3. உபக்கிலேஸஞாணனித்³தே³ஸோ

பட²மச்ச²க்கம்

154. இமேஹி ச பன நீவரணேஹி விஸுத்³த⁴சித்தஸ்ஸ ஸோளஸவத்து²கம் ஆனாபானஸ்ஸதிஸமாதி⁴ம் பா⁴வயதோ க²ணிகஸமோதா⁴னா கதமே அட்டா²ரஸ உபக்கிலேஸா உப்பஜ்ஜந்தி? அஸ்ஸாஸாதி³மஜ்ஜ²பரியோஸானம் ஸதியா அனுக³ச்ச²தோ அஜ்ஜ²த்தவிக்கே²பக³தம் சித்தம் ஸமாதி⁴ஸ்ஸ பரிபந்தோ². பஸ்ஸாஸாதி³மஜ்ஜ²பரியோஸானம் ஸதியா அனுக³ச்ச²தோ ப³ஹித்³தா⁴விக்கே²பக³தம் சித்தம் ஸமாதி⁴ஸ்ஸ பரிபந்தோ². அஸ்ஸாஸபடிகங்க²னா நிகந்தி தண்ஹாசரியா ஸமாதி⁴ஸ்ஸ பரிபந்தோ². பஸ்ஸாஸபடிகங்க²னா நிகந்தி தண்ஹாசரியா ஸமாதி⁴ஸ்ஸ பரிபந்தோ². அஸ்ஸாஸேனாபி⁴துன்னஸ்ஸ பஸ்ஸாஸபடிலாபே⁴ முச்ச²னா ஸமாதி⁴ஸ்ஸ பரிபந்தோ². பஸ்ஸாஸேனாபி⁴துன்னஸ்ஸ அஸ்ஸாஸபடிலாபே⁴ முச்ச²னா ஸமாதி⁴ஸ்ஸ பரிபந்தோ².

அனுக³ச்ச²னா ச அஸ்ஸாஸம், பஸ்ஸாஸம் அனுக³ச்ச²னா;

ஸதி அஜ்ஜ²த்தவிக்கே²பா, கங்க²னா ப³ஹித்³தா⁴விக்கே²பபத்த²னா [விக்கே²பபந்த²னா (ஸ்யா.)].

அஸ்ஸாஸேனாபி⁴துன்னஸ்ஸ, பஸ்ஸாஸபடிலாபே⁴ முச்ச²னா;

பஸ்ஸாஸேனாபி⁴துன்னஸ்ஸ, அஸ்ஸாஸபடிலாபே⁴ முச்ச²னா.

ச² ஏதே உபக்கிலேஸா, ஆனாபானஸ்ஸதிஸமாதி⁴ஸ்ஸ;

யேஹி விக்கி²ப்பமானஸ்ஸ [விகம்பமானஸ்ஸ (ஸ்யா.)], நோ ச சித்தம் விமுச்சதி;

விமோக்க²ம் அப்பஜானந்தா, தே ஹோந்தி பரபத்தியாதி.

து³தியச்ச²க்கம்

155. நிமித்தம் ஆவஜ்ஜதோ அஸ்ஸாஸே சித்தம் விகம்பதி – ஸமாதி⁴ஸ்ஸ பரிபந்தோ². அஸ்ஸாஸம் ஆவஜ்ஜதோ நிமித்தே சித்தம் விகம்பதி – ஸமாதி⁴ஸ்ஸ பரிபந்தோ². நிமித்தம் ஆவஜ்ஜதோ பஸ்ஸாஸே சித்தம் விகம்பதி – ஸமாதி⁴ஸ்ஸ பரிபந்தோ². பஸ்ஸாஸம் ஆவஜ்ஜதோ நிமித்தே சித்தம் விகம்பதி – ஸமாதி⁴ஸ்ஸ பரிபந்தோ². அஸ்ஸாஸம் ஆவஜ்ஜதோ பஸ்ஸாஸே சித்தம் விகம்பதி – ஸமாதி⁴ஸ்ஸ பரிபந்தோ². பஸ்ஸாஸம் ஆவஜ்ஜதோ அஸ்ஸாஸே சித்தம் விகம்பதி – ஸமாதி⁴ஸ்ஸ பரிபந்தோ².

நிமித்தம் ஆவஜ்ஜமானஸ்ஸ, அஸ்ஸாஸே விக்கி²பதே மனோ;

அஸ்ஸாஸம் ஆவஜ்ஜமானஸ்ஸ, நிமித்தே சித்தம் விகம்பதி.

நிமித்தம் ஆவஜ்ஜமானஸ்ஸ, பஸ்ஸாஸே விக்கி²பதே மனோ;

பஸ்ஸாஸம் ஆவஜ்ஜமானஸ்ஸ, நிமித்தே சித்தம் விகம்பதி.

அஸ்ஸாஸம் ஆவஜ்ஜமானஸ்ஸ, பஸ்ஸாஸே விக்கி²பதே மனோ;

பஸ்ஸாஸம் ஆவஜ்ஜமானஸ்ஸ, அஸ்ஸாஸே சித்தம் விகம்பதி.

ச² ஏதே உபக்கிலேஸா, ஆனாபானஸ்ஸதிஸமாதி⁴ஸ்ஸ;

யேஹி விக்கி²ப்பமானஸ்ஸ, நோ ச சித்தம் விமுச்சதி;

விமோக்க²ம் அப்பஜானந்தா, தே ஹோந்தி பரபத்தியாதி.

ததியச்ச²க்கம்

156. அதீதானுதா⁴வனம் சித்தம் விக்கே²பானுபதிதம் – ஸமாதி⁴ஸ்ஸ பரிபந்தோ². அனாக³தபடிகங்க²னம் சித்தம் விகம்பிதம் – ஸமாதி⁴ஸ்ஸ பரிபந்தோ². லீனம் சித்தம் கோஸஜ்ஜானுபதிதம் – ஸமாதி⁴ஸ்ஸ பரிபந்தோ². அதிபக்³க³ஹிதம் சித்தம் உத்³த⁴ச்சானுபதிதம் – ஸமாதி⁴ஸ்ஸ பரிபந்தோ². அபி⁴னதம் சித்தம் ராகா³னுபதிதம் – ஸமாதி⁴ஸ்ஸ பரிபந்தோ². அபனதம் சித்தம் ப்³யாபாதா³னுபதிதம் – ஸமாதி⁴ஸ்ஸ பரிபந்தோ².

அதீதானுதா⁴வனம் சித்தம், அனாக³தபடிகங்க²னம் லீனம்;

அதிபக்³க³ஹிதம் அபி⁴னதம், அபனதம் சித்தம் ந ஸமாதி⁴யதி.

ச² ஏதே உபக்கிலேஸா, ஆனாபானஸ்ஸதிஸமாதி⁴ஸ்ஸ;

யேஹி உபக்கிலிட்ட²ஸங்கப்போ, அதி⁴சித்தம் நப்பஜானாதீதி.

157. அஸ்ஸாஸாதி³மஜ்ஜ²பரியோஸானம் ஸதியா அனுக³ச்ச²தோ அஜ்ஜ²த்தம் விக்கே²பக³தேன சித்தேன காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. பஸ்ஸாஸாதி³மஜ்ஜ²பரியோஸானம் ஸதியா அனுக³ச்ச²தோ ப³ஹித்³தா⁴விக்கே²பக³தேன சித்தேன காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. அஸ்ஸாஸபடிகங்க²னாய நிகந்தியா தண்ஹாசரியாய காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. பஸ்ஸாஸபடிகங்க²னாய நிகந்தியா தண்ஹாசரியாய காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. அஸ்ஸாஸேனாபி⁴துன்னஸ்ஸ பஸ்ஸாஸபடிலாபே⁴ முச்சி²தத்தா காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. பஸ்ஸாஸேனாபி⁴துன்னஸ்ஸ அஸ்ஸாஸபடிலாபே⁴ முச்சி²தத்தா காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. நிமித்தம் ஆவஜ்ஜதோ அஸ்ஸாஸே சித்தம் விகம்பிதத்தா காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. அஸ்ஸாஸம் ஆவஜ்ஜதோ நிமித்தே சித்தம் விகம்பிதத்தா காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. நிமித்தம் ஆவஜ்ஜதோ பஸ்ஸாஸே சித்தம் விகம்பிதத்தா காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. பஸ்ஸாஸம் ஆவஜ்ஜதோ நிமித்தே சித்தம் விகம்பிதத்தா காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. அஸ்ஸாஸம் ஆவஜ்ஜதோ பஸ்ஸாஸே சித்தம் விகம்பிதத்தா காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. பஸ்ஸாஸம் ஆவஜ்ஜதோ அஸ்ஸாஸே சித்தம் விகம்பிதத்தா காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. அதீதானுதா⁴வனேன சித்தேன விக்கே²பானுபதிதேன காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. அனாக³தபடிகங்க²னேன சித்தேன விகம்பிதேன காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. லீனேன சித்தேன கோஸஜ்ஜானுபதிதேன காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. அதிபக்³க³ஹிதேன சித்தேன உத்³த⁴ச்சானுபதிதேன காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. அபி⁴னதேன சித்தேன ராகா³னுபதிதேன காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச. அபனதேன சித்தேன ப்³யாபாதா³னுபதிதேன காயோபி சித்தம்பி ஸாரத்³தா⁴ ச ஹோந்தி இஞ்ஜிதா ச ப²ந்தி³தா ச.

ஆனாபானஸ்ஸதி யஸ்ஸ, பரிபுண்ணா அபா⁴விதா;

காயோபி இஞ்ஜிதோ ஹோதி, சித்தம்பி ஹோதி இஞ்ஜிதம்;

காயோபி ப²ந்தி³தோ ஹோதி, சித்தம்பி ஹோதி ப²ந்தி³தம்.

ஆனாபானஸ்ஸதி யஸ்ஸ, பரிபுண்ணா ஸுபா⁴விதா;

காயோபி அனிஞ்ஜிதோ ஹோதி, சித்தம்பி ஹோதி அனிஞ்ஜிதம்;

காயோபி அப²ந்தி³தோ ஹோதி, சித்தம்பி ஹோதி அப²ந்தி³தந்தி.

இமேஹி ச பன நீவரணேஹி விஸுத்³த⁴சித்தஸ்ஸ ஸோளஸவத்து²கம் ஆனாபானஸ்ஸதிஸமாதி⁴ம் பா⁴வயதோ க²ணிகஸமோதா⁴னா இமே அட்டா²ரஸ உபக்கிலேஸா உப்பஜ்ஜந்தி.

உபக்கிலேஸஞாணனித்³தே³ஸோ ததியோ.