2. ஸதிபட்டா²னவாரோ

41. ‘‘‘அயம் காயே காயானுபஸ்ஸனா’தி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³…பே… ஆலோகோ உத³பாதி³. ஸா கோ² பனாயம் காயே காயானுபஸ்ஸனா பா⁴வேதப்³பா³தி மே, பி⁴க்க²வே,…பே… பா⁴விதாதி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³…பே… ஆலோகோ உத³பாதி³’’.

‘‘அயம் வேத³னாஸு…பே… அயம் சித்தே… அயம் த⁴ம்மேஸு த⁴ம்மானுபஸ்ஸனாதி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³…பே… ஆலோகோ உத³பாதி³. ஸா கோ² பனாயம் த⁴ம்மேஸு த⁴ம்மானுபஸ்ஸனா பா⁴வேதப்³பா³தி மே, பி⁴க்க²வே…பே… பா⁴விதாதி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³…பே… ஆலோகோ உத³பாதி³’’.

அயம் காயே காயானுபஸ்ஸனாதி புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³…பே… ஆலோகோ உத³பாதி³…பே… ஸா கோ² பனாயம் காயே காயானுபஸ்ஸனா பா⁴வேதப்³பா³தி…பே… பா⁴விதாதி புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³…பே… ஆலோகோ உத³பாதி³.

சக்கு²ம் உத³பாதீ³தி – கேனட்டே²ன…பே… ஆலோகோ உத³பாதீ³தி – கேனட்டே²ன? சக்கு²ம் உத³பாதீ³தி – த³ஸ்ஸனட்டே²ன…பே… ஆலோகோ உத³பாதீ³தி – ஓபா⁴ஸட்டே²ன.

சக்கு²ம் த⁴ம்மோ, த³ஸ்ஸனட்டோ² அத்தோ²…பே… ஆலோகோ த⁴ம்மோ, ஓபா⁴ஸட்டோ² அத்தோ². இமே பஞ்ச த⁴ம்மா பஞ்ச அத்தா² காயவத்து²கா ஸதிபட்டா²னவத்து²கா…பே… வேத³னாவத்து²கா ஸதிபட்டா²னவத்து²கா… சித்தவத்து²கா ஸதிபட்டா²னவத்து²கா… த⁴ம்மவத்து²கா ஸதிபட்டா²னவத்து²கா ஸதிபட்டா²னாரம்மணா ஸதிபட்டா²னகோ³சரா ஸதிபட்டா²னஸங்க³ஹிதா ஸதிபட்டா²னபரியாபன்னா ஸதிபட்டா²னே ஸமுதா³க³தா ஸதிபட்டா²னே டி²தா ஸதிபட்டா²னே பதிட்டி²தா.

த⁴ம்மசக்கந்தி கேனட்டே²ன த⁴ம்மசக்கம்? த⁴ம்மஞ்ச பவத்தேதி சக்கஞ்சாதி – த⁴ம்மசக்கம். சக்கஞ்ச பவத்தேதி த⁴ம்மஞ்சாதி – த⁴ம்மசக்கம். த⁴ம்மேன பவத்தேதீதி – த⁴ம்மசக்கம். த⁴ம்மசரியாய பவத்தேதீதி – த⁴ம்மசக்கம். த⁴ம்மே டி²தோ பவத்தேதீதி – த⁴ம்மசக்கம். த⁴ம்மே பதிட்டி²தோ பவத்தேதீதி – த⁴ம்மசக்கம் …பே… அமதோக³த⁴ம் நிப்³பா³னம் பரியோஸானட்டே²ன த⁴ம்மோ. தம் த⁴ம்மம் பவத்தேதீதி – த⁴ம்மசக்கம்.