10. மாதிகாகதா²

40. நிச்சா²தோ [நிச்சா²தோ முச்சதீதி (ஸ்யா.)], மோக்கோ² விமோக்கோ², விஜ்ஜாவிமுத்தி, அதி⁴ஸீலம், அதி⁴சித்தம், அதி⁴பஞ்ஞா, பஸ்ஸத்³தி⁴, ஞாணம், த³ஸ்ஸனம் விஸுத்³தி⁴ [ஸுத்³தி⁴ (ஸ்யா.)] நேக்க²ம்மம், நிஸ்ஸரணம் பவிவேகோ, வோஸ்ஸக்³கோ³, சரியா, ஜா²னவிமோக்கோ², பா⁴வனா, அதி⁴ட்டா²னம், ஜீவிதம்.

41. நிச்சா²தோதி நேக்க²ம்மேன காமச்ச²ந்த³தோ நிச்சா²தோ, அப்³யாபாதே³ன ப்³யாபாத³தோ நிச்சா²தோ…பே… பட²மேன ஜா²னேன நீவரணேஹி நிச்சா²தோ…பே… அரஹத்தமக்³கே³ன ஸப்³ப³கிலேஸேஹி நிச்சா²தோ.

மோக்கோ² விமோக்கோ²தி நேக்க²ம்மேன காமச்ச²ந்த³தோ முச்சதீதி – மோக்கோ² விமோக்கோ². அப்³யாபாதே³ன ப்³யாபாத³தோ முச்சதீதி – மோக்கோ² விமோக்கோ²…பே… பட²மேன ஜா²னேன நீவரணேஹி முச்சதீதி – மோக்கோ² விமோக்கோ²…பே… அரஹத்தமக்³கே³ன ஸப்³ப³கிலேஸேஹி முச்சதீதி – மோக்கோ² விமோக்கோ².

விஜ்ஜாவிமுத்தீதி நேக்க²ம்மம் விஜ்ஜதீதி விஜ்ஜா, காமச்ச²ந்த³தோ முச்சதீதி விமுத்தி. விஜ்ஜந்தோ முச்சதி, முச்சந்தோ விஜ்ஜதீதி – விஜ்ஜாவிமுத்தி. அப்³யாபாதோ³ [அப்³யாபாத³ம் (ஸ்யா.)] விஜ்ஜதீதி விஜ்ஜா, ப்³யாபாத³தோ விமுச்சதீதி விமுத்தி. விஜ்ஜந்தோ முச்சதி, முச்சந்தோ விஜ்ஜதீதி – விஜ்ஜாவிமுத்தி…பே… அரஹத்தமக்³கோ³ விஜ்ஜதீதி விஜ்ஜா, ஸப்³ப³கிலேஸேஹி முச்சதீதி விமுத்தி. விஜ்ஜந்தோ முச்சதி, முச்சந்தோ விஜ்ஜதீதி – விஜ்ஜாவிமுத்தி.

அதி⁴ஸீலம் அதி⁴சித்தம் அதி⁴பஞ்ஞாதி நேக்க²ம்மேன காமச்ச²ந்த³ம், ஸம்வரட்டே²ன ஸீலவிஸுத்³தி⁴, அவிக்கே²பட்டே²ன சித்தவிஸுத்³தி⁴, த³ஸ்ஸனட்டே²ன தி³ட்டி²விஸுத்³தி⁴. யோ தத்த² ஸம்வரட்டோ², அயம் அதி⁴ஸீலஸிக்கா². யோ தத்த² அவிக்கே²பட்டோ², அயம் அதி⁴சித்தஸிக்கா². யோ தத்த² த³ஸ்ஸனட்டோ², அயம் அதி⁴பஞ்ஞாஸிக்கா². அப்³யாபாதே³ன ப்³யாபாத³ம் ஸம்வரட்டே²ன ஸீலவிஸுத்³தி⁴…பே… அரஹத்தமக்³கே³ன ஸப்³ப³கிலேஸே ஸம்வரட்டே²ன ஸீலவிஸுத்³தி⁴, அவிக்கே²பட்டே²ன சித்தவிஸுத்³தி⁴. த³ஸ்ஸனட்டே²ன தி³ட்டி²விஸுத்³தி⁴. யோ தத்த² ஸம்வரட்டோ², அயம் அதி⁴ஸீலஸிக்கா². யோ தத்த² அவிக்கே²பட்டோ², அயம் அதி⁴சித்தஸிக்கா². யோ தத்த² த³ஸ்ஸனட்டோ², அயம் அதி⁴பஞ்ஞாஸிக்கா².

பஸ்ஸத்³தீ⁴தி நேக்க²ம்மேன காமச்ச²ந்த³ம் படிப்பஸ்ஸம்பே⁴தி, அப்³யாபாதே³ன ப்³யாபாத³ம் படிப்பஸ்ஸம்பே⁴தி…பே… அரஹத்தமக்³கே³ன ஸப்³ப³கிலேஸே படிப்பஸ்ஸம்பே⁴தி.

ஞாணந்தி காமச்ச²ந்த³ஸ்ஸ பஹீனத்தா நேக்க²ம்மம் ஞாதட்டே²ன ஞாணம்; ப்³யாபாத³ஸ்ஸ பஹீனத்தா அப்³யாபாதோ³ ஞாதட்டே²ன ஞாணம்…பே… ஸப்³ப³கிலேஸானம் பஹீனத்தா அரஹத்தமக்³கோ³ ஞாதட்டே²ன ஞாணம்.

த³ஸ்ஸனந்தி காமச்ச²ந்த³ஸ்ஸ பஹீனத்தா நேக்க²ம்மம் தி³ட்ட²த்தா த³ஸ்ஸனம். ப்³யாபாத³ஸ்ஸ பஹீனத்தா அப்³யாபாதோ³ தி³ட்ட²த்தா த³ஸ்ஸனம்…பே… ஸப்³ப³கிலேஸானம் பஹீனத்தா அரஹத்தமக்³கோ³ தி³ட்ட²த்தா த³ஸ்ஸனம்.

விஸுத்³தீ⁴தி காமச்ச²ந்த³ம் பஜஹந்தோ நேக்க²ம்மேன விஸுஜ்ஜ²தி. ப்³யாபாத³ம் பஜஹந்தோ அப்³யாபாதே³ன விஸுஜ்ஜ²தி…பே… ஸப்³ப³கிலேஸே பஜஹந்தோ அரஹத்தமக்³கே³ன விஸுஜ்ஜ²தி.

நேக்க²ம்மந்தி காமானமேதம் நிஸ்ஸரணம், யதி³த³ம் நேக்க²ம்மம். ரூபானமேதம் நிஸ்ஸரணம், யதி³த³ம் ஆருப்பம். யம் கோ² பன கிஞ்சி பூ⁴தம் ஸங்க²தம் படிச்சஸமுப்பன்னம், நிரோதோ⁴ தஸ்ஸ நேக்க²ம்மம். ப்³யாபாத³ஸ்ஸ அப்³யாபாதோ³ நேக்க²ம்மம். தி²னமித்³த⁴ஸ்ஸ ஆலோகஸஞ்ஞா நேக்க²ம்மம்…பே… ஸப்³ப³கிலேஸானம் அரஹத்தமக்³கோ³ நேக்க²ம்மம்.

நிஸ்ஸரணந்தி காமானமேதம் நிஸ்ஸரணம், யதி³த³ம் நேக்க²ம்மம். ரூபானமேதம் நிஸ்ஸரணம், யதி³த³ம் ஆருப்பம். யம் கோ² பன கிஞ்சி பூ⁴தம் ஸங்க²தம் படிச்சஸமுப்பன்னம், நிரோதோ⁴ தஸ்ஸ நிஸ்ஸரணம். காமச்ச²ந்த³ஸ்ஸ நேக்க²ம்மம் நிஸ்ஸரணம். ப்³யாபாத³ஸ்ஸ அப்³யாபாதோ³ நிஸ்ஸரணம்…பே… ஸப்³ப³கிலேஸானம் அரஹத்தமக்³கோ³ நிஸ்ஸரணம்.

பவிவேகோதி காமச்ச²ந்த³ஸ்ஸ நேக்க²ம்மம் பவிவேகோ …பே… ஸப்³ப³கிலேஸானம் அரஹத்தமக்³கோ³ பவிவேகோ.

வோஸ்ஸக்³கோ³தி நேக்க²ம்மேன காமச்ச²ந்த³ம் வோஸ்ஸஜ்ஜதீதி – வோஸ்ஸக்³கோ³. அப்³யாபாதே³ன ப்³யாபாத³ம் வோஸ்ஸஜ்ஜதீதி – வோஸ்ஸக்³கோ³…பே… அரஹத்தமக்³கே³ன ஸப்³ப³கிலேஸே வோஸ்ஸஜ்ஜதீதி – வோஸ்ஸக்³கோ³.

சரியாதி காமச்ச²ந்த³ம் பஜஹந்தோ நேக்க²ம்மேன சரதி. ப்³யாபாத³ம் பஜஹந்தோ அப்³யாபாதே³ன சரதி…பே… ஸப்³ப³கிலேஸே பஜஹந்தோ அரஹத்தமக்³கே³ன சரதி.

ஜா²னவிமோக்கோ²தி நேக்க²ம்மம் ஜா²யதீதி – ஜா²னம். காமச்ச²ந்த³ம் ஜா²பேதீதி – ஜா²னம். ஜா²யந்தோ முச்சதீதி – ஜா²னவிமோக்கோ². ஜா²பேந்தோ முச்சதீதி – ஜா²னவிமோக்கோ². ஜா²யந்தீதி த⁴ம்மா. ஜா²பேந்தீதி கிலேஸே. ஜா²தே ச ஜா²பே ச ஜானாதீதி – ஜா²னஜா²யீ [ஜா²னவிமோக்கோ² (ஸ்யா.) அட்ட²கதா² ஓலோகேதப்³பா³]. அப்³யாபாதோ³ ஜா²யதீதி ஜா²னம். ப்³யாபாத³ம் ஜா²பேதீதி – ஜா²னம்…பே… ஆலோகஸஞ்ஞா ஜா²யதீதி – ஜா²னம். தி²னமித்³த⁴ம் ஜா²பேதீதி – ஜா²னம்…பே… அரஹத்தமக்³கோ³ ஜா²யதீதி – ஜா²னம். ஸப்³ப³கிலேஸே ஜா²பேதீதி – ஜா²னம். ஜா²யந்தோ முச்சதீதி – ஜா²னவிமோக்கோ². ஜா²பேந்தோ முச்சதீதி – ஜா²னவிமோக்கோ². ஜா²யந்தீதி – த⁴ம்மா. ஜா²பேந்தீதி – கிலேஸே. ஜா²தே ச ஜா²பே ச ஜானாதீதி – ஜா²னஜா²யீ.

42. பா⁴வனா அதி⁴ட்டா²னம் ஜீவிதந்தி காமச்ச²ந்த³ம் பஜஹந்தோ நேக்க²ம்மம் பா⁴வேதீதி – பா⁴வனாஸம்பன்னோ. நேக்க²ம்மவஸேன சித்தம் அதி⁴ட்டா²தீதி – அதி⁴ட்டா²னஸம்பன்னோ. ஸ்வாயம் ஏவம் பா⁴வனாஸம்பன்னோ அதி⁴ட்டா²னஸம்பன்னோ ஸமம் ஜீவதி, நோ விஸமம்; ஸம்மா ஜீவதி, நோ மிச்சா²; விஸுத்³த⁴ம் ஜீவதி, நோ கிலிட்ட²ந்தி – ஆஜீவஸம்பன்னோ. ஸ்வாயம் ஏவம் பா⁴வனாஸம்பன்னோ அதி⁴ட்டா²னஸம்பன்னோ ஆஜீவஸம்பன்னோ யஞ்ஞதே³வ பரிஸம் உபஸங்கமதி – யதி³ க²த்தியபரிஸம் யதி³ ப்³ராஹ்மணபரிஸம் யதி³ க³ஹபதிபரிஸம் யதி³ ஸமணபரிஸம் – விஸாரதோ³ உபஸங்கமதி அமங்குபூ⁴தோ. தம் கிஸ்ஸ ஹேது? ததா² ஹி ஸோ பா⁴வனாஸம்பன்னோ அதி⁴ட்டா²னஸம்பன்னோ ஆஜீவஸம்பன்னோ.

ப்³யாபாத³ம் பஜஹந்தோ அப்³யாபாத³ம் பா⁴வேதீதி – பா⁴வனாஸம்பன்னோ…பே… தி²னமித்³த⁴ம் பஜஹந்தோ ஆலோகஸஞ்ஞம் பா⁴வேதீதி – பா⁴வனாஸம்பன்னோ…பே… உத்³த⁴ச்சம் பஜஹந்தோ அவிக்கே²பம் பா⁴வேதீதி – பா⁴வனாஸம்பன்னோ…பே… விசிகிச்ச²ம் பஜஹந்தோ த⁴ம்மவவத்தா²னம் பா⁴வேதீதி – பா⁴வனாஸம்பன்னோ…பே… அவிஜ்ஜம் பஜஹந்தோ விஜ்ஜம் பா⁴வேதீதி – பா⁴வனாஸம்பன்னோ…பே… அரதிம் பஜஹந்தோ பாமோஜ்ஜம் பா⁴வேதீதி – பா⁴வனாஸம்பன்னோ…பே… நீவரணே பஜஹந்தோ பட²மம் ஜா²னம் பா⁴வேதீதி – பா⁴வனாஸம்பன்னோ…பே… ஸப்³ப³கிலேஸே பஜஹந்தோ அரஹத்தமக்³க³ம் பா⁴வேதீதி – பா⁴வனாஸம்பன்னோ. அரஹத்தமக்³க³வஸேன சித்தம் அதி⁴ட்டா²தீதி – அதி⁴ட்டா²னஸம்பன்னோ. ஸ்வாயம் ஏவம் பா⁴வனாஸம்பன்னோ அதி⁴ட்டா²னஸம்பன்னோ ஸமம் ஜீவதி, நோ விஸமம்; ஸம்மா ஜீவதி, நோ மிச்சா²; விஸுத்³த⁴ம் ஜீவதி, நோ கிலிட்ட²ந்தி – ஆஜீவஸம்பன்னோ. ஸ்வாயம் ஏவம் பா⁴வனாஸம்பன்னோ அதி⁴ட்டா²னஸம்பன்னோ ஆஜீவஸம்பன்னோ யஞ்ஞதே³வ பரிஸம் உபஸங்கமதி – யதி³ க²த்தியபரிஸம் யதி³ ப்³ராஹ்மணபரிஸம் யதி³ க³ஹபதிபரிஸம் யதி³ ஸமணபரிஸம் – விஸாரதோ³ உபஸங்கமதி அமங்குபூ⁴தோ. தம் கிஸ்ஸ ஹேது? ததா² ஹி ஸோ பா⁴வனாஸம்பன்னோ அதி⁴ட்டா²னஸம்பன்னோ ஆஜீவஸம்பன்னோதி.

மாதிகாகதா² நிட்டி²தா.

பஞ்ஞாவக்³கோ³ ததியோ.