1. பட²மஸுத்தந்தனித்³தே³ஸோ

184. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி [‘‘ப⁴த்³த³ந்தே’’தி (க.)] தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம் – இமானி கோ², பி⁴க்க²வே, பஞ்சிந்த்³ரியானி’’ [ஸம். நி. 5.471].

185. இமானி பஞ்சிந்த்³ரியானி கதிஹாகாரேஹி விஸுஜ்ஜ²ந்தி? இமானி பஞ்சிந்த்³ரியானி பன்னரஸஹி ஆகாரேஹி விஸுஜ்ஜ²ந்தி. அஸ்ஸத்³தே⁴ புக்³க³லே பரிவஜ்ஜயதோ, ஸத்³தே⁴ புக்³க³லே ஸேவதோ ப⁴ஜதோ பயிருபாஸதோ, பஸாத³னீயே ஸுத்தந்தே பச்சவேக்க²தோ – இமேஹி தீஹாகாரேஹி ஸத்³தி⁴ந்த்³ரியம் விஸுஜ்ஜ²தி. குஸீதே புக்³க³லே பரிவஜ்ஜயதோ, ஆரத்³த⁴வீரியே புக்³க³லே ஸேவதோ ப⁴ஜதோ பயிருபாஸதோ, ஸம்மப்பதா⁴னே பச்சவேக்க²தோ – இமேஹி தீஹாகாரேஹி வீரியிந்த்³ரியம் விஸுஜ்ஜ²தி. முட்ட²ஸ்ஸதீ புக்³க³லே பரிவஜ்ஜயதோ, உபட்டி²தஸ்ஸதீ புக்³க³லே ஸேவதோ ப⁴ஜதோ பயிருபாஸதோ, ஸதிபட்டா²னே பச்சவேக்க²தோ – இமேஹி தீஹாகாரேஹி ஸதிந்த்³ரியம் விஸுஜ்ஜ²தி. அஸமாஹிதே புக்³க³லே பரிவஜ்ஜயதோ, ஸமாஹிதே புக்³க³லே ஸேவதோ ப⁴ஜதோ பயிருபாஸதோ, ஜா²னவிமோக்கே² பச்சவேக்க²தோ – இமேஹி தீஹாகாரேஹி ஸமாதி⁴ந்த்³ரியம் விஸுஜ்ஜ²தி. து³ப்பஞ்ஞே புக்³க³லே பரிவஜ்ஜயதோ, பஞ்ஞவந்தே புக்³க³லே ஸேவதோ ப⁴ஜதோ பயிருபாஸதோ, க³ம்பீ⁴ரஞாணசரியம் பச்சவேக்க²தோ – இமேஹி தீஹாகாரேஹி பஞ்ஞிந்த்³ரியம் விஸுஜ்ஜ²தி. இதி இமே பஞ்ச புக்³க³லே பரிவஜ்ஜயதோ, பஞ்ச புக்³க³லே ஸேவதோ ப⁴ஜதோ பயிருபாஸதோ, பஞ்ச ஸுத்தந்தக்க²ந்தே⁴ பச்சவேக்க²தோ – இமேஹி பன்னரஸஹி ஆகாரேஹி இமானி பஞ்சிந்த்³ரியானி விஸுஜ்ஜ²ந்தி.

கதிஹாகாரேஹி பஞ்சிந்த்³ரியானி பா⁴வியந்தி, கதிஹாகாரேஹி பஞ்சன்னம் இந்த்³ரியானம் பா⁴வனா ஹோதி? த³ஸஹாகாரேஹி பஞ்சிந்த்³ரியானி பா⁴வியந்தி, த³ஸஹாகாரேஹி பஞ்சன்னம் இந்த்³ரியானம் பா⁴வனா ஹோதி. அஸ்ஸத்³தி⁴யம் பஜஹந்தோ ஸத்³தி⁴ந்த்³ரியம் பா⁴வேதி, ஸத்³தி⁴ந்த்³ரியம் பா⁴வேந்தோ அஸ்ஸத்³தி⁴யம் பஜஹதி; கோஸஜ்ஜம் பஜஹந்தோ வீரியிந்த்³ரியம் பா⁴வேதி, வீரியிந்த்³ரியம் பா⁴வேந்தோ கோஸஜ்ஜம் பஜஹதி; பமாத³ம் பஜஹந்தோ ஸதிந்த்³ரியம் பா⁴வேதி, ஸதிந்த்³ரியம் பா⁴வேந்தோ பமாத³ம் பஜஹதி; உத்³த⁴ச்சம் பஜஹந்தோ ஸமாதி⁴ந்த்³ரியம் பா⁴வேதி, ஸமாதி⁴ந்த்³ரியம் பா⁴வேந்தோ உத்³த⁴ச்சம் பஜஹதி; அவிஜ்ஜம் பஜஹந்தோ பஞ்ஞிந்த்³ரியம் பா⁴வேதி, பஞ்ஞிந்த்³ரியம் பா⁴வேந்தோ அவிஜ்ஜம் பஜஹதி. இமேஹி த³ஸஹாகாரேஹி பஞ்சிந்த்³ரியானி பா⁴வியந்தி, இமேஹி த³ஸஹாகாரேஹி பஞ்சன்னம் இந்த்³ரியானம் பா⁴வனா ஹோதி.

கதிஹாகாரேஹி பஞ்சிந்த்³ரியானி பா⁴விதானி ஹோந்தி ஸுபா⁴விதானி? த³ஸஹாகாரேஹி பஞ்சிந்த்³ரியானி பா⁴விதானி ஹோந்தி ஸுபா⁴விதானி. அஸ்ஸத்³தி⁴யஸ்ஸ பஹீனத்தா ஸுப்பஹீனத்தா ஸத்³தி⁴ந்த்³ரியம் பா⁴விதம் ஹோதி ஸுபா⁴விதம்; ஸத்³தி⁴ந்த்³ரியஸ்ஸ பா⁴விதத்தா ஸுபா⁴விதத்தா அஸ்ஸத்³தி⁴யம் பஹீனம் ஹோதி ஸுப்பஹீனம். கோஸஜ்ஜஸ்ஸ பஹீனத்தா ஸுப்பஹீனத்தா வீரியிந்த்³ரியம் பா⁴விதம் ஹோதி ஸுபா⁴விதம்; வீரியிந்த்³ரியஸ்ஸ பா⁴விதத்தா ஸுபா⁴விதத்தா கோஸஜ்ஜம் பஹீனம் ஹோதி ஸுப்பஹீனம். பமாத³ஸ்ஸ பஹீனத்தா ஸுப்பஹீனத்தா ஸதிந்த்³ரியம் பா⁴விதம் ஹோதி ஸுபா⁴விதம்; ஸதிந்த்³ரியஸ்ஸ பா⁴விதத்தா ஸுபா⁴விதத்தா பமாதோ³ பஹீனோ ஹோதி ஸுப்பஹீனோ. உத்³த⁴ச்சஸ்ஸ பஹீனத்தா ஸுப்பஹீனத்தா ஸமாதி⁴ந்த்³ரியம் பா⁴விதம் ஹோதி ஸுபா⁴விதம்; ஸமாதி⁴ந்த்³ரியஸ்ஸ பா⁴விதத்தா ஸுபா⁴விதத்தா உத்³த⁴ச்சம் பஹீனம் ஹோதி ஸுப்பஹீனம். அவிஜ்ஜாய பஹீனத்தா பஞ்ஞிந்த்³ரியம் பா⁴விதம் ஹோதி ஸுபா⁴விதம்; பஞ்ஞிந்த்³ரியஸ்ஸ பா⁴விதத்தா ஸுபா⁴விதத்தா அவிஜ்ஜா பஹீனா ஹோதி ஸுப்பஹீனா. இமேஹி த³ஸஹாகாரேஹி பஞ்சிந்த்³ரியானி பா⁴விதானி ஹோந்தி ஸுபா⁴விதானி.

186. கதிஹாகாரேஹி பஞ்சிந்த்³ரியானி பா⁴வியந்தி, கதிஹாகாரேஹி பஞ்சிந்த்³ரியானி பா⁴விதானி சேவ ஹோந்தி ஸுபா⁴விதானி ச படிப்பஸ்ஸத்³தா⁴னி ச ஸுப்படிப்பஸ்ஸத்³தா⁴னி ச? சதூஹாகாரேஹி பஞ்சிந்த்³ரியானி பா⁴வியந்தி சதூஹாகாரேஹி பஞ்சிந்த்³ரியானி பா⁴விதானி சேவ ஹோந்தி ஸுபா⁴விதானி ச படிப்பஸ்ஸத்³தா⁴னி ச ஸுப்படிப்பஸ்ஸத்³தா⁴னி ச. ஸோதாபத்திமக்³க³க்க²ணே பஞ்சிந்த்³ரியானி பா⁴வியந்தி; ஸோதாபத்திப²லக்க²ணே பஞ்சிந்த்³ரியானி பா⁴விதானி சேவ ஹோந்தி ஸுபா⁴விதானி ச படிப்பஸ்ஸத்³தா⁴னி ச ஸுப்படிப்பஸ்ஸத்³தா⁴னி ச. ஸகதா³கா³மிமக்³க³க்க²ணே பஞ்சிந்த்³ரியானி பா⁴வியந்தி; ஸகதா³கா³மிப²லக்க²ணே பஞ்சிந்த்³ரியானி பா⁴விதானி சேவ ஹோந்தி ஸுபா⁴விதானி ச படிப்பஸ்ஸத்³தா⁴னி ச ஸுப்படிப்பஸ்ஸத்³தா⁴னி ச. அனாகா³மிமக்³க³க்க²ணே பஞ்சிந்த்³ரியானி பா⁴வியந்தி; அனாகா³மிப²லக்க²ணே பஞ்சிந்த்³ரியானி பா⁴விதானி சேவ ஹோந்தி ஸுபா⁴விதானி ச படிப்பஸ்ஸத்³தா⁴னி ச ஸுப்படிப்பஸ்ஸத்³தா⁴னி ச. அரஹத்தமக்³க³க்க²ணே பஞ்சிந்த்³ரியானி பா⁴வியந்தி; அரஹத்தப²லக்க²ணே பஞ்சிந்த்³ரியானி பா⁴விதானி சேவ ஹோந்தி ஸுபா⁴விதானி ச படிப்பஸ்ஸத்³தா⁴னி ச ஸுப்படிப்பஸ்ஸத்³தா⁴னி ச. இதி சதஸ்ஸோ மக்³க³விஸுத்³தி⁴யோ, சதஸ்ஸோ ப²லவிஸுத்³தி⁴யோ, சதஸ்ஸோ ஸமுச்சே²த³விஸுத்³தி⁴யோ, சதஸ்ஸோ படிப்பஸ்ஸத்³தி⁴விஸுத்³தி⁴யோ. இமேஹி சதூஹாகாரேஹி பஞ்சிந்த்³ரியானி பா⁴வியந்தி; இமேஹி சதூஹாகாரேஹி பஞ்சிந்த்³ரியானி பா⁴விதானி சேவ ஹோந்தி ஸுபா⁴விதானி ச படிப்பஸ்ஸத்³தா⁴னி ச ஸுப்படிப்பஸ்ஸத்³தா⁴னி ச.

கதினம் புக்³க³லானம் இந்த்³ரியபா⁴வனா; கதி புக்³க³லா பா⁴விதிந்த்³ரியா? அட்ட²ன்னம் புக்³க³லானம் இந்த்³ரியபா⁴வனா; தயோ புக்³க³லா பா⁴விதிந்த்³ரியா. கதமேஸம் அட்ட²ன்னம் புக்³க³லானம் இந்த்³ரியபா⁴வனா? ஸத்தன்னஞ்ச ஸேக்கா²னம், புது²ஜ்ஜனகல்யாணகஸ்ஸ ச – இமேஸம் அட்ட²ன்னம் புக்³க³லானம் இந்த்³ரியபா⁴வனா. கதமே தயோ புக்³க³லா பா⁴விதிந்த்³ரியா? ஸவனேன பு³த்³தோ⁴ ததா²க³தஸ்ஸ ஸாவகோ கீ²ணாஸவோ பா⁴விதிந்த்³ரியோ, ஸயம் பூ⁴தட்டே²ன பச்சேகஸம்பு³த்³தோ⁴ பா⁴விதிந்த்³ரியோ, அப்பமேய்யட்டே²ன ததா²க³தோ அரஹம் ஸம்மாஸம்பு³த்³தோ⁴ பா⁴விதிந்த்³ரியோ – இமே தயோ புக்³க³லா பா⁴விதிந்த்³ரியா. இதி இமேஸம் அட்ட²ன்னம் புக்³க³லானம் இந்த்³ரியபா⁴வனா; இமே தயோ புக்³க³லா பா⁴விதிந்த்³ரியா.

ஸுத்தந்தனித்³தே³ஸோ பட²மோ.