1. இந்த்³ரியவாரோ

23. ஸப்³பே³ஸம் ஸத்தானம் பீளனம் வஜ்ஜேத்வா அபீளனாய, உபகா⁴தம் வஜ்ஜேத்வா அனுபகா⁴தேன, ஸந்தாபம் வஜ்ஜேத்வா அஸந்தாபேன, பரியாதா³னம் வஜ்ஜேத்வா அபரியாதா³னேன, விஹேஸம் வஜ்ஜேத்வா அவிஹேஸாய, ஸப்³பே³ ஸத்தா அவேரினோ ஹோந்து மா வேரினோ, ஸுகி²னோ ஹோந்து மா து³க்கி²னோ, ஸுகி²தத்தா ஹோந்து மா து³க்கி²தத்தாதி – இமேஹி அட்ட²ஹாகாரேஹி ஸப்³பே³ ஸத்தே மேத்தாயதீதி – மேத்தா. தம் த⁴ம்மம் சேதயதீதி – சேதோ. ஸப்³ப³ப்³யாபாத³பரியுட்டா²னேஹி விமுச்சதீதி – விமுத்தி. மேத்தா ச சேதோ ச விமுத்தி சாதி – மேத்தாசேதோவிமுத்தி.

ஸப்³பே³ ஸத்தா அவேரினோ ஹோந்து, கே²மினோ ஹோந்து, ஸுகி²னோ ஹோந்தூதி – ஸத்³தா⁴ய அதி⁴முச்சதி. ஸத்³தி⁴ந்த்³ரியபரிபா⁴விதா ஹோதி மேத்தாசேதோவிமுத்தி.

ஸப்³பே³ ஸத்தா அவேரினோ ஹோந்து, கே²மினோ ஹோந்து, ஸுகி²னோ ஹோந்தூதி – வீரியம் பக்³க³ண்ஹாதி. வீரியிந்த்³ரியபரிபா⁴விதா ஹோதி மேத்தாசேதோவிமுத்தி.

ஸப்³பே³ ஸத்தா அவேரினோ ஹோந்து, கே²மினோ ஹோந்து, ஸுகி²னோ ஹோந்தூதி – ஸதிம் உபட்டா²பேதி. ஸதிந்த்³ரியபரிபா⁴விதா ஹோதி மேத்தாசேதோவிமுத்தி.

ஸப்³பே³ ஸத்தா அவேரினோ ஹோந்து, கே²மினோ ஹோந்து, ஸுகி²னோ ஹோந்தூதி – சித்தம் ஸமாத³ஹதி. ஸமாதி⁴ந்த்³ரியபரிபா⁴விதா ஹோதி மேத்தாசேதோவிமுத்தி.

ஸப்³பே³ ஸத்தா அவேரினோ ஹோந்து, கே²மினோ ஹோந்து, ஸுகி²னோ ஹோந்தூதி – பஞ்ஞாய பஜானாதி. பஞ்ஞிந்த்³ரியபரிபா⁴விதா ஹோதி மேத்தாசேதோவிமுத்தி.

இமானி பஞ்சிந்த்³ரியானி மேத்தாய சேதோவிமுத்தியா ஆஸேவனா ஹோந்தி. இமேஹி பஞ்சஹி இந்த்³ரியேஹி மேத்தாசேதோவிமுத்தி ஆஸேவீயதி. இமானி பஞ்சிந்த்³ரியானி மேத்தாய சேதோவிமுத்தியா பா⁴வனா ஹோந்தி. இமேஹி பஞ்சஹி இந்த்³ரியேஹி மேத்தாசேதோவிமுத்தி பா⁴வீயதி. இமானி பஞ்சிந்த்³ரியானி மேத்தாய சேதோவிமுத்தியா ப³ஹுலீகதா ஹோந்தி. இமேஹி பஞ்சஹி இந்த்³ரியேஹி மேத்தாசேதோவிமுத்தி ப³ஹுலீகரீயதி. இமானி பஞ்சிந்த்³ரியானி மேத்தாய சேதோவிமுத்தியா அலங்காரா ஹோந்தி. இமேஹி பஞ்சஹி இந்த்³ரியேஹி மேத்தாசேதோவிமுத்தி ஸ்வாலங்கதா ஹோதி. இமானி பஞ்சிந்த்³ரியானி மேத்தாய சேதோவிமுத்தியா பரிக்கா²ரா ஹோந்தி. இமேஹி பஞ்சஹி இந்த்³ரியேஹி மேத்தாசேதோவிமுத்தி ஸுபரிக்க²தா ஹோதி. இமானி பஞ்சிந்த்³ரியானி மேத்தாய சேதோவிமுத்தியா பரிவாரா ஹோந்தி. இமேஹி பஞ்சஹி இந்த்³ரியேஹி மேத்தாசேதோவிமுத்தி ஸுபரிவுதா ஹோதி. இமானி பஞ்சிந்த்³ரியானி மேத்தாய சேதோவிமுத்தியா ஆஸேவனா ஹோந்தி, பா⁴வனா ஹோந்தி, ப³ஹுலீகதா ஹோந்தி, அலங்காரா ஹோந்தி, பரிக்கா²ரா ஹோந்தி, பரிவாரா ஹோந்தி, பாரிபூரீ ஹோந்தி, ஸஹக³தா ஹோந்தி, ஸஹஜாதா ஹோந்தி, ஸம்ஸட்டா² ஹோந்தி, ஸம்பயுத்தா ஹோந்தி, பக்க²ந்த³னா ஹோந்தி, பஸீத³னா [ஸம்ஸீத³னா (க. ஸீ. அட்ட².)] ஹோந்தி, ஸந்திட்ட²னா ஹோந்தி, விமுச்சனா ஹோந்தி, ‘‘ஏதம் ஸந்த’’ந்தி ப²ஸ்ஸனா ஹோந்தி, யானீகதா ஹோந்தி, வத்து²கதா ஹோந்தி, அனுட்டி²தா ஹோந்தி, பரிசிதா ஹோந்தி, ஸுஸமாரத்³தா⁴ ஹோந்தி, ஸுபா⁴விதா ஹோந்தி, ஸ்வாதி⁴ட்டி²தா ஹோந்தி, ஸுஸமுக்³க³தா ஹோந்தி, ஸுவிமுத்தா ஹோந்தி, நிப்³ப³த்தேந்தி ஜோதேந்தி பதாபேந்தி.