9. சூளஸகுலுதா³யிஸுத்தம்

269. ஏவம் மே ஸுதம் – ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஸகுலுதா³யீ பரிப்³பா³ஜகோ மோரனிவாபே பரிப்³பா³ஜகாராமே படிவஸதி மஹதியா பரிப்³பா³ஜகபரிஸாய ஸத்³தி⁴ம். அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய ராஜக³ஹம் பிண்டா³ய பாவிஸி. அத² கோ² ப⁴க³வதோ ஏதத³ஹோஸி – ‘‘அதிப்பகோ³ கோ² தாவ ராஜக³ஹே பிண்டா³ய சரிதும். யம்னூனாஹம் யேன மோரனிவாபோ பரிப்³பா³ஜகாராமோ யேன ஸகுலுதா³யீ பரிப்³பா³ஜகோ தேனுபஸங்கமேய்ய’’ந்தி. அத² கோ² ப⁴க³வா யேன மோரனிவாபோ பரிப்³பா³ஜகாராமோ தேனுபஸங்கமி.

தேன கோ² பன ஸமயேன ஸகுலுதா³யீ பரிப்³பா³ஜகோ மஹதியா பரிப்³பா³ஜகபரிஸாய ஸத்³தி⁴ம் நிஸின்னோ ஹோதி உன்னாதி³னியா உச்சாஸத்³த³மஹாஸத்³தா³ய அனேகவிஹிதம் திரச்சா²னகத²ம் கதே²ந்தியா, ஸேய்யதி²த³ம் – ராஜகத²ம் சோரகத²ம் மஹாமத்தகத²ம் ஸேனாகத²ம் ப⁴யகத²ம் யுத்³த⁴கத²ம் அன்னகத²ம் பானகத²ம் வத்த²கத²ம் ஸயனகத²ம் மாலாகத²ம் க³ந்த⁴கத²ம் ஞாதிகத²ம் யானகத²ம் கா³மகத²ம் நிக³மகத²ம் நக³ரகத²ம் ஜனபத³கத²ம் இத்தி²கத²ம் ஸூரகத²ம் விஸிகா²கத²ம் கும்ப⁴ட்டா²னகத²ம் புப்³ப³பேதகத²ம் நானத்தகத²ம் லோகக்கா²யிகம் ஸமுத்³த³க்கா²யிகம் இதிப⁴வாப⁴வகத²ம் இதி வா. அத்³த³ஸா கோ² ஸகுலுதா³யீ பரிப்³பா³ஜகோ ப⁴க³வந்தம் தூ³ரதோவ ஆக³ச்ச²ந்தம். தி³ஸ்வான ஸகம் பரிஸம் ஸண்டா²பேஸி – ‘‘அப்பஸத்³தா³ போ⁴ந்தோ ஹோந்து, மா போ⁴ந்தோ ஸத்³த³மகத்த². அயம் ஸமணோ கோ³தமோ ஆக³ச்ச²தி; அப்பஸத்³த³காமோ கோ² பன ஸோ ஆயஸ்மா அப்பஸத்³த³ஸ்ஸ வண்ணவாதீ³. அப்பேவ நாம அப்பஸத்³த³ம் பரிஸம் விதி³த்வா உபஸங்கமிதப்³ப³ம் மஞ்ஞேய்யா’’தி. அத² கோ² தே பரிப்³பா³ஜகா துண்ஹீ அஹேஸும்.

270. அத² கோ² ப⁴க³வா யேன ஸகுலுதா³யீ பரிப்³பா³ஜகோ தேனுபஸங்கமி. அத² கோ² ஸகுலுதா³யீ பரிப்³பா³ஜகோ ப⁴க³வந்தம் ஏதத³வோச – ‘‘ஏது கோ², ப⁴ந்தே, ப⁴க³வா. ஸ்வாக³தம், ப⁴ந்தே, ப⁴க³வதோ. சிரஸ்ஸம் கோ², ப⁴ந்தே, ப⁴க³வா இமம் பரியாயமகாஸி யதி³த³ம் இதா⁴க³மனாய. நிஸீத³து, ப⁴ந்தே, ப⁴க³வா; இத³மாஸனம் பஞ்ஞத்த’’ந்தி. நிஸீதி³ ப⁴க³வா பஞ்ஞத்தே ஆஸனே. ஸகுலுதா³யீபி கோ² பரிப்³பா³ஜகோ அஞ்ஞதரம் நீசம் ஆஸனம் க³ஹேத்வா ஏகமந்தம் நிஸீதி³. ஏகமந்தம் நிஸின்னம் கோ² ஸகுலுதா³யிம் பரிப்³பா³ஜகம் ப⁴க³வா ஏதத³வோச – ‘‘காய நுத்த², உதா³யி, ஏதரஹி கதா²ய ஸன்னிஸின்னா, கா ச பன வோ அந்தராகதா² விப்பகதா’’தி? ‘‘திட்ட²தேஸா, ப⁴ந்தே, கதா² யாய மயம் ஏதரஹி கதா²ய ஸன்னிஸின்னா. நேஸா, ப⁴ந்தே, கதா² ப⁴க³வதோ து³ல்லபா⁴ ப⁴விஸ்ஸதி பச்சா²பி ஸவனாய. யதா³ஹம், ப⁴ந்தே, இமம் பரிஸம் அனுபஸங்கந்தோ ஹோமி அதா²யம் பரிஸா அனேகவிஹிதம் திரச்சா²னகத²ம் கதே²ந்தீ நிஸின்னா ஹோதி; யதா³ ச கோ² அஹம், ப⁴ந்தே, இமம் பரிஸம் உபஸங்கந்தோ ஹோமி அதா²யம் பரிஸா மமஞ்ஞேவ முக²ம் உல்லோகேந்தீ நிஸின்னா ஹோதி – ‘யம் நோ ஸமணோ உதா³யீ த⁴ம்மம் பா⁴ஸிஸ்ஸதி தம் [தம் நோ (ஸீ. ஸ்யா. கம். பீ.)] ஸோஸ்ஸாமா’தி; யதா³ பன, ப⁴ந்தே, ப⁴க³வா இமம் பரிஸம் உபஸங்கந்தோ ஹோதி அதா²ஹஞ்சேவ அயஞ்ச பரிஸா ப⁴க³வதோ முக²ம் உல்லோகேந்தா [ஓலோகேந்தீ (ஸ்யா. கம். க.)] நிஸின்னா ஹோம – ‘யம் நோ ப⁴க³வா த⁴ம்மம் பா⁴ஸிஸ்ஸதி தம் ஸோஸ்ஸாமா’’’தி.

271. ‘‘தேனஹுதா³யி, தம்யேவேத்த² படிபா⁴து யதா² மம் படிபா⁴ஸேய்யா’’ஸி. ‘‘புரிமானி, ப⁴ந்தே, தி³வஸானி புரிமதரானி ஸப்³ப³ஞ்ஞூ ஸப்³ப³த³ஸ்ஸாவீ அபரிஸேஸம் ஞாணத³ஸ்ஸனம் படிஜானமானோ ‘சரதோ ச மே திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததம் ஸமிதம் ஞாணத³ஸ்ஸனம் பச்சுபட்டி²த’ந்தி. ஸோ மயா [பச்சுபட்டி²த’’ந்தி மயா (?)] புப்³ப³ந்தம் ஆரப்³ப⁴ பஞ்ஹம் புட்டோ² ஸமானோ அஞ்ஞேனஞ்ஞம் படிசரி, ப³ஹித்³தா⁴ கத²ம் அபனாமேஸி, கோபஞ்ச தோ³ஸஞ்ச அப்பச்சயஞ்ச பாத்வாகாஸி. தஸ்ஸ மய்ஹம், ப⁴ந்தே, ப⁴க³வந்தம்யேவ ஆரப்³ப⁴ ஸதி உத³பாதி³ – ‘அஹோ நூன ப⁴க³வா, அஹோ நூன ஸுக³தோ! யோ இமேஸம் த⁴ம்மானம் ஸுகுஸலோ’’’தி. ‘‘கோ பன ஸோ, உதா³யி, ஸப்³ப³ஞ்ஞூ ஸப்³ப³த³ஸ்ஸாவீ அபரிஸேஸம் ஞாணத³ஸ்ஸனம் படிஜானமானோ ‘சரதோ ச மே திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததம் ஸமிதம் ஞாணத³ஸ்ஸனம் பச்சுபட்டி²த’ந்தி, யோ தயா புப்³ப³ந்தம் ஆரப்³ப⁴ பஞ்ஹம் புட்டோ² ஸமானோ அஞ்ஞேனஞ்ஞம் படிசரி, ப³ஹித்³தா⁴ கத²ம் அபனாமேஸி கோபஞ்ச தோ³ஸஞ்ச அப்பச்சயஞ்ச பாத்வாகாஸீ’’தி? ‘நிக³ண்டோ², ப⁴ந்தே, நாடபுத்தோ’தி.

‘‘யோ கோ², உதா³யி, அனேகவிஹிதம் புப்³பே³னிவாஸம் அனுஸ்ஸரேய்ய, ஸேய்யதி²த³ம் – ஏகம்பி ஜாதிம் த்³வேபி ஜாதியோ…பே… இதி ஸாகாரம் ஸஉத்³தே³ஸம் அனேகவிஹிதம் புப்³பே³னிவாஸம் அனுஸ்ஸரேய்ய, ஸோ வா மம் புப்³ப³ந்தம் ஆரப்³ப⁴ பஞ்ஹம் புச்சே²ய்ய, தம் வாஹம் புப்³ப³ந்தம் ஆரப்³ப⁴ பஞ்ஹம் புச்சே²ய்யம்; ஸோ வா மே புப்³ப³ந்தம் ஆரப்³ப⁴ பஞ்ஹஸ்ஸ வேய்யாகரணேன சித்தம் ஆராதே⁴ய்ய, தஸ்ஸ வாஹம் புப்³ப³ந்தம் ஆரப்³ப⁴ பஞ்ஹஸ்ஸ வேய்யாகரணேன சித்தம் ஆராதே⁴ய்யம்.

‘‘யோ [ஸோ (ஸீ. பீ.)] கோ², உதா³யி, தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸேய்ய சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே பஜானேய்ய, ஸோ வா மம் அபரந்தம் ஆரப்³ப⁴ பஞ்ஹம் புச்சே²ய்ய, தம் வாஹம் அபரந்தம் ஆரப்³ப⁴ பஞ்ஹம் புச்சே²ய்யம்; ஸோ வா மே அபரந்தம் ஆரப்³ப⁴ பஞ்ஹஸ்ஸ வேய்யாகரணேன சித்தம் ஆராதே⁴ய்ய, தஸ்ஸ வாஹம் அபரந்தம் ஆரப்³ப⁴ பஞ்ஹஸ்ஸ வேய்யாகரணேன சித்தம் ஆராதே⁴ய்யம்.

‘‘அபி ச, உதா³யி, திட்ட²து புப்³ப³ந்தோ, திட்ட²து அபரந்தோ. த⁴ம்மம் தே தே³ஸேஸ்ஸாமி – இமஸ்மிம் ஸதி இத³ம் ஹோதி, இமஸ்ஸுப்பாதா³ இத³ம் உப்பஜ்ஜதி; இமஸ்மிம் அஸதி இத³ம் ந ஹோதி, இமஸ்ஸ நிரோதா⁴ இத³ம் நிருஜ்ஜ²தீ’’தி.

‘‘அஹஞ்ஹி, ப⁴ந்தே, யாவதகம்பி மே இமினா அத்தபா⁴வேன பச்சனுபூ⁴தம் தம்பி நப்பஹோமி ஸாகாரம் ஸஉத்³தே³ஸம் அனுஸ்ஸரிதும், குதோ பனாஹம் அனேகவிஹிதம் புப்³பே³னிவாஸம் அனுஸ்ஸரிஸ்ஸாமி, ஸேய்யதி²த³ம் – ஏகம்பி ஜாதிம் த்³வேபி ஜாதியோ…பே… இதி ஸாகாரம் ஸஉத்³தே³ஸம் அனேகவிஹிதம் புப்³பே³னிவாஸம் அனுஸ்ஸரிஸ்ஸாமி, ஸேய்யதா²பி ப⁴க³வா? அஹஞ்ஹி, ப⁴ந்தே, ஏதரஹி பம்ஸுபிஸாசகம்பி ந பஸ்ஸாமி, குதோ பனாஹம் தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸிஸ்ஸாமி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே பஜானிஸ்ஸாமி, ஸேய்யதா²பி ப⁴க³வா? யம் பன மம், ப⁴ந்தே, ப⁴க³வா ஏவமாஹ – ‘அபி ச, உதா³யி, திட்ட²து புப்³ப³ந்தோ, திட்ட²து அபரந்தோ; த⁴ம்மம் தே தே³ஸேஸ்ஸாமி – இமஸ்மிம் ஸதி இத³ம் ஹோதி, இமஸ்ஸுப்பாதா³ இத³ம் உப்பஜ்ஜதி; இமஸ்மிம் அஸதி இத³ம் ந ஹோதி, இமஸ்ஸ நிரோதா⁴ இத³ம் நிருஜ்ஜ²தீ’தி தஞ்ச பன மே பி⁴ய்யோஸோமத்தாய ந பக்கா²யதி. அப்பேவ நாமாஹம், ப⁴ந்தே, ஸகே ஆசரியகே ப⁴க³வதோ சித்தம் ஆராதே⁴ய்யம் பஞ்ஹஸ்ஸ வேய்யாகரணேனா’’தி.

272. ‘‘கிந்தி பன தே, உதா³யி, ஸகே ஆசரியகே ஹோதீ’’தி? ‘‘அம்ஹாகம், ப⁴ந்தே, ஸகே ஆசரியகே ஏவம் ஹோதி – ‘அயம் பரமோ வண்ணோ, அயம் பரமோ வண்ணோ’’’தி.

‘‘யம் பன தே ஏதம், உதா³யி, ஸகே ஆசரியகே ஏவம் ஹோதி – ‘அயம் பரமோ வண்ணோ, அயம் பரமோ வண்ணோ’தி, கதமோ ஸோ பரமோ வண்ணோ’’தி? ‘‘யஸ்மா, ப⁴ந்தே, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’’தி.

‘‘கதமோ பன ஸோ பரமோ வண்ணோ யஸ்மா வண்ணா அஞ்ஞோ வண்ணோ உத்தரிதரோ வா பணீததரோ வா நத்தீ²’’தி? ‘‘யஸ்மா, ப⁴ந்தே, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’’தி.

‘‘தீ³கா⁴பி கோ² தே ஏஸா, உதா³யி, ப²ரேய்ய – ‘யஸ்மா, ப⁴ந்தே, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’தி வதே³ஸி, தஞ்ச வண்ணம் ந பஞ்ஞபேஸி. ஸேய்யதா²பி, உதா³யி, புரிஸோ ஏவம் வதே³ய்ய – ‘அஹம் யா இமஸ்மிம் ஜனபதே³ ஜனபத³கல்யாணீ தம் இச்சா²மி, தம் காமேமீ’தி. தமேனம் ஏவம் வதே³ய்யும் – ‘அம்போ⁴ புரிஸ, யம் த்வம் ஜனபத³கல்யாணிம் இச்ச²ஸி காமேஸி, ஜானாஸி தம் ஜனபத³கல்யாணிம் – க²த்தியீ வா ப்³ராஹ்மணீ வா வேஸ்ஸீ வா ஸுத்³தீ³ வா’’தி? இதி புட்டோ² ‘நோ’தி வதே³ய்ய. தமேனம் ஏவம் வதே³ய்யும் – ‘அம்போ⁴ புரிஸ, யம் த்வம் ஜனபத³கல்யாணிம் இச்ச²ஸி காமேஸி, ஜானாஸி தம் ஜனபத³கல்யாணிம் – ஏவம்னாமா ஏவம்கோ³த்தாதி வாதி…பே… தீ³கா⁴ வா ரஸ்ஸா வா மஜ்ஜி²மா வா காளீ வா ஸாமா வா மங்கு³ரச்ச²வீ வாதி… அமுகஸ்மிம் கா³மே வா நிக³மே வா நக³ரே வா’தி? இதி புட்டோ² ‘நோ’தி வதே³ய்ய. தமேனம் ஏவம் வதே³ய்யும் – ‘அம்போ⁴ புரிஸ, யம் த்வம் ந ஜானாஸி ந பஸ்ஸஸி, தம் த்வம் இச்ச²ஸி காமேஸீ’’’தி? இதி புட்டோ² ‘ஆமா’தி வதே³ய்ய.

‘‘தம் கிம் மஞ்ஞஸி, உதா³யி – நனு ஏவம் ஸந்தே, தஸ்ஸ புரிஸஸ்ஸ அப்பாடிஹீரகதம் பா⁴ஸிதம் ஸம்பஜ்ஜதீ’’தி? ‘‘அத்³தா⁴ கோ², ப⁴ந்தே, ஏவம் ஸந்தே தஸ்ஸ புரிஸஸ்ஸ அப்பாடிஹீரகதம் பா⁴ஸிதம் ஸம்பஜ்ஜதீ’’தி.

‘‘ஏவமேவ கோ² த்வம், உதா³யி, ‘யஸ்மா, ப⁴ந்தே, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’தி வதே³ஸி, தஞ்ச வண்ணம் ந பஞ்ஞபேஸீ’’தி.

‘‘ஸேய்யதா²பி, ப⁴ந்தே, மணி வேளுரியோ ஸுபோ⁴ ஜாதிமா அட்ட²ம்ஸோ ஸுபரிகம்மகதோ பண்டு³கம்ப³லே நிக்கி²த்தோ பா⁴ஸதே ச தபதே ச விரோசதி ச, ஏவம் வண்ணோ அத்தா ஹோதி அரோகோ³ பரம் மரணா’’தி.

273. ‘‘தம் கிம் மஞ்ஞஸி, உதா³யி, யோ வா மணி வேளுரியோ ஸுபோ⁴ ஜாதிமா அட்ட²ம்ஸோ ஸுபரிகம்மகதோ பண்டு³கம்ப³லே நிக்கி²த்தோ பா⁴ஸதே ச தபதே ச விரோசதி ச, யோ வா ரத்தந்த⁴காரதிமிஸாய கிமி க²ஜ்ஜோபனகோ – இமேஸம் உபி⁴ன்னம் வண்ணானம் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயம், ப⁴ந்தே, ரத்தந்த⁴காரதிமிஸாய கிமி க²ஜ்ஜோபனகோ – அயம் இமேஸம் உபி⁴ன்னம் வண்ணானம் அபி⁴க்கந்ததரோ ச பணீததரோ சா’’தி.

‘‘தம் கிம் மஞ்ஞஸி, உதா³யி, யோ வா ரத்தந்த⁴காரதிமிஸாய கிமி க²ஜ்ஜோபனகோ, யோ வா ரத்தந்த⁴காரதிமிஸாய தேலப்பதீ³போ – இமேஸம் உபி⁴ன்னம் வண்ணானம் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயம், ப⁴ந்தே, ரத்தந்த⁴காரதிமிஸாய தேலப்பதீ³போ – அயம் இமேஸம் உபி⁴ன்னம் வண்ணானம் அபி⁴க்கந்ததரோ ச பணீததரோ சா’’தி.

‘‘தம் கிம் மஞ்ஞஸி, உதா³யி, யோ வா ரத்தந்த⁴காரதிமிஸாய தேலப்பதீ³போ, யோ வா ரத்தந்த⁴காரதிமிஸாய மஹாஅக்³கி³க்க²ந்தோ⁴ – இமேஸம் உபி⁴ன்னம் வண்ணானம் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயம், ப⁴ந்தே, ரத்தந்த⁴காரதிமிஸாய மஹாஅக்³கி³க்க²ந்தோ⁴ – அயம் இமேஸம் உபி⁴ன்னம் வண்ணானம் அபி⁴க்கந்ததரோ ச பணீததரோ சா’’தி.

‘‘தம் கிம் மஞ்ஞஸி, உதா³யி, யோ வா ரத்தந்த⁴காரதிமிஸாய மஹாஅக்³கி³க்க²ந்தோ⁴, யா வா ரத்தியா பச்சூஸஸமயம் வித்³தே⁴ விக³தவலாஹகே தே³வே ஓஸதி⁴தாரகா – இமேஸம் உபி⁴ன்னம் வண்ணானம் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயம், ப⁴ந்தே, ரத்தியா பச்சூஸஸமயம் வித்³தே⁴ விக³தவலாஹகே தே³வே ஓஸதி⁴தாரகா – அயம் இமேஸம் உபி⁴ன்னம் வண்ணானம் அபி⁴க்கந்ததரோ ச பணீததரோ சா’’தி.

‘‘தம் கிம் மஞ்ஞஸி, உதா³யி, யா வா ரத்தியா பச்சூஸஸமயம் வித்³தே⁴ விக³தவலாஹகே தே³வே ஓஸதி⁴தாரகா, யோ வா தத³ஹுபோஸதே² பன்னரஸே வித்³தே⁴ விக³தவலாஹகே தே³வே அபி⁴தோ³ [அபி⁴தே³ (க. ஸீ.), அபி⁴தோ³ஸம் (க.) அபி⁴தோ³தி அபி⁴ஸத்³தே³ன ஸமானத்த²னிபாதபத³ம் (ச²க்கங்கு³த்தரடீகா மஹாவக்³க³ அட்ட²மஸுத்தவண்ணனா)] அட்³ட⁴ரத்தஸமயம் சந்தோ³ – இமேஸம் உபி⁴ன்னம் வண்ணானம் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயம், ப⁴ந்தே, தத³ஹுபோஸதே² பன்னரஸே வித்³தே⁴ விக³தவலாஹகே தே³வே அபி⁴தோ³ அட்³ட⁴ரத்தஸமயம் சந்தோ³ – அயம் இமேஸம் உபி⁴ன்னம் வண்ணானம் அபி⁴க்கந்ததரோ ச பணீததரோ சா’’தி.

‘‘தம் கிம் மஞ்ஞஸி, உதா³யி, யோ வா தத³ஹுபோஸதே² பன்னரஸே வித்³தே⁴ விக³தவலாஹகே தே³வே அபி⁴தோ³ அட்³ட⁴ரத்தஸமயம் சந்தோ³, யோ வா வஸ்ஸானம் பச்சி²மே மாஸே ஸரத³ஸமயே வித்³தே⁴ விக³தவலாஹகே தே³வே அபி⁴தோ³ மஜ்ஜ²ன்ஹிகஸமயம் ஸூரியோ – இமேஸம் உபி⁴ன்னம் வண்ணானம் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயம், ப⁴ந்தே, வஸ்ஸானம் பச்சி²மே மாஸே ஸரத³ஸமயே வித்³தே⁴ விக³தவலாஹகே தே³வே அபி⁴தோ³ மஜ்ஜ²ன்ஹிகஸமயம் ஸூரியோ – அயம் இமேஸம் உபி⁴ன்னம் வண்ணானம் அபி⁴க்கந்ததரோ ச பணீததரோ சா’’தி.

‘‘அதோ கோ² தே, உதா³யி, ப³ஹூ ஹி ப³ஹுதரா தே³வா யே இமேஸம் சந்தி³மஸூரியானம் ஆபா⁴ நானுபோ⁴ந்தி, த்யாஹம் பஜானாமி. அத² ச பனாஹம் ந வதா³மி – ‘யஸ்மா வண்ணா அஞ்ஞோ வண்ணோ உத்தரிதரோ வா பணீததரோ வா நத்தீ²’தி. அத² ச பன த்வம், உதா³யி, ‘ய்வாயம் வண்ணோ கிமினா க²ஜ்ஜோபனகேன நிஹீனதரோ [ஹீனதரோ (ஸீ. பீ.)] ச பதிகிட்ட²தரோ ச ஸோ பரமோ வண்ணோ’தி வதே³ஸி, தஞ்ச வண்ணம் ந பஞ்ஞபேஸீ’’தி. ‘‘அச்சி²த³ம் [அச்சி²ர (க.), அச்சி²த³ (?)] ப⁴க³வா கத²ம், அச்சி²த³ம் ஸுக³தோ கத²’’ந்தி!

‘‘கிம் பன த்வம், உதா³யி, ஏவம் வதே³ஸி – ‘அச்சி²த³ம் ப⁴க³வா கத²ம், அச்சி²த³ம் ஸுக³தோ கத²ம்’’’தி? ‘‘அம்ஹாகம், ப⁴ந்தே, ஸகே ஆசரியகே ஏவம் ஹோதி – ‘அயம் பரமோ வண்ணோ, அயம் பரமோ வண்ணோ’தி. தே மயம், ப⁴ந்தே, ப⁴க³வதா ஸகே ஆசரியகே ஸமனுயுஞ்ஜியமானா ஸமனுக்³கா³ஹியமானா ஸமனுபா⁴ஸியமானா ரித்தா துச்சா² அபரத்³தா⁴’’தி.

274. ‘‘கிம் பனுதா³யி, அத்தி² ஏகந்தஸுகோ² லோகோ, அத்தி² ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி? ‘‘அம்ஹாகம், ப⁴ந்தே, ஸகே ஆசரியகே ஏவம் ஹோதி – ‘அத்தி² ஏகந்தஸுகோ² லோகோ, அத்தி² ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’’தி.

‘‘கதமா பன ஸா, உதா³யி, ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி? ‘‘இத⁴, ப⁴ந்தே, ஏகச்சோ பாணாதிபாதம் பஹாய பாணாதிபாதா படிவிரதோ ஹோதி, அதி³ன்னாதா³னம் பஹாய அதி³ன்னாதா³னா படிவிரதோ ஹோதி, காமேஸுமிச்சா²சாரம் பஹாய காமேஸுமிச்சா²சாரா படிவிரதோ ஹோதி, முஸாவாத³ம் பஹாய முஸாவாதா³ படிவிரதோ ஹோதி, அஞ்ஞதரம் வா பன தபோகு³ணம் ஸமாதா³ய வத்ததி. அயம் கோ² ஸா, ப⁴ந்தே, ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி.

‘‘தம் கிம் மஞ்ஞஸி, உதா³யி, யஸ்மிம் ஸமயே பாணாதிபாதம் பஹாய பாணாதிபாதா படிவிரதோ ஹோதி, ஏகந்தஸுகீ² வா தஸ்மிம் ஸமயே அத்தா ஹோதி ஸுக²து³க்கீ² வா’’தி? ‘‘ஸுக²து³க்கீ², ப⁴ந்தே’’.

‘‘தம் கிம் மஞ்ஞஸி, உதா³யி, யஸ்மிம் ஸமயே அதி³ன்னாதா³னம் பஹாய அதி³ன்னாதா³னா படிவிரதோ ஹோதி, ஏகந்தஸுகீ² வா தஸ்மிம் ஸமயே அத்தா ஹோதி ஸுக²து³க்கீ² வா’’தி? ‘‘ஸுக²து³க்கீ², ப⁴ந்தே’’.

‘‘தம் கிம் மஞ்ஞஸி, உதா³யி, யஸ்மிம் ஸமயே காமேஸுமிச்சா²சாரம் பஹாய காமேஸுமிச்சா²சாரா படிவிரதோ ஹோதி, ஏகந்தஸுகீ² வா தஸ்மிம் ஸமயே அத்தா ஹோதி ஸுக²து³க்கீ² வா’’தி? ‘‘ஸுக²து³க்கீ², ப⁴ந்தே’’.

‘‘தம் கிம் மஞ்ஞஸி, உதா³யி, யஸ்மிம் ஸமயே முஸாவாத³ம் பஹாய முஸாவாதா³ படிவிரதோ ஹோதி, ஏகந்தஸுகீ² வா தஸ்மிம் ஸமயே அத்தா ஹோதி ஸுக²து³க்கீ² வா’’தி? ‘‘ஸுக²து³க்கீ², ப⁴ந்தே’’.

‘‘தம் கிம் மஞ்ஞஸி, உதா³யி, யஸ்மிம் ஸமயே அஞ்ஞதரம் தபோகு³ணம் ஸமாதா³ய வத்ததி, ஏகந்தஸுகீ² வா தஸ்மிம் ஸமயே அத்தா ஹோதி ஸுக²து³க்கீ² வா’’தி? ‘‘ஸுக²து³க்கீ², ப⁴ந்தே’’.

‘‘தம் கிம் மஞ்ஞஸி, உதா³யி, அபி நு கோ² வோகிண்ணஸுக²து³க்க²ம் படிபத³ம் ஆக³ம்ம ஏகந்தஸுக²ஸ்ஸ லோகஸ்ஸ ஸச்சி²கிரியா ஹோதீ’’தி [ஸச்சி²கிரியாயாதி (க.)]? ‘‘அச்சி²த³ம் ப⁴க³வா கத²ம், அச்சி²த³ம் ஸுக³தோ கத²’’ந்தி!

‘‘கிம் பன த்வம், உதா³யி, வதே³ஸி – ‘அச்சி²த³ம் ப⁴க³வா கத²ம், அச்சி²த³ம் ஸுக³தோ கத²ம்’’’தி? ‘‘அம்ஹாகம், ப⁴ந்தே, ஸகே ஆசரியகே ஏவம் ஹோதி – ‘அத்தி² ஏகந்தஸுகோ² லோகோ, அத்தி² ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’தி. தே மயம், ப⁴ந்தே, ப⁴க³வதா ஸகே ஆசரியகே ஸமனுயுஞ்ஜியமானா ஸமனுக்³கா³ஹியமானா ஸமனுபா⁴ஸியமானா ரித்தா துச்சா² அபரத்³தா⁴’’தி [அபரத்³தா⁴ (ஸீ.), அபரத்³தா⁴பி (ஸ்யா. கம். பீ.)].

275. ‘‘கிம் பன, ப⁴ந்தே, அத்தி² ஏகந்தஸுகோ² லோகோ, அத்தி² ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி? ‘‘அத்தி² கோ², உதா³யி, ஏகந்தஸுகோ² லோகோ, அத்தி² ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி.

‘‘கதமா பன ஸா, ப⁴ந்தே, ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி? ‘‘இது⁴தா³யி, பி⁴க்கு² விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி; விதக்கவிசாரானம் வூபஸமா… து³தியம் ஜா²னம் உபஸம்பஜ்ஜ விஹரதி; பீதியா ச விராகா³… ததியம் ஜா²னம் உபஸம்பஜ்ஜ விஹரதி – அயம் கோ² ஸா, உதா³யி, ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி.

‘‘ந [கிம் நு (ஸ்யா. கம். க.)] கோ² ஸா, ப⁴ந்தே, ஆகாரவதீ படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாய, ஸச்சி²கதோ ஹிஸ்ஸ, ப⁴ந்தே, ஏத்தாவதா ஏகந்தஸுகோ² லோகோ ஹோதீ’’தி. ‘‘ந க்²வாஸ்ஸ, உதா³யி, ஏத்தாவதா ஏகந்தஸுகோ² லோகோ ஸச்சி²கதோ ஹோதி; ஆகாரவதீத்வேவ ஸா படிபதா³ ஏகந்தஸுக²ஸ்ஸ லோகஸ்ஸ ஸச்சி²கிரியாயா’’தி.

ஏவம் வுத்தே, ஸகுலுதா³யிஸ்ஸ பரிப்³பா³ஜகஸ்ஸ பரிஸா உன்னாதி³னீ உச்சாஸத்³த³மஹாஸத்³தா³ அஹோஸி – ‘‘ஏத்த² மயம் அனஸ்ஸாம ஸாசரியகா, ஏத்த² மயம் அனஸ்ஸாம [பனஸ்ஸாம (ஸீ.)] ஸாசரியகா! ந மயம் இதோ பி⁴ய்யோ உத்தரிதரம் பஜானாமா’’தி.

அத² கோ² ஸகுலுதா³யீ பரிப்³பா³ஜகோ தே பரிப்³பா³ஜகே அப்பஸத்³தே³ கத்வா ப⁴க³வந்தம் ஏதத³வோச – ‘‘கித்தாவதா பனாஸ்ஸ, ப⁴ந்தே, ஏகந்தஸுகோ² லோகோ ஸச்சி²கதோ ஹோதீ’’தி? ‘‘இது⁴தா³யி, பி⁴க்கு² ஸுக²ஸ்ஸ ச பஹானா…பே… சதுத்த²ம் ஜா²னம்… உபஸம்பஜ்ஜ விஹரதி. யா தா தே³வதா ஏகந்தஸுக²ம் லோகம் உபபன்னா தாஹி தே³வதாஹி ஸத்³தி⁴ம் ஸந்திட்ட²தி ஸல்லபதி ஸாகச்ச²ம் ஸமாபஜ்ஜதி. ஏத்தாவதா க்²வாஸ்ஸ, உதா³யி, ஏகந்தஸுகோ² லோகோ ஸச்சி²கதோ ஹோதீ’’தி.

276. ‘‘ஏதஸ்ஸ நூன, ப⁴ந்தே, ஏகந்தஸுக²ஸ்ஸ லோகஸ்ஸ ஸச்சி²கிரியாஹேது பி⁴க்கூ² ப⁴க³வதி ப்³ரஹ்மசரியம் சரந்தீ’’தி? ‘‘ந கோ², உதா³யி, ஏகந்தஸுக²ஸ்ஸ லோகஸ்ஸ ஸச்சி²கிரியாஹேது பி⁴க்கூ² மயி ப்³ரஹ்மசரியம் சரந்தி. அத்தி² கோ², உதா³யி, அஞ்ஞேவ த⁴ம்மா உத்தரிதரா ச பணீததரா ச யேஸம் ஸச்சி²கிரியாஹேது பி⁴க்கூ² மயி ப்³ரஹ்மசரியம் சரந்தீ’’தி.

‘‘கதமே பன தே, ப⁴ந்தே, த⁴ம்மா உத்தரிதரா ச பணீததரா ச யேஸம் ஸச்சி²கிரியாஹேது பி⁴க்கூ² ப⁴க³வதி ப்³ரஹ்மசரியம் சரந்தீ’’தி? ‘‘இது⁴தா³யி, ததா²க³தோ லோகே உப்பஜ்ஜதி அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா…பே… ஸோ இமே பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி. அயம்பி கோ², உதா³யி, த⁴ம்மோ உத்தரிதரோ ச பணீததரோ ச யஸ்ஸ ஸச்சி²கிரியாஹேது பி⁴க்கூ² மயி ப்³ரஹ்மசரியம் சரந்தி’’.

‘‘புன சபரம், உதா³யி, பி⁴க்கு² விதக்கவிசாரானம் வூபஸமா…பே… து³தியம் ஜா²னம்… ததியம் ஜா²னம்… சதுத்த²ம் ஜா²னம் உபஸம்பஜ்ஜ விஹரதி. அயம்பி கோ², உதா³யி, த⁴ம்மோ உத்தரிதரோ ச பணீததரோ ச யஸ்ஸ ஸச்சி²கிரியாஹேது பி⁴க்கூ² மயி ப்³ரஹ்மசரியம் சரந்தி.

‘‘ஸோ ஏவம் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே புப்³பே³னிவாஸானுஸ்ஸதிஞாணாய சித்தம் அபி⁴னின்னாமேதி. ஸோ அனேகவிஹிதம் புப்³பே³னிவாஸம் அனுஸ்ஸரதி, ஸேய்யதி²த³ம் – ஏகம்பி ஜாதிம் த்³வேபி ஜாதியோ…பே… இதி ஸாகாரம் ஸஉத்³தே³ஸம் அனேகவிஹிதம் புப்³பே³னிவாஸம் அனுஸ்ஸரதி. அயம்பி கோ², உதா³யி, த⁴ம்மோ உத்தரிதரோ ச பணீததரோ ச யஸ்ஸ ஸச்சி²கிரியாஹேது பி⁴க்கூ² மயி ப்³ரஹ்மசரியம் சரந்தி.

‘‘ஸோ ஏவம் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஸத்தானம் சுதூபபாதஞாணாய சித்தம் அபி⁴னின்னாமேதி. ஸோ தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே…பே… யதா²கம்மூபகே³ ஸத்தே பஜானாதி. அயம்பி கோ², உதா³யி, த⁴ம்மோ உத்தரிதரோ ச பணீததரோ ச யஸ்ஸ ஸச்சி²கிரியாஹேது பி⁴க்கூ² மயி ப்³ரஹ்மசரியம் சரந்தி.

‘‘ஸோ ஏவம் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஆஸவானம் க²யஞாணாய சித்தம் அபி⁴னின்னாமேதி. ஸோ ‘இத³ம் து³க்க²’ந்தி யதா²பூ⁴தம் பஜானாதி, ‘அயம் து³க்க²ஸமுத³யோ’தி…பே… ‘அயம் து³க்க²னிரோதோ⁴’தி… ‘அயம் து³க்க²னிரோத⁴கா³மினீ படிபதா³’தி… ‘இமே ஆஸவா’தி யதா²பூ⁴தம் பஜானாதி, ‘அயம் ஆஸவஸமுத³யோ’தி… ‘அயம் ஆஸவனிரோதோ⁴’தி… ‘அயம் ஆஸவனிரோத⁴கா³மினீ படிபதா³’தி யதா²பூ⁴தம் பஜானாதி. தஸ்ஸ ஏவம் ஜானதோ ஏவம் பஸ்ஸதோ காமாஸவாபி சித்தம் விமுச்சதி, ப⁴வாஸவாபி சித்தம் விமுச்சதி, அவிஜ்ஜாஸவாபி சித்தம் விமுச்சதி. விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதி. அயம்பி கோ², உதா³யி, த⁴ம்மோ உத்தரிதரோ ச பணீததரோ ச யஸ்ஸ ஸச்சி²கிரியாஹேது பி⁴க்கூ² மயி ப்³ரஹ்மசரியம் சரந்தி. இமே கோ², உதா³யி, த⁴ம்மா உத்தரிதரா ச பணீததரா ச யேஸம் ஸச்சி²கிரியாஹேது பி⁴க்கூ² மயி ப்³ரஹ்மசரியம் சரந்தீ’’தி.

277. ஏவம் வுத்தே, ஸகுலுதா³யீ பரிப்³பா³ஜகோ ப⁴க³வந்தம் ஏதத³வோச – ‘‘அபி⁴க்கந்தம், ப⁴ந்தே, அபி⁴க்கந்தம், ப⁴ந்தே! ஸேய்யதா²பி, ப⁴ந்தே, நிக்குஜ்ஜிதம் வா உக்குஜ்ஜேய்ய, படிச்ச²ன்னம் வா விவரேய்ய, மூள்ஹஸ்ஸ வா மக்³க³ம் ஆசிக்கே²ய்ய, அந்த⁴காரே வா தேலபஜ்ஜோதம் தா⁴ரேய்ய – ‘சக்கு²மந்தோ ரூபானி த³க்க²ந்தீ’தி; ஏவமேவம் ப⁴க³வதா அனேகபரியாயேன த⁴ம்மோ பகாஸிதோ. ஏஸாஹம், ப⁴ந்தே, ப⁴க³வந்தம் ஸரணம் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. லபே⁴ய்யாஹம், ப⁴ந்தே, ப⁴க³வதோ ஸந்திகே பப்³ப³ஜ்ஜம், லபே⁴ய்யம் உபஸம்பத³’’ந்தி.

ஏவம் வுத்தே, ஸகுலுதா³யிஸ்ஸ பரிப்³பா³ஜகஸ்ஸ பரிஸா ஸகுலுதா³யிம் பரிப்³பா³ஜகம் ஏதத³வோசும் – ‘‘மா ப⁴வம், உதா³யி, ஸமணே கோ³தமே ப்³ரஹ்மசரியம் சரி; மா ப⁴வம், உதா³யி, ஆசரியோ ஹுத்வா அந்தேவாஸீவாஸம் வஸி. ஸேய்யதா²பி நாம உத³கமணிகோ [மணிகோ (ஸீ. பீ. க.)] ஹுத்வா உத³ஞ்சனிகோ [உத்³தே³கனிகோ (ஸீ. ஸ்யா. கம். பீ.)] அஸ்ஸ, ஏவம் ஸம்பத³மித³ம் [ஏவம் ஸம்பத³மேதம் (ஸீ. பீ.)] போ⁴தோ உதா³யிஸ்ஸ ப⁴விஸ்ஸதி. மா ப⁴வம், உதா³யி, ஸமணே கோ³தமே ப்³ரஹ்மசரியம் சரி; மா ப⁴வம், உதா³யி, ஆசரியோ ஹுத்வா அந்தேவாஸீவாஸம் வஸீ’’தி. இதி ஹித³ம் ஸகுலுதா³யிஸ்ஸ பரிப்³பா³ஜகஸ்ஸ பரிஸா ஸகுலுதா³யிம் பரிப்³பா³ஜகம் அந்தராயமகாஸி ப⁴க³வதி ப்³ரஹ்மசரியேதி.

சூளஸகுலுதா³யிஸுத்தம் நிட்டி²தம் நவமம்.