10. வேக²னஸஸுத்தம்

278. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² வேக²னஸோ [வேக²னஸ்ஸோ (ஸீ. பீ.)] பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் அட்டா²ஸி. ஏகமந்தம் டி²தோ கோ² வேக²னஸோ பரிப்³பா³ஜகோ ப⁴க³வதோ ஸந்திகே உதா³னம் உதா³னேஸி – ‘‘அயம் பரமோ வண்ணோ, அயம் பரமோ வண்ணோ’’தி.

‘‘கிம் பன த்வம், கச்சான, ஏவம் வதே³ஸி – ‘அயம் பரமோ வண்ணோ, அயம் பரமோ வண்ணோ’தி? கதமோ, கச்சான, ஸோ பரமோ வண்ணோ’’தி?

‘‘யஸ்மா, போ⁴ கோ³தம, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’’தி.

‘‘கதமோ பன ஸோ, கச்சான, வண்ணோ யஸ்மா வண்ணா அஞ்ஞோ வண்ணோ உத்தரிதரோ வா பணீததரோ வா நத்தீ²’’தி?

‘‘யஸ்மா, போ⁴ கோ³தம, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’’தி.

‘‘தீ³கா⁴பி கோ² தே ஏஸா, கச்சான, ப²ரேய்ய – ‘யஸ்மா, போ⁴ கோ³தம, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’தி வதே³ஸி, தஞ்ச வண்ணம் ந பஞ்ஞபேஸி. ஸேய்யதா²பி, கச்சான, புரிஸோ ஏவம் வதே³ய்ய – ‘அஹம் யா இமஸ்மிம் ஜனபதே³ ஜனபத³கல்யாணீ, தம் இச்சா²மி தம் காமேமீ’தி. தமேனம் ஏவம் வதே³ய்யும் – ‘அம்போ⁴ புரிஸ, யம் த்வம் ஜனபத³கல்யாணிம் இச்ச²ஸி காமேஸி, ஜானாஸி தம் ஜனபத³கல்யாணிம் – க²த்தியீ வா ப்³ராஹ்மணீ வா வேஸ்ஸீ வா ஸுத்³தீ³ வா’தி? இதி புட்டோ² ‘நோ’தி வதே³ய்ய. தமேனம் ஏவம் வதே³ய்யும் – ‘அம்போ⁴ புரிஸ, யம் த்வம் ஜனபத³கல்யாணிம் இச்ச²ஸி காமேஸி, ஜானாஸி தம் ஜனபத³கல்யாணிம் ‘ஏவம்னாமா ஏவம்கோ³த்தாதி வாதி…பே… தீ³கா⁴ வா ரஸ்ஸா வா மஜ்ஜி²மா வா காளீ வா ஸாமா வா மங்கு³ரச்ச²வீ வாதி… அமுகஸ்மிம் கா³மே வா நிக³மே வா நக³ரே வா’தி? இதி புட்டோ² ‘நோ’தி வதே³ய்ய. தமேனம் ஏவம் வதே³ய்யும் – ‘அம்போ⁴ புரிஸ, யம் த்வம் ந ஜானாஸி ந பஸ்ஸஸி, தம் த்வம் இச்ச²ஸி காமேஸீ’’’தி? இதி புட்டோ² ‘ஆமா’தி வதே³ய்ய.

‘‘தம் கிம் மஞ்ஞஸி, கச்சான, நனு ஏவம் ஸந்தே தஸ்ஸ புரிஸஸ்ஸ அப்பாடிஹீரகதம் பா⁴ஸிதம் ஸம்பஜ்ஜதீ’’தி? ‘‘அத்³தா⁴ கோ², போ⁴ கோ³தம, ஏவம் ஸந்தே தஸ்ஸ புரிஸஸ்ஸ அப்பாடிஹீரகதம் பா⁴ஸிதம் ஸம்பஜ்ஜதீ’’தி. ‘‘ஏவமேவ கோ² த்வம், கச்சான, ‘யஸ்மா, போ⁴ கோ³தம, வண்ணா அஞ்ஞோ வண்ணோ உத்தரிதரோ வா பணீததரோ வா நத்தி² ஸோ பரமோ வண்ணோ’தி வதே³ஸி; தஞ்ச வண்ணம் ந பஞ்ஞபேஸீ’’தி. ‘‘ஸேய்யதா²பி, போ⁴ கோ³தம, மணி வேளுரியோ ஸுபோ⁴ ஜாதிமா அட்ட²ம்ஸோ ஸுபரிகம்மகதோ பண்டு³கம்ப³லே நிக்கி²த்தோ பா⁴ஸதே ச தபதே ச விரோசதி ச, ஏவம் வண்ணோ அத்தா ஹோதி அரோகோ³ பரம் மரணா’’தி.

279. ‘‘தம் கிம் மஞ்ஞஸி, கச்சான, யோ வா மணி வேளுரியோ ஸுபோ⁴ ஜாதிமா அட்ட²ம்ஸோ ஸுபரிகம்மகதோ பண்டு³கம்ப³லே நிக்கி²த்தோ பா⁴ஸதே ச தபதே ச விரோசதி ச, யோ வா ரத்தந்த⁴காரதிமிஸாய கிமி க²ஜ்ஜோபனகோ இமேஸம் உபி⁴ன்னம் வண்ணானம் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயம், போ⁴ கோ³தம, ரத்தந்த⁴காரதிமிஸாய கிமி க²ஜ்ஜோபனகோ, அயம் இமேஸம் உபி⁴ன்னம் வண்ணானம் அபி⁴க்கந்ததரோ ச பணீததரோ சா’’தி.

‘‘தம் கிம் மஞ்ஞஸி, கச்சான, யோ வா ரத்தந்த⁴காரதிமிஸாய கிமி க²ஜ்ஜோபனகோ, யோ வா ரத்தந்த⁴காரதிமிஸாய தேலப்பதீ³போ, இமேஸம் உபி⁴ன்னம் வண்ணானம் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயம், போ⁴ கோ³தம, ரத்தந்த⁴காரதிமிஸாய தேலப்பதீ³போ, அயம் இமேஸம் உபி⁴ன்னம் வண்ணானம் அபி⁴க்கந்ததரோ ச பணீததரோ சா’’தி.

‘‘தம் கிம் மஞ்ஞஸி, கச்சான, யோ வா ரத்தந்த⁴காரதிமிஸாய தேலப்பதீ³போ, யோ வா ரத்தந்த⁴காரதிமிஸாய மஹாஅக்³கி³க்க²ந்தோ⁴, இமேஸம் உபி⁴ன்னம் வண்ணானம் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயம், போ⁴ கோ³தம, ரத்தந்த⁴காரதிமிஸாய மஹாஅக்³கி³க்க²ந்தோ⁴, அயம் இமேஸம் உபி⁴ன்னம் வண்ணானம் அபி⁴க்கந்ததரோ ச பணீததரோ சா’’தி.

‘‘தம் கிம் மஞ்ஞஸி, கச்சான, யோ வா ரத்தந்த⁴காரதிமிஸாய மஹாஅக்³கி³க்க²ந்தோ⁴, யா வா ரத்தியா பச்சூஸஸமயம் வித்³தே⁴ விக³தவலாஹகே தே³வே ஓஸதி⁴தாரகா, இமேஸம் உபி⁴ன்னம் வண்ணானம் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயம், போ⁴ கோ³தம, ரத்தியா பச்சூஸஸமயம் வித்³தே⁴ விக³தவலாஹகே தே³வே ஓஸதி⁴தாரகா, அயம் இமேஸம் உபி⁴ன்னம் வண்ணானம் அபி⁴க்கந்ததரோ ச பணீததரோ சா’’தி. ‘‘தம் கிம் மஞ்ஞஸி, கச்சான, யா வா ரத்தியா பச்சூஸஸமயம் வித்³தே⁴ விக³தவலாஹகே தே³வே ஓஸதி⁴தாரகா, யோ வா தத³ஹுபோஸதே² பன்னரஸே வித்³தே⁴ விக³தவலாஹகே தே³வே அபி⁴தோ³ அட்³ட⁴ரத்தஸமயம் சந்தோ³, இமேஸம் உபி⁴ன்னம் வண்ணானம் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயம், போ⁴ கோ³தம, தத³ஹுபோஸதே² பன்னரஸே வித்³தே⁴ விக³தவலாஹகே தே³வே அபி⁴தோ³ அட்³ட⁴ரத்தஸமயம் சந்தோ³, அயம் இமேஸம் உபி⁴ன்னம் வண்ணானம் அபி⁴க்கந்ததரோ ச பணீததரோ சா’’தி. ‘‘தம் கிம் மஞ்ஞஸி, கச்சான, யோ வா தத³ஹுபோஸதே² பன்னரஸே வித்³தே⁴ விக³தவலாஹகே தே³வே அபி⁴தோ³ அட்³ட⁴ரத்தஸமயம் சந்தோ³, யோ வா வஸ்ஸானம் பச்சி²மே மாஸே ஸரத³ஸமயே வித்³தே⁴ விக³தவலாஹகே தே³வே அபி⁴தோ³ மஜ்ஜ²ன்ஹிகஸமயம் ஸூரியோ, இமேஸம் உபி⁴ன்னம் வண்ணானம் கதமோ வண்ணோ அபி⁴க்கந்ததரோ ச பணீததரோ சா’’தி? ‘‘ய்வாயம், போ⁴ கோ³தம, வஸ்ஸானம் பச்சி²மே மாஸே ஸரத³ஸமயே வித்³தே⁴ விக³தவலாஹகே தே³வே அபி⁴தோ³ மஜ்ஜ²ன்ஹிகஸமயம் ஸூரியோ – அயம் இமேஸம் உபி⁴ன்னம் வண்ணானம் அபி⁴க்கந்ததரோ ச பணீததரோ சா’’தி. ‘‘அதோ கோ² தே, கச்சான, ப³ஹூ ஹி ப³ஹுதரா தே³வா யே இமேஸம் சந்தி³மஸூரியானம் ஆபா⁴ நானுபோ⁴ந்தி, த்யாஹம் பஜானாமி. அத² ச பனாஹம் ந வதா³மி – ‘யஸ்மா வண்ணா அஞ்ஞோ வண்ணோ உத்தரிதரோ ச பணீததரோ ச நத்தீ²’தி. அத² ச பன த்வம், கச்சான, ‘ய்வாயம் வண்ணோ கிமினா க²ஜ்ஜோபனகேன நிஹீனதரோ ச பதிகிட்ட²தரோ ச ஸோ பரமோ வண்ணோ’தி வதே³ஸி; தஞ்ச வண்ணம் ந பஞ்ஞபேஸி’’.

280. ‘‘பஞ்ச கோ² இமே, கச்சான, காமகு³ணா. கதமே பஞ்ச? சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா, ஸோதவிஞ்ஞேய்யா ஸத்³தா³…பே… கா⁴னவிஞ்ஞேய்யா க³ந்தா⁴… ஜிவ்ஹாவிஞ்ஞேய்யா ரஸா… காயவிஞ்ஞேய்யா போ²ட்ட²ப்³பா³ இட்டா² கந்தா மனாபா பியரூபா காமூபஸம்ஹிதா ரஜனீயா – இமே கோ², கச்சான, பஞ்ச காமகு³ணா. யம் கோ², கச்சான, இமே பஞ்ச காமகு³ணே படிச்ச உப்பஜ்ஜதி ஸுக²ம் ஸோமனஸ்ஸம் இத³ம் வுச்சதி காமஸுக²ம். இதி காமேஹி காமஸுக²ம், காமஸுகா² காமக்³க³ஸுக²ம் தத்த² அக்³க³மக்கா²யதீ’’தி.

ஏவம் வுத்தே, வேக²னஸோ பரிப்³பா³ஜகோ ப⁴க³வந்தம் ஏதத³வோச – ‘‘அச்ச²ரியம், போ⁴ கோ³தம, அப்³பு⁴தம், போ⁴ கோ³தம! யாவ ஸுபா⁴ஸிதம் சித³ம் போ⁴தா கோ³தமேன – ‘காமேஹி காமஸுக²ம், காமஸுகா² காமக்³க³ஸுக²ம் தத்த² அக்³க³மக்கா²யதீ’தி. (‘காமேஹி, போ⁴ கோ³தம, காமஸுக²ம், காமஸுகா² காமக்³க³ஸுக²ம், தத்த² அக்³க³மக்கா²யதீ’தி) [( ) ஸீ. ஸ்யா. கம். பீ. போத்த²கேஸு நத்தி²] – ‘‘து³ஜ்ஜானம் கோ² ஏதம், கச்சான, தயா அஞ்ஞதி³ட்டி²கேன அஞ்ஞக²ந்திகேன அஞ்ஞருசிகேன அஞ்ஞத்ரயோகே³ன அஞ்ஞத்ராசரியகேன – காமா [காமம் (ஸீ. ஸ்யா. கம். பீ.)] வா காமஸுக²ம் வா காமக்³க³ஸுக²ம் வா. யே கோ² தே, கச்சான, பி⁴க்கூ² அரஹந்தோ கீ²ணாஸவா வுஸிதவந்தோ கதகரணீயா ஓஹிதபா⁴ரா அனுப்பத்தஸத³த்தா² பரிக்கீ²ணப⁴வஸம்யோஜனா ஸம்மத³ஞ்ஞா விமுத்தா தே கோ² ஏதம் ஜானேய்யும் – காமா வா காமஸுக²ம் வா காமக்³க³ஸுக²ம் வா’’தி.

281. ஏவம் வுத்தே, வேக²னஸோ பரிப்³பா³ஜகோ குபிதோ அனத்தமனோ ப⁴க³வந்தம்யேவ கு²ம்ஸேந்தோ ப⁴க³வந்தம்யேவ வம்பே⁴ந்தோ ப⁴க³வந்தம்யேவ வத³மானோ ‘‘ஸமணோ [ஸமணோ ச (ஸீ. பீ.)] கோ³தமோ பாபிதோ ப⁴விஸ்ஸதீ’’தி ப⁴க³வந்தம் ஏதத³வோச – ‘‘ஏவமேவ பனிதே⁴கச்சே [பனிதே⁴கே (ஸீ. பீ.), பனிமேகே (உபரிஸுப⁴ஸுத்தே)] ஸமணப்³ராஹ்மணா அஜானந்தா புப்³ப³ந்தம், அபஸ்ஸந்தா அபரந்தம் அத² ச பன ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி – பஜானாமா’தி – படிஜானந்தி [இத்த²த்தாயாதி படிஜானந்தி (பீ.)]. தேஸமித³ம் பா⁴ஸிதம் ஹஸ்ஸகம்யேவ ஸம்பஜ்ஜதி, நாமகம்யேவ ஸம்பஜ்ஜதி, ரித்தகம்யேவ ஸம்பஜ்ஜதி, துச்ச²கம்யேவ ஸம்பஜ்ஜதீ’’தி. ‘‘யே கோ² தே, கச்சான, ஸமணப்³ராஹ்மணா அஜானந்தா புப்³ப³ந்தம், அபஸ்ஸந்தா அபரந்தம், ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி – பஜானாமா’தி – படிஜானந்தி; தேஸம் ஸோயேவ [தேஸம் தேஸாயம் (ஸீ.), தேஸம்யேவ ஸோ (?)] ஸஹத⁴ம்மிகோ நிக்³க³ஹோ ஹோதி. அபி ச, கச்சான, திட்ட²து புப்³ப³ந்தோ, திட்ட²து அபரந்தோ. ஏது விஞ்ஞூ புரிஸோ அஸடோ² அமாயாவீ உஜுஜாதிகோ, அஹமனுஸாஸாமி அஹம் த⁴ம்மம் தே³ஸேமி. யதா²னுஸிட்ட²ம் ததா² படிபஜ்ஜமானோ [யதா²னுஸிட்ட²ம் படிபஜ்ஜமானோ (?)] நசிரஸ்ஸேவ ஸாமஞ்ஞேவ ஞஸ்ஸதி ஸாமம் த³க்கி²தி – ஏவம் கிர ஸம்மா [ஏவம் கிராயஸ்மா (ஸ்யா. க.)] ப³ந்த⁴னா விப்பமோக்கோ² ஹோதி, யதி³த³ம் அவிஜ்ஜா ப³ந்த⁴னா. ஸேய்யதா²பி, கச்சான, த³ஹரோ குமாரோ மந்தோ³ உத்தானஸேய்யகோ கண்ட²பஞ்சமேஹி ப³ந்த⁴னேஹி ப³த்³தோ⁴ அஸ்ஸ ஸுத்தப³ந்த⁴னேஹி; தஸ்ஸ வுத்³தி⁴மன்வாய இந்த்³ரியானம் பரிபாகமன்வாய தானி ப³ந்த⁴னானி முச்சேய்யும்; ஸோ மோக்கோ²ம்ஹீதி கோ² ஜானேய்ய நோ ச ப³ந்த⁴னம். ஏவமேவ கோ², கச்சான, ஏது விஞ்ஞூ புரிஸோ அஸடோ² அமாயாவீ உஜுஜாதிகோ, அஹமனுஸாஸாமி, அஹம் த⁴ம்மம் தே³ஸேமி; யதா²னுஸிட்ட²ம் ததா² படிபஜ்ஜமானோ நசிரஸ்ஸேவ ஸாமஞ்ஞே ஞஸ்ஸதி, ஸாமம் த³க்கி²தி – ‘ஏவம் கிர ஸம்மா ப³ந்த⁴னா விப்பமோக்கோ² ஹோதி, யதி³த³ம் அவிஜ்ஜா ப³ந்த⁴னா’’’தி.

ஏவம் வுத்தே, வேக²னஸோ பரிப்³பா³ஜகோ ப⁴க³வந்தம் ஏதத³வோச – ‘‘அபி⁴க்கந்தம், போ⁴ கோ³தம…பே… உபாஸகம் மம் ப⁴வம் கோ³தமோ தா⁴ரேது அஜ்ஜதக்³கே³ பாணுபேதம் ஸரணம் க³த’’ந்தி.

வேக²னஸஸுத்தம் நிட்டி²தம் த³ஸமம்.

பரிப்³பா³ஜகவக்³கோ³ நிட்டி²தோ ததியோ.