5. இந்த்³ரியஸமோதா⁴னம்

204. புது²ஜ்ஜனோ ஸமாதி⁴ம் பா⁴வேந்தோ கதிஹாகாரேஹி உபட்டா²னகுஸலோ ஹோதி? ஸேக்கோ² ஸமாதி⁴ம் பா⁴வேந்தோ கதிஹாகாரேஹி உபட்டா²னகுஸலோ ஹோதி? வீதராகோ³ ஸமாதி⁴ம் பா⁴வேந்தோ கதிஹாகாரேஹி உபட்டா²னகுஸலோ ஹோதி? புது²ஜ்ஜனோ ஸமாதி⁴ம் பா⁴வேந்தோ ஸத்தஹி ஆகாரேஹி உபட்டா²னகுஸலோ ஹோதி. ஸேக்கோ² ஸமாதி⁴ம் பா⁴வேந்தோ அட்ட²ஹி ஆகாரேஹி உபட்டா²னகுஸலோ ஹோதி. வீதராகோ³ ஸமாதி⁴ம் பா⁴வேந்தோ த³ஸஹி ஆகாரேஹி உபட்டா²னகுஸலோ ஹோதி.

புது²ஜ்ஜனோ ஸமாதி⁴ம் பா⁴வேந்தோ கதமேஹி ஸத்தஹாகாரேஹி உபட்டா²னகுஸலோ ஹோதி? ஆவஜ்ஜிதத்தா ஆரம்மணூபட்டா²னகுஸலோ ஹோதி, ஸமத²னிமித்தூபட்டா²னகுஸலோ ஹோதி, பக்³க³ஹனிமித்தூபட்டா²னகுஸலோ ஹோதி, அவிக்கே²பூபட்டா²னகுஸலோ ஹோதி, ஓபா⁴ஸூபட்டா²னகுஸலோ ஹோதி, ஸம்பஹம்ஸனூபட்டா²னகுஸலோ ஹோதி, உபேக்கூ²பட்டா²னகுஸலோ ஹோதி – புது²ஜ்ஜனோ ஸமாதி⁴ம் பா⁴வேந்தோ இமேஹி ஸத்தஹி ஆகாரேஹி உபட்டா²னகுஸலோ ஹோதி.

ஸேக்கோ² ஸமாதி⁴ம் பா⁴வேந்தோ கதமேஹி அட்ட²ஹி ஆகாரேஹி உபட்டா²னகுஸலோ ஹோதி? ஆவஜ்ஜிதத்தா ஆரம்மணூபட்டா²னகுஸலோ ஹோதி, ஸமத²னிமித்தூபட்டா²னகுஸலோ ஹோதி, பக்³க³ஹனிமித்தூபட்டா²னகுஸலோ ஹோதி, அவிக்கே²பூபட்டா²னகுஸலோ ஹோதி, ஓபா⁴ஸூபட்டா²னகுஸலோ ஹோதி, ஸம்பஹம்ஸனூபட்டா²னகுஸலோ ஹோதி, உபேக்கூ²பட்டா²னகுஸலோ ஹோதி, ஏகத்தூபட்டா²னகுஸலோ ஹோதி – ஸேக்கோ² ஸமாதி⁴ம் பா⁴வேந்தோ இமேஹி அட்ட²ஹி ஆகாரேஹி உபட்டா²னகுஸலோ ஹோதி.

வீதராகோ³ ஸமாதி⁴ம் பா⁴வேந்தோ கதமேஹி த³ஸஹி ஆகாரேஹி உபட்டா²னகுஸலோ ஹோதி? ஆவஜ்ஜிதத்தா ஆரம்மணூபட்டா²னகுஸலோ ஹோதி…பே… ஏகத்தூபட்டா²னகுஸலோ ஹோதி, ஞாணூபட்டா²னகுஸலோ ஹோதி, விமுத்தூபட்டா²னகுஸலோ ஹோதி – வீதராகோ³ ஸமாதி⁴ம் பா⁴வேந்தோ இமேஹி த³ஸஹி ஆகாரேஹி உபட்டா²னகுஸலோ ஹோதி.

205. புது²ஜ்ஜனோ விபஸ்ஸனம் பா⁴வேந்தோ கதிஹாகாரேஹி உபட்டா²னகுஸலோ ஹோதி, கதிஹாகாரேஹி அனுபட்டா²னகுஸலோ ஹோதி? ஸேக்கோ² விபஸ்ஸனம் பா⁴வேந்தோ கதிஹாகாரேஹி உபட்டா²னகுஸலோ ஹோதி, கதிஹாகாரேஹி அனுபட்டா²னகுஸலோ ஹோதி? வீதராகோ³ விபஸ்ஸனம் பா⁴வேந்தோ கதிஹாகாரேஹி உபட்டா²னகுஸலோ ஹோதி, கதிஹாகாரேஹி அனுபட்டா²னகுஸலோ ஹோதி?

புது²ஜ்ஜனோ விபஸ்ஸனம் பா⁴வேந்தோ நவஹி ஆகாரேஹி உபட்டா²னகுஸலோ ஹோதி, நவஹி ஆகாரேஹி அனுபட்டா²னகுஸலோ ஹோதி. ஸேக்கோ² விபஸ்ஸனம் பா⁴வேந்தோ த³ஸஹி ஆகாரேஹி உபட்டா²னகுஸலோ ஹோதி, த³ஸஹி ஆகாரேஹி அனுபட்டா²னகுஸலோ ஹோதி. வீதராகோ³ விபஸ்ஸனம் பா⁴வேந்தோ த்³வாத³ஸஹி ஆகாரேஹி உபட்டா²னகுஸலோ ஹோதி, த்³வாத³ஸஹி ஆகாரேஹி அனுபட்டா²னகுஸலோ ஹோதி.

புது²ஜ்ஜனோ விபஸ்ஸனம் பா⁴வேந்தோ கதமேஹி நவஹி ஆகாரேஹி உபட்டா²னகுஸலோ ஹோதி, கதமேஹி நவஹி ஆகாரேஹி அனுபட்டா²னகுஸலோ ஹோதி? அனிச்சதோ உபட்டா²னகுஸலோ ஹோதி, நிச்சதோ அனுபட்டா²னகுஸலோ ஹோதி. து³க்க²தோ உபட்டா²னகுஸலோ ஹோதி, ஸுக²தோ அனுபட்டா²னகுஸலோ ஹோதி. அனத்ததோ உபட்டா²னகுஸலோ ஹோதி, அத்ததோ அனுபட்டா²னகுஸலோ ஹோதி. க²யதோ உபட்டா²னகுஸலோ ஹோதி, க⁴னதோ அனுபட்டா²னகுஸலோ ஹோதி. வயதோ உபட்டா²னகுஸலோ ஹோதி, ஆயூஹனானுபட்டா²னகுஸலோ ஹோதி. விபரிணாமூபட்டா²னகுஸலோ ஹோதி, து⁴வதோ அனுபட்டா²னகுஸலோ ஹோதி. அனிமித்தூபட்டா²னகுஸலோ ஹோதி, நிமித்தானுபட்டா²னகுஸலோ ஹோதி. அப்பணிஹிதூபட்டா²னகுஸலோ ஹோதி, பணிதி⁴அனுபட்டா²னகுஸலோ [பணிதா⁴னுபட்டா²னகுஸலோ (ஸ்யா.)] ஹோதி. ஸுஞ்ஞதூபட்டா²னகுஸலோ ஹோதி, அபி⁴னிவேஸானுபட்டா²னகுஸலோ ஹோதி – புது²ஜ்ஜனோ விபஸ்ஸனம் பா⁴வேந்தோ இமேஹி நவஹி ஆகாரேஹி உபட்டா²னகுஸலோ ஹோதி, இமேஹி நவஹி ஆகாரேஹி அனுபட்டா²னகுஸலோ ஹோதி.

206. ஸேக்கோ² விபஸ்ஸனம் பா⁴வேந்தோ கதமேஹி த³ஸஹி ஆகாரேஹி உபட்டா²னகுஸலோ ஹோதி, கதமேஹி த³ஸஹி ஆகாரேஹி அனுபட்டா²னகுஸலோ ஹோதி? அனிச்சதோ உபட்டா²னகுஸலோ ஹோதி, நிச்சதோ அனுபட்டா²னகுஸலோ ஹோதி…பே… ஸுஞ்ஞதூபட்டா²னகுஸலோ ஹோதி, அபி⁴னிவேஸானூபட்டா²னகுஸலோ ஹோதி. ஞாணூபட்டா²னகுஸலோ ஹோதி, அஞாணஅனுபட்டா²னகுஸலோ ஹோதி – ஸேக்கோ² விபஸ்ஸனம் பா⁴வேந்தோ இமேஹி த³ஸஹி ஆகாரேஹி உபட்டா²னகுஸலோ ஹோதி, இமேஹி த³ஸஹி ஆகாரேஹி அனுபட்டா²னகுஸலோ ஹோதி.

வீதராகோ³ விபஸ்ஸனம் பா⁴வேந்தோ கதமேஹி த்³வாத³ஸஹி ஆகாரேஹி உபட்டா²னகுஸலோ ஹோதி, கதமேஹி த்³வாத³ஸஹி ஆகாரேஹி அனுபட்டா²னகுஸலோ ஹோதி? அனிச்சதோ உபட்டா²னகுஸலோ ஹோதி, நிச்சதோ அனுபட்டா²னகுஸலோ ஹோதி…பே… ஞாணூபட்டா²னகுஸலோ ஹோதி, அஞாணானுபட்டா²னகுஸலோ ஹோதி. விஸஞ்ஞோகூ³பட்டா²னகுஸலோ ஹோதி, ஸஞ்ஞோகா³னுபட்டா²னகுஸலோ ஹோதி. நிரோதூ⁴பட்டா²னகுஸலோ ஹோதி, ஸங்கா²ரானுபட்டா²னகுஸலோ ஹோதி – வீதராகோ³ விபஸ்ஸனம் பா⁴வேந்தோ இமேஹி த்³வாத³ஸஹி ஆகாரேஹி உபட்டா²னகுஸலோ ஹோதி, இமேஹி த்³வாத³ஸஹி ஆகாரேஹி அனுபட்டா²னகுஸலோ ஹோதி.

ஆவஜ்ஜிதத்தா ஆரம்மணூபட்டா²னகுஸலவஸேன இந்த்³ரியானி ஸமோதா⁴னேதி, கோ³சரஞ்ச பஜானாதி, ஸமத்த²ஞ்ச படிவிஜ்ஜ²தி…பே… த⁴ம்மே ஸமோதா⁴னேதி, கோ³சரஞ்ச பஜானாதி, ஸமத்த²ஞ்ச படிவிஜ்ஜ²தி. இந்த்³ரியானி ஸமோதா⁴னேதீதி கத²ம் இந்த்³ரியானி ஸமோதா⁴னேதி? அதி⁴மோக்க²ட்டே²ன ஸத்³தி⁴ந்த்³ரியம் ஸமோதா⁴னேதி…பே… ஸமத²னிமித்தூபட்டா²னகுஸலவஸேன, பக்³க³ஹனிமித்தூபட்டா²னகுஸலவஸேன, அவிக்கே²பூபட்டா²னகுஸலவஸேன, ஓபா⁴ஸூபட்டா²னகுஸலவஸேன, ஸம்பஹம்ஸனூபட்டா²னகுஸலவஸேன, உபேக்கூ²பட்டா²னகுஸலவஸேன, ஏகத்தூபட்டா²னகுஸலவஸேன, ஞாணூபட்டா²னகுஸலவஸேன, விமுத்தூபட்டா²னகுஸலவஸேன.

அனிச்சதோ உபட்டா²னகுஸலவஸேன, நிச்சதோ அனுபட்டா²னகுஸலவஸேன, து³க்க²தோ உபட்டா²னகுஸலவஸேன, ஸுக²தோ அனுபட்டா²னகுஸலவஸேன, அனத்ததோ உபட்டா²னகுஸலவஸேன, அத்ததோ அனுபட்டா²னகுஸலவஸேன, க²யதோ உபட்டா²னகுஸலவஸேன, க⁴னதோ அனுபட்டா²னகுஸலவஸேன, வயதோ உபட்டா²னகுஸலவஸேன, ஆயூஹனானுபட்டா²னகுஸலவஸேன, விபரிணாமூபட்டா²னகுஸலவஸேன, து⁴வதோ அனுபட்டா²னகுஸலவஸேன, அனிமித்தூபட்டா²னகுஸலவஸேன, நிமித்தானுபட்டா²னகுஸலவஸேன, அப்பணிஹிதூபட்டா²னகுஸலவஸேன, பணிதி⁴அனுபட்டா²னகுஸலவஸேன, ஸுஞ்ஞதூபட்டா²னகுஸலவஸேன, அபி⁴னிவேஸானுபட்டா²னகுஸலவஸேன, ஞாணூபட்டா²னகுஸலவஸேன, அஞாணானுபட்டா²னகுஸலவஸேன, விஸஞ்ஞோகூ³பட்டா²னகுஸலவஸேன, ஸஞ்ஞோகா³னுபட்டா²னகுஸலவஸேன, நிரோதூ⁴பட்டா²னகுஸலவஸேன, ஸங்கா²ரானுபட்டா²னகுஸலவஸேன இந்த்³ரியானி ஸமோதா⁴னேதி, கோ³சரஞ்ச பஜானாதி, ஸமத்த²ஞ்ச படிவிஜ்ஜ²தி.

207. சதுஸட்டி²யா ஆகாரேஹி திண்ணன்னம் இந்த்³ரியானம் வஸீபா⁴வதாபஞ்ஞா ஆஸவானம் க²யே ஞாணம். கதமேஸம் திண்ணன்னம் இந்த்³ரியானம்? அனஞ்ஞாதஞ்ஞஸ்ஸாமீதிந்த்³ரியஸ்ஸ, அஞ்ஞிந்த்³ரியஸ்ஸ, அஞ்ஞாதாவிந்த்³ரியஸ்ஸ.

அனஞ்ஞாதஞ்ஞஸ்ஸாமீதிந்த்³ரியம் கதி டா²னானி க³ச்ச²தி? அஞ்ஞிந்த்³ரியம் கதி டா²னானி க³ச்ச²தி? அஞ்ஞாதாவிந்த்³ரியம் கதி டா²னானி க³ச்ச²தி? அனஞ்ஞாதஞ்ஞஸ்ஸாமீதிந்த்³ரியம் ஏகம் டா²னம் க³ச்ச²தி – ஸோதாபத்திமக்³க³ம். அஞ்ஞிந்த்³ரியம் ச² டா²னானி க³ச்ச²தி – ஸோதாபத்திப²லம், ஸகதா³கா³மிமக்³க³ம், ஸகதா³கா³மிப²லம், அனாகா³மிமக்³க³ம், அனாகா³மிப²லம், அரஹத்தமக்³க³ம். அஞ்ஞாதாவிந்த்³ரியம் ஏகம் டா²னம் க³ச்ச²தி – அரஹத்தப²லம்.

ஸோதாபத்திமக்³க³க்க²ணே அனஞ்ஞாதஞ்ஞஸ்ஸாமீதிந்த்³ரியஸ்ஸ ஸத்³தி⁴ந்த்³ரியம் அதி⁴மோக்க²பரிவாரம் ஹோதி, வீரியிந்த்³ரியம் பக்³க³ஹபரிவாரம் ஹோதி, ஸதிந்த்³ரியம் உபட்டா²னபரிவாரம் ஹோதி, ஸமாதி⁴ந்த்³ரியம் அவிக்கே²பபரிவாரம் ஹோதி, பஞ்ஞிந்த்³ரியம் த³ஸ்ஸனபரிவாரம் ஹோதி, மனிந்த்³ரியம் விஜானனபரிவாரம் ஹோதி, ஸோமனஸ்ஸிந்த்³ரியம் அபி⁴ஸந்த³னபரிவாரம் ஹோதி, ஜீவிதிந்த்³ரியம் பவத்தஸந்ததாதி⁴பதேய்யபரிவாரம் ஹோதி. ஸோதாபத்திமக்³க³க்க²ணே ஜாதா த⁴ம்மா, ட²பேத்வா சித்தஸமுட்டா²னம் ரூபம், ஸப்³பே³வ குஸலா ஹோந்தி, ஸப்³பே³வ அனாஸவா ஹோந்தி, ஸப்³பே³வ நிய்யானிகா ஹோந்தி, ஸப்³பே³வ அபசயகா³மினோ ஹோந்தி, ஸப்³பே³வ லோகுத்தரா ஹோந்தி, ஸப்³பே³வ நிப்³பா³னாரம்மணா ஹோந்தி. ஸோதாபத்திமக்³க³க்க²ணே அனஞ்ஞாதஞ்ஞஸ்ஸாமீதிந்த்³ரியஸ்ஸ இமானி அட்டி²ந்த்³ரியானி ஸஹஜாதபரிவாரா ஹோந்தி, அஞ்ஞமஞ்ஞபரிவாரா ஹோந்தி, நிஸ்ஸயபரிவாரா ஹோந்தி, ஸம்பயுத்தபரிவாரா ஹோந்தி, ஸஹக³தா ஹோந்தி, ஸஹஜாதா ஹோந்தி, ஸம்ஸட்டா² ஹோந்தி, ஸம்பயுத்தா ஹோந்தி. தேவ தஸ்ஸ ஆகாரா சேவ ஹோந்தி பரிவாரா ச.

ஸோதாபத்திப²லக்க²ணே…பே… அரஹத்தப²லக்க²ணே அஞ்ஞாதாவிந்த்³ரியஸ்ஸ ஸத்³தி⁴ந்த்³ரியம் அதி⁴மோக்க²பரிவாரம் ஹோதி…பே… ஜீவிதிந்த்³ரியம் பவத்தஸந்ததாதி⁴பதேய்யபரிவாரம் ஹோதி. அரஹத்தப²லக்க²ணே ஜாதா த⁴ம்மா ஸப்³பே³வ அப்³யாகதா ஹோந்தி, ட²பேத்வா சித்தஸமுட்டா²னம் ரூபம் ஸப்³பே³வ அனாஸவா ஹோந்தி, ஸப்³பே³வ லோகுத்தரா ஹோந்தி, ஸப்³பே³வ நிப்³பா³னாரம்மணா ஹோந்தி. அரஹத்தப²லக்க²ணே அஞ்ஞாதாவிந்த்³ரியஸ்ஸ இமானி அட்டி²ந்த்³ரியானி ஸஹஜாதபரிவாரா ஹோந்தி. தேவ தஸ்ஸ ஆகாரா சேவ ஹோந்தி பரிவாரா ச. இதி இமானி அட்ட² அட்ட²கானி சதுஸட்டி² ஹோந்தி.

ஆஸவாதி கதமே தே ஆஸவா? காமாஸவோ, ப⁴வாஸவோ, தி³ட்டா²ஸவோ, அவிஜ்ஜாஸவோ. கத்தே²தே ஆஸவா கீ²யந்தி [கி²ய்யந்தி (க.)]? ஸோதாபத்திமக்³கே³ன அனவஸேஸோ தி³ட்டா²ஸவோ கீ²யதி. அபாயக³மனீயோ காமாஸவோ கீ²யதி, அபாயக³மனீயோ ப⁴வாஸவோ கீ²யதி, அபாயக³மனீயோ அவிஜ்ஜாஸவோ கீ²யதி. ஏத்தே²தே ஆஸவா கீ²யந்தி. ஸகதா³கா³மிமக்³கே³ன ஓளாரிகோ காமாஸவோ கீ²யதி, ததே³கட்டோ² ப⁴வாஸவோ கீ²யதி, ததே³கட்டோ² அவிஜ்ஜாஸவோ கீ²யதி. ஏத்தே²தே ஆஸவா கீ²யந்தி. அனாகா³மிமக்³கே³ன அனவஸேஸோ காமாஸவோ கீ²யதி, ததே³கட்டோ² ப⁴வாஸவோ கீ²யதி, ததே³கட்டோ² அவிஜ்ஜாஸவோ கீ²யதி. ஏத்தே²தே ஆஸவா கீ²யந்தி. அரஹத்தமக்³கே³ன அனவஸேஸோ ப⁴வாஸவோ கீ²யதி, அனவஸேஸோ அவிஜ்ஜாஸவோ கீ²யதி. ஏத்தே²தே ஆஸவா கீ²யந்தி.

208. ந தஸ்ஸ அத்³தி³ட்ட²மித⁴த்தி² கிஞ்சி, அதோ² அவிஞ்ஞாதமஜானிதப்³ப³ம்;

ஸப்³ப³ம் அபி⁴ஞ்ஞாஸி யத³த்தி² நேய்யம், ததா²க³தோ தேன ஸமந்தசக்கூ²தி.

ஸமந்தசக்கூ²தி கேனட்டே²ன ஸமந்தசக்கு²? சுத்³த³ஸ பு³த்³த⁴ஞாணானி – து³க்கே² ஞாணம் பு³த்³த⁴ஞாணம், து³க்க²ஸமுத³யே ஞாணம் பு³த்³த⁴ஞாணம்…பே… ஸப்³ப³ஞ்ஞுதஞாணம் பு³த்³த⁴ஞாணம், அனாவரணஞாணம் பு³த்³த⁴ஞாணம். இமானி சுத்³த³ஸ பு³த்³த⁴ஞாணானி. இமேஸம் சுத்³த³ஸன்னம் பு³த்³த⁴ஞாணானம் அட்ட² ஞாணானி ஸாவகஸாதா⁴ரணானி, ச² ஞாணானி அஸாதா⁴ரணானி ஸாவகேஹி.

யாவதா து³க்க²ஸ்ஸ து³க்க²ட்டோ² ஞாதோ, அஞ்ஞாதோ து³க்க²ட்டோ² நத்தீ²தி – ஸமந்தசக்கு². யம் ஸமந்தசக்கு² தம் பஞ்ஞிந்த்³ரியம். பஞ்ஞிந்த்³ரியஸ்ஸ வஸேன அதி⁴மோக்க²ட்டே²ன ஸத்³தி⁴ந்த்³ரியம், பக்³க³ஹட்டே²ன வீரியிந்த்³ரியம், உபட்டா²னட்டே²ன ஸதிந்த்³ரியம், அவிக்கே²பட்டே²ன ஸமாதி⁴ந்த்³ரியம். யாவதா து³க்க²ஸ்ஸ து³க்க²ட்டோ² தி³ட்டோ² விதி³தோ ஸச்சி²கதோ ப²ஸ்ஸிதோ பஞ்ஞாய; அப²ஸ்ஸிதோ பஞ்ஞாய து³க்க²ட்டோ² நத்தீ²தி – ஸமந்தசக்கு². யம் ஸமந்தசக்கு² தம் பஞ்ஞிந்த்³ரியம். பஞ்ஞிந்த்³ரியஸ்ஸ வஸேன அதி⁴மோக்க²ட்டே²ன ஸத்³தி⁴ந்த்³ரியம், பக்³க³ஹட்டே²ன வீரியிந்த்³ரியம், உபட்டா²னட்டே²ன ஸதிந்த்³ரியம், அவிக்கே²பட்டே²ன ஸமாதி⁴ந்த்³ரியம். யாவதா ஸமுத³யஸ்ஸ ஸமுத³யட்டோ²…பே… யாவதா நிரோத⁴ஸ்ஸ நிரோத⁴ட்டோ²… யாவதா மக்³க³ஸ்ஸ மக்³க³ட்டோ²… யாவதா அத்த²படிஸம்பி⁴தா³ய அத்த²படிஸம்பி⁴த³ட்டோ²… யாவதா த⁴ம்மபடிஸம்பி⁴தா³ய த⁴ம்மபடிஸம்பி⁴த³ட்டோ²… யாவதா நிருத்திபடிஸம்பி⁴தா³ய நிருத்திபடிஸம்பி⁴த³ட்டோ²… யாவதா படிபா⁴னபடிஸம்பி⁴தா³ய படிபா⁴னபடிஸம்பி⁴த³ட்டோ²… யாவதா இந்த்³ரியபரோபரியத்தே ஞாணம்… யாவதா ஸத்தானம் ஆஸயானுஸயே ஞாணம்… யாவதா யமகபாடிஹீரே ஞாணம்… யாவதா மஹாகருணாஸமாபத்தியா ஞாணம்… யாவதா ஸதே³வகஸ்ஸ லோகஸ்ஸ ஸமாரகஸ்ஸ ஸப்³ரஹ்மகஸ்ஸ ஸஸ்ஸமணப்³ராஹ்மணியா பஜாய ஸதே³வமனுஸ்ஸாய தி³ட்ட²ம் ஸுதம் முதம் விஞ்ஞாதம் பத்தம் பரியேஸிதம் அனுவிசரிதம் மனஸா, தம் ஞாதம் தி³ட்ட²ம் விதி³தம் ஸச்சி²கதம் ப²ஸ்ஸிதம் பஞ்ஞாய. அப²ஸ்ஸிதம் பஞ்ஞாய நத்தீ²தி – ஸமந்தசக்கு². யம் ஸமந்தசக்கு² தம் பஞ்ஞிந்த்³ரியம். பஞ்ஞிந்த்³ரியஸ்ஸ வஸேன அதி⁴மோக்க²ட்டே²ன ஸத்³தி⁴ந்த்³ரியம், பக்³க³ஹட்டே²ன வீரியிந்த்³ரியம், உபட்டா²னட்டே²ன ஸதிந்த்³ரியம், அவிக்கே²பட்டே²ன ஸமாதி⁴ந்த்³ரியம்.

ஸத்³த³ஹந்தோ பக்³க³ண்ஹாதி, பக்³க³ண்ஹந்தோ ஸத்³த³ஹதி. ஸத்³த³ஹந்தோ உபட்டா²பேதி, உபட்டா²பேந்தோ ஸத்³த³ஹதி. ஸத்³த³ஹந்தோ ஸமாத³ஹதி, ஸமாத³ஹந்தோ ஸத்³த³ஹதி. ஸத்³த³ஹந்தோ பஜானாதி, பஜானந்தோ ஸத்³த³ஹதி. பக்³க³ண்ஹந்தோ உபட்டா²பேதி, உபட்டா²பேந்தோ பக்³க³ண்ஹாதி. பக்³க³ண்ஹந்தோ ஸமாத³ஹதி, ஸமாத³ஹந்தோ பக்³க³ண்ஹாதி. பக்³க³ண்ஹந்தோ பஜானாதி, பஜானந்தோ பக்³க³ண்ஹாதி. பக்³க³ண்ஹந்தோ ஸத்³த³ஹதி, ஸத்³த³ஹந்தோ பக்³க³ண்ஹாதி. உபட்டா²பேந்தோ ஸமாத³ஹதி, ஸமாத³ஹந்தோ உபட்டா²பேதி. உபட்டா²பேந்தோ பஜானாதி, பஜானந்தோ உபட்டா²பேதி. உபட்டா²பேந்தோ ஸத்³த³ஹதி, ஸத்³த³ஹந்தோ உபட்டா²பேதி. உபட்டா²பேந்தோ பக்³க³ண்ஹாதி, பக்³க³ண்ஹந்தோ உபட்டா²பேதி. ஸமாத³ஹந்தோ பஜானாதி, பஜானந்தோ ஸமாத³ஹதி. ஸமாத³ஹந்தோ ஸத்³த³ஹதி, ஸத்³த³ஹந்தோ ஸமாத³ஹதி. ஸமாத³ஹந்தோ பக்³க³ண்ஹாதி, பக்³க³ண்ஹந்தோ ஸமாத³ஹதி. ஸமாத³ஹந்தோ உபட்டா²பேதி, உபட்டா²பேந்தோ ஸமாத³ஹதி. பஜானந்தோ ஸத்³த³ஹதி, ஸத்³த³ஹந்தோ பஜானாதி. பஜானந்தோ பக்³க³ண்ஹாதி, பக்³க³ண்ஹந்தோ பஜானாதி. பஜானந்தோ உபட்டா²பேதி, உபட்டா²பேந்தோ பஜானாதி. பஜானந்தோ ஸமாத³ஹதி, ஸமாத³ஹந்தோ பஜானாதி.

ஸத்³த³ஹிதத்தா பக்³க³ஹிதம், பக்³க³ஹிதத்தா ஸத்³த³ஹிதம். ஸத்³த³ஹிதத்தா உபட்டா²பிதம், உபட்டா²பிதத்தா ஸத்³த³ஹிதம். ஸத்³த³ஹிதத்தா ஸமாத³ஹிதம், ஸமாத³ஹிதத்தா ஸத்³த³ஹிதம். ஸத்³த³ஹிதத்தா பஜானிதம், பஜானிதத்தா ஸத்³த³ஹிதம். பக்³க³ஹிதத்தா உபட்டா²பிதம், உபட்டா²பிதத்தா பக்³க³ஹிதம். பக்³க³ஹிதத்தா ஸமாத³ஹிதம், ஸமாத³ஹிதத்தா பக்³க³ஹிதம். பக்³க³ஹிதத்தா பஜானிதம் பஜானிதத்தா பக்³க³ஹிதம். பக்³க³ஹிதத்தா ஸத்³த³ஹிதம், ஸத்³த³ஹிதத்தா பக்³க³ஹிதம். உபட்டா²பிதத்தா ஸமாத³ஹிதம், ஸமாத³ஹிதத்தா உபட்டா²பிதம். உபட்டா²பிதத்தா பஜானிதம், பஜானிதத்தா உபட்டா²பிதம். உபட்டா²பிதத்தா ஸத்³த³ஹிதம், ஸத்³த³ஹிதத்தா உபட்டா²பிதம். உபட்டா²பிதத்தா பக்³க³ஹிதம், பக்³க³ஹிதத்தா உபட்டா²பிதம். ஸமாத³ஹிதத்தா பஜானிதம், பஜானிதத்தா ஸமாத³ஹிதம். ஸமாத³ஹிதத்தா ஸத்³த³ஹிதம், ஸத்³த³ஹிதத்தா ஸமாத³ஹிதம். ஸமாத³ஹிதத்தா பக்³க³ஹிதம், பக்³க³ஹிதத்தா ஸமாத³ஹிதம். ஸமாத³ஹிதத்தா உபட்டா²பிதம், உபட்டா²பிதத்தா ஸமாத³ஹிதம். பஜானிதத்தா ஸத்³த³ஹிதம், ஸத்³த³ஹிதத்தா பஜானிதம். பஜானிதத்தா பக்³க³ஹிதம், பக்³க³ஹிதத்தா பஜானிதம். பஜானிதத்தா உபட்டா²பிதம், உபட்டா²பிதத்தா பஜானிதம். பஜானிதத்தா ஸமாத³ஹிதம், ஸமாத³ஹிதத்தா பஜானிதம்.

யம் பு³த்³த⁴சக்கு² தம் பு³த்³த⁴ஞாணம், யம் பு³த்³த⁴ஞாணம் தம் பு³த்³த⁴சக்கு², யேன சக்கு²னா ததா²க³தோ ஸத்தே பஸ்ஸதி அப்பரஜக்கே² மஹாரஜக்கே² திக்கி²ந்த்³ரியே முதி³ந்த்³ரியே ஸ்வாகாரே த்³வாகாரே ஸுவிஞ்ஞாபயே து³விஞ்ஞாபயே அப்பேகச்சே பரலோகவஜ்ஜப⁴யத³ஸ்ஸாவினோ [பரலோகவஜ்ஜப⁴யத³ஸ்ஸாவினே (ஸ்யா. க.)], அப்பேகச்சே நபரலோகவஜ்ஜப⁴யத³ஸ்ஸாவினோ.

அப்பரஜக்கே² மஹாரஜக்கே²தி ஸத்³தோ⁴ புக்³க³லோ அப்பரஜக்கோ², அஸ்ஸத்³தோ⁴ புக்³க³லோ மஹாரஜக்கோ². ஆரத்³த⁴வீரியோ புக்³க³லோ அப்பரஜக்கோ², குஸீதோ புக்³க³லோ மஹாரஜக்கோ². உபட்டி²தஸ்ஸதி புக்³க³லோ அப்பரஜக்கோ², முட்ட²ஸ்ஸதி புக்³க³லோ மஹாரஜக்கோ². ஸமாஹிதோ புக்³க³லோ அப்பரஜக்கோ², அஸமாஹிதோ புக்³க³லோ மஹாரஜக்கோ². பஞ்ஞவா புக்³க³லோ அப்பரஜக்கோ², து³ப்பஞ்ஞோ புக்³க³லோ மஹாரஜக்கோ².

திக்கி²ந்த்³ரியே முதி³ந்த்³ரியேதி ஸத்³தோ⁴ புக்³க³லோ திக்கி²ந்த்³ரியோ, அஸ்ஸத்³தோ⁴ புக்³க³லோ முதி³ந்த்³ரியோ…பே… பஞ்ஞவா புக்³க³லோ திக்கி²ந்த்³ரியோ, து³ப்பஞ்ஞோ புக்³க³லோ முதி³ந்த்³ரியோ. ஸ்வாகாரே த்³வாகாரேதி ஸத்³தோ⁴ புக்³க³லோ ஸ்வாகாரோ, அஸ்ஸத்³தோ⁴ புக்³க³லோ த்³வாகாரோ…பே… பஞ்ஞவா புக்³க³லோ ஸ்வாகாரோ, து³ப்பஞ்ஞோ புக்³க³லோ த்³வாகாரோ. ஸுவிஞ்ஞாபயே து³விஞ்ஞாபயேதி ஸத்³தோ⁴ புக்³க³லோ ஸுவிஞ்ஞாபயோ, அஸ்ஸத்³தோ⁴ புக்³க³லோ து³விஞ்ஞாபயோ…பே… பஞ்ஞவா புக்³க³லோ ஸுவிஞ்ஞாபயோ, து³ப்பஞ்ஞோ புக்³க³லோ து³விஞ்ஞாபயோ.

அப்பேகச்சே பரலோகவஜ்ஜப⁴யத³ஸ்ஸாவினோ, அப்பேகச்சே நபரலோகவஜ்ஜப⁴யத³ஸ்ஸாவினோதி ஸத்³தோ⁴ புக்³க³லோ பரலோகவஜ்ஜப⁴யத³ஸ்ஸாவீ, அஸ்ஸத்³தோ⁴ புக்³க³லோ நபரலோகவஜ்ஜப⁴யத³ஸ்ஸாவீ. ஆரத்³த⁴வீரியோ புக்³க³லோ பரலோகவஜ்ஜப⁴யத³ஸ்ஸாவீ, குஸீதோ புக்³க³லோ நபரலோகவஜ்ஜப⁴யத³ஸ்ஸாவீ…பே… பஞ்ஞவா புக்³க³லோ பரலோகவஜ்ஜப⁴யத³ஸ்ஸாவீ, து³ப்பஞ்ஞோ புக்³க³லோ நபரலோகவஜ்ஜப⁴யத³ஸ்ஸாவீ.

லோகோதி க²ந்த⁴லோகோ தா⁴துலோகோ ஆயதனலோகோ விபத்திப⁴வலோகோ விபத்திஸம்ப⁴வலோகோ ஸம்பத்திப⁴வலோகோ ஸம்பத்திஸம்ப⁴வலோகோ.

ஏகோ லோகோ – ஸப்³பே³ ஸத்தா ஆஹாரட்டி²திகா. த்³வே லோகா – நாமஞ்ச ரூபஞ்ச. தயோ லோகா – திஸ்ஸோ வேத³னா. சத்தாரோ லோகா – சத்தாரோ ஆஹாரா. பஞ்ச லோகா – பஞ்சுபாதா³னக்க²ந்தா⁴. ச² லோகா – ச² அஜ்ஜ²த்திகானி ஆயதனானி. ஸத்த லோகா – ஸத்த விஞ்ஞாணட்டி²தியோ. அட்ட² லோகா – அட்ட² லோகத⁴ம்மா. நவ லோகா – நவ ஸத்தாவாஸா. த³ஸ லோகா – த³ஸாயதனானி. த்³வாத³ஸ லோகா – த்³வாத³ஸாயதனானி. அட்டா²ரஸ லோகா – அட்டா²ரஸ தா⁴துயோ.

வஜ்ஜந்தி ஸப்³பே³ கிலேஸா வஜ்ஜா, ஸப்³பே³ து³ச்சரிதா வஜ்ஜா, ஸப்³பே³ அபி⁴ஸங்கா²ரா வஜ்ஜா, ஸப்³பே³ ப⁴வகா³மிகம்மா வஜ்ஜா. இதி இமஸ்மிஞ்ச லோகே இமஸ்மிஞ்ச வஜ்ஜே திப்³பா³ ப⁴யஸஞ்ஞா பச்சுபட்டி²தா ஹோந்தி, ஸேய்யதா²பி உக்கி²த்தாஸிகே வத⁴கே. இமேஹி பஞ்ஞாஸாய ஆகாரேஹி இமானி பஞ்சிந்த்³ரியானி ஜானாதி பஸ்ஸதி அஞ்ஞாதி படிவிஜ்ஜ²தீதி.

இந்த்³ரியஸமோதா⁴னோ பஞ்சமோ.

ததியபா⁴ணவாரோ.

இந்த்³ரியகதா² நிட்டி²தா.