8. ஸுந்த³ரீஸுத்தம்

38. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ப⁴க³வா ஸக்கதோ ஹோதி க³ருகதோ மானிதோ பூஜிதோ அபசிதோ லாபீ⁴ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானம். பி⁴க்கு²ஸங்கோ⁴பி ஸக்கதோ ஹோதி க³ருகதோ மானிதோ பூஜிதோ அபசிதோ லாபீ⁴ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானம். அஞ்ஞதித்தி²யா பன பரிப்³பா³ஜகா அஸக்கதா ஹோந்தி அக³ருகதா அமானிதா அபூஜிதா அனபசிதா ந லாபி⁴னோ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானம்.

அத² கோ² தே அஞ்ஞதித்தி²யா பரிப்³பா³ஜகா ப⁴க³வதோ ஸக்காரம் அஸஹமானா பி⁴க்கு²ஸங்க⁴ஸ்ஸ ச யேன ஸுந்த³ரீ பரிப்³பா³ஜிகா தேனுபஸங்கமிம்ஸு; உபஸங்கமித்வா ஸுந்த³ரிம் பரிப்³பா³ஜிகம் ஏதத³வோசும் – ‘‘உஸ்ஸஹஸி த்வம், ப⁴கி³னி, ஞாதீனம் அத்த²ம் காது’’ந்தி? ‘‘க்யாஹம், அய்யா, கரோமி? கிம் மயா ந ஸக்கா [கிம் மயா ஸக்கா (ஸ்யா. பீ.)] காதும்? ஜீவிதம்பி மே பரிச்சத்தம் ஞாதீனம் அத்தா²யா’’தி.

‘‘தேன ஹி, ப⁴கி³னி, அபி⁴க்க²ணம் ஜேதவனம் க³ச்சா²ஹீ’’தி. ‘‘ஏவம், அய்யா’’தி கோ² ஸுந்த³ரீ பரிப்³பா³ஜிகா தேஸம் அஞ்ஞதித்தி²யானம் பரிப்³பா³ஜகானம் படிஸ்ஸுத்வா அபி⁴க்க²ணம் ஜேதவனம் அக³மாஸி.

யதா³ தே அஞ்ஞிம்ஸு அஞ்ஞதித்தி²யா பரிப்³பா³ஜகா – ‘‘வோதி³ட்டா² கோ² ஸுந்த³ரீ பரிப்³பா³ஜிகா ப³ஹுஜனேன அபி⁴க்க²ணம் ஜேதவனம் க³ச்ச²தீ’’தி [க³ச்ச²தீதி (ஸீ. ஸ்யா. கம். பீ.)]. அத² நம் ஜீவிதா வோரோபேத்வா தத்தே²வ ஜேதவனஸ்ஸ பரிகா²கூபே நிக்கி²பித்வா [நிக²னித்வா (ஸீ. ஸ்யா. பீ.)] யேன ராஜா பஸேனதி³ கோஸலோ தேனுபஸங்கமிம்ஸு; உபஸங்கமித்வா ராஜானம் பஸேனதி³ம் கோஸலம் ஏதத³வோசும் – ‘‘யா ஸா, மஹாராஜ, ஸுந்த³ரீ பரிப்³பா³ஜிகா; ஸா நோ ந தி³ஸ்ஸதீ’’தி. ‘‘கத்த² பன தும்ஹே ஆஸங்கதா²’’தி? ‘‘ஜேதவனே, மஹாராஜா’’தி. ‘‘தேன ஹி ஜேதவனம் விசினதா²’’தி.

அத² கோ² தே அஞ்ஞதித்தி²யா பரிப்³பா³ஜகா ஜேதவனம் விசினித்வா யதா²னிக்கி²த்தம் பரிகா²கூபா உத்³த⁴ரித்வா மஞ்சகம் ஆரோபேத்வா ஸாவத்தி²ம் பவேஸேத்வா ரதி²யாய ரதி²யம் ஸிங்கா⁴டகேன ஸிங்கா⁴டகம் உபஸங்கமித்வா மனுஸ்ஸே உஜ்ஜா²பேஸும் –

‘‘பஸ்ஸதா²ய்யா ஸமணானம் ஸக்யபுத்தியானம் கம்மம்! அலஜ்ஜினோ இமே ஸமணா ஸக்யபுத்தியா து³ஸ்ஸீலா பாபத⁴ம்மா முஸாவாதி³னோ அப்³ரஹ்மசாரினோ. இமே ஹி நாம த⁴ம்மசாரினோ ஸமசாரினோ ப்³ரஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா படிஜானிஸ்ஸந்தி! நத்தி² இமேஸம் ஸாமஞ்ஞம், நத்தி² இமேஸம் ப்³ரஹ்மஞ்ஞம். நட்ட²ம் இமேஸம் ஸாமஞ்ஞம், நட்ட²ம் இமேஸம் ப்³ரஹ்மஞ்ஞம். குதோ இமேஸம் ஸாமஞ்ஞம், குதோ இமேஸம் ப்³ரஹ்மஞ்ஞம்? அபக³தா இமே ஸாமஞ்ஞா, அபக³தா இமே ப்³ரஹ்மஞ்ஞா. கத²ஞ்ஹி நாம புரிஸோ புரிஸகிச்சம் கரித்வா இத்தி²ம் ஜீவிதா வோரோபேஸ்ஸதீ’’தி!

தேன கோ² பன ஸமயேன ஸாவத்தி²யம் மனுஸ்ஸா பி⁴க்கூ² தி³ஸ்வா அஸப்³பா⁴ஹி ப²ருஸாஹி வாசாஹி அக்கோஸந்தி பரிபா⁴ஸந்தி ரோஸந்தி விஹேஸந்தி –

‘‘அலஜ்ஜினோ இமே ஸமணா ஸக்யபுத்தியா து³ஸ்ஸீலா பாபத⁴ம்மா முஸாவாதி³னோ அப்³ரஹ்மசாரினோ. இமே ஹி நாம த⁴ம்மசாரினோ ஸமசாரினோ ப்³ரஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா படிஜானிஸ்ஸந்தி! நத்தி² இமேஸம் ஸாமஞ்ஞம், நத்தி² இமேஸம் ப்³ரஹ்மஞ்ஞம். நட்ட²ம் இமேஸம் ஸாமஞ்ஞம், நட்ட²ம் இமேஸம் ப்³ரஹ்மஞ்ஞம். குதோ இமேஸம் ஸாமஞ்ஞம், குதோ இமேஸம் ப்³ரஹ்மஞ்ஞம்? அபக³தா இமே ஸாமஞ்ஞா, அபக³தா இமே ப்³ரஹ்மஞ்ஞா. கத²ஞ்ஹி நாம புரிஸோ புரிஸகிச்சம் கரித்வா இத்தி²ம் ஜீவிதா வோரோபேஸ்ஸதீ’’தி!

அத² கோ² ஸம்ப³ஹுலா பி⁴க்கூ² புப்³ப³ண்ஹஸமயம் நிவாஸேத்வா பத்தசீவரமாதா³ய ஸாவத்தி²ம் பிண்டா³ய பாவிஸிம்ஸு. ஸாவத்தி²யம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் –

‘‘ஏதரஹி, ப⁴ந்தே, ஸாவத்தி²யம் மனுஸ்ஸா பி⁴க்கூ² தி³ஸ்வா அஸப்³பா⁴ஹி ப²ருஸாஹி வாசாஹி அக்கோஸந்தி பரிபா⁴ஸந்தி ரோஸந்தி விஹேஸந்தி – ‘அலஜ்ஜினோ இமே ஸமணா ஸக்யபுத்தியா து³ஸ்ஸீலா பாபத⁴ம்மா முஸாவாதி³னோ அப்³ரஹ்மசாரினோ. இமே ஹி நாம த⁴ம்மசாரினோ ஸமசாரினோ ப்³ரஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா படிஜானிஸ்ஸந்தி. நத்தி² இமேஸம் ஸாமஞ்ஞம், நத்தி² இமேஸம் ப்³ரஹ்மஞ்ஞம். நட்ட²ம் இமேஸம் ஸாமஞ்ஞம், நட்ட²ம் இமேஸம் ப்³ரஹ்மஞ்ஞம். குதோ இமேஸம் ஸாமஞ்ஞம், குதோ இமேஸம் ப்³ரஹ்மஞ்ஞம்? அபக³தா இமே ஸாமஞ்ஞா, அபக³தா இமே ப்³ரஹ்மஞ்ஞா. கத²ஞ்ஹி நாம புரிஸோ புரிஸகிச்சம் கரித்வா இத்தி²ம் ஜீவிதா வோரோபேஸ்ஸதீ’’’தி!

‘‘நேஸோ, பி⁴க்க²வே, ஸத்³தோ³ சிரம் ப⁴விஸ்ஸதி ஸத்தாஹமேவ ப⁴விஸ்ஸதி. ஸத்தாஹஸ்ஸ அச்சயேன அந்தரதா⁴யிஸ்ஸதி. தேன ஹி, பி⁴க்க²வே, யே மனுஸ்ஸா பி⁴க்கூ² தி³ஸ்வா அஸப்³பா⁴ஹி ப²ருஸாஹி வாசாஹி அக்கோஸந்தி பரிபா⁴ஸந்தி ரோஸந்தி விஹேஸந்தி, தே தும்ஹே இமாய கா³தா²ய படிசோதே³த² –

‘‘‘அபூ⁴தவாதீ³ நிரயம் உபேதி,

யோ வாபி [யோ சாபி (ஸீ. பீ. க.)] கத்வா ந கரோமி சாஹ;

உபோ⁴பி தே பேச்ச ஸமா ப⁴வந்தி,

நிஹீனகம்மா மனுஜா பரத்தா²’’’தி.

அத² கோ² தே பி⁴க்கூ² ப⁴க³வதோ ஸந்திகே இமம் கா³த²ம் பரியாபுணித்வா யே மனுஸ்ஸா பி⁴க்கூ² தி³ஸ்வா அஸப்³பா⁴ஹி ப²ருஸாஹி வாசாஹி அக்கோஸந்தி பரிபா⁴ஸந்தி ரோஸந்தி விஹேஸந்தி தே இமாய கா³தா²ய படிசோதே³ந்தி –

‘‘அபூ⁴தவாதீ³ நிரயம் உபேதி,

யோ வாபி கத்வா ந கரோமிசாஹ;

உபோ⁴பி தே பேச்ச ஸமா ப⁴வந்தி,

நிஹீனகம்மா மனுஜா பரத்தா²’’தி.

மனுஸ்ஸானம் ஏதத³ஹோஸி – ‘‘அகாரகா இமே ஸமணா ஸக்யபுத்தியா. நயிமேஹி கதம். ஸபந்திமே ஸமணா ஸக்யபுத்தியா’’தி. நேவ ஸோ ஸத்³தோ³ சிரம் அஹோஸி. ஸத்தாஹமேவ அஹோஸி. ஸத்தாஹஸ்ஸ அச்சயேன அந்தரதா⁴யி.

அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வதோ ஏதத³வோசும் –

‘‘அச்ச²ரியம், ப⁴ந்தே, அப்³பு⁴தம், ப⁴ந்தே! யாவ ஸுபா⁴ஸிதம் சித³ம் ப⁴ந்தே ப⁴க³வதா – ‘நேஸோ, பி⁴க்க²வே, ஸத்³தோ³ சிரம் ப⁴விஸ்ஸதி. ஸத்தாஹமேவ ப⁴விஸ்ஸதி. ஸத்தாஹஸ்ஸ அச்சயேன அந்தரதா⁴யிஸ்ஸதீ’தி. அந்தரஹிதோ ஸோ, ப⁴ந்தே, ஸத்³தோ³’’தி.

அத² கோ² ப⁴க³வா ஏதமத்த²ம் விதி³த்வா தாயம் வேலாயம் இமம் உதா³னம் உதா³னேஸி –

‘‘துத³ந்தி வாசாய ஜனா அஸஞ்ஞதா,

ஸரேஹி ஸங்கா³மக³தம்வ குஞ்ஜரம்;

ஸுத்வான வாக்யம் ப²ருஸம் உதீ³ரிதம்,

அதி⁴வாஸயே பி⁴க்கு² அது³ட்ட²சித்தோ’’தி. அட்ட²மம்;