2. நித்³தே³ஸோ

48. கதமம் ஸுஞ்ஞஸுஞ்ஞம்? சக்கு² ஸுஞ்ஞம் அத்தேன வா அத்தனியேன வா நிச்சேன வா து⁴வேன வா ஸஸ்ஸதேன வா அவிபரிணாமத⁴ம்மேன வா. ஸோதம் ஸுஞ்ஞம்…பே… கா⁴னம் ஸுஞ்ஞம்… ஜிவ்ஹா ஸுஞ்ஞா… காயோ ஸுஞ்ஞோ… மனோ ஸுஞ்ஞோ அத்தேன வா அத்தனியேன வா நிச்சேன வா து⁴வேன வா ஸஸ்ஸதேன வா அவிபரிணாமத⁴ம்மேன வா. இத³ம் ஸுஞ்ஞஸுஞ்ஞம்.

கதமம் ஸங்கா²ரஸுஞ்ஞம்? தயோ ஸங்கா²ரா – புஞ்ஞாபி⁴ஸங்கா²ரோ, அபுஞ்ஞாபி⁴ஸங்கா²ரோ, ஆனேஞ்ஜாபி⁴ஸங்கா²ரோ. புஞ்ஞாபி⁴ஸங்கா²ரோ அபுஞ்ஞாபி⁴ஸங்கா²ரேன ச ஆனேஞ்ஜாபி⁴ஸங்கா²ரேன ச ஸுஞ்ஞோ. அபுஞ்ஞாபி⁴ஸங்கா²ரோ புஞ்ஞாபி⁴ஸங்கா²ரேன ச ஆனேஞ்ஜாபி⁴ஸங்கா²ரேன ச ஸுஞ்ஞோ. ஆனேஞ்ஜாபி⁴ஸங்கா²ரோ புஞ்ஞாபி⁴ஸங்கா²ரேன ச அபுஞ்ஞாபி⁴ஸங்கா²ரேன ச ஸுஞ்ஞோ. இமே தயோ ஸங்கா²ரா.

அபரேபி தயோ ஸங்கா²ரா – காயஸங்கா²ரோ, வசீஸங்கா²ரோ, சித்தஸங்கா²ரோ. காயஸங்கா²ரோ வசீஸங்கா²ரேன ச சித்தஸங்கா²ரேன ச ஸுஞ்ஞோ. வசீஸங்கா²ரோ காயஸங்கா²ரேன ச சித்தஸங்கா²ரேன ச ஸுஞ்ஞோ. சித்தஸங்கா²ரோ காயஸங்கா²ரேன ச வசீஸங்கா²ரேன ச ஸுஞ்ஞோ. இமே தயோ ஸங்கா²ரா.

அபரேபி தயோ ஸங்கா²ரா – அதீதா ஸங்கா²ரா, அனாக³தா ஸங்கா²ரா, பச்சுப்பன்னா ஸங்கா²ரா. அதீதா ஸங்கா²ரா அனாக³தேஹி ச பச்சுப்பன்னேஹி ச ஸங்கா²ரேஹி ஸுஞ்ஞா. அனாக³தா ஸங்கா²ரா அதீதேஹி ச பச்சுப்பன்னேஹி ச ஸங்கா²ரேஹி ஸுஞ்ஞா பச்சுப்பன்னா ஸங்கா²ரா அதீதேஹி ச அனாக³தேஹி ச ஸங்கா²ரேஹி ஸுஞ்ஞா. இமே தயோ ஸங்கா²ரா; இத³ம் ஸங்கா²ரஸுஞ்ஞம்.

கதமம் விபரிணாமஸுஞ்ஞம்? ஜாதம் ரூபம் ஸபா⁴வேன ஸுஞ்ஞம். விக³தம் ரூபம் விபரிணதஞ்சேவ ஸுஞ்ஞஞ்ச. ஜாதா வேத³னா ஸபா⁴வேன ஸுஞ்ஞா. விக³தா வேத³னா விபரிணதா சேவ ஸுஞ்ஞா ச …பே… ஜாதா ஸஞ்ஞா… ஜாதா ஸங்கா²ரா… ஜாதம் விஞ்ஞாணம்… ஜாதம் சக்கு²…பே… ஜாதோ ப⁴வோ ஸபா⁴வேன ஸுஞ்ஞோ. விக³தோ ப⁴வோ விபரிணதோ சேவ ஸுஞ்ஞோ ச. இத³ம் விபரிணாமஸுஞ்ஞம்.

கதமம் அக்³க³ஸுஞ்ஞம்? அக்³க³மேதம் பத³ம் ஸேட்ட²மேதம் பத³ம் விஸிட்ட²மேதம் [விஸேட்ட²மேதம் (க.)] பத³ம் யதி³த³ம் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹக்க²யோ விராகோ³ நிரோதோ⁴ நிப்³பா³னம். இத³ம் அக்³க³ஸுஞ்ஞம்.

கதமம் லக்க²ணஸுஞ்ஞம்? த்³வே லக்க²ணானி – பா³லலக்க²ணஞ்ச பண்டி³தலக்க²ணஞ்ச. பா³லலக்க²ணம் பண்டி³தலக்க²ணேன ஸுஞ்ஞம். பண்டி³தலக்க²ணம் பா³லலக்க²ணேன ஸுஞ்ஞம். தீணி லக்க²ணானி – உப்பாத³லக்க²ணம், வயலக்க²ணம், டி²தஞ்ஞத²த்தலக்க²ணம். உப்பாத³லக்க²ணம் வயலக்க²ணேன ச டி²தஞ்ஞத²த்தலக்க²ணேன ச ஸுஞ்ஞம். வயலக்க²ணம் உப்பாத³லக்க²ணேன ச டி²தஞ்ஞத²த்தலக்க²ணேன ச ஸுஞ்ஞம், டி²தஞ்ஞத²த்தலக்க²ணம் உப்பாத³லக்க²ணேன ச வயலக்க²ணேன ச ஸுஞ்ஞம்.

ரூபஸ்ஸ உப்பாத³லக்க²ணம் வயலக்க²ணேன ச டி²தஞ்ஞத²த்தலக்க²ணேன ச ஸுஞ்ஞம். ரூபஸ்ஸ வயலக்க²ணம் உப்பாத³லக்க²ணேன ச டி²தஞ்ஞத²த்தலக்க²ணேன ச ஸுஞ்ஞம். ரூபஸ்ஸ டி²தஞ்ஞத²த்தலக்க²ணம் உப்பாத³லக்க²ணேன ச வயலக்க²ணேன ச ஸுஞ்ஞம். வேத³னாய…பே… ஸஞ்ஞாய… ஸங்கா²ரானம்… விஞ்ஞாணஸ்ஸ… சக்கு²ஸ்ஸ… ஜராமரணஸ்ஸ உப்பாத³லக்க²ணம் வயலக்க²ணேன ச டி²தஞ்ஞத²த்தலக்க²ணேன ச ஸுஞ்ஞம். ஜராமரணஸ்ஸ வயலக்க²ணம் உப்பாத³லக்க²ணேன ச டி²தஞ்ஞத²த்தலக்க²ணேன ச ஸுஞ்ஞம். ஜராமரணஸ்ஸ டி²தஞ்ஞத²த்தலக்க²ணம் உப்பாத³லக்க²ணேன ச வயலக்க²ணேன ச ஸுஞ்ஞம். இத³ம் லக்க²ணஸுஞ்ஞம்.

கதமம் விக்க²ம்ப⁴னஸுஞ்ஞம்? நேக்க²ம்மேன காமச்ச²ந்தோ³ விக்க²ம்பி⁴தோ சேவ ஸுஞ்ஞோ ச. அப்³யாபாதே³ன ப்³யாபாதோ³ விக்க²ம்பி⁴தோ சேவ ஸுஞ்ஞோ ச. ஆலோகஸஞ்ஞாய தி²னமித்³த⁴ம் விக்க²ம்பி⁴தஞ்சேவ ஸுஞ்ஞஞ்ச. அவிக்கே²பேன உத்³த⁴ச்சம் விக்க²ம்பி⁴தஞ்சேவ ஸுஞ்ஞஞ்ச. த⁴ம்மவவத்தா²னேன விசிகிச்சா² விக்க²ம்பி⁴தா சேவ ஸுஞ்ஞா ச. ஞாணேன அவிஜ்ஜா விக்க²ம்பி⁴தா சேவ ஸுஞ்ஞா ச. பாமோஜ்ஜேன அரதி விக்க²ம்பி⁴தா சேவ ஸுஞ்ஞா ச. பட²மேன ஜா²னேன நீவரணா விக்க²ம்பி⁴தா சேவ ஸுஞ்ஞா ச…பே… அரஹத்தமக்³கே³ன ஸப்³ப³கிலேஸா விக்க²ம்பி⁴தா சேவ ஸுஞ்ஞா ச. இத³ம் விக்க²ம்ப⁴னஸுஞ்ஞம்.

கதமம் தத³ங்க³ஸுஞ்ஞம்? நேக்க²ம்மேன காமச்ச²ந்தோ³ தத³ங்க³ஸுஞ்ஞோ. அப்³யாபாதே³ன ப்³யாபாதோ³ தத³ங்க³ஸுஞ்ஞோ. ஆலோகஸஞ்ஞாய தி²னமித்³த⁴ம் தத³ங்க³ஸுஞ்ஞம். அவிக்கே²பேன உத்³த⁴ச்சம் தத³ங்க³ஸுஞ்ஞம். த⁴ம்மவவத்தா²னேன விசிகிச்சா² தத³ங்க³ஸுஞ்ஞா. ஞாணேன அவிஜ்ஜா தத³ங்க³ஸுஞ்ஞா. பாமோஜ்ஜேன அரதி தத³ங்க³ஸுஞ்ஞா. பட²மேன ஜா²னேன நீவரணா தத³ங்க³ஸுஞ்ஞா…பே… விவட்டனானுபஸ்ஸனாய ஸஞ்ஞோகா³பி⁴னிவேஸோ தத³ங்க³ஸுஞ்ஞோ. இத³ம் தத³ங்க³ஸுஞ்ஞம்.

கதமம் ஸமுச்சே²த³ஸுஞ்ஞம்? நேக்க²ம்மேன காமச்ச²ந்தோ³ ஸமுச்சி²ன்னோ சேவ ஸுஞ்ஞோ ச. அப்³யாபாதே³ன ப்³யாபாதோ³ ஸமுச்சி²ன்னோ சேவ ஸுஞ்ஞோ ச. ஆலோகஸஞ்ஞாய தி²னமித்³த⁴ம் ஸமுச்சி²ன்னஞ்சேவ ஸுஞ்ஞஞ்ச. அவிக்கே²பேன உத்³த⁴ச்சம் ஸமுச்சி²ன்னஞ்சேவ ஸுஞ்ஞஞ்ச. த⁴ம்மவவத்தா²னேன விசிகிச்சா² ஸமுச்சி²ன்னா சேவ ஸுஞ்ஞா ச. ஞாணேன அவிஜ்ஜா ஸமுச்சி²ன்னா சேவ ஸுஞ்ஞா ச. பாமோஜ்ஜேன அரதி ஸமுச்சி²ன்னா சேவ ஸுஞ்ஞா ச. பட²மேன ஜா²னேன நீவரணா ஸமுச்சி²ன்னா சேவ ஸுஞ்ஞா ச…பே… அரஹத்தமக்³கே³ன ஸப்³ப³கிலேஸா ஸமுச்சி²ன்னா சேவ ஸுஞ்ஞா ச. இத³ம் ஸமுச்சே²த³ஸுஞ்ஞம்.

கதமம் படிப்பஸ்ஸத்³தி⁴ஸுஞ்ஞம்? நேக்க²ம்மேன காமச்ச²ந்தோ³ படிப்பஸ்ஸத்³தோ⁴ சேவ ஸுஞ்ஞோ ச. அப்³யாபாதே³ன ப்³யாபாதோ³ படிப்பஸ்ஸத்³தோ⁴ சேவ ஸுஞ்ஞோ ச. ஆலோகஸஞ்ஞாய தி²னமித்³த⁴ம் படிப்பஸ்ஸத்³த⁴ஞ்சேவ ஸுஞ்ஞஞ்ச. அவிக்கே²பேன உத்³த⁴ச்சம் படிப்பஸ்ஸத்³த⁴ஞ்சேவ ஸுஞ்ஞஞ்ச. த⁴ம்மவவத்தா²னேன விசிகிச்சா² படிப்பஸ்ஸத்³தா⁴ சேவ ஸுஞ்ஞா ச. ஞாணேன அவிஜ்ஜா படிப்பஸ்ஸத்³தா⁴ சேவ ஸுஞ்ஞா ச. பாமோஜ்ஜேன அரதி படிப்பஸ்ஸத்³தா⁴ சேவ ஸுஞ்ஞா ச. பட²மேன ஜா²னேன நீவரணா படிப்பஸ்ஸத்³தா⁴ சேவ ஸுஞ்ஞா ச…பே… அரஹத்தமக்³கே³ன ஸப்³ப³கிலேஸா படிப்பஸ்ஸத்³தா⁴ சேவ ஸுஞ்ஞா ச. இத³ம் படிப்பஸ்ஸத்³தி⁴ஸுஞ்ஞம்.

கதமம் நிஸ்ஸரணஸுஞ்ஞம்? நேக்க²ம்மேன காமச்ச²ந்தோ³ நிஸ்ஸடோ சேவ ஸுஞ்ஞோ ச. அப்³யாபாதே³ன ப்³யாபாதோ³ நிஸ்ஸடோ சேவ ஸுஞ்ஞோ ச. ஆலோகஸஞ்ஞாய தி²னமித்³த⁴ம் நிஸ்ஸடஞ்சேவ ஸுஞ்ஞஞ்ச. அவிக்கே²பேன உத்³த⁴ச்சம் நிஸ்ஸடஞ்சேவ ஸுஞ்ஞஞ்ச. த⁴ம்மவவத்தா²னேன விசிகிச்சா² நிஸ்ஸடா சேவ ஸுஞ்ஞா ச. ஞாணேன அவிஜ்ஜா நிஸ்ஸடா சேவ ஸுஞ்ஞா ச. பாமோஜ்ஜேன அரதி நிஸ்ஸடா சேவ ஸுஞ்ஞா ச. பட²மேன ஜா²னேன நீவரணா நிஸ்ஸடா சேவ ஸுஞ்ஞா ச …பே… அரஹத்தமக்³கே³ன ஸப்³ப³கிலேஸா நிஸ்ஸடா சேவ ஸுஞ்ஞா ச. இத³ம் நிஸ்ஸரணஸுஞ்ஞம்.

கதமம் அஜ்ஜ²த்தஸுஞ்ஞம்? அஜ்ஜ²த்தம் சக்கு²ம் ஸுஞ்ஞம் அத்தேன வா அத்தனியேன வா நிச்சேன வா து⁴வேன வா ஸஸ்ஸதேன வா அவிபரிணாமத⁴ம்மேன வா. அஜ்ஜ²த்தம் ஸோதம் ஸுஞ்ஞம்… அஜ்ஜ²த்தம் கா⁴னம் ஸுஞ்ஞம்… அஜ்ஜ²த்தம் ஜிவ்ஹா ஸுஞ்ஞா… அஜ்ஜ²த்தம் காயோ ஸுஞ்ஞோ… அஜ்ஜ²த்தம் மனோ ஸுஞ்ஞோ அத்தேன வா அத்தனியேன வா நிச்சேன வா து⁴வேன வா ஸஸ்ஸதேன வா அவிபரிணாமத⁴ம்மேன வா. இத³ம் அஜ்ஜ²த்தஸுஞ்ஞம்.

கதமம் ப³ஹித்³தா⁴ஸுஞ்ஞம்? ப³ஹித்³தா⁴ ரூபா ஸுஞ்ஞா…பே… ப³ஹித்³தா⁴ த⁴ம்மா ஸுஞ்ஞா அத்தேன வா அத்தனியேன வா நிச்சேன வா து⁴வேன வா ஸஸ்ஸதேன வா அவிபரிணாமத⁴ம்மேன வா. இத³ம் ப³ஹித்³தா⁴ஸுஞ்ஞம்.

கதமம் து³ப⁴தோஸுஞ்ஞம்? யஞ்ச அஜ்ஜ²த்தம் சக்கு² யே ச ப³ஹித்³தா⁴ ரூபா உப⁴யமேதம் ஸுஞ்ஞம் [உப⁴யதோ தம் ஸுஞ்ஞா (ஸ்யா.)] அத்தேன வா அத்தனியேன வா நிச்சேன வா து⁴வேன வா ஸஸ்ஸதேன வா அவிபரிணாமத⁴ம்மேன வா. யஞ்ச அஜ்ஜ²த்தம் ஸோதம் யே ச ப³ஹித்³தா⁴ ஸத்³தா³…பே… யஞ்ச அஜ்ஜ²த்தம் கா⁴னம் யே ச ப³ஹித்³தா⁴ க³ந்தா⁴… யா ச அஜ்ஜ²த்தம் ஜிவ்ஹா யே ச ப³ஹித்³தா⁴ ரஸா… யோ ச அஜ்ஜ²த்தம் காயோ யே ச ப³ஹித்³தா⁴ போ²ட்ட²ப்³பா³… யோ ச அஜ்ஜ²த்தம் மனோ யே ச ப³ஹித்³தா⁴ த⁴ம்மா உப⁴யமேதம் ஸுஞ்ஞம் அத்தேன வா அத்தனியேன வா நிச்சேன வா து⁴வேன வா ஸஸ்ஸதேன வா அவிபரிணாமத⁴ம்மேன வா. இத³ம் து³ப⁴தோஸுஞ்ஞம்.

கதமம் ஸபா⁴க³ஸுஞ்ஞம்? ச² அஜ்ஜ²த்திகானி ஆயதனானி ஸபா⁴கா³னி சேவ ஸுஞ்ஞானி ச. ச² பா³ஹிரானி ஆயதனானி ஸபா⁴கா³னி சேவ ஸுஞ்ஞானி ச. ச² விஞ்ஞாணகாயா ஸபா⁴கா³ சேவ ஸுஞ்ஞா ச. ச² ப²ஸ்ஸகாயா ஸபா⁴கா³ சேவ ஸுஞ்ஞா ச. ச² வேத³னாகாயா ஸபா⁴கா³ சேவ ஸுஞ்ஞா ச. ச² ஸஞ்ஞாகாயா ஸபா⁴கா³ சேவ ஸுஞ்ஞா ச. ச² சேதனாகாயா ஸபா⁴கா³ சேவ ஸுஞ்ஞா ச. இத³ம் ஸபா⁴க³ஸுஞ்ஞம்.

கதமம் விஸபா⁴க³ஸுஞ்ஞம்? ச² அஜ்ஜ²த்திகானி ஆயதனானி ச²ஹி பா³ஹிரேஹி ஆயதனேஹி விஸபா⁴கா³னி சேவ ஸுஞ்ஞானி ச. ச² பா³ஹிரானி ஆயதனானி ச²ஹி விஞ்ஞாணகாயேஹி விஸபா⁴கா³னி சேவ ஸுஞ்ஞானி ச. ச² விஞ்ஞாணகாயா ச²ஹி ப²ஸ்ஸகாயேஹி விஸபா⁴கா³ சேவ ஸுஞ்ஞா ச. ச² ப²ஸ்ஸகாயா ச²ஹி வேத³னாகாயேஹி விஸபா⁴கா³ சேவ ஸுஞ்ஞா ச. ச² வேத³னாகாயா ச²ஹி ஸஞ்ஞாகாயேஹி விஸபா⁴கா³ சேவ ஸுஞ்ஞா ச. ச² ஸஞ்ஞாகாயா ச²ஹி சேதனாகாயேஹி விஸபா⁴கா³ சேவ ஸுஞ்ஞா ச. இத³ம் விஸபா⁴க³ஸுஞ்ஞம்.

கதமம் ஏஸனாஸுஞ்ஞம்? நேக்க²ம்மேஸனா காமச்ச²ந்தே³ன ஸுஞ்ஞா. அப்³யாபாதே³ஸனா ப்³யாபாதே³ன ஸுஞ்ஞா. ஆலோகஸஞ்ஞேஸனா தி²னமித்³தே⁴ன ஸுஞ்ஞா. அவிக்கே²பேஸனா உத்³த⁴ச்சேன ஸுஞ்ஞா. த⁴ம்மவவத்தா²னேஸனா விசிகிச்சா²ய ஸுஞ்ஞா. ஞாணேஸனா அவிஜ்ஜாய ஸுஞ்ஞா. பாமோஜ்ஜேஸனா அரதியா ஸுஞ்ஞா. பட²மஜ்ஜா²னேஸனா நீவரணேஹி ஸுஞ்ஞா…பே… அரஹத்தமக்³கே³ஸனா ஸப்³ப³கிலேஸேஹி ஸுஞ்ஞா. இத³ம் ஏஸனாஸுஞ்ஞம்.

கதமம் பரிக்³க³ஹஸுஞ்ஞம்? நேக்க²ம்மபரிக்³க³ஹோ காமச்ச²ந்தே³ன ஸுஞ்ஞோ. அப்³யாபாத³பரிக்³க³ஹோ ப்³யாபாதே³ன ஸுஞ்ஞோ. ஆலோகஸஞ்ஞாபரிக்³க³ஹோ தி²னமித்³தே⁴ன ஸுஞ்ஞோ. அவிக்கே²பபரிக்³க³ஹோ உத்³த⁴ச்சேன ஸுஞ்ஞோ. த⁴ம்மவவத்தா²னபரிக்³க³ஹோ விசிகிச்சா²ய ஸுஞ்ஞோ. ஞாணபரிக்³க³ஹோ அவிஜ்ஜாய ஸுஞ்ஞோ. பாமோஜ்ஜபரிக்³க³ஹோ அரதியா ஸுஞ்ஞோ. பட²மஜ்ஜா²னபரிக்³க³ஹோ நீவரணேஹி ஸுஞ்ஞோ…பே… அரஹத்தமக்³க³பரிக்³க³ஹோ ஸப்³ப³கிலேஸேஹி ஸுஞ்ஞோ. இத³ம் பரிக்³க³ஹஸுஞ்ஞம்.

கதமம் படிலாப⁴ஸுஞ்ஞம்? நேக்க²ம்மபடிலாபோ⁴ காமச்ச²ந்தே³ன ஸுஞ்ஞோ. அப்³யாபாத³படிலாபோ⁴ ப்³யாபாதே³ன ஸுஞ்ஞோ. ஆலோகஸஞ்ஞாபடிலாபோ⁴ தி²னமித்³தே⁴ன ஸுஞ்ஞோ. அவிக்கே²பபடிலாபோ⁴ உத்³த⁴ச்சேன ஸுஞ்ஞோ. த⁴ம்மவவத்தா²னபடிலாபோ⁴ விசிகிச்சா²ய ஸுஞ்ஞோ. ஞாணபடிலாபோ⁴ அவிஜ்ஜாய ஸுஞ்ஞோ. பாமோஜ்ஜபடிலாபோ⁴ அரதியா ஸுஞ்ஞோ. பட²மஜ்ஜா²னபடிலாபோ⁴ நீவரணேஹி ஸுஞ்ஞோ…பே… அரஹத்தமக்³க³படிலாபோ⁴ ஸப்³ப³கிலேஸேஹி ஸுஞ்ஞோ. இத³ம் படிலாப⁴ஸுஞ்ஞம்.

கதமம் படிவேத⁴ஸுஞ்ஞம்? நேக்க²ம்மப்படிவேதோ⁴ காமச்ச²ந்தே³ன ஸுஞ்ஞோ. அப்³யாபாத³ப்படிவேதோ⁴ ப்³யாபாதே³ன ஸுஞ்ஞோ. ஆலோகஸஞ்ஞாப்படிவேதோ⁴ தி²னமித்³தே⁴ன ஸுஞ்ஞோ. அவிக்கே²பப்படிவேதோ⁴ உத்³த⁴ச்சேன ஸுஞ்ஞோ. த⁴ம்மவவத்தா²னப்படிவேதோ⁴ விசிகிச்சா²ய ஸுஞ்ஞோ. ஞாணப்படிவேதோ⁴ அவிஜ்ஜாய ஸுஞ்ஞோ. பாமோஜ்ஜப்படிவேதோ⁴ அரதியா ஸுஞ்ஞோ. பட²மஜ்ஜா²னப்படிவேதோ⁴ நீவரணேஹி ஸுஞ்ஞோ…பே… அரஹத்தமக்³க³ப்படிவேதோ⁴ ஸப்³ப³கிலேஸேஹி ஸுஞ்ஞோ. இத³ம் படிவேத⁴ஸுஞ்ஞம்.

கதமம் ஏகத்தஸுஞ்ஞம், நானத்தஸுஞ்ஞம்? காமச்ச²ந்தோ³ நானத்தம், நேக்க²ம்மம் ஏகத்தம். நேக்க²ம்மேகத்தம் சேதயதோ காமச்ச²ந்தே³ன ஸுஞ்ஞம். ப்³யாபாதோ³ நானத்தம், அப்³யாபாதோ³ ஏகத்தம். அப்³யாபாதே³கத்தம் சேதயதோ ப்³யாபாதே³ன ஸுஞ்ஞம். தி²னமித்³த⁴ம் நானத்தம், ஆலோகஸஞ்ஞா ஏகத்தம். ஆலோகஸஞ்ஞேகத்தம் சேதயதோ தி²னமித்³தே⁴ன ஸுஞ்ஞம். உத்³த⁴ச்சம் நானத்தம், அவிக்கே²போ ஏகத்தம். அவிக்கே²பேகத்தம் சேதயதோ உத்³த⁴ச்சேன ஸுஞ்ஞம். விசிகிச்சா² நானத்தம், த⁴ம்மவவத்தா²னம் ஏகத்தம். த⁴ம்மவவத்தா²னேகத்தம் சேதயதோ விசிகிச்சா²ய ஸுஞ்ஞம். அவிஜ்ஜா நானத்தம், ஞாணம் ஏகத்தம். ஞாணேகத்தம் சேதயதோ அவிஜ்ஜாய ஸுஞ்ஞம். அரதி நானத்தம், பாமோஜ்ஜம் ஏகத்தம். பாமோஜ்ஜேகத்தம் சேதயதோ அரதியா ஸுஞ்ஞம். நீவரணா நானத்தம், பட²மஜ்ஜா²னம் ஏகத்தம். பட²மஜ்ஜா²னேகத்தம் சேதயதோ நீவரணேஹி ஸுஞ்ஞம்…பே… ஸப்³ப³கிலேஸா நானத்தம், அரஹத்தமக்³கோ³ ஏகத்தம். அரஹத்தமக்³கே³கத்தம் சேதயதோ ஸப்³ப³கிலேஸேஹி ஸுஞ்ஞம். இத³ம் ஏகத்தஸுஞ்ஞம் நானத்தஸுஞ்ஞம்.

கதமம் க²ந்திஸுஞ்ஞம்? நேக்க²ம்மக²ந்தி காமச்ச²ந்தே³ன ஸுஞ்ஞா. அப்³யாபாத³க²ந்தி ப்³யாபாதே³ன ஸுஞ்ஞா. ஆலோகஸஞ்ஞாக²ந்தி தி²னமித்³தே⁴ன ஸுஞ்ஞா. அவிக்கே²பக²ந்தி உத்³த⁴ச்சேன ஸுஞ்ஞா. த⁴ம்மவவத்தா²னக²ந்தி விசிகிச்சா²ய ஸுஞ்ஞா. ஞாணக²ந்தி அவிஜ்ஜாய ஸுஞ்ஞா. பாமோஜ்ஜக²ந்தி அரதியா ஸுஞ்ஞா. பட²மஜ்ஜா²னக²ந்தி நீவரணேஹி ஸுஞ்ஞா…பே… அரஹத்தமக்³க³க²ந்தி ஸப்³ப³கிலேஸேஹி ஸுஞ்ஞா. இத³ம் க²ந்திஸுஞ்ஞம்.

கதமம் அதி⁴ட்டா²னஸுஞ்ஞம்? நேக்க²ம்மாதி⁴ட்டா²னம் காமச்ச²ந்தே³ன ஸுஞ்ஞம். அப்³யாபாதா³தி⁴ட்டா²னம் ப்³யாபாதே³ன ஸுஞ்ஞம். ஆலோகஸஞ்ஞாதி⁴ட்டா²னம் தி²னமித்³தே⁴ன ஸுஞ்ஞம். அவிக்கே²பாதி⁴ட்டா²னம் உத்³த⁴ச்சேன ஸுஞ்ஞம். த⁴ம்மவவத்தா²னாதி⁴ட்டா²னம் விசிகிச்சா²ய ஸுஞ்ஞம். ஞாணாதி⁴ட்டா²னம் அவிஜ்ஜாய ஸுஞ்ஞம். பாமோஜ்ஜாதி⁴ட்டா²னம் அரதியா ஸுஞ்ஞம். பட²மஜ்ஜா²னாதி⁴ட்டா²னம் நீவரணேஹி ஸுஞ்ஞம்…பே… அரஹத்தமக்³கா³தி⁴ட்டா²னம் ஸப்³ப³கிலேஸேஹி ஸுஞ்ஞம். இத³ம் அதி⁴ட்டா²னஸுஞ்ஞம்.

கதமம் பரியோகா³ஹணஸுஞ்ஞம்? நேக்க²ம்மபரியோகா³ஹணம் காமச்ச²ந்தே³ன ஸுஞ்ஞம். அப்³யாபாத³பரியோகா³ஹணம் ப்³யாபாதே³ன ஸுஞ்ஞம். ஆலோகஸஞ்ஞாபரியோகா³ஹணம் தி²னமித்³தே⁴ன ஸுஞ்ஞம். அவிக்கே²பபரியோகா³ஹணம் உத்³த⁴ச்சேன ஸுஞ்ஞம். த⁴ம்மவவத்தா²னபரியோகா³ஹணம் விசிகிச்சா²ய ஸுஞ்ஞம். ஞாணபரியோகா³ஹணம் அவிஜ்ஜாய ஸுஞ்ஞம். பாமோஜ்ஜபரியோகா³ஹணம் அரதியா ஸுஞ்ஞம். பட²மஜ்ஜா²னபரியோகா³ஹணம் நீவரணேஹி ஸுஞ்ஞம்…பே… அரஹத்தமக்³க³பரியோகா³ஹணம் ஸப்³ப³கிலேஸேஹி ஸுஞ்ஞம். இத³ம் பரியோகா³ஹணஸுஞ்ஞம்.

கதமம் ஸம்பஜானஸ்ஸ பவத்தபரியாதா³னம் ஸப்³ப³ஸுஞ்ஞதானம் பரமத்த²ஸுஞ்ஞம்? இத⁴ ஸம்பஜானோ நேக்க²ம்மேன காமச்ச²ந்த³ஸ்ஸ பவத்தம் பரியாதி³யதி, அப்³யாபாதே³ன ப்³யாபாத³ஸ்ஸ பவத்தம் பரியாதி³யதி, ஆலோகஸஞ்ஞாய தி²னமித்³த⁴ஸ்ஸ பவத்தம் பரியாதி³யதி, அவிக்கே²பேன உத்³த⁴ச்சஸ்ஸ பவத்தம் பரியாதி³யதி, த⁴ம்மவவத்தா²னேன விசிகிச்சா²ய பவத்தம் பரியாதி³யதி, ஞாணேன அவிஜ்ஜாய பவத்தம் பரியாதி³யதி, பாமோஜ்ஜேன அரதியா பவத்தம் பரியாதி³யதி, பட²மேன ஜா²னேன நீவரணானம் பவத்தம் பரியாதி³யதி…பே… அரஹத்தமக்³கே³ன ஸப்³ப³கிலேஸானம் பவத்தம் பரியாதி³யதி. அத² வா பன ஸம்பஜானஸ்ஸ அனுபாதி³ஸேஸாய நிப்³பா³னதா⁴துயா பரினிப்³பா³யந்தஸ்ஸ இத³ம் சேவ சக்கு²பவத்தம் பரியாதி³யதி, அஞ்ஞஞ்ச சக்கு²பவத்தம் ந உப்பஜ்ஜதி. இத³ஞ்சேவ ஸோதபவத்தம்…பே… கா⁴னபவத்தம்… ஜிவ்ஹாபவத்தம்… காயபவத்தம்… மனோபவத்தம் பரியாதி³யதி, அஞ்ஞஞ்ச மனோபவத்தம் ந உப்பஜ்ஜதி. இத³ம் ஸம்பஜானஸ்ஸ பவத்தபரியாதா³னம் ஸப்³ப³ஸுஞ்ஞதானம் பரமத்த²ஸுஞ்ஞந்தி.

ஸுஞ்ஞகதா² நிட்டி²தா.

யுக³னத்³த⁴வக்³கோ³ து³தியோ.