4. சூளவேத³ல்லஸுத்தம்

460. ஏவம் மே ஸுதம் – ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² விஸாகோ² உபாஸகோ யேன த⁴ம்மதி³ன்னா பி⁴க்கு²னீ தேனுபஸங்கமி; உபஸங்கமித்வா த⁴ம்மதி³ன்னம் பி⁴க்கு²னிம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² விஸாகோ² உபாஸகோ த⁴ம்மதி³ன்னம் பி⁴க்கு²னிம் ஏதத³வோச – ‘‘‘ஸக்காயோ ஸக்காயோ’தி, அய்யே, வுச்சதி. கதமோ நு கோ², அய்யே, ஸக்காயோ வுத்தோ ப⁴க³வதா’’தி? ‘‘பஞ்ச கோ² இமே, ஆவுஸோ விஸாக², உபாதா³னக்க²ந்தா⁴ ஸக்காயோ வுத்தோ ப⁴க³வதா, ஸேய்யதி²த³ம் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴. இமே கோ², ஆவுஸோ விஸாக², பஞ்சுபாதா³னக்க²ந்தா⁴ ஸக்காயோ வுத்தோ ப⁴க³வதா’’தி.

‘‘ஸாத⁴ய்யே’’தி கோ² விஸாகோ² உபாஸகோ த⁴ம்மதி³ன்னாய பி⁴க்கு²னியா பா⁴ஸிதம் அபி⁴னந்தி³த்வா அனுமோதி³த்வா த⁴ம்மதி³ன்னம் பி⁴க்கு²னிம் உத்தரிம் பஞ்ஹம் அபுச்சி² – ‘‘‘ஸக்காயஸமுத³யோ ஸக்காயஸமுத³யோ’தி, அய்யே, வுச்சதி. கதமோ நு கோ², அய்யே, ஸக்காயஸமுத³யோ வுத்தோ ப⁴க³வதா’’தி? ‘‘யாயம், ஆவுஸோ விஸாக², தண்ஹா போனோப்³ப⁴விகா நந்தீ³ராக³ஸஹக³தா தத்ரதத்ராபி⁴னந்தி³னீ, ஸேய்யதி²த³ம் – காமதண்ஹா ப⁴வதண்ஹா விப⁴வதண்ஹா; அயம் கோ², ஆவுஸோ விஸாக², ஸக்காயஸமுத³யோ வுத்தோ ப⁴க³வதா’’தி.

‘‘‘ஸக்காயனிரோதோ⁴ ஸக்காயனிரோதோ⁴’தி, அய்யே, வுச்சதி. கதமோ நு கோ², அய்யே, ஸக்காயனிரோதோ⁴ வுத்தோ ப⁴க³வதா’’தி?

‘‘யோ கோ², ஆவுஸோ விஸாக², தஸ்ஸாயேவ தண்ஹாய அஸேஸவிராக³னிரோதோ⁴ சாகோ³ படினிஸ்ஸக்³கோ³ முத்தி அனாலயோ; அயம் கோ², ஆவுஸோ விஸாக², ஸக்காயனிரோதோ⁴ வுத்தோ ப⁴க³வதா’’தி.

‘‘‘ஸக்காயனிரோத⁴கா³மினீ படிபதா³ ஸக்காயனிரோத⁴கா³மினீ படிபதா³’தி, அய்யே, வுச்சதி. கதமா நு கோ², அய்யே, ஸக்காயனிரோத⁴கா³மினீ படிபதா³ வுத்தா ப⁴க³வதா’’தி?

‘‘அயமேவ கோ², ஆவுஸோ விஸாக², அரியோ அட்ட²ங்கி³கோ மக்³கோ³ ஸக்காயனிரோத⁴கா³மினீ படிபதா³ வுத்தா ப⁴க³வதா, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதீ⁴’’தி.

‘‘தஞ்ஞேவ நு கோ², அய்யே, உபாதா³னம் தே [தேவ (ஸீ.)] பஞ்சுபாதா³னக்க²ந்தா⁴ உதா³ஹு அஞ்ஞத்ர பஞ்சஹுபாதா³னக்க²ந்தே⁴ஹி உபாதா³ன’’ந்தி? ‘‘ந கோ², ஆவுஸோ விஸாக², தஞ்ஞேவ உபாதா³னம் தே பஞ்சுபாதா³னக்க²ந்தா⁴, நாபி அஞ்ஞத்ர பஞ்சஹுபாதா³னக்க²ந்தே⁴ஹி உபாதா³னம். யோ கோ², ஆவுஸோ விஸாக², பஞ்சஸு உபாதா³னக்க²ந்தே⁴ஸு ச²ந்த³ராகோ³ தம் தத்த² உபாதா³ன’’ந்தி.

461. ‘‘கத²ம் பனாய்யே, ஸக்காயதி³ட்டி² ஹோதீ’’தி? ‘‘இதா⁴வுஸோ விஸாக², அஸ்ஸுதவா புது²ஜ்ஜனோ, அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ, ரூபம் அத்ததோ ஸமனுபஸ்ஸதி, ரூபவந்தம் வா அத்தானம், அத்தனி வா ரூபம், ரூபஸ்மிம் வா அத்தானம். வேத³னம்…பே… ஸஞ்ஞம்… ஸங்கா²ரே… விஞ்ஞாணம் அத்ததோ ஸமனுபஸ்ஸதி, விஞ்ஞாணவந்தம் வா அத்தானம், அத்தனி வா விஞ்ஞாணம், விஞ்ஞாணஸ்மிம் வா அத்தானம். ஏவம் கோ², ஆவுஸோ விஸாக², ஸக்காயதி³ட்டி² ஹோதீ’’தி.

‘‘கத²ம் பனாய்யே, ஸக்காயதி³ட்டி² ந ஹோதீ’’தி?

‘‘இதா⁴வுஸோ விஸாக², ஸுதவா அரியஸாவகோ, அரியானம் த³ஸ்ஸாவீ அரியத⁴ம்மஸ்ஸ கோவிதோ³ அரியத⁴ம்மே ஸுவினீதோ, ஸப்புரிஸானம் த³ஸ்ஸாவீ ஸப்புரிஸத⁴ம்மஸ்ஸ கோவிதோ³ ஸப்புரிஸத⁴ம்மே ஸுவினீதோ, ந ரூபம் அத்ததோ ஸமனுபஸ்ஸதி, ந ரூபவந்தம் வா அத்தானம், ந அத்தனி வா ரூபம், ந ரூபஸ்மிம் வா அத்தானம். ந வேத³னம்…பே… ந ஸஞ்ஞம்… ந ஸங்கா²ரே…பே… ந விஞ்ஞாணம் அத்ததோ ஸமனுபஸ்ஸதி, ந விஞ்ஞாணவந்தம் வா அத்தானம், ந அத்தனி வா விஞ்ஞாணம், ந விஞ்ஞாணஸ்மிம் வா அத்தானம். ஏவம் கோ², ஆவுஸோ விஸாக², ஸக்காயதி³ட்டி² ந ஹோதீ’’தி.

462. ‘‘கதமோ பனாய்யே, அரியோ அட்ட²ங்கி³கோ மக்³கோ³’’தி?

‘‘அயமேவ கோ², ஆவுஸோ விஸாக², அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதீ⁴’’தி. ‘‘அரியோ பனாய்யே, அட்ட²ங்கி³கோ மக்³கோ³ ஸங்க²தோ உதா³ஹு அஸங்க²தோ’’தி?

‘‘அரியோ கோ², ஆவுஸோ விஸாக², அட்ட²ங்கி³கோ மக்³கோ³ ஸங்க²தோ’’தி.

‘‘அரியேன நு கோ², அய்யே, அட்ட²ங்கி³கேன மக்³கே³ன தயோ க²ந்தா⁴ ஸங்க³ஹிதா உதா³ஹு தீஹி க²ந்தே⁴ஹி அரியோ அட்ட²ங்கி³கோ மக்³கோ³ ஸங்க³ஹிதோ’’தி?

‘‘ந கோ², ஆவுஸோ விஸாக², அரியேன அட்ட²ங்கி³கேன மக்³கே³ன தயோ க²ந்தா⁴ ஸங்க³ஹிதா; தீஹி ச கோ², ஆவுஸோ விஸாக², க²ந்தே⁴ஹி அரியோ அட்ட²ங்கி³கோ மக்³கோ³ ஸங்க³ஹிதோ. யா சாவுஸோ விஸாக², ஸம்மாவாசா யோ ச ஸம்மாகம்மந்தோ யோ ச ஸம்மாஆஜீவோ இமே த⁴ம்மா ஸீலக்க²ந்தே⁴ ஸங்க³ஹிதா. யோ ச ஸம்மாவாயாமோ யா ச ஸம்மாஸதி யோ ச ஸம்மாஸமாதி⁴ இமே த⁴ம்மா ஸமாதி⁴க்க²ந்தே⁴ ஸங்க³ஹிதா. யா ச ஸம்மாதி³ட்டி² யோ ச ஸம்மாஸங்கப்போ, இமே த⁴ம்மா பஞ்ஞாக்க²ந்தே⁴ ஸங்க³ஹிதா’’தி.

‘‘கதமோ பனாய்யே, ஸமாதி⁴, கதமே த⁴ம்மா ஸமாதி⁴னிமித்தா, கதமே த⁴ம்மா ஸமாதி⁴பரிக்கா²ரா, கதமா ஸமாதி⁴பா⁴வனா’’தி?

‘‘யா கோ², ஆவுஸோ விஸாக², சித்தஸ்ஸ ஏகக்³க³தா அயம் ஸமாதி⁴; சத்தாரோ ஸதிபட்டா²னா ஸமாதி⁴னிமித்தா; சத்தாரோ ஸம்மப்பதா⁴னா ஸமாதி⁴பரிக்கா²ரா. யா தேஸம்யேவ த⁴ம்மானம் ஆஸேவனா பா⁴வனா ப³ஹுலீகம்மம், அயம் ஏத்த² ஸமாதி⁴பா⁴வனா’’தி.

463. ‘‘கதி பனாய்யே, ஸங்கா²ரா’’தி?

‘‘தயோமே, ஆவுஸோ விஸாக², ஸங்கா²ரா – காயஸங்கா²ரோ, வசீஸங்கா²ரோ, சித்தஸங்கா²ரோ’’தி.

‘‘கதமோ பனாய்யே, காயஸங்கா²ரோ, கதமோ வசீஸங்கா²ரோ, கதமோ சித்தஸங்கா²ரோ’’தி?

‘‘அஸ்ஸாஸபஸ்ஸாஸா கோ², ஆவுஸோ விஸாக², காயஸங்கா²ரோ, விதக்கவிசாரா வசீஸங்கா²ரோ, ஸஞ்ஞா ச வேத³னா ச சித்தஸங்கா²ரோ’’தி.

‘‘கஸ்மா பனாய்யே, அஸ்ஸாஸபஸ்ஸாஸா காயஸங்கா²ரோ, கஸ்மா விதக்கவிசாரா வசீஸங்கா²ரோ, கஸ்மா ஸஞ்ஞா ச வேத³னா ச சித்தஸங்கா²ரோ’’தி?

‘‘அஸ்ஸாஸபஸ்ஸாஸா கோ², ஆவுஸோ விஸாக², காயிகா ஏதே த⁴ம்மா காயப்படிப³த்³தா⁴, தஸ்மா அஸ்ஸாஸபஸ்ஸாஸா காயஸங்கா²ரோ. புப்³பே³ கோ², ஆவுஸோ விஸாக², விதக்கேத்வா விசாரேத்வா பச்சா² வாசம் பி⁴ந்த³தி, தஸ்மா விதக்கவிசாரா வசீஸங்கா²ரோ. ஸஞ்ஞா ச வேத³னா ச சேதஸிகா ஏதே த⁴ம்மா சித்தப்படிப³த்³தா⁴, தஸ்மா ஸஞ்ஞா ச வேத³னா ச சித்தஸங்கா²ரோ’’தி.

464. ‘‘கத²ம் பனாய்யே, ஸஞ்ஞாவேத³யிதனிரோத⁴ஸமாபத்தி ஹோதீ’’தி?

‘‘ந கோ², ஆவுஸோ விஸாக², ஸஞ்ஞாவேத³யிதனிரோத⁴ம் ஸமாபஜ்ஜந்தஸ்ஸ பி⁴க்கு²னோ ஏவம் ஹோதி – ‘அஹம் ஸஞ்ஞாவேத³யிதனிரோத⁴ம் ஸமாபஜ்ஜிஸ்ஸ’ந்தி வா, ‘அஹம் ஸஞ்ஞாவேத³யிதனிரோத⁴ம் ஸமாபஜ்ஜாமீ’தி வா, ‘அஹம் ஸஞ்ஞாவேத³யிதனிரோத⁴ம் ஸமாபன்னோ’தி வா. அத² க்²வாஸ்ஸ புப்³பே³வ ததா² சித்தம் பா⁴விதம் ஹோதி யம் தம் தத²த்தாய உபனேதீ’’தி.

‘‘ஸஞ்ஞாவேத³யிதனிரோத⁴ம் ஸமாபஜ்ஜந்தஸ்ஸ பனாய்யே, பி⁴க்கு²னோ கதமே த⁴ம்மா பட²மம் நிருஜ்ஜ²ந்தி – யதி³ வா காயஸங்கா²ரோ, யதி³ வா வசீஸங்கா²ரோ, யதி³ வா சித்தஸங்கா²ரோ’’தி? ‘‘ஸஞ்ஞாவேத³யிதனிரோத⁴ம் ஸமாபஜ்ஜந்தஸ்ஸ கோ², ஆவுஸோ விஸாக², பி⁴க்கு²னோ பட²மம் நிருஜ்ஜ²தி வசீஸங்கா²ரோ, ததோ காயஸங்கா²ரோ, ததோ சித்தஸங்கா²ரோ’’தி.

‘‘கத²ம் பனாய்யே, ஸஞ்ஞாவேத³யிதனிரோத⁴ஸமாபத்தியா வுட்டா²னம் ஹோதீ’’தி?

‘‘ந கோ², ஆவுஸோ விஸாக², ஸஞ்ஞாவேத³யிதனிரோத⁴ஸமாபத்தியா வுட்ட²ஹந்தஸ்ஸ பி⁴க்கு²னோ ஏவம் ஹோதி – ‘அஹம் ஸஞ்ஞாவேத³யிதனிரோத⁴ஸமாபத்தியா வுட்ட²ஹிஸ்ஸ’ந்தி வா, ‘அஹம் ஸஞ்ஞாவேத³யிதனிரோத⁴ஸமாபத்தியா வுட்ட²ஹாமீ’தி வா, ‘அஹம் ஸஞ்ஞாவேத³யிதனிரோத⁴ஸமாபத்தியா வுட்டி²தோ’தி வா. அத² க்²வாஸ்ஸ புப்³பே³வ ததா² சித்தம் பா⁴விதம் ஹோதி யம் தம் தத²த்தாய உபனேதீ’’தி.

‘‘ஸஞ்ஞாவேத³யிதனிரோத⁴ஸமாபத்தியா வுட்ட²ஹந்தஸ்ஸ பனாய்யே, பி⁴க்கு²னோ கதமே த⁴ம்மா பட²மம் உப்பஜ்ஜந்தி – யதி³ வா காயஸங்கா²ரோ, யதி³ வா வசீஸங்கா²ரோ, யதி³ வா சித்தஸங்கா²ரோ’’தி? ‘‘ஸஞ்ஞாவேத³யிதனிரோத⁴ஸமாபத்தியா வுட்ட²ஹந்தஸ்ஸ கோ², ஆவுஸோ விஸாக², பி⁴க்கு²னோ பட²மம் உப்பஜ்ஜதி சித்தஸங்கா²ரோ, ததோ காயஸங்கா²ரோ, ததோ வசீஸங்கா²ரோ’’தி.

‘‘ஸஞ்ஞாவேத³யிதனிரோத⁴ஸமாபத்தியா வுட்டி²தம் பனாய்யே, பி⁴க்கு²ம் கதி ப²ஸ்ஸா பு²ஸந்தீ’’தி? ‘‘ஸஞ்ஞாவேத³யிதனிரோத⁴ஸமாபத்தியா வுட்டி²தம் கோ², ஆவுஸோ விஸாக², பி⁴க்கு²ம் தயோ ப²ஸ்ஸா பு²ஸந்தி – ஸுஞ்ஞதோ ப²ஸ்ஸோ, அனிமித்தோ ப²ஸ்ஸோ, அப்பணிஹிதோ ப²ஸ்ஸோ’’தி.

‘‘ஸஞ்ஞாவேத³யிதனிரோத⁴ஸமாபத்தியா வுட்டி²தஸ்ஸ பனாய்யே, பி⁴க்கு²னோ கிம்னின்னம் சித்தம் ஹோதி கிம்போணம் கிம்பப்³பா⁴ர’’ந்தி? ‘‘ஸஞ்ஞாவேத³யிதனிரோத⁴ஸமாபத்தியா வுட்டி²தஸ்ஸ கோ², ஆவுஸோ விஸாக², பி⁴க்கு²னோ விவேகனின்னம் சித்தம் ஹோதி, விவேகபோணம் விவேகபப்³பா⁴ர’’ந்தி.

465. ‘‘கதி பனாய்யே, வேத³னா’’தி?

‘‘திஸ்ஸோ கோ² இமா, ஆவுஸோ விஸாக², வேத³னா – ஸுகா² வேத³னா, து³க்கா² வேத³னா, அது³க்க²மஸுகா² வேத³னா’’தி.

‘‘கதமா பனாய்யே, ஸுகா² வேத³னா, கதமா து³க்கா² வேத³னா, கதமா அது³க்க²மஸுகா² வேத³னா’’தி?

‘‘யம் கோ², ஆவுஸோ விஸாக², காயிகம் வா சேதஸிகம் வா ஸுக²ம் ஸாதம் வேத³யிதம் – அயம் ஸுகா² வேத³னா. யம் கோ², ஆவுஸோ விஸாக², காயிகம் வா சேதஸிகம் வா து³க்க²ம் அஸாதம் வேத³யிதம் – அயம் து³க்கா² வேத³னா. யம் கோ², ஆவுஸோ விஸாக², காயிகம் வா சேதஸிகம் வா நேவ ஸாதம் நாஸாதம் வேத³யிதம் – அயம் அது³க்க²மஸுகா² வேத³னா’’தி.

‘‘ஸுகா² பனாய்யே, வேத³னா கிம்ஸுகா² கிம்து³க்கா², து³க்கா² வேத³னா கிம்ஸுகா² கிம்து³க்கா², அது³க்க²மஸுகா² வேத³னா கிம்ஸுகா² கிம்து³க்கா²’’தி?

‘‘ஸுகா² கோ², ஆவுஸோ விஸாக², வேத³னா டி²திஸுகா² விபரிணாமது³க்கா²; து³க்கா² வேத³னா டி²திது³க்கா² விபரிணாமஸுகா²; அது³க்க²மஸுகா² வேத³னா ஞாணஸுகா² அஞ்ஞாணது³க்கா²’’தி.

‘‘ஸுகா²ய பனாய்யே, வேத³னாய கிம் அனுஸயோ அனுஸேதி, து³க்கா²ய வேத³னாய கிம் அனுஸயோ அனுஸேதி, அது³க்க²மஸுகா²ய வேத³னாய கிம் அனுஸயோ அனுஸேதீ’’தி?

‘‘ஸுகா²ய கோ², ஆவுஸோ விஸாக², வேத³னாய ராகா³னுஸயோ அனுஸேதி, து³க்கா²ய வேத³னாய படிகா⁴னுஸயோ அனுஸேதி, அது³க்க²மஸுகா²ய வேத³னாய அவிஜ்ஜானுஸயோ அனுஸேதீ’’தி.

‘‘ஸப்³பா³ய நு கோ², அய்யே, ஸுகா²ய வேத³னாய ராகா³னுஸயோ அனுஸேதி, ஸப்³பா³ய து³க்கா²ய வேத³னாய படிகா⁴னுஸயோ அனுஸேதி, ஸப்³பா³ய அது³க்க²மஸுகா²ய வேத³னாய அவிஜ்ஜானுஸயோ அனுஸேதீ’’தி?

‘‘ந கோ², ஆவுஸோ விஸாக², ஸப்³பா³ய ஸுகா²ய வேத³னாய ராகா³னுஸயோ அனுஸேதி, ந ஸப்³பா³ய து³க்கா²ய வேத³னாய படிகா⁴னுஸயோ அனுஸேதி, ந ஸப்³பா³ய அது³க்க²மஸுகா²ய வேத³னாய அவிஜ்ஜானுஸயோ அனுஸேதீ’’தி.

‘‘ஸுகா²ய பனாய்யே, வேத³னாய கிம் பஹாதப்³ப³ம், து³க்கா²ய வேத³னாய கிம் பஹாதப்³ப³ம், அது³க்க²மஸுகா²ய வேத³னாய கிம் பஹாதப்³ப³’’ந்தி?

‘‘ஸுகா²ய கோ², ஆவுஸோ விஸாக², வேத³னாய ராகா³னுஸயோ பஹாதப்³போ³, து³க்கா²ய வேத³னாய படிகா⁴னுஸயோ பஹாதப்³போ³, அது³க்க²மஸுகா²ய வேத³னாய அவிஜ்ஜானுஸயோ பஹாதப்³போ³’’தி.

‘‘ஸப்³பா³ய நு கோ², அய்யே, ஸுகா²ய வேத³னாய ராகா³னுஸயோ பஹாதப்³போ³, ஸப்³பா³ய து³க்கா²ய வேத³னாய படிகா⁴னுஸயோ பஹாதப்³போ³, ஸப்³பா³ய அது³க்க²மஸுகா²ய வேத³னாய அவிஜ்ஜானுஸயோ பஹாதப்³போ³’’தி?

‘‘ந கோ², ஆவுஸோ விஸாக², ஸப்³பா³ய ஸுகா²ய வேத³னாய ராகா³னுஸயோ பஹாதப்³போ³, ந ஸப்³பா³ய து³க்கா²ய வேத³னாய படிகா⁴னுஸயோ பஹாதப்³போ³, ந ஸப்³பா³ய அது³க்க²மஸுகா²ய வேத³னாய அவிஜ்ஜானுஸயோ பஹாதப்³போ³. இதா⁴வுஸோ விஸாக², பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. ராக³ம் தேன பஜஹதி, ந தத்த² ராகா³னுஸயோ அனுஸேதி. இதா⁴வுஸோ விஸாக², பி⁴க்கு² இதி படிஸஞ்சிக்க²தி – ‘குதா³ஸ்ஸு நாமாஹம் ததா³யதனம் உபஸம்பஜ்ஜ விஹரிஸ்ஸாமி யத³ரியா ஏதரஹி ஆயதனம் உபஸம்பஜ்ஜ விஹரந்தீ’தி? இதி அனுத்தரேஸு விமோக்கே²ஸு பிஹம் உபட்டா²பயதோ உப்பஜ்ஜதி பிஹாப்பச்சயா தோ³மனஸ்ஸம். படிக⁴ம் தேன பஜஹதி, ந தத்த² படிகா⁴னுஸயோ அனுஸேதி. இதா⁴வுஸோ விஸாக², பி⁴க்கு² ஸுக²ஸ்ஸ ச பஹானா, து³க்க²ஸ்ஸ ச பஹானா, புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா, அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி. அவிஜ்ஜம் தேன பஜஹதி, ந தத்த² அவிஜ்ஜானுஸயோ அனுஸேதீ’’தி.

466. ‘‘ஸுகா²ய பனாய்யே, வேத³னாய கிம் படிபா⁴கோ³’’தி?

‘‘ஸுகா²ய கோ², ஆவுஸோ விஸாக², வேத³னாய து³க்கா² வேத³னா படிபா⁴கோ³’’தி.

‘‘து³க்கா²ய பன்னாய்யே, வேத³னாய கிம் படிபா⁴கோ³’’தி?

‘‘து³க்கா²ய கோ², ஆவுஸோ விஸாக², வேத³னாய ஸுகா² வேத³னா படிபா⁴கோ³’’தி.

‘‘அது³க்க²மஸுகா²ய பனாய்யே, வேத³னாய கிம் படிபா⁴கோ³’’தி?

‘‘அது³க்க²மஸுகா²ய கோ², ஆவுஸோ விஸாக², வேத³னாய அவிஜ்ஜா படிபா⁴கோ³’’தி.

‘‘அவிஜ்ஜாய பனாய்யே, கிம் படிபா⁴கோ³’’தி?

‘‘அவிஜ்ஜாய கோ², ஆவுஸோ விஸாக², விஜ்ஜா படிபா⁴கோ³’’தி.

‘‘விஜ்ஜாய பனாய்யே, கிம் படிபா⁴கோ³’’தி?

‘‘விஜ்ஜாய கோ², ஆவுஸோ விஸாக², விமுத்தி படிபா⁴கோ³’’தி.

‘‘விமுத்தியா பனாய்யே, கிம் படிபா⁴கோ³’’தி?

‘‘விமுத்தியா கோ², ஆவுஸோ விஸாக², நிப்³பா³னம் படிபா⁴கோ³’’தி.

‘‘நிப்³பா³னஸ்ஸ பனாய்யே, கிம் படிபா⁴கோ³’’தி? ‘‘அச்சயாஸி, ஆவுஸோ [அச்சஸராவுஸோ (ஸீ. பீ.), அச்சஸ்ஸராவுஸோ (ஸ்யா. கம்.)] விஸாக², பஞ்ஹம், நாஸக்கி² பஞ்ஹானம் பரியந்தம் க³ஹேதும். நிப்³பா³னோக³த⁴ஞ்ஹி, ஆவுஸோ விஸாக², ப்³ரஹ்மசரியம், நிப்³பா³னபராயனம் நிப்³பா³னபரியோஸானம். ஆகங்க²மானோ ச த்வம், ஆவுஸோ விஸாக², ப⁴க³வந்தம் உபஸங்கமித்வா ஏதமத்த²ம் புச்சே²ய்யாஸி, யதா² ச தே ப⁴க³வா ப்³யாகரோதி ததா² நம் தா⁴ரேய்யாஸீ’’தி.

467. அத² கோ² விஸாகோ² உபாஸகோ த⁴ம்மதி³ன்னாய பி⁴க்கு²னியா பா⁴ஸிதம் அபி⁴னந்தி³த்வா அனுமோதி³த்வா உட்டா²யாஸனா த⁴ம்மதி³ன்னம் பி⁴க்கு²னிம் அபி⁴வாதே³த்வா பத³க்கி²ணம் கத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² விஸாகோ² உபாஸகோ யாவதகோ அஹோஸி த⁴ம்மதி³ன்னாய பி⁴க்கு²னியா ஸத்³தி⁴ம் கதா²ஸல்லாபோ தம் ஸப்³ப³ம் ப⁴க³வதோ ஆரோசேஸி. ஏவம் வுத்தே, ப⁴க³வா விஸாக²ம் உபாஸகம் ஏதத³வோச – ‘‘பண்டி³தா, விஸாக², த⁴ம்மதி³ன்னா பி⁴க்கு²னீ, மஹாபஞ்ஞா, விஸாக², த⁴ம்மதி³ன்னா பி⁴க்கு²னீ. மம் சேபி த்வம், விஸாக², ஏதமத்த²ம் புச்சே²ய்யாஸி, அஹம்பி தம் ஏவமேவம் ப்³யாகரேய்யம், யதா² தம் த⁴ம்மதி³ன்னாய பி⁴க்கு²னியா ப்³யாகதம். ஏஸோ சேவேதஸ்ஸ [ஏஸோவேதஸ்ஸ (ஸ்யா. கம்.)] அத்தோ². ஏவஞ்ச நம் [ஏவமேதம் (ஸீ. ஸ்யா. கம்.)] தா⁴ரேஹீ’’தி.

இத³மவோச ப⁴க³வா. அத்தமனோ விஸாகோ² உபாஸகோ ப⁴க³வதோ பா⁴ஸிதம் அபி⁴னந்தீ³தி.

சூளவேத³ல்லஸுத்தம் நிட்டி²தம் சதுத்த²ம்.