3. ததியஸுத்தந்தனித்³தே³ஸோ

194. ஸாவத்தி²னிதா³னம் [ஸம். நி. 5.478-479 பஸ்ஸிதப்³பா³]. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம். கத்த² ச, பி⁴க்க²வே, ஸத்³தி⁴ந்த்³ரியம் த³ட்ட²ப்³ப³ம்? சதூஸு ஸோதாபத்தியங்கே³ஸு – ஏத்த² ஸத்³தி⁴ந்த்³ரியம் த³ட்ட²ப்³ப³ம். கத்த² ச, பி⁴க்க²வே, வீரியிந்த்³ரியம் த³ட்ட²ப்³ப³ம்? சதூஸு ஸம்மப்பதா⁴னேஸு – ஏத்த² வீரியிந்த்³ரியம் த³ட்ட²ப்³ப³ம். கத்த² ச, பி⁴க்க²வே, ஸதிந்த்³ரியம் த³ட்ட²ப்³ப³ம்? சதூஸு ஸதிபட்டா²னேஸு – ஏத்த² ஸதிந்த்³ரியம் த³ட்ட²ப்³ப³ம். கத்த² ச, பி⁴க்க²வே, ஸமாதி⁴ந்த்³ரியம் த³ட்ட²ப்³ப³ம்? சதூஸு ஜா²னேஸு – ஏத்த² ஸமாதி⁴ந்த்³ரியம் த³ட்ட²ப்³ப³ம். கத்த² ச, பி⁴க்க²வே, பஞ்ஞிந்த்³ரியம் த³ட்ட²ப்³ப³ம்? சதூஸு அரியஸச்சேஸு – ஏத்த² பஞ்ஞிந்த்³ரியம் த³ட்ட²ப்³ப³ம்’’.

சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன கதிஹாகாரேஹி பஞ்சிந்த்³ரியானி த³ட்ட²ப்³பா³னி? சதூஸு ஸம்மப்பதா⁴னேஸு வீரியிந்த்³ரியஸ்ஸ வஸேன கதிஹாகாரேஹி பஞ்சிந்த்³ரியானி த³ட்ட²ப்³பா³னி? சதூஸு ஸதிபட்டா²னேஸு ஸதிந்த்³ரியஸ்ஸ வஸேன கதிஹாகாரேஹி பஞ்சிந்த்³ரியானி த³ட்ட²ப்³பா³னி? சதூஸு ஜா²னேஸு ஸமாதி⁴ந்த்³ரியஸ்ஸ வஸேன கதிஹாகாரேஹி பஞ்சிந்த்³ரியானி த³ட்ட²ப்³பா³னி? சதூஸு அரியஸச்சேஸு பஞ்ஞிந்த்³ரியஸ்ஸ வஸேன கதிஹாகாரேஹி பஞ்சிந்த்³ரியானி த³ட்ட²ப்³பா³னி?

சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி. சதூஸு ஸம்மப்பதா⁴னேஸு வீரியிந்த்³ரியஸ்ஸ வஸேன வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி. சதூஸு ஸதிபட்டா²னேஸு ஸதிந்த்³ரியஸ்ஸ வஸேன வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி. சதூஸு ஜா²னேஸு ஸமாதி⁴ந்த்³ரியஸ்ஸ வஸேன வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி. சதூஸு அரியஸச்சேஸு பஞ்ஞிந்த்³ரியஸ்ஸ வஸேன வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி.

க. பபே⁴த³க³ணனனித்³தே³ஸோ

195. சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி? ஸப்புரிஸஸம்ஸேவே ஸோதாபத்தியங்கே³ அதி⁴மோக்கா²தி⁴பதேய்யட்டே²ன ஸத்³தி⁴ந்த்³ரியம் த³ட்ட²ப்³ப³ம், ஸத்³தி⁴ந்த்³ரியஸ்ஸ வஸேன பக்³க³ஹட்டே²ன வீரியிந்த்³ரியம் த³ட்ட²ப்³ப³ம், உபட்டா²னட்டே²ன ஸதிந்த்³ரியம் த³ட்ட²ப்³ப³ம், அவிக்கே²பட்டே²ன ஸமாதி⁴ந்த்³ரியம் த³ட்ட²ப்³ப³ம், த³ஸ்ஸனட்டே²ன பஞ்ஞிந்த்³ரியம் த³ட்ட²ப்³ப³ம்; ஸத்³த⁴ம்மஸவனே ஸோதாபத்தியங்கே³… யோனிஸோமனஸிகாரே ஸோதாபத்தியங்கே³… த⁴ம்மானுத⁴ம்மபடிபத்தியா ஸோதாபத்தியங்கே³ அதி⁴மோக்கா²தி⁴பதேய்யட்டே²ன ஸத்³தி⁴ந்த்³ரியம் த³ட்ட²ப்³ப³ம், ஸத்³தி⁴ந்த்³ரியஸ்ஸ வஸேன பக்³க³ஹட்டே²ன வீரியிந்த்³ரியம் த³ட்ட²ப்³ப³ம், உபட்டா²னட்டே²ன ஸதிந்த்³ரியம் த³ட்ட²ப்³ப³ம், அவிக்கே²பட்டே²ன ஸமாதி⁴ந்த்³ரியம் த³ட்ட²ப்³ப³ம், த³ஸ்ஸனட்டே²ன பஞ்ஞிந்த்³ரியம் த³ட்ட²ப்³ப³ம். சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி.

சதூஸு ஸம்மப்பதா⁴னேஸு வீரியிந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி? அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ஸம்மப்பதா⁴னே பக்³க³ஹாதி⁴பதேய்யட்டே²ன வீரியிந்த்³ரியம் த³ட்ட²ப்³ப³ம், வீரியிந்த்³ரியஸ்ஸ வஸேன உபட்டா²னட்டே²ன ஸதிந்த்³ரியம் த³ட்ட²ப்³ப³ம், அவிக்கே²பட்டே²ன ஸமாதி⁴ந்த்³ரியம் த³ட்ட²ப்³ப³ம், த³ஸ்ஸனட்டே²ன பஞ்ஞிந்த்³ரியம் த³ட்ட²ப்³ப³ம், அதி⁴மோக்க²ட்டே²ன ஸத்³தி⁴ந்த்³ரியம் த³ட்ட²ப்³ப³ம். உப்பன்னானம் பாபகானம் அகுஸலானம் த⁴ம்மானம் பஹானாய ஸம்மப்பதா⁴னே…பே… அனுப்பன்னானம் குஸலானம் த⁴ம்மானம் உப்பாதா³ய ஸம்மப்பதா⁴னே…பே… உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ஸம்மப்பதா⁴னே பக்³க³ஹாதி⁴பதேய்யட்டே²ன வீரியிந்த்³ரியம் த³ட்ட²ப்³ப³ம், வீரியிந்த்³ரியஸ்ஸ வஸேன உபட்டா²னட்டே²ன ஸதிந்த்³ரியம் த³ட்ட²ப்³ப³ம், அவிக்கே²பட்டே²ன ஸமாதி⁴ந்த்³ரியம் த³ட்ட²ப்³ப³ம், த³ஸ்ஸனட்டே²ன பஞ்ஞிந்த்³ரியம் த³ட்ட²ப்³ப³ம், அதி⁴மோக்க²ட்டே²ன ஸத்³தி⁴ந்த்³ரியம் த³ட்ட²ப்³ப³ம். சதூஸு ஸம்மப்பதா⁴னேஸு வீரியிந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி.

சதூஸு ஸதிபட்டா²னேஸு ஸதிந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி? காயே காயானுபஸ்ஸனாஸதிபட்டா²னே உபட்டா²னாதி⁴பதேய்யட்டே²ன ஸதிந்த்³ரியம் த³ட்ட²ப்³ப³ம், ஸதிந்த்³ரியஸ்ஸ வஸேன அவிக்கே²பட்டே²ன ஸமாதி⁴ந்த்³ரியம் த³ட்ட²ப்³ப³ம், த³ஸ்ஸனட்டே²ன பஞ்ஞிந்த்³ரியம் த³ட்ட²ப்³ப³ம், அதி⁴மோக்க²ட்டே²ன ஸத்³தி⁴ந்த்³ரியம் த³ட்ட²ப்³ப³ம், பக்³க³ஹட்டே²ன வீரியிந்த்³ரியம் த³ட்ட²ப்³ப³ம். வேத³னாஸு வேத³னானுபஸ்ஸனாஸதிபட்டா²னே…பே… சித்தே சித்தானுபஸ்ஸனாஸதிபட்டா²னே… த⁴ம்மேஸு த⁴ம்மானுபஸ்ஸனாஸதிபட்டா²னே உபட்டா²னாதி⁴பதேய்யட்டே²ன ஸதிந்த்³ரியம் த³ட்ட²ப்³ப³ம், ஸதிந்த்³ரியஸ்ஸ வஸேன அவிக்கே²பட்டே²ன ஸமாதி⁴ந்த்³ரியம் த³ட்ட²ப்³ப³ம், த³ஸ்ஸனட்டே²ன பஞ்ஞிந்த்³ரியம் த³ட்ட²ப்³ப³ம், அதி⁴மோக்க²ட்டே²ன ஸத்³தி⁴ந்த்³ரியம் த³ட்ட²ப்³ப³ம், பக்³க³ஹட்டே²ன வீரியிந்த்³ரியம் த³ட்ட²ப்³ப³ம். சதூஸு ஸதிபட்டா²னேஸு ஸதிந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி.

சதூஸு ஜா²னேஸு ஸமாதி⁴ந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி? பட²மே ஜா²னே அவிக்கே²பாதி⁴பதேய்யட்டே²ன ஸமாதி⁴ந்த்³ரியம் த³ட்ட²ப்³ப³ம், ஸமாதி⁴ந்த்³ரியஸ்ஸ வஸேன த³ஸ்ஸனட்டே²ன பஞ்ஞிந்த்³ரியம் த³ட்ட²ப்³ப³ம், அதி⁴மோக்க²ட்டே²ன ஸத்³தி⁴ந்த்³ரியம் த³ட்ட²ப்³ப³ம், பக்³க³ஹட்டே²ன வீரியிந்த்³ரியம் த³ட்ட²ப்³ப³ம், உபட்டா²னட்டே²ன ஸதிந்த்³ரியம் த³ட்ட²ப்³ப³ம். து³தியே ஜா²னே…பே… ததியே ஜா²னே… சதுத்தே² ஜா²னே அவிக்கே²பாதி⁴பதேய்யட்டே²ன ஸமாதி⁴ந்த்³ரியம் த³ட்ட²ப்³ப³ம், ஸமாதி⁴ந்த்³ரியஸ்ஸ வஸேன த³ஸ்ஸனட்டே²ன பஞ்ஞிந்த்³ரியம் த³ட்ட²ப்³ப³ம், அதி⁴மோக்க²ட்டே²ன ஸத்³தி⁴ந்த்³ரியம் த³ட்ட²ப்³ப³ம், பக்³க³ஹட்டே²ன வீரியிந்த்³ரியம் த³ட்ட²ப்³ப³ம், உபட்டா²னட்டே²ன ஸதிந்த்³ரியம் த³ட்ட²ப்³ப³ம். சதூஸு ஜா²னேஸு ஸமாதி⁴ந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி.

சதூஸு அரியஸச்சேஸு பஞ்ஞிந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி? து³க்கே² அரியஸச்சே த³ஸ்ஸனாதி⁴பதேய்யட்டே²ன பஞ்ஞிந்த்³ரியம் த³ட்ட²ப்³ப³ம், பஞ்ஞிந்த்³ரியஸ்ஸ வஸேன அதி⁴மோக்க²ட்டே²ன ஸத்³தி⁴ந்த்³ரியம் த³ட்ட²ப்³ப³ம், பக்³க³ஹட்டே²ன வீரியிந்த்³ரியம் த³ட்ட²ப்³ப³ம், உபட்டா²னட்டே²ன ஸதிந்த்³ரியம் த³ட்ட²ப்³ப³ம், அவிக்கே²பட்டே²ன ஸமாதி⁴ந்த்³ரியம் த³ட்ட²ப்³ப³ம். து³க்க²ஸமுத³யே அரியஸச்சே…பே… து³க்க²னிரோதே⁴ அரியஸச்சே… து³க்க²னிரோத⁴கா³மினியா படிபதா³ய அரியஸச்சே த³ஸ்ஸனாதி⁴பதேய்யட்டே²ன பஞ்ஞிந்த்³ரியம் த³ட்ட²ப்³ப³ம், பஞ்ஞிந்த்³ரியஸ்ஸ வஸேன அதி⁴மோக்க²ட்டே²ன ஸத்³தி⁴ந்த்³ரியம் த³ட்ட²ப்³ப³ம், பக்³க³ஹட்டே²ன வீரியிந்த்³ரியம் த³ட்ட²ப்³ப³ம், உபட்டா²னட்டே²ன ஸதிந்த்³ரியம் த³ட்ட²ப்³ப³ம், அவிக்கே²பட்டே²ன ஸமாதி⁴ந்த்³ரியம் த³ட்ட²ப்³ப³ம். சதூஸு அரியஸச்சேஸு பஞ்ஞிந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி.

க². சரியவாரோ

196. சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன கதிஹாகாரேஹி பஞ்சன்னம் இந்த்³ரியானம் சரியா த³ட்ட²ப்³பா³?

சதூஸு ஸம்மப்பதா⁴னேஸு…பே… சதூஸு ஸதிபட்டா²னேஸு… சதூஸு ஜா²னேஸு… சதூஸு அரியஸச்சேஸு பஞ்ஞிந்த்³ரியஸ்ஸ வஸேன கதிஹாகாரேஹி பஞ்சன்னம் இந்த்³ரியானம் சரியா த³ட்ட²ப்³பா³? சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன வீஸதியா ஆகாரேஹி பஞ்சன்னம் இந்த்³ரியானம் சரியா த³ட்ட²ப்³பா³. சதூஸு ஸம்மப்பதா⁴னேஸு…பே… சதூஸு ஸதிபட்டா²னேஸு… சதூஸு ஜா²னேஸு… சதூஸு அரியஸச்சேஸு பஞ்ஞிந்த்³ரியஸ்ஸ வஸேன வீஸதியா ஆகாரேஹி பஞ்சன்னம் இந்த்³ரியானம் சரியா த³ட்ட²ப்³பா³.

சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சன்னம் இந்த்³ரியானம் சரியா த³ட்ட²ப்³பா³? ஸப்புரிஸஸம்ஸேவே ஸோதாபத்தியங்கே³ அதி⁴மோக்கா²தி⁴பதேய்யட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³, ஸத்³தி⁴ந்த்³ரியஸ்ஸ வஸேன பக்³க³ஹட்டே²ன வீரியிந்த்³ரியஸ்ஸ சரியா த³ட்ட²ப்³பா³, உபட்டா²னட்டே²ன ஸதிந்த்³ரியஸ்ஸ சரியா த³ட்ட²ப்³பா³, அவிக்கே²பட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³, த³ஸ்ஸனட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³. ஸத்³த⁴ம்மஸவனே ஸோதாபத்தியங்கே³…பே… யோனிஸோ மனஸிகாரே ஸோதாபத்தியங்கே³… த⁴ம்மானுத⁴ம்மபடிபத்தியா ஸோதாபத்தியங்கே³ அதி⁴மோக்கா²தி⁴பதேய்யட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³, ஸத்³தி⁴ந்த்³ரியஸ்ஸ வஸேன பக்³க³ஹட்டே²ன வீரியிந்த்³ரியஸ்ஸ சரியா த³ட்ட²ப்³பா³, உபட்டா²னட்டே²ன ஸதிந்த்³ரியஸ்ஸ சரியா த³ட்ட²ப்³பா³, அவிக்கே²பட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³, த³ஸ்ஸனட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³. சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சன்னம் இந்த்³ரியானம் சரியா த³ட்ட²ப்³பா³.

சதூஸு ஸம்மப்பதா⁴னேஸு வீரியிந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சன்னம் இந்த்³ரியானம் சரியா த³ட்ட²ப்³பா³? அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ஸம்மப்பதா⁴னே பக்³க³ஹாதி⁴பதேய்யட்டே²ன வீரியிந்த்³ரியஸ்ஸ சரியா த³ட்ட²ப்³பா³, வீரியிந்த்³ரியஸ்ஸ வஸேன உபட்டா²னட்டே²ன ஸதிந்த்³ரியஸ்ஸ சரியா த³ட்ட²ப்³பா³, அவிக்கே²பட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³, த³ஸ்ஸனட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³, அதி⁴மோக்க²ட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³. உப்பன்னானம் பாபகானம் அகுஸலானம் த⁴ம்மானம் பஹானாய ஸம்மப்பதா⁴னே…பே… அனுப்பன்னானம் குஸலானம் த⁴ம்மானம் உப்பாதா³ய ஸம்மப்பதா⁴னே…பே… உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ஸம்மப்பதா⁴னே பக்³க³ஹாதி⁴பதேய்யட்டே²ன வீரியிந்த்³ரியஸ்ஸ சரியா த³ட்ட²ப்³பா³…பே… சதூஸு ஸம்மப்பதா⁴னேஸு வீரியிந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சன்னம் இந்த்³ரியானம் சரியா த³ட்ட²ப்³பா³.

சதூஸு ஸதிபட்டா²னேஸு ஸதிந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சன்னம் இந்த்³ரியானம் சரியா த³ட்ட²ப்³பா³? காயே காயானுபஸ்ஸனாஸதிபட்டா²னே உபட்டா²னாதி⁴பதேய்யட்டே²ன ஸதிந்த்³ரியஸ்ஸ சரியா த³ட்ட²ப்³பா³, ஸதிந்த்³ரியஸ்ஸ வஸேன அவிக்கே²பட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³, த³ஸ்ஸனட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³, அதி⁴மோக்க²ட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³, பக்³க³ஹட்டே²ன வீரியிந்த்³ரியஸ்ஸ சரியா த³ட்ட²ப்³பா³. வேத³னாஸு வேத³னானுபஸ்ஸனாஸதிபட்டா²னே…பே… சித்தே சித்தானுபஸ்ஸனாஸதிபட்டா²னே…பே… த⁴ம்மேஸு த⁴ம்மானுபஸ்ஸனாஸதிபட்டா²னே உபட்டா²னாதி⁴பதேய்யட்டே²ன ஸதிந்த்³ரியஸ்ஸ சரியா த³ட்ட²ப்³பா³…பே… சதூஸு ஸதிபட்டா²னேஸு ஸதிந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சன்னம் இந்த்³ரியானம் சரியா த³ட்ட²ப்³பா³.

சதூஸு ஜா²னேஸு ஸமாதி⁴ந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சன்னம் இந்த்³ரியானம் சரியா த³ட்ட²ப்³பா³? பட²மே ஜா²னே அவிக்கே²பாதி⁴பதேய்யட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³, ஸமாதி⁴ந்த்³ரியஸ்ஸ வஸேன த³ஸ்ஸனட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³, அதி⁴மோக்க²ட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³, பக்³க³ஹட்டே²ன வீரியிந்த்³ரியஸ்ஸ சரியா த³ட்ட²ப்³பா³, உபட்டா²னட்டே²ன ஸதிந்த்³ரியஸ்ஸ சரியா த³ட்ட²ப்³பா³. து³தியே ஜா²னே…பே… ததியே ஜா²னே…பே… சதுத்தே² ஜா²னே அவிக்கே²பாதி⁴பதேய்யட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³…பே… சதூஸு ஜா²னேஸு ஸமாதி⁴ந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சன்னம் இந்த்³ரியானம் சரியா த³ட்ட²ப்³பா³.

சதூஸு அரியஸச்சேஸு பஞ்ஞிந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சன்னம் இந்த்³ரியானம் சரியா த³ட்ட²ப்³பா³? து³க்கே² அரியஸச்சே த³ஸ்ஸனாதி⁴பதேய்யட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³, பஞ்ஞிந்த்³ரியஸ்ஸ வஸேன அதி⁴மோக்க²ட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³, பக்³க³ஹட்டே²ன வீரியிந்த்³ரியஸ்ஸ சரியா த³ட்ட²ப்³பா³, உபட்டா²னட்டே²ன ஸதிந்த்³ரியஸ்ஸ சரியா த³ட்ட²ப்³பா³, அவிக்கே²பட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³. து³க்க²ஸமுத³யே அரியஸச்சே…பே… து³க்க²னிரோதே⁴ அரியஸச்சே… து³க்க²னிரோத⁴கா³மினியா படிபதா³ய அரியஸச்சே த³ஸ்ஸனாதி⁴பதேய்யட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³, பஞ்ஞிந்த்³ரியஸ்ஸ வஸேன அதி⁴மோக்க²ட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³, பக்³க³ஹட்டே²ன வீரியிந்த்³ரியஸ்ஸ சரியா த³ட்ட²ப்³பா³, உபட்டா²னட்டே²ன ஸதிந்த்³ரியஸ்ஸ சரியா த³ட்ட²ப்³பா³, அவிக்கே²பட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³. சதூஸு அரியஸச்சேஸு பஞ்ஞிந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சன்னம் இந்த்³ரியானம் சரியா த³ட்ட²ப்³பா³.

க³. சாரவிஹாரனித்³தே³ஸோ

197. சாரோ ச விஹாரோ ச அனுபு³த்³தோ⁴ ஹோதி படிவித்³தோ⁴, யதா²சரந்தம் யதா²விஹரந்தம் விஞ்ஞூ ஸப்³ரஹ்மசாரீ க³ம்பீ⁴ரேஸு டா²னேஸு ஓகப்பேய்யும் – ‘‘அத்³தா⁴, அயமாயஸ்மா பத்தோ வா பாபுணிஸ்ஸதி வா’’.

சரியாதி அட்ட² சரியாயோ – இரியாபத²சரியா, ஆயதனசரியா, ஸதிசரியா, ஸமாதி⁴சரியா, ஞாணசரியா, மக்³க³சரியா, பத்திசரியா, லோகத்த²சரியாதி. இரியாபத²சரியாதி சதூஸு இரியாபதே²ஸு. ஆயதனசரியாதி ச²ஸு அஜ்ஜ²த்திகபா³ஹிரேஸு ஆயதனேஸு. ஸதிசரியாதி சதூஸு ஸதிபட்டா²னேஸு. ஸமாதி⁴சரியாதி சதூஸு ஜா²னேஸு. ஞாணசரியாதி சதூஸு அரியஸச்சேஸு. மக்³க³சரியாதி சதூஸு அரியமக்³கே³ஸு. பத்திசரியாதி சதூஸு ஸாமஞ்ஞப²லேஸு. லோகத்த²சரியாதி ததா²க³தேஸு அரஹந்தேஸு ஸம்மாஸம்பு³த்³தே⁴ஸு, பதே³ஸே பச்சேகபு³த்³தே⁴ஸு, பதே³ஸே ஸாவகேஸு. இரியாபத²சரியா ச பணிதி⁴ஸம்பன்னானம், ஆயதனசரியா ச இந்த்³ரியேஸு கு³த்தத்³வாரானம், ஸதிசரியா ச அப்பமாத³விஹாரீனம், ஸமாதி⁴சரியா ச அதி⁴சித்தமனுயுத்தானம், ஞாணசரியா ச பு³த்³தி⁴ஸம்பன்னானம், மக்³க³சரியா ச ஸம்மாபடிபன்னானம், பத்திசரியா ச அதி⁴க³தப²லானம், லோகத்த²சரியா ச ததா²க³தானம் அரஹந்தானம் ஸம்மாஸம்பு³த்³தா⁴னம், பதே³ஸே பச்சேகபு³த்³தா⁴னம், பதே³ஸே ஸாவகானம். இமா அட்ட² சரியாயோ.

அபராபி அட்ட² சரியாயோ. அதி⁴முச்சந்தோ ஸத்³தா⁴ய சரதி, பக்³க³ண்ஹந்தோ வீரியேன சரதி, உபட்டா²பேந்தோ ஸதியா சரதி, அவிக்கே²பம் கரோந்தோ ஸமாதி⁴னா சரதி, பஜானந்தோ பஞ்ஞாய சரதி, விஜானந்தோ விஞ்ஞாணசரியாய சரதி, ஏவம் படிபன்னஸ்ஸ குஸலா த⁴ம்மா ஆயாபேந்தீதி ஆயதனசரியாய சரதி, ஏவம் படிபன்னோ விஸேஸமதி⁴க³ச்ச²தீதி விஸேஸசரியாய சரதி – இமா அட்ட² சரியாயோ.

அபராபி அட்ட² சரியாயோ. த³ஸ்ஸனசரியா ச ஸம்மாதி³ட்டி²யா, அபி⁴னிரோபனசரியா ச ஸம்மாஸங்கப்பஸ்ஸ, பரிக்³க³ஹசரியா ச ஸம்மாவாசாய, ஸமுட்டா²னசரியா ச ஸம்மாகம்மந்தஸ்ஸ, வோதா³னசரியா ச ஸம்மாஆஜீவஸ்ஸ, பக்³க³ஹசரியா ச ஸம்மாவாயாமஸ்ஸ, உபட்டா²னசரியா ச ஸம்மாஸதியா, அவிக்கே²பசரியா ச ஸம்மாஸமாதி⁴ஸ்ஸ – இமா அட்ட² சரியாயோ.

விஹாரோதி அதி⁴முச்சந்தோ ஸத்³தா⁴ய விஹரதி, பக்³க³ண்ஹந்தோ வீரியேன விஹரதி, உபட்டா²பேந்தோ ஸதியா விஹரதி, அவிக்கே²பம் கரோந்தோ ஸமாதி⁴னா விஹரதி, பஜானந்தோ பஞ்ஞாய விஹரதி.

அனுபு³த்³தோ⁴தி ஸத்³தி⁴ந்த்³ரியஸ்ஸ அதி⁴மோக்க²ட்டோ² அனுபு³த்³தோ⁴ ஹோதி, வீரியிந்த்³ரியஸ்ஸ பக்³க³ஹட்டோ² அனுபு³த்³தோ⁴ ஹோதி, ஸதிந்த்³ரியஸ்ஸ உபட்டா²னட்டோ² அனுபு³த்³தோ⁴ ஹோதி, ஸமாதி⁴ந்த்³ரியஸ்ஸ அவிக்கே²பட்டோ² அனுபு³த்³தோ⁴ ஹோதி, பஞ்ஞிந்த்³ரியஸ்ஸ த³ஸ்ஸனட்டோ² அனுபு³த்³தோ⁴ ஹோதி.

படிவித்³தோ⁴தி ஸத்³தி⁴ந்த்³ரியஸ்ஸ அதி⁴மோக்க²ட்டோ² படிவித்³தோ⁴ ஹோதி, வீரியிந்த்³ரியஸ்ஸ பக்³க³ஹட்டோ² படிவித்³தோ⁴ ஹோதி, ஸதிந்த்³ரியஸ்ஸ உபட்டா²னட்டோ² படிவித்³தோ⁴ ஹோதி, ஸமாதி⁴ந்த்³ரியஸ்ஸ அவிக்கே²பட்டோ² படிவித்³தோ⁴ ஹோதி, பஞ்ஞிந்த்³ரியஸ்ஸ த³ஸ்ஸனட்டோ² படிவித்³தோ⁴ ஹோதி. யதா²சரந்தந்தி ஏவம் ஸத்³தா⁴ய சரந்தம், ஏவம் வீரியேன சரந்தம், ஏவம் ஸதியா சரந்தம், ஏவம் ஸமாதி⁴னா சரந்தம், ஏவம் பஞ்ஞாய சரந்தம். யதா²விஹரந்தந்தி ஏவம் ஸத்³தா⁴ய விஹரந்தம், ஏவம் வீரியேன விஹரந்தம், ஏவம் ஸதியா விஹரந்தம், ஏவம் ஸமாதி⁴னா விஹரந்தம், ஏவம் பஞ்ஞாய விஹரந்தம். விஞ்ஞூதி விஞ்ஞூ விபா⁴வீ மேதா⁴வீ பண்டி³தா பு³த்³தி⁴ஸம்பன்னா. ஸப்³ரஹ்மசாரீதி ஏககம்மம் ஏகுத்³தே³ஸோ ஸமஸிக்க²தா. க³ம்பீ⁴ரேஸு டா²னேஸூதி க³ம்பீ⁴ரானி டா²னானி வுச்சந்தி ஜா²னா ச விமோக்கா² ச ஸமாதீ⁴ ச ஸமாபத்தியோ ச மக்³கா³ ச ப²லானி ச அபி⁴ஞ்ஞாயோ ச படிஸம்பி⁴தா³ ச. ஓகப்பேய்யுந்தி ஸத்³த³ஹேய்யும் அதி⁴முச்சேய்யும். அத்³தா⁴தி ஏகம்ஸவசனமேதம் நிஸ்ஸம்ஸயவசனமேதம் நிக்கங்க²வசனமேதம் அத்³வேஜ்ஜ²வசனமேதம் அத்³வேள்ஹகவசனமேதம் நியோக³வசனமேதம் அபண்ணகவசனமேதம் அவத்தா²பனவசனமேதம் – அத்³தா⁴தி. ஆயஸ்மாதி பியவசனமேதம் க³ருவசனமேதம் ஸகா³ரவஸப்பதிஸ்ஸாதி⁴வசனமேதம் – ஆயஸ்மாதி. பத்தோ வாதி அதி⁴க³தோ வா. பாபுணிஸ்ஸதி வாதி அதி⁴க³மிஸ்ஸதி வா.

ஸுத்தந்தனித்³தே³ஸோ ததியோ.