8. ஸமணமுண்டி³கஸுத்தம்

260. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன உக்³கா³ஹமானோ பரிப்³பா³ஜகோ ஸமணமுண்டி³காபுத்தோ [ஸமணமண்டி³காபுத்தோ (ஸீ. பீ.)] ஸமயப்பவாத³கே திந்து³காசீரே ஏகஸாலகே மல்லிகாய ஆராமே படிவஸதி மஹதியா பரிப்³பா³ஜகபரிஸாய ஸத்³தி⁴ம் பஞ்சமத்தேஹி பரிப்³பா³ஜகஸதேஹி. அத² கோ² பஞ்சகங்கோ³ த²பதி ஸாவத்தி²யா நிக்க²மி தி³வா தி³வஸ்ஸ ப⁴க³வந்தம் த³ஸ்ஸனாய. அத² கோ² பஞ்சகங்க³ஸ்ஸ த²பதிஸ்ஸ ஏதத³ஹோஸி – ‘‘அகாலோ கோ² தாவ ப⁴க³வந்தம் த³ஸ்ஸனாய; படிஸல்லீனோ ப⁴க³வா. மனோபா⁴வனியானம்பி பி⁴க்கூ²னம் அஸமயோ த³ஸ்ஸனாய; படிஸல்லீனா மனோபா⁴வனியா பி⁴க்கூ². யம்னூனாஹம் யேன ஸமயப்பவாத³கோ திந்து³காசீரோ ஏகஸாலகோ மல்லிகாய ஆராமோ யேன உக்³கா³ஹமானோ பரிப்³பா³ஜகோ ஸமணமுண்டி³காபுத்தோ தேனுபஸங்கமேய்ய’’ந்தி. அத² கோ² பஞ்சகங்கோ³ த²பதி யேன ஸமயப்பவாத³கோ திந்து³காசீரோ ஏகஸாலகோ மல்லிகாய ஆராமோ யேன உக்³கா³ஹமானோ பரிப்³பா³ஜகோ ஸமணமுண்டி³காபுத்தோ தேனுபஸங்கமி.

தேன கோ² பன ஸமயேன உக்³கா³ஹமானோ பரிப்³பா³ஜகோ ஸமணமுண்டி³காபுத்தோ மஹதியா பரிப்³பா³ஜகபரிஸாய ஸத்³தி⁴ம் நிஸின்னோ ஹோதி உன்னாதி³னியா உச்சாஸத்³த³மஹாஸத்³தா³ய அனேகவிஹிதம் திரச்சா²னகத²ம் கதே²ந்தியா, ஸேய்யதி²த³ம் – ராஜகத²ம் சோரகத²ம் மஹாமத்தகத²ம் ஸேனாகத²ம் ப⁴யகத²ம் யுத்³த⁴கத²ம் அன்னகத²ம் பானகத²ம் வத்த²கத²ம் ஸயனகத²ம் மாலாகத²ம் க³ந்த⁴கத²ம் ஞாதிகத²ம் யானகத²ம் கா³மகத²ம் நிக³மகத²ம் நக³ரகத²ம் ஜனபத³கத²ம் இத்தி²கத²ம் ஸூரகத²ம் விஸிகா²கத²ம் கும்ப⁴ட்டா²னகத²ம் புப்³ப³பேதகத²ம் நானத்தகத²ம் லோகக்கா²யிகம் ஸமுத்³த³க்கா²யிகம் இதிப⁴வாப⁴வகத²ம் இதி வா.

அத்³த³ஸா கோ² உக்³கா³ஹமானோ பரிப்³பா³ஜகோ ஸமணமுண்டி³காபுத்தோ பஞ்சகங்க³ம் த²பதிம் தூ³ரதோவ ஆக³ச்ச²ந்தம். தி³ஸ்வான ஸகம் பரிஸம் ஸண்டா²பேஸி – ‘‘அப்பஸத்³தா³ போ⁴ந்தோ ஹோந்து, மா போ⁴ந்தோ ஸத்³த³மகத்த²; அயம் ஸமணஸ்ஸ கோ³தமஸ்ஸ ஸாவகோ ஆக³ச்ச²தி பஞ்சகங்கோ³ த²பதி. யாவதா கோ² பன ஸமணஸ்ஸ கோ³தமஸ்ஸ ஸாவகா கி³ஹீ ஓதா³தவஸனா ஸாவத்தி²யம் படிவஸந்தி அயம் தேஸம் அஞ்ஞதரோ பஞ்சகங்கோ³ த²பதி. அப்பஸத்³த³காமா கோ² பன தே ஆயஸ்மந்தோ அப்பஸத்³த³வினீதா அப்பஸத்³த³ஸ்ஸ வண்ணவாதி³னோ; அப்பேவ நாம அப்பஸத்³த³ம் பரிஸம் விதி³த்வா உபஸங்கமிதப்³ப³ம் மஞ்ஞேய்யா’’தி. அத² கோ² தே பரிப்³பா³ஜகா துண்ஹீ அஹேஸும்.

261. அத² கோ² பஞ்சகங்கோ³ த²பதி யேன உக்³கா³ஹமானோ பரிப்³பா³ஜகோ ஸமணமுண்டி³காபுத்தோ தேனுபஸங்கமி; உபஸங்கமித்வா உக்³கா³ஹமானேன பரிப்³பா³ஜகேன ஸமணமுண்டி³காபுத்தேன ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னம் கோ² பஞ்சகங்க³ம் த²பதிம் உக்³கா³ஹமானோ பரிப்³பா³ஜகோ ஸமணமுண்டி³காபுத்தோ ஏதத³வோச – ‘‘சதூஹி கோ² அஹம், க³ஹபதி, த⁴ம்மேஹி ஸமன்னாக³தம் புரிஸபுக்³க³லம் பஞ்ஞபேமி ஸம்பன்னகுஸலம் பரமகுஸலம் உத்தமபத்திபத்தம் ஸமணம் அயோஜ்ஜ²ம். கதமேஹி சதூஹி? இத⁴, க³ஹபதி, ந காயேன பாபகம்மம் கரோதி, ந பாபகம் வாசம் பா⁴ஸதி, ந பாபகம் ஸங்கப்பம் ஸங்கப்பேதி, ந பாபகம் ஆஜீவம் ஆஜீவதி – இமேஹி கோ² அஹம், க³ஹபதி, சதூஹி த⁴ம்மேஹி ஸமன்னாக³தம் புரிஸபுக்³க³லம் பஞ்ஞபேமி ஸம்பன்னகுஸலம் பரமகுஸலம் உத்தமபத்திபத்தம் ஸமணம் அயோஜ்ஜ²’’ந்தி.

அத² கோ² பஞ்சகங்கோ³ த²பதி உக்³கா³ஹமானஸ்ஸ பரிப்³பா³ஜகஸ்ஸ ஸமணமுண்டி³காபுத்தஸ்ஸ பா⁴ஸிதம் நேவ அபி⁴னந்தி³ நப்படிக்கோஸி. அனபி⁴னந்தி³த்வா அப்படிக்கோஸித்வா உட்டா²யாஸனா பக்காமி – ‘‘ப⁴க³வதோ ஸந்திகே ஏதஸ்ஸ பா⁴ஸிதஸ்ஸ அத்த²ம் ஆஜானிஸ்ஸாமீ’’தி. அத² கோ² பஞ்சகங்கோ³ த²பதி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² பஞ்சகங்கோ³ த²பதி யாவதகோ அஹோஸி உக்³கா³ஹமானேன பரிப்³பா³ஜகேன ஸமணமுண்டி³காபுத்தேன ஸத்³தி⁴ம் கதா²ஸல்லாபோ தம் ஸப்³ப³ம் ப⁴க³வதோ ஆரோசேஸி.

262. ஏவம் வுத்தே, ப⁴க³வா பஞ்சகங்க³ம் த²பதிம் ஏதத³வோச – ‘‘ஏவம் ஸந்தே கோ², த²பதி, த³ஹரோ குமாரோ மந்தோ³ உத்தானஸேய்யகோ ஸம்பன்னகுஸலோ ப⁴விஸ்ஸதி பரமகுஸலோ உத்தமபத்திபத்தோ ஸமணோ அயோஜ்ஜோ², யதா² உக்³கா³ஹமானஸ்ஸ பரிப்³பா³ஜகஸ்ஸ ஸமணமுண்டி³காபுத்தஸ்ஸ வசனம். த³ஹரஸ்ஸ ஹி, த²பதி, குமாரஸ்ஸ மந்த³ஸ்ஸ உத்தானஸேய்யகஸ்ஸ காயோதிபி ந ஹோதி, குதோ பன காயேன பாபகம்மம் கரிஸ்ஸதி, அஞ்ஞத்ர ப²ந்தி³தமத்தா! த³ஹரஸ்ஸ ஹி, த²பதி, குமாரஸ்ஸ மந்த³ஸ்ஸ உத்தானஸேய்யகஸ்ஸ வாசாதிபி ந ஹோதி, குதோ பன பாபகம் வாசம் பா⁴ஸிஸ்ஸதி, அஞ்ஞத்ர ரோதி³தமத்தா! த³ஹரஸ்ஸ ஹி, த²பதி, குமாரஸ்ஸ மந்த³ஸ்ஸ உத்தானஸேய்யகஸ்ஸ ஸங்கப்போதிபி ந ஹோதி, குதோ பன பாபகம் ஸங்கப்பம் ஸங்கப்பிஸ்ஸதி, அஞ்ஞத்ர விகூஜிதமத்தா [விகுஜ்ஜிதமத்தா (ஸீ. ஸ்யா. கம். பீ.)]! த³ஹரஸ்ஸ ஹி, த²பதி, குமாரஸ்ஸ மந்த³ஸ்ஸ உத்தானஸேய்யகஸ்ஸ ஆஜீவோதிபி ந ஹோதி, குதோ பன பாபகம் ஆஜீவம் ஆஜீவிஸ்ஸதி, அஞ்ஞத்ர மாதுத²ஞ்ஞா! ஏவம் ஸந்தே கோ², த²பதி, த³ஹரோ குமாரோ மந்தோ³ உத்தானஸேய்யகோ ஸம்பன்னகுஸலோ ப⁴விஸ்ஸதி பரமகுஸலோ உத்தமபத்திபத்தோ ஸமணோ அயோஜ்ஜோ², யதா² உக்³கா³ஹமானஸ்ஸ பரிப்³பா³ஜகஸ்ஸ ஸமணமுண்டி³காபுத்தஸ்ஸ வசனம்.

263. ‘‘சதூஹி கோ² அஹம், த²பதி, த⁴ம்மேஹி ஸமன்னாக³தம் புரிஸபுக்³க³லம் பஞ்ஞபேமி ந சேவ ஸம்பன்னகுஸலம் ந பரமகுஸலம் ந உத்தமபத்திபத்தம் ஸமணம் அயோஜ்ஜ²ம், அபி சிமம் த³ஹரம் குமாரம் மந்த³ம் உத்தானஸேய்யகம் ஸமதி⁴க³ய்ஹ திட்ட²தி. கதமேஹி சதூஹி? இத⁴, த²பதி, ந காயேன பாபகம்மம் கரோதி, ந பாபகம் வாசம் பா⁴ஸதி, ந பாபகம் ஸங்கப்பம் ஸங்கப்பேதி, ந பாபகம் ஆஜீவம் ஆஜீவதி – இமேஹி கோ² அஹம், த²பதி, சதூஹி த⁴ம்மேஹி ஸமன்னாக³தம் புரிஸபுக்³க³லம் பஞ்ஞபேமி ந சேவ ஸம்பன்னகுஸலம் ந பரமகுஸலம் ந உத்தமபத்திபத்தம் ஸமணம் அயோஜ்ஜ²ம், அபி சிமம் த³ஹரம் குமாரம் மந்த³ம் உத்தானஸேய்யகம் ஸமதி⁴க³ய்ஹ திட்ட²தி.

‘‘த³ஸஹி கோ² அஹம், த²பதி, த⁴ம்மேஹி ஸமன்னாக³தம் புரிஸபுக்³க³லம் பஞ்ஞபேமி ஸம்பன்னகுஸலம் பரமகுஸலம் உத்தமபத்திபத்தம் ஸமணம் அயோஜ்ஜ²ம். இமே அகுஸலா ஸீலா; தமஹம் [கஹம் (ஸீ.), தஹம் (பீ.)], த²பதி, வேதி³தப்³ப³ந்தி வதா³மி. இதோஸமுட்டா²னா அகுஸலா ஸீலா; தமஹம், த²பதி, வேதி³தப்³ப³ந்தி வதா³மி. இத⁴ அகுஸலா ஸீலா அபரிஸேஸா நிருஜ்ஜ²ந்தி; தமஹம், த²பதி, வேதி³தப்³ப³ந்தி வதா³மி. ஏவம் படிபன்னோ அகுஸலானம் ஸீலானம் நிரோதா⁴ய படிபன்னோ ஹோதி; தமஹம், த²பதி, வேதி³தப்³ப³ந்தி வதா³மி.

‘‘இமே குஸலா ஸீலா; தமஹம், த²பதி, வேதி³தப்³ப³ந்தி வதா³மி. இதோஸமுட்டா²னா குஸலா ஸீலா; தமஹம், த²பதி, வேதி³தப்³ப³ந்தி வதா³மி. இத⁴ குஸலா ஸீலா அபரிஸேஸா நிருஜ்ஜ²ந்தி; தமஹம், த²பதி, வேதி³தப்³ப³ந்தி வதா³மி. ஏவம் படிபன்னோ குஸலானம் ஸீலானம் நிரோதா⁴ய படிபன்னோ ஹோதி; தமஹம், த²பதி, வேதி³தப்³ப³ந்தி வதா³மி.

‘‘இமே அகுஸலா ஸங்கப்பா; தமஹம், த²பதி, வேதி³தப்³ப³ந்தி வதா³மி. இதோஸமுட்டா²னா அகுஸலா ஸங்கப்பா; தமஹம், த²பதி, வேதி³தப்³ப³ந்தி வதா³மி. இத⁴ அகுஸலா ஸங்கப்பா அபரிஸேஸா நிருஜ்ஜ²ந்தி; தமஹம், த²பதி, வேதி³தப்³ப³ந்தி வதா³மி. ஏவம் படிபன்னோ அகுஸலானம் ஸங்கப்பானம் நிரோதா⁴ய படிபன்னோ ஹோதி; தமஹம், த²பதி, வேதி³தப்³ப³ந்தி வதா³மி.

‘‘இமே குஸலா ஸங்கப்பா; தமஹம், த²பதி, வேதி³தப்³ப³ந்தி வதா³மி. இதோஸமுட்டா²னா குஸலா ஸங்கப்பா; தமஹம், த²பதி, வேதி³தப்³ப³ந்தி வதா³மி. இத⁴ குஸலா ஸங்கப்பா அபரிஸேஸா நிருஜ்ஜ²ந்தி; தமஹம், த²பதி, வேதி³தப்³ப³ந்தி வதா³மி. ஏவம் படிபன்னோ குஸலானம் ஸங்கப்பானம் நிரோதா⁴ய படிபன்னோ ஹோதி; தமஹம், த²பதி, வேதி³தப்³ப³ந்தி வதா³மி.

264. ‘‘கதமே ச, த²பதி, அகுஸலா ஸீலா? அகுஸலம் காயகம்மம், அகுஸலம் வசீகம்மம், பாபகோ ஆஜீவோ – இமே வுச்சந்தி, த²பதி, அகுஸலா ஸீலா.

‘‘இமே ச, த²பதி, அகுஸலா ஸீலா கிம்ஸமுட்டா²னா? ஸமுட்டா²னம்பி நேஸம் வுத்தம். ‘சித்தஸமுட்டா²னா’திஸ்ஸ வசனீயம். கதமம் சித்தம்? சித்தம்பி ஹி ப³ஹும் அனேகவித⁴ம் நானப்பகாரகம். யம் சித்தம் ஸராக³ம் ஸதோ³ஸம் ஸமோஹம், இதோஸமுட்டா²னா அகுஸலா ஸீலா.

‘‘இமே ச, த²பதி, அகுஸலா ஸீலா குஹிம் அபரிஸேஸா நிருஜ்ஜ²ந்தி? நிரோதோ⁴பி நேஸம் வுத்தோ. இத⁴, த²பதி, பி⁴க்கு² காயது³ச்சரிதம் பஹாய காயஸுசரிதம் பா⁴வேதி, வசீது³ச்சரிதம் பஹாய வசீஸுசரிதம் பா⁴வேதி, மனோது³ச்சரிதம் பஹாய மனோஸுசரிதம் பா⁴வேதி, மிச்சா²ஜீவம் பஹாய ஸம்மாஜீவேன ஜீவிதம் கப்பேதி – ஏத்தே²தே அகுஸலா ஸீலா அபரிஸேஸா நிருஜ்ஜ²ந்தி.

‘‘கத²ம் படிபன்னோ, த²பதி, அகுஸலானம் ஸீலானம் நிரோதா⁴ய படிபன்னோ ஹோதி? இத⁴, த²பதி, பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி; உப்பன்னானம் பாபகானம் அகுஸலானம் த⁴ம்மானம் பஹானாய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி; அனுப்பன்னானம் குஸலானம் த⁴ம்மானம் உப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி; உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. ஏவம் படிபன்னோ கோ², த²பதி, அகுஸலானம் ஸீலானம் நிரோதா⁴ய படிபன்னோ ஹோதி.

265. ‘‘கதமே ச, த²பதி, குஸலா ஸீலா? குஸலம் காயகம்மம், குஸலம் வசீகம்மம், ஆஜீவபரிஸுத்³த⁴ம்பி கோ² அஹம், த²பதி, ஸீலஸ்மிம் வதா³மி. இமே வுச்சந்தி, த²பதி, குஸலா ஸீலா.

‘‘இமே ச, த²பதி, குஸலா ஸீலா கிம்ஸமுட்டா²னா? ஸமுட்டா²னம்பி நேஸம் வுத்தம். ‘சித்தஸமுட்டா²னா’திஸ்ஸ வசனீயம். கதமம் சித்தம்? சித்தம்பி ஹி ப³ஹும் அனேகவித⁴ம் நானப்பகாரகம். யம் சித்தம் வீதராக³ம் வீததோ³ஸம் வீதமோஹம், இதோஸமுட்டா²னா குஸலா ஸீலா.

‘‘இமே ச, த²பதி, குஸலா ஸீலா குஹிம் அபரிஸேஸா நிருஜ்ஜ²ந்தி? நிரோதோ⁴பி நேஸம் வுத்தோ. இத⁴, த²பதி, பி⁴க்கு² ஸீலவா ஹோதி நோ ச ஸீலமயோ, தஞ்ச சேதோவிமுத்திம் பஞ்ஞாவிமுத்திம் யதா²பூ⁴தம் பஜானாதி; யத்த²ஸ்ஸ தே குஸலா ஸீலா அபரிஸேஸா நிருஜ்ஜ²ந்தி.

‘‘கத²ம் படிபன்னோ ச, த²பதி, குஸலானம் ஸீலானம் நிரோதா⁴ய படிபன்னோ ஹோதி? இத⁴, த²பதி, பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி; உப்பன்னானம் பாபகானம் அகுஸலானம் த⁴ம்மானம் பஹானாய…பே… அனுப்பன்னானம் குஸலானம் த⁴ம்மானம் உப்பாதா³ய…பே… உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. ஏவம் படிபன்னோ கோ², த²பதி, குஸலானம் ஸீலானம் நிரோதா⁴ய படிபன்னோ ஹோதி.

266. ‘‘கதமே ச, த²பதி, அகுஸலா ஸங்கப்பா? காமஸங்கப்போ, ப்³யாபாத³ஸங்கப்போ, விஹிம்ஸாஸங்கப்போ – இமே வுச்சந்தி, த²பதி, அகுஸலா ஸங்கப்பா.

‘‘இமே ச, த²பதி, அகுஸலா ஸங்கப்பா கிம்ஸமுட்டா²னா? ஸமுட்டா²னம்பி நேஸம் வுத்தம். ‘ஸஞ்ஞாஸமுட்டா²னா’திஸ்ஸ வசனீயம். கதமா ஸஞ்ஞா? ஸஞ்ஞாபி ஹி ப³ஹூ அனேகவிதா⁴ நானப்பகாரகா. காமஸஞ்ஞா, ப்³யாபாத³ஸஞ்ஞா, விஹிம்ஸாஸஞ்ஞா – இதோஸமுட்டா²னா அகுஸலா ஸங்கப்பா.

‘‘இமே ச, த²பதி, அகுஸலா ஸங்கப்பா குஹிம் அபரிஸேஸா நிருஜ்ஜ²ந்தி? நிரோதோ⁴பி நேஸம் வுத்தோ. இத⁴, த²பதி, பி⁴க்கு² விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி; ஏத்தே²தே அகுஸலா ஸங்கப்பா அபரிஸேஸா நிருஜ்ஜ²ந்தி.

‘‘கத²ம் படிபன்னோ ச, த²பதி, அகுஸலானம் ஸங்கப்பானம் நிரோதா⁴ய படிபன்னோ ஹோதி? இத⁴, த²பதி, பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி; உப்பன்னானம் பாபகானம் அகுஸலானம் த⁴ம்மானம் பஹானாய…பே… அனுப்பன்னானம் குஸலானம் த⁴ம்மானம் உப்பாதா³ய…பே… உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. ஏவம் படிபன்னோ கோ², த²பதி, அகுஸலானம் ஸங்கப்பானம் நிரோதா⁴ய படிபன்னோ ஹோதி.

267. ‘‘கதமே ச, த²பதி, குஸலா ஸங்கப்பா? நேக்க²ம்மஸங்கப்போ, அப்³யாபாத³ஸங்கப்போ, அவிஹிம்ஸாஸங்கப்போ – இமே வுச்சந்தி, த²பதி, குஸலா ஸங்கப்பா.

‘‘இமே ச, த²பதி, குஸலா ஸங்கப்பா கிம்ஸமுட்டா²னா? ஸமுட்டா²னம்பி நேஸம் வுத்தம். ‘ஸஞ்ஞாஸமுட்டா²னா’திஸ்ஸ வசனீயம். கதமா ஸஞ்ஞா? ஸஞ்ஞாபி ஹி ப³ஹூ அனேகவிதா⁴ நானப்பகாரகா. நேக்க²ம்மஸஞ்ஞா, அப்³யாபாத³ஸஞ்ஞா, அவிஹிம்ஸாஸஞ்ஞா – இதோஸமுட்டா²னா குஸலா ஸங்கப்பா.

‘‘இமே ச, த²பதி, குஸலா ஸங்கப்பா குஹிம் அபரிஸேஸா நிருஜ்ஜ²ந்தி? நிரோதோ⁴பி நேஸம் வுத்தோ. இத⁴, த²பதி, பி⁴க்கு² விதக்கவிசாரானம் வூபஸமா…பே… து³தியம் ஜா²னம் உபஸம்பஜ்ஜ விஹரதி; ஏத்தே²தே குஸலா ஸங்கப்பா அபரிஸேஸா நிருஜ்ஜ²ந்தி.

‘‘கத²ம் படிபன்னோ ச, த²பதி, குஸலானம் ஸங்கப்பானம் நிரோதா⁴ய படிபன்னோ ஹோதி? இத⁴, த²பதி, பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி; உப்பன்னானம் பாபகானம் அகுஸலானம் த⁴ம்மானம் பஹானாய…பே… அனுப்பன்னானம் குஸலானம் த⁴ம்மானம் உப்பாதா³ய…பே… உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. ஏவம் படிபன்னோ கோ², த²பதி, குஸலானம் ஸங்கப்பானம் நிரோதா⁴ய படிபன்னோ ஹோதி.

268. ‘‘கதமேஹி சாஹம், த²பதி, த³ஸஹி த⁴ம்மேஹி ஸமன்னாக³தம் புரிஸபுக்³க³லம் பஞ்ஞபேமி ஸம்பன்னகுஸலம் பரமகுஸலம் உத்தமபத்திபத்தம் ஸமணம் அயோஜ்ஜ²ம்? இத⁴, த²பதி, பி⁴க்கு² அஸேகா²ய ஸம்மாதி³ட்டி²யா ஸமன்னாக³தோ ஹோதி, அஸேகே²ன ஸம்மாஸங்கப்பேன ஸமன்னாக³தோ ஹோதி, அஸேகா²ய ஸம்மாவாசாய ஸமன்னாக³தோ ஹோதி, அஸேகே²ன ஸம்மாகம்மந்தேன ஸமன்னாக³தோ ஹோதி, அஸேகே²ன ஸம்மாஆஜீவேன ஸமன்னாக³தோ ஹோதி, அஸேகே²ன ஸம்மாவாயாமேன ஸமன்னாக³தோ ஹோதி, அஸேகா²ய ஸம்மாஸதியா ஸமன்னாக³தோ ஹோதி, அஸேகே²ன ஸம்மாஸமாதி⁴னா ஸமன்னாக³தோ ஹோதி, அஸேகே²ன ஸம்மாஞாணேன ஸமன்னாக³தோ ஹோதி, அஸேகா²ய ஸம்மாவிமுத்தியா ஸமன்னாக³தோ ஹோதி – இமேஹி கோ² அஹம், த²பதி, த³ஸஹி த⁴ம்மேஹி ஸமன்னாக³தம் புரிஸபுக்³க³லம் பஞ்ஞபேமி ஸம்பன்னகுஸலம் பரமகுஸலம் உத்தமபத்திபத்தம் ஸமணம் அயோஜ்ஜ²’’ந்தி.

இத³மவோச ப⁴க³வா. அத்தமனோ பஞ்சகங்கோ³ த²பதி ப⁴க³வதோ பா⁴ஸிதம் அபி⁴னந்தீ³தி.

ஸமணமுண்டி³கஸுத்தம் நிட்டி²தம் அட்ட²மம்.