8. ஸதிபட்டா²னகதா²

34. ஸாவத்தி²னிதா³னம். ‘‘சத்தாரோமே, பி⁴க்க²வே, ஸதிபட்டா²னா. கதமே சத்தாரோ? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். வேத³னாஸு…பே… சித்தே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். இமே கோ², பி⁴க்க²வே, சத்தாரோ ஸதிபட்டா²னா’’தி.

35. [க] கத²ம் காயே காயானுபஸ்ஸீ விஹரதி? இதே⁴கச்சோ பத²வீகாயம் அனிச்சதோ அனுபஸ்ஸதி, நோ நிச்சதோ; து³க்க²தோ அனுபஸ்ஸதி, நோ ஸுக²தோ; அனத்ததோ அனுபஸ்ஸதி, நோ அத்ததோ; நிப்³பி³ந்த³தி, நோ நந்த³தி; விரஜ்ஜதி, நோ ரஜ்ஜதி; நிரோதே⁴தி, நோ ஸமுதே³தி, படினிஸ்ஸஜ்ஜதி, நோ ஆதி³யதி. அனிச்சதோ அனுபஸ்ஸந்தோ நிச்சஸஞ்ஞம் பஜஹதி, து³க்க²தோ அனுபஸ்ஸந்தோ ஸுக²ஸஞ்ஞம் பஜஹதி, அனத்ததோ அனுபஸ்ஸந்தோ அத்தஸஞ்ஞம் பஜஹதி, நிப்³பி³ந்த³ந்தோ நந்தி³ம் பஜஹதி, விரஜ்ஜந்தோ ராக³ம் பஜஹதி, நிரோதே⁴ந்தோ ஸமுத³யம் பஜஹதி, படினிஸ்ஸஜ்ஜந்தோ ஆதா³னம் பஜஹதி. இமேஹி ஸத்தஹி ஆகாரேஹி காயம் அனுபஸ்ஸதி. காயோ உபட்டா²னம், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தம் காயம் அனுபஸ்ஸதி. தேன வுச்சதி – ‘‘காயே காயானுபஸ்ஸனாஸதிபட்டா²னா’’.

பா⁴வனாதி சதஸ்ஸோ பா⁴வனா – தத்த² ஜாதானம் த⁴ம்மானம் அனதிவத்தனட்டே²ன பா⁴வனா, இந்த்³ரியானம் ஏகரஸட்டே²ன பா⁴வனா, தது³பக³வீரியவாஹனட்டே²ன பா⁴வனா, ஆஸேவனட்டே²ன பா⁴வனா.

இதே⁴கச்சோ ஆபோகாயம்…பே… தேஜோகாயம்… வாயோகாயம்… கேஸகாயம்… லோமகாயம்… ச²விகாயம்… சம்மகாயம்… மம்ஸகாயம்… ருதி⁴ரகாயம்… ந்ஹாருகாயம் [நஹாருகாயம் (ஸ்யா.)] … அட்டி²காயம்… அட்டி²மிஞ்ஜகாயம் அனிச்சதோ அனுபஸ்ஸதி, நோ நிச்சதோ; து³க்க²தோ அனுபஸ்ஸதி, நோ ஸுக²தோ; அனத்ததோ அனுபஸ்ஸதி, நோ அத்ததோ; நிப்³பி³ந்த³தி, நோ நந்த³தி; விரஜ்ஜதி, நோ ரஜ்ஜதி, நிரோதே⁴தி, நோ ஸமுதே³தி; படினிஸ்ஸஜ்ஜதி, நோ ஆதி³யதி. அனிச்சதோ அனுபஸ்ஸந்தோ நிச்சஸஞ்ஞம் பஜஹதி, து³க்க²தோ அனுபஸ்ஸந்தோ ஸுக²ஸஞ்ஞம் பஜஹதி, அனத்ததோ அனுபஸ்ஸந்தோ அத்தஸஞ்ஞம் பஜஹதி, நிப்³பி³ந்த³ந்தோ நந்தி³ம் பஜஹதி, விரஜ்ஜந்தோ ராக³ம் பஜஹதி, நிரோதே⁴ந்தோ ஸமுத³யம் பஜஹதி, படினிஸ்ஸஜ்ஜந்தோ ஆதா³னம் பஜஹதி. இமேஹி ஸத்தஹி ஆகாரேஹி காயம் அனுபஸ்ஸதி. காயோ உபட்டா²னம், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தம் காயம் அனுபஸ்ஸதி. தேன வுச்சதி – ‘‘காயே காயானுபஸ்ஸனாஸதிபட்டா²னா’’.

பா⁴வனாதி சதஸ்ஸோ பா⁴வனா – தத்த² ஜாதானம் த⁴ம்மானம் அனதிவத்தனட்டே²ன பா⁴வனா, இந்த்³ரியானம் ஏகரஸட்டே²ன பா⁴வனா, தது³பக³வீரியவாஹனட்டே²ன பா⁴வனா, ஆஸேவனட்டே²ன பா⁴வனா. ஏவம் காயே காயானுபஸ்ஸீ விஹரதி.

[க²] கத²ம் வேத³னாஸு வேத³னானுபஸ்ஸீ விஹரதி? இதே⁴கச்சோ ஸுக²ம் வேத³னம் அனிச்சதோ அனுபஸ்ஸதி, நோ நிச்சதோ…பே… படினிஸ்ஸஜ்ஜதி, நோ ஆதி³யதி. அனிச்சதோ அனுபஸ்ஸந்தோ நிச்சஸஞ்ஞம் பஜஹதி…பே… படினிஸ்ஸஜ்ஜந்தோ ஆதா³னம் பஜஹதி. இமேஹி ஸத்தஹி ஆகாரேஹி வேத³னம் அனுபஸ்ஸதி. வேத³னா உபட்டா²னம், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தம் வேத³னம் அனுபஸ்ஸதி. தேன வுச்சதி – ‘‘வேத³னாஸு வேத³னானுபஸ்ஸனாஸதிபட்டா²னா’’.

பா⁴வனாதி சதஸ்ஸோ பா⁴வனா…பே… ஆஸேவனட்டே²ன பா⁴வனா…பே… இதே⁴கச்சோ து³க்க²ம் வேத³னம்…பே… அது³க்க²மஸுக²ம் வேத³னம்… ஸாமிஸம் ஸுக²ம் வேத³னம்… நிராமிஸம் ஸுக²ம் வேத³னம்… ஸாமிஸம் து³க்க²ம் வேத³னம்… நிராமிஸம் து³க்க²ம் வேத³னம்… ஸாமிஸம் அது³க்க²மஸுக²ம் வேத³னம்… நிராமிஸம் அது³க்க²மஸுக²ம் வேத³னம்… சக்கு²ஸம்ப²ஸ்ஸஜம் வேத³னம்… ஸோதஸம்ப²ஸ்ஸஜம் வேத³னம்… கா⁴னஸம்ப²ஸ்ஸஜம் வேத³னம்… ஜிவ்ஹாஸம்ப²ஸ்ஸஜம் வேத³னம்… காயஸம்ப²ஸ்ஸஜம் வேத³னம்… மனோஸம்ப²ஸ்ஸஜம் வேத³னம் அனிச்சதோ அனுபஸ்ஸதி, நோ நிச்சதோ…பே… படினிஸ்ஸஜ்ஜதி, நோ ஆதி³யதி. அனிச்சதோ அனுபஸ்ஸந்தோ நிச்சஸஞ்ஞம் பஜஹதி…பே… படினிஸ்ஸஜ்ஜந்தோ ஆதா³னம் பஜஹதி. இமேஹி ஸத்தஹி ஆகாரேஹி வேத³னம் அனுபஸ்ஸதி. வேத³னா உபட்டா²னம், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தம் வேத³னம் அனுபஸ்ஸதி. தேன வுச்சதி – ‘‘வேத³னாஸு வேத³னானுபஸ்ஸனாஸதிபட்டா²னா’’.

பா⁴வனாதி சதஸ்ஸோ பா⁴வனா…பே… ஏவம் வேத³னாஸு வேத³னானுபஸ்ஸீ விஹரதி.

[க³] கத²ம் சித்தே சித்தானுபஸ்ஸீ விஹரதி? இதே⁴கச்சோ ஸராக³ம் சித்தம் அனிச்சதோ அனுபஸ்ஸதி, நோ நிச்சதோ…பே… படினிஸ்ஸஜ்ஜதி, நோ ஆதி³யதி. அனிச்சதோ அனுபஸ்ஸந்தோ நிச்சஸஞ்ஞம் பஜஹதி…பே… படினிஸ்ஸஜ்ஜந்தோ ஆதா³னம் பஜஹதி. இமேஹி ஸத்தஹி ஆகாரேஹி சித்தம் அனுபஸ்ஸதி. சித்தம் உபட்டா²னம், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தம் சித்தம் அனுபஸ்ஸதி. தேன வுச்சதி – ‘‘சித்தே சித்தானுபஸ்ஸனாஸதிபட்டா²னா’’.

பா⁴வனாதி சதஸ்ஸோ பா⁴வனா…பே… ஆஸேவனட்டே²ன பா⁴வனா.

இதே⁴கச்சோ வீதராக³ம் சித்தம்…பே… ஸதோ³ஸம் சித்தம்… வீததோ³ஸம் சித்தம்… ஸமோஹம் சித்தம்… வீதமோஹம் சித்தம்… ஸம்கி²த்தம் சித்தம்… விக்கி²த்தம் சித்தம்… மஹக்³க³தம் சித்தம்… அமஹக்³க³தம் சித்தம்… ஸஉத்தரம் சித்தம்… அனுத்தரம் சித்தம்… ஸமாஹிதம் சித்தம்… அஸமாஹிதம் சித்தம்… விமுத்தம் சித்தம்… அவிமுத்தம் சித்தம்… சக்கு²விஞ்ஞாணம்… ஸோதவிஞ்ஞாணம்… கா⁴னவிஞ்ஞாணம்… ஜிவ்ஹாவிஞ்ஞாணம்… காயவிஞ்ஞாணம்… மனோவிஞ்ஞாணம் அனிச்சதோ அனுபஸ்ஸதி, நோ நிச்சதோ…பே… படினிஸ்ஸஜ்ஜதி, நோ ஆதி³யதி. அனிச்சதோ அனுபஸ்ஸந்தோ நிச்சஸஞ்ஞம் பஜஹதி…பே… படினிஸ்ஸஜ்ஜந்தோ ஆதா³னம் பஜஹதி. இமேஹி ஸத்தஹி ஆகாரேஹி சித்தம் அனுபஸ்ஸதி. சித்தம் உபட்டா²னம், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தம் சித்தம் அனுபஸ்ஸதி. தேன வுச்சதி – ‘‘சித்தே சித்தானுபஸ்ஸனாஸதிபட்டா²னா’’.

பா⁴வனாதி சதஸ்ஸோ பா⁴வனா…பே… ஆஸேவனட்டே²ன பா⁴வனா. ஏவம் சித்தே சித்தானுபஸ்ஸீ விஹரதி.

[க⁴] கத²ம் த⁴ம்மேஸு த⁴ம்மானுபஸ்ஸீ விஹரதி? இதே⁴கச்சோ ட²பேத்வா காயம் ட²பேத்வா வேத³னம் ட²பேத்வா சித்தம் தத³வஸேஸே த⁴ம்மே அனிச்சதோ அனுபஸ்ஸதி, நோ நிச்சதோ; து³க்க²தோ அனுபஸ்ஸதி, நோ ஸுக²தோ; அனத்ததோ அனுபஸ்ஸதி, நோ அத்ததோ; நிப்³பி³ந்த³தி, நோ நந்த³தி; விரஜ்ஜதி, நோ ரஜ்ஜதி; நிரோதே⁴தி, நோ ஸமுதே³தி; படினிஸ்ஸஜ்ஜதி, நோ ஆதி³யதி. அனிச்சதோ அனுபஸ்ஸந்தோ நிச்சஸஞ்ஞம் பஜஹதி, து³க்க²தோ அனுபஸ்ஸந்தோ ஸுக²ஸஞ்ஞம் பஜஹதி, அனத்ததோ அனுபஸ்ஸந்தோ அத்தஸஞ்ஞம் பஜஹதி, நிப்³பி³ந்த³ந்தோ நந்தி³ம் பஜஹதி, விரஜ்ஜந்தோ ராக³ம் பஜஹதி, நிரோதே⁴ந்தோ ஸமுத³யம் பஜஹதி, படினிஸ்ஸஜ்ஜந்தோ ஆதா³னம் பஜஹதி. இமேஹி ஸத்தஹி ஆகாரேஹி தே த⁴ம்மே அனுபஸ்ஸதி. த⁴ம்மா உபட்டா²னம், நோ ஸதி. ஸதி உபட்டா²னஞ்சேவ ஸதி ச. தாய ஸதியா தேன ஞாணேன தே த⁴ம்மே அனுபஸ்ஸதி. தேன வுச்சதி – ‘‘த⁴ம்மேஸு த⁴ம்மானுபஸ்ஸனாஸதிபட்டா²னா’’.

பா⁴வனாதி சதஸ்ஸோ பா⁴வனா – தத்த² ஜாதானம் த⁴ம்மானம் அனதிவத்தனட்டே²ன பா⁴வனா, இந்த்³ரியானம் ஏகரஸட்டே²ன பா⁴வனா, தது³பக³வீரியவாஹனட்டே²ன பா⁴வனா, ஆஸேவனட்டே²ன பா⁴வனா. ஏவம் த⁴ம்மேஸு த⁴ம்மானுபஸ்ஸீ விஹரதீதி.

ஸதிபட்டா²னகதா² நிட்டி²தா.