2. அக்³கி³வச்ச²ஸுத்தம்

187. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² வச்ச²கோ³த்தோ பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² வச்ச²கோ³த்தோ பரிப்³பா³ஜகோ ப⁴க³வந்தம் ஏதத³வோச –

‘‘கிம் நு கோ², போ⁴ கோ³தம, ‘ஸஸ்ஸதோ லோகோ, இத³மேவ ஸச்சம் மோக⁴மஞ்ஞ’ந்தி – ஏவம்தி³ட்டி² [ஏவம்தி³ட்டீ² (ஸீ. ஸ்யா. கம். க.)] ப⁴வம் கோ³தமோ’’தி? ‘‘ந கோ² அஹம், வச்ச², ஏவம்தி³ட்டி² – ‘ஸஸ்ஸதோ லோகோ, இத³மேவ ஸச்சம் மோக⁴மஞ்ஞ’’’ந்தி.

‘‘கிம் பன, போ⁴ கோ³தம, ‘அஸஸ்ஸதோ லோகோ, இத³மேவ ஸச்சம் மோக⁴மஞ்ஞ’ந்தி – ஏவம்தி³ட்டி² ப⁴வம் கோ³தமோ’’தி? ‘‘ந கோ² அஹம், வச்ச², ஏவம்தி³ட்டி² – ‘அஸஸ்ஸதோ லோகோ, இத³மேவ ஸச்சம் மோக⁴மஞ்ஞ’’’ந்தி.

‘‘கிம் நு கோ², போ⁴ கோ³தம, ‘அந்தவா லோகோ, இத³மேவ ஸச்சம் மோக⁴மஞ்ஞ’ந்தி – ஏவம்தி³ட்டி² ப⁴வம் கோ³தமோ’’தி? ‘‘ந கோ² அஹம், வச்ச², ஏவம்தி³ட்டி² – ‘அந்தவா லோகோ, இத³மேவ ஸச்சம் மோக⁴மஞ்ஞ’’’ந்தி.

‘‘கிம் பன, போ⁴ கோ³தம, ‘அனந்தவா லோகோ, இத³மேவ ஸச்சம் மோக⁴மஞ்ஞ’ந்தி – ஏவம்தி³ட்டி² ப⁴வம் கோ³தமோ’’தி? ‘‘ந கோ² அஹம், வச்ச², ஏவம்தி³ட்டி² – ‘அனந்தவா லோகோ, இத³மேவ ஸச்சம் மோக⁴மஞ்ஞ’’’ந்தி.

‘‘கிம் நு கோ², போ⁴ கோ³தம, ‘தம் ஜீவம் தம் ஸரீரம், இத³மேவ ஸச்சம் மோக⁴மஞ்ஞ’ந்தி – ஏவம்தி³ட்டி² ப⁴வம் கோ³தமோ’’தி? ‘‘ந கோ² அஹம், வச்ச², ஏவம்தி³ட்டி² – ‘தம் ஜீவம் தம் ஸரீரம், இத³மேவ ஸச்சம் மோக⁴மஞ்ஞ’’’ந்தி.

‘‘கிம் பன, போ⁴ கோ³தம, ‘அஞ்ஞம் ஜீவம் அஞ்ஞம் ஸரீரம், இத³மேவ ஸச்சம் மோக⁴மஞ்ஞ’ந்தி – ஏவம்தி³ட்டி² ப⁴வம் கோ³தமோ’’தி? ‘‘ந கோ² அஹம், வச்ச², ஏவம்தி³ட்டி² – ‘அஞ்ஞம் ஜீவம் அஞ்ஞம் ஸரீரம், இத³மேவ ஸச்சம் மோக⁴மஞ்ஞ’’’ந்தி.

‘‘கிம் நு கோ², போ⁴ கோ³தம, ‘ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’ந்தி – ஏவம்தி³ட்டி² ப⁴வம் கோ³தமோ’’தி? ‘‘ந கோ² அஹம், வச்ச², ஏவம்தி³ட்டி² – ‘ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’’’ந்தி.

‘‘கிம் பன, போ⁴ கோ³தம, ‘ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’ந்தி – ஏவம்தி³ட்டி² ப⁴வம் கோ³தமோ’’தி? ‘‘ந கோ² அஹம், வச்ச², ஏவம்தி³ட்டி² – ‘ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’’’ந்தி.

‘‘கிம் நு கோ², போ⁴ கோ³தம, ‘ஹோதி ச ந ச ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’ந்தி – ஏவம்தி³ட்டி² ப⁴வம் கோ³தமோ’’தி? ‘‘ந கோ² அஹம், வச்ச², ஏவம்தி³ட்டி² – ‘ஹோதி ச ந ச ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’’’ந்தி.

‘‘கிம் பன, போ⁴ கோ³தம, ‘நேவ ஹோதி ந ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’ந்தி – ஏவம்தி³ட்டி² ப⁴வம் கோ³தமோ’’தி? ‘‘ந கோ² அஹம், வச்ச², ஏவம்தி³ட்டி² – ‘நேவ ஹோதி ந ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’’’ந்தி.

188. ‘‘‘கிம் நு கோ², போ⁴ கோ³தம, ஸஸ்ஸதோ லோகோ, இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வம் கோ³தமோ’தி இதி புட்டோ² ஸமானோ ‘ந கோ² அஹம், வச்ச², ஏவம்தி³ட்டி² – ஸஸ்ஸதோ லோகோ, இத³மேவ ஸச்சம் மோக⁴மஞ்ஞ’ந்தி வதே³ஸி [மோக⁴மஞ்ஞந்தீதி வதே³ஸி (ஸீ.), மோக⁴மஞ்ஞந்தி இதி வதே³ஸி (?)]. ‘கிம் பன, போ⁴ கோ³தம, அஸஸ்ஸதோ லோகோ, இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வம் கோ³தமோ’தி இதி புட்டோ² ஸமானோ ‘ந கோ² அஹம், வச்ச², ஏவம்தி³ட்டி² – அஸஸ்ஸதோ லோகோ, இத³மேவ ஸச்சம் மோக⁴மஞ்ஞ’ந்தி வதே³ஸி. ‘கிம் நு கோ², போ⁴ கோ³தம, அந்தவா லோகோ, இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வம் கோ³தமோ’தி இதி புட்டோ² ஸமானோ ‘ந கோ² அஹம், வச்ச², ஏவம்தி³ட்டி² – அந்தவா லோகோ, இத³மேவ ஸச்சம் மோக⁴மஞ்ஞ’ந்தி வதே³ஸி. ‘கிம் பன, போ⁴ கோ³தம, அனந்தவா லோகோ, இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வம் கோ³தமோ’தி இதி புட்டோ² ஸமானோ ‘ந கோ² அஹம், வச்ச², ஏவம்தி³ட்டி² – அனந்தவா லோகோ, இத³மேவ ஸச்சம் மோக⁴மஞ்ஞ’ந்தி வதே³ஸி. ‘கிம் நு கோ², போ⁴ கோ³தம, தம் ஜீவம் தம் ஸரீரம், இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வம் கோ³தமோ’தி இதி புட்டோ² ஸமானோ ‘ந கோ² அஹம், வச்ச², ஏவம்தி³ட்டி² – தம் ஜீவம் தம் ஸரீரம், இத³மேவ ஸச்சம் மோக⁴மஞ்ஞ’ந்தி வதே³ஸி. ‘கிம் பன, போ⁴ கோ³தம, அஞ்ஞம் ஜீவம் அஞ்ஞம் ஸரீரம், இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வம் கோ³தமோ’தி இதி புட்டோ² ஸமானோ ‘ந கோ² அஹம், வச்ச², ஏவம்தி³ட்டி² – அஞ்ஞம் ஜீவம் அஞ்ஞம் ஸரீரம், இத³மேவ ஸச்சம் மோக⁴மஞ்ஞ’ந்தி வதே³ஸி. ‘கிம் நு கோ², போ⁴ கோ³தம, ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வம் கோ³தமோ’தி இதி புட்டோ² ஸமானோ ‘ந கோ² அஹம், வச்ச², ஏவம்தி³ட்டி² – ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’ந்தி வதே³ஸி.

‘‘‘கிம் பன, போ⁴ கோ³தம, ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வம் கோ³தமோ’தி இதி புட்டோ² ஸமானோ ‘ந கோ² அஹம், வச்ச², ஏவம்தி³ட்டி² – ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’ந்தி வதே³ஸி. ‘கிம் நு கோ², போ⁴ கோ³தம, ஹோதி ச ந ச ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வம் கோ³தமோ’தி இதி புட்டோ² ஸமானோ ‘ந கோ² அஹம், வச்ச², ஏவம்தி³ட்டி² – ஹோதி ச ந ச ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’ந்தி வதே³ஸி. ‘கிம் பன, போ⁴ கோ³தம, நேவ ஹோதி ந ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞந்தி – ஏவம்தி³ட்டி² ப⁴வம் கோ³தமோ’தி இதி புட்டோ² ஸமானோ ‘ந கோ² அஹம், வச்ச², ஏவம்தி³ட்டி² – நேவ ஹோதி ந ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’ந்தி வதே³ஸி.

‘‘கிம் பன போ⁴ கோ³தமோ ஆதீ³னவம் ஸம்பஸ்ஸமானோ ஏவம் இமானி ஸப்³ப³ஸோ தி³ட்டி²க³தானி அனுபக³தோ’’தி?

189. ‘‘‘ஸஸ்ஸதோ லோகோ’தி கோ², வச்ச², தி³ட்டி²க³தமேதம் தி³ட்டி²க³ஹனம் தி³ட்டி²கந்தாரோ [தி³ட்டி²கந்தாரம் (ஸீ. பீ.)] தி³ட்டி²விஸூகம் தி³ட்டி²விப்ப²ந்தி³தம் தி³ட்டி²ஸம்யோஜனம் ஸது³க்க²ம் ஸவிகா⁴தம் ஸஉபாயாஸம் ஸபரிளாஹம், ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸம்வத்ததி. ‘அஸஸ்ஸதோ லோகோ’தி கோ², வச்ச²…பே… ‘அந்தவா லோகோ’தி கோ², வச்ச²…பே… ‘அனந்தவா லோகோ’தி கோ², வச்ச²…பே… ‘தம் ஜீவம் தம் ஸரீர’ந்தி கோ², வச்ச²…பே… ‘அஞ்ஞம் ஜீவம் அஞ்ஞம் ஸரீர’ந்தி கோ², வச்ச²…பே… ‘ஹோதி ததா²க³தோ பரம் மரணா’தி கோ², வச்ச² …பே… ‘ந ஹோதி ததா²க³தோ பரம் மரணா’தி கோ², வச்ச²…பே… ‘ஹோதி ச ந ச ஹோதி ததா²க³தோ பரம் மரணா’தி கோ², வச்ச²…பே… ‘நேவ ஹோதி ந ந ஹோதி ததா²க³தோ பரம் மரணா’தி கோ², வச்ச², தி³ட்டி²க³தமேதம் தி³ட்டி²க³ஹனம் தி³ட்டி²கந்தாரோ தி³ட்டி²விஸூகம் தி³ட்டி²விப்ப²ந்தி³தம் தி³ட்டி²ஸம்யோஜனம் ஸது³க்க²ம் ஸவிகா⁴தம் ஸஉபாயாஸம் ஸபரிளாஹம், ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸம்வத்ததி. இமம் கோ² அஹம், வச்ச², ஆதீ³னவம் ஸம்பஸ்ஸமானோ ஏவம் இமானி ஸப்³ப³ஸோ தி³ட்டி²க³தானி அனுபக³தோ’’தி.

‘‘அத்தி² பன போ⁴தோ கோ³தமஸ்ஸ கிஞ்சி தி³ட்டி²க³த’’ந்தி? ‘‘தி³ட்டி²க³தந்தி கோ², வச்ச², அபனீதமேதம் ததா²க³தஸ்ஸ. தி³ட்ட²ஞ்ஹேதம், வச்ச², ததா²க³தேன – ‘இதி ரூபம், இதி ரூபஸ்ஸ ஸமுத³யோ, இதி ரூபஸ்ஸ அத்த²ங்க³மோ; இதி வேத³னா, இதி வேத³னாய ஸமுத³யோ, இதி வேத³னாய அத்த²ங்க³மோ; இதி ஸஞ்ஞா, இதி ஸஞ்ஞாய ஸமுத³யோ, இதி ஸஞ்ஞாய அத்த²ங்க³மோ; இதி ஸங்கா²ரா, இதி ஸங்கா²ரானம் ஸமுத³யோ, இதி ஸங்கா²ரானம் அத்த²ங்க³மோ; இதி விஞ்ஞாணம், இதி விஞ்ஞாணஸ்ஸ ஸமுத³யோ, இதி விஞ்ஞாணஸ்ஸ அத்த²ங்க³மோ’தி. தஸ்மா ததா²க³தோ ஸப்³ப³மஞ்ஞிதானம் ஸப்³ப³மதி²தானம் ஸப்³ப³அஹம்காரமமம்காரமானானுஸயானம் க²யா விராகா³ நிரோதா⁴ சாகா³ படினிஸ்ஸக்³கா³ அனுபாதா³ விமுத்தோதி வதா³மீ’’தி.

190. ‘‘ஏவம் விமுத்தசித்தோ பன, போ⁴ கோ³தம, பி⁴க்கு² குஹிம் உபபஜ்ஜதீ’’தி? ‘‘உபபஜ்ஜதீதி கோ², வச்ச², ந உபேதி’’. ‘‘தேன ஹி, போ⁴ கோ³தம, ந உபபஜ்ஜதீ’’தி? ‘‘ந உபபஜ்ஜதீதி கோ², வச்ச², ந உபேதி’’. ‘‘தேன ஹி, போ⁴ கோ³தம, உபபஜ்ஜதி ச ந ச உபபஜ்ஜதீ’’தி? ‘‘உபபஜ்ஜதி ச ந ச உபபஜ்ஜதீதி கோ², வச்ச², ந உபேதி’’. ‘‘தேன ஹி, போ⁴ கோ³தம, நேவ உபபஜ்ஜதி ந ந உபபஜ்ஜதீ’’தி? ‘‘நேவ உபபஜ்ஜதி ந ந உபபஜ்ஜதீதி கோ², வச்ச², ந உபேதி’’.

‘‘‘ஏவம் விமுத்தசித்தோ பன, போ⁴ கோ³தம, பி⁴க்கு² குஹிம் உபபஜ்ஜதீ’தி இதி புட்டோ² ஸமானோ ‘உபபஜ்ஜதீதி கோ², வச்ச², ந உபேதீ’தி வதே³ஸி. ‘தேன ஹி, போ⁴ கோ³தம, ந உபபஜ்ஜதீ’தி இதி புட்டோ² ஸமானோ ‘ந உபபஜ்ஜதீதி கோ², வச்ச², ந உபேதீ’தி வதே³ஸி. ‘தேன ஹி, போ⁴ கோ³தம, உபபஜ்ஜதி ச ந ச உபபஜ்ஜதீ’தி இதி புட்டோ² ஸமானோ ‘உபபஜ்ஜதி ச ந ச உபபஜ்ஜதீதி கோ², வச்ச², ந உபேதீ’தி வதே³ஸி. ‘தேன ஹி, போ⁴ கோ³தம, நேவ உபபஜ்ஜதி ந ந உபபஜ்ஜதீ’தி இதி புட்டோ² ஸமானோ ‘நேவ உபபஜ்ஜதி ந ந உபபஜ்ஜதீதி கோ², வச்ச², ந உபேதீ’தி வதே³ஸி. ஏத்தா²ஹம், போ⁴ கோ³தம, அஞ்ஞாணமாபாதி³ம், ஏத்த² ஸம்மோஹமாபாதி³ம். யாபி மே ஏஸா போ⁴தோ கோ³தமஸ்ஸ புரிமேன கதா²ஸல்லாபேன அஹு பஸாத³மத்தா ஸாபி மே ஏதரஹி அந்தரஹிதா’’தி. ‘‘அலஞ்ஹி தே, வச்ச², அஞ்ஞாணாய, அலம் ஸம்மோஹாய. க³ம்பீ⁴ரோ ஹாயம், வச்ச², த⁴ம்மோ து³த்³த³ஸோ து³ரனுபோ³தோ⁴ ஸந்தோ பணீதோ அதக்காவசரோ நிபுணோ பண்டி³தவேத³னீயோ. ஸோ தயா து³ஜ்ஜானோ அஞ்ஞதி³ட்டி²கேன அஞ்ஞக²ந்திகேன அஞ்ஞருசிகேன அஞ்ஞத்ரயோகே³ன [அஞ்ஞத்ராயோகே³ன (தீ³. நி. 1.420)] அஞ்ஞத்ராசரியகேன’’ [அஞ்ஞத்தா²சரியகேன (ஸீ. ஸ்யா. கம். பீ.)].

191. ‘‘தேன ஹி, வச்ச², தஞ்ஞேவேத்த² படிபுச்சி²ஸ்ஸாமி; யதா² தே க²மேய்ய ததா² நம் ப்³யாகரேய்யாஸி. தம் கிம் மஞ்ஞஸி, வச்ச², ஸசே தே புரதோ அக்³கி³ ஜலேய்ய, ஜானேய்யாஸி த்வம் – ‘அயம் மே புரதோ அக்³கி³ ஜலதீ’’’தி? ‘‘ஸசே மே, போ⁴ கோ³தம, புரதோ அக்³கி³ ஜலேய்ய, ஜானேய்யாஹம் – ‘அயம் மே புரதோ அக்³கி³ ஜலதீ’’’தி.

‘‘ஸசே பன தம், வச்ச², ஏவம் புச்சே²ய்ய – ‘யோ தே அயம் புரதோ அக்³கி³ ஜலதி அயம் அக்³கி³ கிம் படிச்ச ஜலதீ’தி, ஏவம் புட்டோ² த்வம், வச்ச², கிந்தி ப்³யாகரேய்யாஸீ’’தி? ‘‘ஸசே மம், போ⁴ கோ³தம, ஏவம் புச்சே²ய்ய – ‘யோ தே அயம் புரதோ அக்³கி³ ஜலதி அயம் அக்³கி³ கிம் படிச்ச ஜலதீ’தி, ஏவம் புட்டோ² அஹம், போ⁴ கோ³தம, ஏவம் ப்³யாகரேய்யம் – ‘யோ மே அயம் புரதோ அக்³கி³ ஜலதி அயம் அக்³கி³ திணகட்டு²பாதா³னம் படிச்ச ஜலதீ’’’தி.

‘‘ஸசே தே, வச்ச², புரதோ ஸோ அக்³கி³ நிப்³பா³யேய்ய, ஜானேய்யாஸி த்வம் – ‘அயம் மே புரதோ அக்³கி³ நிப்³பு³தோ’’’தி? ‘‘ஸசே மே, போ⁴ கோ³தம, புரதோ ஸோ அக்³கி³ நிப்³பா³யேய்ய, ஜானேய்யாஹம் – ‘அயம் மே புரதோ அக்³கி³ நிப்³பு³தோ’’’தி.

‘‘ஸசே பன தம், வச்ச², ஏவம் புச்சே²ய்ய – ‘யோ தே அயம் புரதோ அக்³கி³ நிப்³பு³தோ ஸோ அக்³கி³ இதோ கதமம் தி³ஸம் க³தோ – புரத்தி²மம் வா த³க்கி²ணம் வா பச்சி²மம் வா உத்தரம் வா’தி, ஏவம் புட்டோ² த்வம், வச்ச², கிந்தி ப்³யாகரேய்யாஸீ’’தி? ‘‘ந உபேதி, போ⁴ கோ³தம, யஞ்ஹி ஸோ, போ⁴ கோ³தம, அக்³கி³ திணகட்டு²பாதா³னம் படிச்ச அஜலி [ஜலதி (ஸ்யா. கம். க.)] தஸ்ஸ ச பரியாதா³னா அஞ்ஞஸ்ஸ ச அனுபஹாரா அனாஹாரோ நிப்³பு³தோ த்வேவ ஸங்க்²யம் க³ச்ச²தீ’’தி.

192. ‘‘ஏவமேவ கோ², வச்ச², யேன ரூபேன ததா²க³தம் பஞ்ஞாபயமானோ பஞ்ஞாபேய்ய தம் ரூபம் ததா²க³தஸ்ஸ பஹீனம் உச்சி²ன்னமூலம் தாலாவத்து²கதம் அனபா⁴வம்கதம் ஆயதிம் அனுப்பாத³த⁴ம்மம். ரூபஸங்க²யவிமுத்தோ [ரூபஸங்கா²விமுத்தோ (ஸீ. ஸ்யா. கம். பீ.) ஏவம் வேத³னாஸங்க²யாதீ³ஸுபி] கோ², வச்ச², ததா²க³தோ க³ம்பீ⁴ரோ அப்பமேய்யோ து³ப்பரியோகா³ள்ஹோ – ஸேய்யதா²பி மஹாஸமுத்³தோ³. உபபஜ்ஜதீதி ந உபேதி, ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந உபேதி, நேவ உபபஜ்ஜதி ந ந உபபஜ்ஜதீதி ந உபேதி.

‘‘யாய வேத³னாய ததா²க³தம் பஞ்ஞாபயமானோ பஞ்ஞாபேய்ய ஸா வேத³னா ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. வேத³னாஸங்க²யவிமுத்தோ கோ², வச்ச², ததா²க³தோ க³ம்பீ⁴ரோ அப்பமேய்யோ து³ப்பரியோகா³ள்ஹோ – ஸேய்யதா²பி மஹாஸமுத்³தோ³. உபபஜ்ஜதீதி ந உபேதி, ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந உபேதி, நேவ உபபஜ்ஜதி ந ந உபபஜ்ஜதீதி ந உபேதி.

‘‘யாய ஸஞ்ஞாய ததா²க³தம் பஞ்ஞாபயமானோ பஞ்ஞாபேய்ய ஸா ஸஞ்ஞா ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. ஸஞ்ஞாஸங்க²யவிமுத்தோ கோ², வச்ச², ததா²க³தோ க³ம்பீ⁴ரோ அப்பமேய்யோ து³ப்பரியோகா³ள்ஹோ – ஸேய்யதா²பி மஹாஸமுத்³தோ³. உபபஜ்ஜதீதி ந உபேதி, ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந உபேதி, நேவ உபபஜ்ஜதி ந ந உபபஜ்ஜதீதி ந உபேதி.

‘‘யேஹி ஸங்கா²ரேஹி ததா²க³தம் பஞ்ஞாபயமானோ பஞ்ஞாபேய்ய தே ஸங்கா²ரா ததா²க³தஸ்ஸ பஹீனா உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. ஸங்கா²ரஸங்க²யவிமுத்தோ கோ², வச்ச², ததா²க³தோ க³ம்பீ⁴ரோ அப்பமேய்யோ து³ப்பரியோகா³ள்ஹோ – ஸேய்யதா²பி மஹாஸமுத்³தோ³. உபபஜ்ஜதீதி ந உபேதி, ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந உபேதி, நேவ உபபஜ்ஜதி ந ந உபபஜ்ஜதீதி ந உபேதி.

‘‘யேன விஞ்ஞாணேன ததா²க³தம் பஞ்ஞாபயமானோ பஞ்ஞாபேய்ய தம் விஞ்ஞாணம் ததா²க³தஸ்ஸ பஹீனம் உச்சி²ன்னமூலம் தாலாவத்து²கதம் அனபா⁴வம்கதம் ஆயதிம் அனுப்பாத³த⁴ம்மம். விஞ்ஞாணஸங்க²யவிமுத்தோ கோ², வச்ச², ததா²க³தோ க³ம்பீ⁴ரோ அப்பமேய்யோ து³ப்பரியோகா³ள்ஹோ – ஸேய்யதா²பி மஹாஸமுத்³தோ³. உபபஜ்ஜதீதி ந உபேதி, ந உபபஜ்ஜதீதி ந உபேதி, உபபஜ்ஜதி ச ந ச உபபஜ்ஜதீதி ந உபேதி, நேவ உபபஜ்ஜதி ந ந உபபஜ்ஜதீதி ந உபேதி’’.

ஏவம் வுத்தே, வச்ச²கோ³த்தோ பரிப்³பா³ஜகோ ப⁴க³வந்தம் ஏதத³வோச – ‘‘ஸேய்யதா²பி, போ⁴ கோ³தம, கா³மஸ்ஸ வா நிக³மஸ்ஸ வா அவிதூ³ரே மஹாஸாலருக்கோ². தஸ்ஸ அனிச்சதா ஸாகா²பலாஸா பலுஜ்ஜேய்யும் [ஸாகா²பலாஸம் பலுஜ்ஜேய்ய], தசபபடிகா பலுஜ்ஜேய்யும், பே²க்³கூ³ பலுஜ்ஜேய்யும் [பே²க்³கு³ பலுஜ்ஜேய்ய (ஸீ. ஸ்யா. கம். பீ.)]; ஸோ அபரேன ஸமயேன அபக³தஸாகா²பலாஸோ அபக³ததசபபடிகோ அபக³தபே²க்³கு³கோ ஸுத்³தோ⁴ அஸ்ஸ, ஸாரே பதிட்டி²தோ; ஏவமேவ போ⁴தோ கோ³தமஸ்ஸ பாவசனம் அபக³தஸாகா²பலாஸம் அபக³ததசபபடிகம் அபக³தபே²க்³கு³கம் ஸுத்³த⁴ம், ஸாரே பதிட்டி²தம். அபி⁴க்கந்தம், போ⁴ கோ³தம…பே… உபாஸகம் மம் ப⁴வம் கோ³தமோ தா⁴ரேது அஜ்ஜதக்³கே³ பாணுபேதம் ஸரணம் க³த’’ந்தி.

அக்³கி³வச்ச²ஸுத்தம் நிட்டி²தம் து³தியம்.