4. தீ³க⁴னக²ஸுத்தம்

201. ஏவம் மே ஸுதம் – ஏகம் ஸமயம் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே ஸூகரக²தாயம். அத² கோ² தீ³க⁴னகோ² பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் அட்டா²ஸி. ஏகமந்தம் டி²தோ கோ² தீ³க⁴னகோ² பரிப்³பா³ஜகோ ப⁴க³வந்தம் ஏதத³வோச – ‘‘அஹஞ்ஹி, போ⁴ கோ³தம, ஏவம்வாதீ³ ஏவம்தி³ட்டி² – ‘ஸப்³ப³ம் மே நக்க²மதீ’’’தி. ‘‘யாபி கோ² தே ஏஸா, அக்³கி³வேஸ்ஸன, தி³ட்டி² – ‘ஸப்³ப³ம் மே நக்க²மதீ’தி, ஏஸாபி தே தி³ட்டி² நக்க²மதீ’’தி? ‘‘ஏஸா சே [ஏஸாபி (க.)] மே, போ⁴ கோ³தம, தி³ட்டி² க²மேய்ய, தம்பஸ்ஸ தாதி³ஸமேவ, தம்பஸ்ஸ தாதி³ஸமேவா’’தி. ‘‘அதோ கோ² தே, அக்³கி³வேஸ்ஸன, ப³ஹூ ஹி ப³ஹுதரா லோகஸ்மிம் யே ஏவமாஹம்ஸு – ‘தம்பஸ்ஸ தாதி³ஸமேவ, தம்பஸ்ஸ தாதி³ஸமேவா’தி. தே தஞ்சேவ தி³ட்டி²ம் நப்பஜஹந்தி அஞ்ஞஞ்ச தி³ட்டி²ம் உபாதி³யந்தி. அதோ கோ² தே, அக்³கி³வேஸ்ஸன, தனூ ஹி தனுதரா லோகஸ்மிம் யே ஏவமாஹம்ஸு – ‘தம்பஸ்ஸ தாதி³ஸமேவ, தம்பஸ்ஸ தாதி³ஸமேவா’தி. தே தஞ்சேவ தி³ட்டி²ம் பஜஹந்தி அஞ்ஞஞ்ச தி³ட்டி²ம் ந உபாதி³யந்தி. ஸந்தக்³கி³வேஸ்ஸன, ஏகே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘ஸப்³ப³ம் மே க²மதீ’தி; ஸந்தக்³கி³வேஸ்ஸன, ஏகே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘ஸப்³ப³ம் மே நக்க²மதீ’தி; ஸந்தக்³கி³வேஸ்ஸன, ஏகே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘ஏகச்சம் மே க²மதி, ஏகச்சம் மே நக்க²மதீ’தி. தத்ரக்³கி³வேஸ்ஸன, யே தே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘ஸப்³ப³ம் மே க²மதீ’தி தேஸமயம் தி³ட்டி² ஸாராகா³ய ஸந்திகே, ஸஞ்ஞோகா³ய ஸந்திகே, அபி⁴னந்த³னாய ஸந்திகே அஜ்ஜோ²ஸானாய ஸந்திகே உபாதா³னாய ஸந்திகே; தத்ரக்³கி³வேஸ்ஸன யே தே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘ஸப்³ப³ம் மே நக்க²மதீ’தி தேஸமயம் தி³ட்டி² அஸாராகா³ய ஸந்திகே, அஸஞ்ஞோகா³ய ஸந்திகே, அனபி⁴னந்த³னாய ஸந்திகே, அனஜ்ஜோ²ஸானாய ஸந்திகே, அனுபாதா³னாய ஸந்திகே’’தி.

202. ஏவம் வுத்தே, தீ³க⁴னகோ² பரிப்³பா³ஜகோ ப⁴க³வந்தம் ஏதத³வோச – ‘‘உக்கம்ஸேதி [உக்கம்ஸதி (ஸீ. பீ. க.)] மே ப⁴வம் கோ³தமோ தி³ட்டி²க³தம், ஸமுக்கம்ஸேதி [ஸம்பஹம்ஸதி (க.)] மே ப⁴வம் கோ³தமோ தி³ட்டி²க³த’’ந்தி. ‘‘தத்ரக்³கி³வேஸ்ஸன, யே தே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘ஏகச்சம் மே க²மதி, ஏகச்சம் மே நக்க²மதீ’தி. யா ஹி தேஸம் க²மதி ஸாயம் தி³ட்டி² ஸாராகா³ய ஸந்திகே, ஸஞ்ஞோகா³ய ஸந்திகே, அபி⁴னந்த³னாய ஸந்திகே, அஜ்ஜோ²ஸானாய ஸந்திகே, உபாதா³னாய ஸந்திகே; யா ஹி தேஸம் நக்க²மதி ஸாயம் தி³ட்டி² அஸாராகா³ய ஸந்திகே, அஸஞ்ஞோகா³ய ஸந்திகே, அனபி⁴னந்த³னாய ஸந்திகே, அனஜ்ஜோ²ஸானாய ஸந்திகே, அனுபாதா³னாய ஸந்திகே. தத்ரக்³கி³வேஸ்ஸன, யே தே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘ஸப்³ப³ம் மே க²மதீ’தி தத்த² விஞ்ஞூ புரிஸோ இதி படிஸஞ்சிக்க²தி – ‘யா கோ² மே அயம் தி³ட்டி² – ஸப்³ப³ம் மே க²மதீதி, இமஞ்சே அஹம் தி³ட்டி²ம் தா²மஸா பராமாஸா அபி⁴னிவிஸ்ஸ வோஹரேய்யம் – இத³மேவ ஸச்சம் மோக⁴மஞ்ஞந்தி; த்³வீஹி மே அஸ்ஸ விக்³க³ஹோ – யோ சாயம் ஸமணோ வா ப்³ராஹ்மணோ வா ஏவம்வாதீ³ ஏவம்தி³ட்டி² – ஸப்³ப³ம் மே நக்க²மதீதி, யோ சாயம் ஸமணோ வா ப்³ராஹ்மணோ வா ஏவம்வாதீ³ ஏவம்தி³ட்டி² – ஏகச்சம் மே க²மதி, ஏகச்சம் மே நக்க²மதீதி – இமேஹி அஸ்ஸ த்³வீஹி விக்³க³ஹோ. இதி விக்³க³ஹே ஸதி விவாதோ³, விவாதே³ ஸதி விகா⁴தோ, விகா⁴தே ஸதி விஹேஸா’. இதி ஸோ விக்³க³ஹஞ்ச விவாத³ஞ்ச விகா⁴தஞ்ச விஹேஸஞ்ச அத்தனி ஸம்பஸ்ஸமானோ தஞ்சேவ தி³ட்டி²ம் பஜஹதி அஞ்ஞஞ்ச தி³ட்டி²ம் ந உபாதி³யதி. ஏவமேதாஸம் தி³ட்டீ²னம் பஹானம் ஹோதி, ஏவமேதாஸம் தி³ட்டீ²னம் படினிஸ்ஸக்³கோ³ ஹோதி.

203. ‘‘தத்ரக்³கி³வேஸ்ஸன, யே தே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘ஸப்³ப³ம் மே நக்க²மதீ’தி தத்த² விஞ்ஞூ புரிஸோ இதி படிஸஞ்சிக்க²தி – ‘யா கோ² மே அயம் தி³ட்டி² – ஸப்³ப³ம் மே நக்க²மதீ’தி, இமஞ்சே அஹம் தி³ட்டி²ம் தா²மஸா பராமாஸா அபி⁴னிவிஸ்ஸ வோஹரேய்யம் – இத³மேவ ஸச்சம் மோக⁴மஞ்ஞந்தி; த்³வீஹி மே அஸ்ஸ விக்³க³ஹோ – யோ சாயம் ஸமணோ வா ப்³ராஹ்மணோ வா ஏவம்வாதீ³ ஏவம்தி³ட்டி² – ஸப்³ப³ம் மே க²மதீதி, யோ சாயம் ஸமணோ வா ப்³ராஹ்மணோ வா ஏவம்வாதீ³ ஏவம்தி³ட்டி² – ஏகச்சம் மே க²மதி ஏகச்சம் மே நக்க²மதீதி – இமேஹி அஸ்ஸ த்³வீஹி விக்³க³ஹோ. இதி விக்³க³ஹே ஸதி விவாதோ³, விவாதே³ ஸதி விகா⁴தோ, விகா⁴தே ஸதி விஹேஸா’. இதி ஸோ விக்³க³ஹஞ்ச விவாத³ஞ்ச விகா⁴தஞ்ச விஹேஸஞ்ச அத்தனி ஸம்பஸ்ஸமானோ தஞ்சேவ தி³ட்டி²ம் பஜஹதி அஞ்ஞஞ்ச தி³ட்டி²ம் ந உபாதி³யதி. ஏவமேதாஸம் தி³ட்டீ²னம் பஹானம் ஹோதி, ஏவமேதாஸம் தி³ட்டீ²னம் படினிஸ்ஸக்³கோ³ ஹோதி.

204. ‘‘தத்ரக்³கி³வேஸ்ஸன, யே தே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘ஏகச்சம் மே க²மதி, ஏகச்சம் மே நக்க²மதீ’தி தத்த² விஞ்ஞூ புரிஸோ இதி படிஸஞ்சிக்க²தி – ‘யா கோ² மே அயம் தி³ட்டி² – ஏகச்சம் மே க²மதி, ஏகச்சம் மே நக்க²மதீதி, இமஞ்சே அஹம் தி³ட்டி²ம் தா²மஸா பராமாஸா அபி⁴னிவிஸ்ஸ வோஹரேய்யம் – இத³மேவ ஸச்சம் மோக⁴மஞ்ஞந்தி; த்³வீஹி மே அஸ்ஸ விக்³க³ஹோ – யோ சாயம் ஸமணோ வா ப்³ராஹ்மணோ வா ஏவம்வாதீ³ ஏவம்தி³ட்டி² – ஸப்³ப³ம் மே க²மதீதி, யோ சாயம் ஸமணோ வா ப்³ராஹ்மணோ வா ஏவம்வாதீ³ ஏவம்தி³ட்டி² – ஸப்³ப³ம் மே நக்க²மதீதி – இமேஹி அஸ்ஸ த்³வீஹி விக்³க³ஹோ. இதி விக்³க³ஹே ஸதி விவாதோ³, விவாதே³ ஸதி விகா⁴தோ, விகா⁴தே ஸதி விஹேஸா’. இதி ஸோ விக்³க³ஹஞ்ச விவாத³ஞ்ச விகா⁴தஞ்ச விஹேஸஞ்ச அத்தனி ஸம்பஸ்ஸமானோ தஞ்சேவ தி³ட்டி²ம் பஜஹதி அஞ்ஞஞ்ச தி³ட்டி²ம் ந உபாதி³யதி. ஏவமேதாஸம் தி³ட்டீ²னம் பஹானம் ஹோதி, ஏவமேதாஸம் தி³ட்டீ²னம் படினிஸ்ஸக்³கோ³ ஹோதி.

205. ‘‘அயம் கோ² பனக்³கி³வேஸ்ஸன, காயோ ரூபீ சாதுமஹாபூ⁴திகோ [சாதும்மஹாபூ⁴திகோ (ஸீ. ஸ்யா.)] மாதாபேத்திகஸம்ப⁴வோ ஓத³னகும்மாஸுபசயோ அனிச்சுச்சா²த³னபரிமத்³த³னபே⁴த³னவித்³த⁴ம்ஸனத⁴ம்மோ, அனிச்சதோ து³க்க²தோ ரோக³தோ க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ அனத்ததோ ஸமனுபஸ்ஸிதப்³போ³. தஸ்ஸிமம் காயம் அனிச்சதோ து³க்க²தோ ரோக³தோ க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ அனத்ததோ ஸமனுபஸ்ஸதோ யோ காயஸ்மிம் காயச²ந்தோ³ காயஸ்னேஹோ காயன்வயதா ஸா பஹீயதி.

‘‘திஸ்ஸோ கோ² இமா, அக்³கி³வேஸ்ஸன, வேத³னா – ஸுகா² வேத³னா, து³க்கா² வேத³னா, அது³க்க²மஸுகா² வேத³னா. யஸ்மிம், அக்³கி³வேஸ்ஸன, ஸமயே ஸுக²ம் வேத³னம் வேதே³தி, நேவ தஸ்மிம் ஸமயே து³க்க²ம் வேத³னம் வேதே³தி, ந அது³க்க²மஸுக²ம் வேத³னம் வேதே³தி; ஸுக²ம்யேவ தஸ்மிம் ஸமயே வேத³னம் வேதே³தி. யஸ்மிம், அக்³கி³வேஸ்ஸன, ஸமயே து³க்க²ம் வேத³னம் வேதே³தி, நேவ தஸ்மிம் ஸமயே ஸுக²ம் வேத³னம் வேதே³தி, ந அது³க்க²மஸுக²ம் வேத³னம் வேதே³தி; து³க்க²ம்யேவ தஸ்மிம் ஸமயே வேத³னம் வேதே³தி. யஸ்மிம், அக்³கி³வேஸ்ஸன, ஸமயே அது³க்க²மஸுக²ம் வேத³னம் வேதே³தி, நேவ தஸ்மிம் ஸமயே ஸுக²ம் வேத³னம் வேதே³தி, ந து³க்க²ம் வேத³னம் வேதே³தி; அது³க்க²மஸுக²ம்யேவ தஸ்மிம் ஸமயே வேத³னம் வேதே³தி. ஸுகா²பி கோ², அக்³கி³வேஸ்ஸன, வேத³னா அனிச்சா ஸங்க²தா படிச்சஸமுப்பன்னா க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மா; து³க்கா²பி கோ², அக்³கி³வேஸ்ஸன, வேத³னா அனிச்சா ஸங்க²தா படிச்சஸமுப்பன்னா க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மா; அது³க்க²மஸுகா²பி கோ², அக்³கி³வேஸ்ஸன, வேத³னா அனிச்சா ஸங்க²தா படிச்சஸமுப்பன்னா க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மா. ஏவம் பஸ்ஸம், அக்³கி³வேஸ்ஸன, ஸுதவா அரியஸாவகோ ஸுகா²யபி வேத³னாய நிப்³பி³ந்த³தி, து³க்கா²யபி வேத³னாய நிப்³பி³ந்த³தி, அது³க்க²மஸுகா²யபி வேத³னாய நிப்³பி³ந்த³தி; நிப்³பி³ந்த³ம் விரஜ்ஜதி, விராகா³ விமுச்சதி. விமுத்தஸ்மிம், விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதி. ஏவம் விமுத்தசித்தோ கோ², அக்³கி³வேஸ்ஸன, பி⁴க்கு² ந கேனசி ஸம்வத³தி, ந கேனசி விவத³தி, யஞ்ச லோகே வுத்தம் தேன வோஹரதி, அபராமஸ’’ந்தி.

206. தேன கோ² பன ஸமயேன ஆயஸ்மா ஸாரிபுத்தோ ப⁴க³வதோ பிட்டி²தோ டி²தோ ஹோதி ப⁴க³வந்தம் பீ³ஜயமானோ [வீஜயமானோ (ஸீ. பீ.)]. அத² கோ² ஆயஸ்மதோ ஸாரிபுத்தஸ்ஸ ஏதத³ஹோஸி – ‘‘தேஸம் தேஸம் கிர நோ ப⁴க³வா த⁴ம்மானம் அபி⁴ஞ்ஞா பஹானமாஹ, தேஸம் தேஸம் கிர நோ ஸுக³தோ த⁴ம்மானம் அபி⁴ஞ்ஞா படினிஸ்ஸக்³க³மாஹா’’தி. இதி ஹித³ம் ஆயஸ்மதோ ஸாரிபுத்தஸ்ஸ படிஸஞ்சிக்க²தோ அனுபாதா³ய ஆஸவேஹி சித்தம் விமுச்சி. தீ³க⁴னக²ஸ்ஸ பன பரிப்³பா³ஜகஸ்ஸ விரஜம் வீதமலம் த⁴ம்மசக்கு²ம் உத³பாதி³ – ‘‘யம் கிஞ்சி ஸமுத³யத⁴ம்மம் ஸப்³ப³ம் தம் நிரோத⁴த⁴ம்ம’’ந்தி. அத² கோ² தீ³க⁴னகோ² பரிப்³பா³ஜகோ தி³ட்ட²த⁴ம்மோ பத்தத⁴ம்மோ விதி³தத⁴ம்மோ பரியோகா³ள்ஹத⁴ம்மோ திண்ணவிசிகிச்சோ² விக³தகத²ம்கதோ² வேஸாரஜ்ஜப்பத்தோ அபரப்பச்சயோ ஸத்து²ஸாஸனே ப⁴க³வந்தம் ஏதத³வோச – ‘‘அபி⁴க்கந்தம், போ⁴ கோ³தம, அபி⁴க்கந்தம், போ⁴ கோ³தம! ஸேய்யதா²பி, போ⁴ கோ³தம, நிக்குஜ்ஜிதம் வா உக்குஜ்ஜேய்ய, படிச்ச²ன்னம் வா விவரேய்ய, மூள்ஹஸ்ஸ வா மக்³க³ம் ஆசிக்கே²ய்ய, அந்த⁴காரே வா தேலபஜ்ஜோதம் தா⁴ரேய்ய – சக்கு²மந்தோ ரூபானி த³க்க²ந்தீதி – ஏவமேவ கோ² போ⁴தா கோ³தமேன அனேகபரியாயேன த⁴ம்மோ பகாஸிதோ. ஏஸாஹம் ப⁴வந்தம் கோ³தமம் ஸரணம் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. உபாஸகம் மம் ப⁴வம் கோ³தமோ தா⁴ரேது அஜ்ஜதக்³கே³ பாணுபேதம் ஸரணம் க³த’’ந்தி.

தீ³க⁴னக²ஸுத்தம் நிட்டி²தம் சதுத்த²ம்.