⁴தம் துண்ஹீபூ⁴தம் பி⁴க்கு²ஸங்க⁴ம் அனுவிலோகேத்வா பி⁴க்கூ² ஆமந்தேஸி – ‘‘ஜானேய்ய நு கோ², பி⁴க்க²வே, அஸப்புரிஸோ அஸப்புரிஸம் – ‘அஸப்புரிஸோ அயம் ப⁴வ’’’ந்தி? ‘‘நோ ஹேதம், ப⁴ந்தே’’. ‘‘ஸாது⁴, பி⁴க்க²வே; அட்டா²னமேதம், பி⁴க்க²வே, அனவகாஸோ யம் அஸப்புரிஸோ அஸப்புரிஸம் ஜானேய்ய – ‘அஸப்புரிஸோ அயம் ப⁴வ’ந்தி. ஜானேய்ய பன, பி⁴க்க²வே, அஸப்புரிஸோ ஸப்புரிஸம் – ‘ஸப்புரிஸோ அயம் ப⁴வ’’’ந்தி? ‘‘நோ ஹேதம், ப⁴ந்தே’’. ‘‘ஸாது⁴, பி⁴க்க²வே; ஏதம்பி கோ², பி⁴க்க²வே, அட்டா²னம் அனவகாஸோ யம் அஸப்புரிஸோ ஸப்புரிஸம் ஜானேய்ய – ‘ஸப்புரிஸோ அயம் ப⁴வ’ந்தி. அஸப்புரிஸோ, பி⁴க்க²வே, அஸ்ஸத்³த⁴ம்மஸமன்னாக³தோ ஹோதி, அஸப்புரிஸப⁴த்தி [அஸப்புரிஸப⁴த்தீ (ஸப்³ப³த்த²)] ஹோதி, அஸப்புரிஸசிந்தீ ஹோதி, அஸப்புரிஸமந்தீ ஹோதி, அஸப்புரிஸவாசோ ஹோதி, அஸப்புரிஸகம்மந்தோ ஹோதி, அஸப்புரிஸதி³ட்டி² [அஸப்புரிஸதி³ட்டீ² (ஸப்³ப³த்த²)] ஹோதி; அஸப்புரிஸதா³னம் தே³தி’’.

‘‘கத²ஞ்ச, பி⁴க்க²வே, அஸப்புரிஸோ அஸ்ஸத்³த⁴ம்மஸமன்னாக³தோ ஹோதி? இத⁴, பி⁴க்க²வே, அஸப்புரிஸோ அஸ்ஸத்³தோ⁴ ஹோதி, அஹிரிகோ ஹோதி, அனோத்தப்பீ ஹோதி, அப்பஸ்ஸுதோ ஹோதி, குஸீதோ ஹோதி, முட்ட²ஸ்ஸதி ஹோதி, து³ப்பஞ்ஞோ ஹோதி. ஏவம் கோ², பி⁴க்க²வே, அஸப்புரிஸோ அஸ்ஸத்³த⁴ம்மஸமன்னாக³தோ ஹோதி.

‘‘கத²ஞ்ச, பி⁴க்க²வே, அஸப்புரிஸோ அஸப்புரிஸப⁴த்தி ஹோதி? இத⁴, பி⁴க்க²வே, அஸப்புரிஸஸ்ஸ யே தே ஸமணப்³ராஹ்மணா அஸ்ஸத்³தா⁴ அஹிரிகா அனோத்தப்பினோ அப்பஸ்ஸுதா குஸீதா முட்ட²ஸ்ஸதினோ து³ப்பஞ்ஞா த்யாஸ்ஸ மித்தா ஹோந்தி தே ஸஹாயா. ஏவம் கோ², பி⁴க்க²வே, அஸப்புரிஸோ அஸப்புரிஸப⁴த்தி ஹோதி.

‘‘கத²ஞ்ச, பி⁴க்க²வே, அஸப்புரிஸோ அஸப்புரிஸசிந்தீ ஹோதி? இத⁴, பி⁴க்க²வே, அஸப்புரிஸோ அத்தப்³யாபா³தா⁴யபி சேதேதி, பரப்³யாபா³தா⁴யபி சேதேதி, உப⁴யப்³யாபா³தா⁴யபி சேதேதி. ஏவம் கோ², பி⁴க்க²வே, அஸப்புரிஸோ அஸப்புரிஸசிந்தீ ஹோதி.

‘‘கத²ஞ்ச, பி⁴க்க²வே, அஸப்புரிஸோ அஸப்புரிஸமந்தீ ஹோதி? இத⁴, பி⁴க்க²வே, அஸப்புரிஸோ அத்தப்³யாபா³தா⁴யபி மந்தேதி, பரப்³யாபா³தா⁴யபி மந்தேதி, உப⁴யப்³யாபா³தா⁴யபி மந்தேதி. ஏவம் கோ², பி⁴க்க²வே, அஸப்புரிஸோ அஸப்புரிஸமந்தீ ஹோதி.

‘‘கத²ஞ்ச, பி⁴க்க²வே, அஸப்புரிஸோ அஸப்புரிஸவாசோ ஹோதி? இத⁴, பி⁴க்க²வே, அஸப்புரிஸோ முஸாவாதீ³ ஹோதி, பிஸுணவாசோ ஹோதி, ப²ருஸவாசோ ஹோதி, ஸம்ப²ப்பலாபீ ஹோதி. ஏவம் கோ², பி⁴க்க²வே, அஸப்புரிஸோ அஸப்புரிஸவாசோ ஹோதி.

‘‘கத²ஞ்ச, பி⁴க்க²வே, அஸப்புரிஸோ அஸப்புரிஸகம்மந்தோ ஹோதி? இத⁴, பி⁴க்க²வே, அஸப்புரிஸோ பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி. ஏவம் கோ², பி⁴க்க²வே, அஸப்புரிஸோ அஸப்புரிஸகம்மந்தோ ஹோதி.

‘‘கத²ஞ்ச, பி⁴க்க²வே, அஸப்புரிஸோ அஸப்புரிஸதி³ட்டி² ஹோதி? இத⁴, பி⁴க்க²வே, அஸப்புரிஸோ ஏவம்தி³ட்டி² [ஏவம்தி³ட்டீ² (ஸீ. பீ.), ஏவம்தி³ட்டி²கோ (ஸ்யா. கம்.)] ஹோதி – ‘நத்தி² தி³ன்னம், நத்தி² யிட்ட²ம், நத்தி² ஹுதம், நத்தி² ஸுகதது³க்கடானம் [ஸுக்கடது³க்கடானம் (ஸீ. பீ.)] கம்மானம் ப²லம் விபாகோ, நத்தி² அயம் லோகோ, நத்தி² பரோ லோகோ, நத்தி² மாதா, நத்தி² பிதா, நத்தி² ஸத்தா ஓபபாதிகா, நத்தி² லோகே ஸமணப்³ராஹ்மணா ஸம்மக்³க³தா [ஸமக்³க³தா (க.)] ஸம்மாபடிபன்னா, யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’தி. ஏவம் கோ², பி⁴க்க²வே, அஸப்புரிஸோ அஸப்புரிஸதி³ட்டி² ஹோதி.

‘‘கத²ஞ்ச, பி⁴க்க²வே, அஸப்புரிஸோ அஸப்புரிஸதா³னம் தே³தி? இத⁴, பி⁴க்க²வே, அஸப்புரிஸோ அஸக்கச்சம் தா³னம் தே³தி, அஸஹத்தா² தா³னம் தே³தி, அசித்தீகத்வா தா³னம் தே³தி, அபவிட்ட²ம் தா³னம் தே³தி அனாக³மனதி³ட்டி²கோ தா³னம் தே³தி. ஏவம் கோ², பி⁴க்க²வே, அஸப்புரிஸோ அஸப்புரிஸதா³னம் தே³தி.

‘‘ஸோ, பி⁴க்க²வே, அஸப்புரிஸோ ஏவம் அஸ்ஸத்³த⁴ம்மஸமன்னாக³தோ, ஏவம் அஸப்புரிஸப⁴த்தி, ஏவம் அஸப்புரிஸசிந்தீ, ஏவம் அஸப்புரிஸமந்தீ, ஏவம் அஸப்புரிஸவாசோ, ஏவம் அஸப்புரிஸகம்மந்தோ, ஏவம் அஸப்புரிஸதி³ட்டி²; ஏவம் அஸப்புரிஸதா³னம் த³த்வா காயஸ்ஸ பே⁴தா³ பரம் மரணா யா அஸப்புரிஸானம் க³தி தத்த² உபபஜ்ஜதி. கா ச, பி⁴க்க²வே, அஸப்புரிஸானம் க³தி? நிரயோ வா திரச்சா²னயோனி வா.

92. ‘‘ஜானேய்ய நு கோ², பி⁴க்க²வே, ஸப்புரிஸோ ஸப்புரிஸம் – ‘ஸப்புரிஸோ அயம் ப⁴வ’’’ந்தி? ‘‘ஏவம், ப⁴ந்தே’’. ‘‘ஸாது⁴, பி⁴க்க²வே; டா²னமேதம், பி⁴க்க²வே, விஜ்ஜதி யம் ஸப்புரிஸோ ஸப்புரிஸம் ஜானேய்ய – ‘ஸப்புரிஸோ அயம் ப⁴வ’ந்தி. ஜானேய்ய பன, பி⁴க்க²வே, ஸப்புரிஸோ அஸப்புரிஸம் – ‘அஸப்புரிஸோ அயம் ப⁴வ’’’ந்தி? ‘‘ஏவம், ப⁴ந்தே’’. ‘‘ஸாது⁴, பி⁴க்க²வே; ஏதம்பி கோ², பி⁴க்க²வே, டா²னம் விஜ்ஜதி யம் ஸப்புரிஸோ அஸப்புரிஸம் ஜானேய்ய – ‘அஸப்புரிஸோ அயம் ப⁴வ’ந்தி. ஸப்புரிஸோ, பி⁴க்க²வே, ஸத்³த⁴ம்மஸமன்னாக³தோ ஹோதி, ஸப்புரிஸப⁴த்தி ஹோதி, ஸப்புரிஸசிந்தீ ஹோதி, ஸப்புரிஸமந்தீ ஹோதி, ஸப்புரிஸவாசோ ஹோதி, ஸப்புரிஸகம்மந்தோ ஹோதி, ஸப்புரிஸதி³ட்டி² ஹோதி; ஸப்புரிஸதா³னம் தே³தி’’.

‘‘கத²ஞ்ச, பி⁴க்க²வே, ஸப்புரிஸோ ஸத்³த⁴ம்மஸமன்னாக³தோ ஹோதி? இத⁴, பி⁴க்க²வே, ஸப்புரிஸோ ஸத்³தோ⁴ ஹோதி, ஹிரிமா ஹோதி, ஓத்தப்பீ ஹோதி, ப³ஹுஸ்ஸுதோ ஹோதி, ஆரத்³த⁴வீரியோ ஹோதி, உபட்டி²தஸ்ஸதி ஹோதி, பஞ்ஞவா ஹோதி. ஏவம் கோ², பி⁴க்க²வே, ஸப்புரிஸோ ஸத்³த⁴ம்மஸமன்னாக³தோ ஹோதி.

‘‘கத²ஞ்ச, பி⁴க்க²வே, ஸப்புரிஸோ ஸப்புரிஸப⁴த்தி ஹோதி? இத⁴, பி⁴க்க²வே, ஸப்புரிஸஸ்ஸ யே தே ஸமணப்³ராஹ்மணா ஸத்³தா⁴ ஹிரிமந்தோ ஓத்தப்பினோ ப³ஹுஸ்ஸுதா ஆரத்³த⁴வீரியா உபட்டி²தஸ்ஸதினோ பஞ்ஞவந்தோ த்யாஸ்ஸ மித்தா ஹோந்தி, தே ஸஹாயா. ஏவம் கோ², பி⁴க்க²வே, ஸப்புரிஸோ ஸப்புரிஸப⁴த்தி ஹோதி.

‘‘கத²ஞ்ச, பி⁴க்க²வே, ஸப்புரிஸோ ஸப்புரிஸசிந்தீ ஹோதி? இத⁴, பி⁴க்க²வே, ஸப்புரிஸோ நேவத்தப்³யாபா³தா⁴ய சேதேதி, ந பரப்³யாபா³தா⁴ய சேதேதி, ந உப⁴யப்³யாபா³தா⁴ய சேதேதி. ஏவம் கோ², பி⁴க்க²வே, ஸப்புரிஸோ ஸப்புரிஸசிந்தீ ஹோதி.

‘‘கத²ஞ்ச, பி⁴க்க²வே, ஸப்புரிஸோ ஸப்புரிஸமந்தீ ஹோதி? இத⁴, பி⁴க்க²வே, ஸப்புரிஸோ நேவத்தப்³யாபா³தா⁴ய மந்தேதி, ந பரப்³யாபா³தா⁴ய மந்தேதி, ந உப⁴யப்³யாபா³தா⁴ய மந்தேதி. ஏவம் கோ², பி⁴க்க²வே, ஸப்புரிஸோ ஸப்புரிஸமந்தீ ஹோதி.

‘‘கத²ஞ்ச, பி⁴க்க²வே, ஸப்புரிஸோ ஸப்புரிஸவாசோ ஹோதி? இத⁴, பி⁴க்க²வே, ஸப்புரிஸோ முஸாவாதா³ படிவிரதோ ஹோதி, பிஸுணாய வாசாய படிவிரதோ ஹோதி, ப²ருஸாய வாசாய படிவிரதோ ஹோதி, ஸம்ப²ப்பலாபா படிவிரதோ ஹோதி. ஏவம் கோ², பி⁴க்க²வே, ஸப்புரிஸோ ஸப்புரிஸவாசோ ஹோதி.

‘‘கத²ஞ்ச, பி⁴க்க²வே, ஸப்புரிஸோ ஸப்புரிஸகம்மந்தோ ஹோதி? இத⁴, பி⁴க்க²வே, ஸப்புரிஸோ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி. ஏவம் கோ², பி⁴க்க²வே, ஸப்புரிஸோ ஸப்புரிஸகம்மந்தோ ஹோதி.

‘‘கத²ஞ்ச, பி⁴க்க²வே, ஸப்புரிஸோ ஸப்புரிஸதி³ட்டி² ஹோதி? இத⁴, பி⁴க்க²வே, ஸப்புரிஸோ ஏவம்தி³ட்டி² ஹோதி – ‘அத்தி² தி³ன்னம், அத்தி² யிட்ட²ம், அத்தி² ஹுதம், அத்தி² ஸுகதது³க்கடானம் கம்மானம் ப²லம் விபாகோ, அத்தி² அயம் லோகோ, அத்தி² பரோ லோகோ, அத்தி² மாதா, அத்தி² பிதா, அத்தி² ஸத்தா ஓபபாதிகா, அத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’தி. ஏவம் கோ², பி⁴க்க²வே, ஸப்புரிஸோ ஸப்புரிஸதி³ட்டி² ஹோதி.

‘‘கத²ஞ்ச, பி⁴க்க²வே, ஸப்புரிஸோ ஸப்புரிஸதா³னம் தே³தி? இத⁴, பி⁴க்க²வே, ஸப்புரிஸோ ஸக்கச்சம் தா³னம் தே³தி, ஸஹத்தா² தா³னம் தே³தி, சித்தீகத்வா தா³னம் தே³தி, அனபவிட்ட²ம் தா³னம் தே³தி, ஆக³மனதி³ட்டி²கோ தா³னம் தே³தி. ஏவம் கோ², பி⁴க்க²வே, ஸப்புரிஸோ ஸப்புரிஸதா³னம் தே³தி.

‘‘ஸோ, பி⁴க்க²வே, ஸப்புரிஸோ ஏவம் ஸத்³த⁴ம்மஸமன்னாக³தோ, ஏவம் ஸப்புரிஸப⁴த்தி, ஏவம் ஸப்புரிஸசிந்தீ, ஏவம் ஸப்புரிஸமந்தீ, ஏவம் ஸப்புரிஸவாசோ, ஏவம் ஸப்புரிஸகம்மந்தோ, ஏவம் ஸப்புரிஸதி³ட்டி²; ஏவம் ஸப்புரிஸதா³னம் த³த்வா காயஸ்ஸ பே⁴தா³ பரம் மரணா யா ஸப்புரிஸானம் க³தி தத்த² உபபஜ்ஜதி. கா ச, பி⁴க்க²வே, ஸப்புரிஸானம் க³தி? தே³வமஹத்ததா வா மனுஸ்ஸமஹத்ததா வா’’தி.

இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதம் அபி⁴னந்து³ந்தி.

சூளபுண்ணமஸுத்தம் நிட்டி²தம் த³ஸமம்.

தே³வத³ஹவக்³கோ³ நிட்டி²தோ பட²மோ.