2. ஸோளஸஞாணனித்³தே³ஸோ

153. இமேஹி ஸோளஸஹி ஆகாரேஹி உது³சித்தம் சித்தம் ஸமுது³சிதம் சித்தம் ஏகத்தே ஸந்திட்ட²தி, நீவரணேஹி விஸுஜ்ஜ²தி. கதமே தே ஏகத்தா? நேக்க²ம்மம் ஏகத்தம், அப்³யாபாதோ³ ஏகத்தம், ஆலோகஸஞ்ஞா ஏகத்தம், அவிக்கே²போ ஏகத்தம், த⁴ம்மவவத்தா²னம் ஏகத்தம், ஞாணம் ஏகத்தம், பாமோஜ்ஜம் ஏகத்தம், ஸப்³பே³பி குஸலா த⁴ம்மா ஏகத்தா.

நீவரணாதி, கதமே தே நீவரணா? காமச்ச²ந்தோ³ நீவரணம், ப்³யாபாதோ³ நீவரணம், தி²னமித்³த⁴ம் நீவரணம், உத்³த⁴ச்சகுக்குச்சம் நீவரணம், விசிகிச்சா² நீவரணம், அவிஜ்ஜா நீவரணம், அரதி நீவரணம், ஸப்³பே³பி அகுஸலா த⁴ம்மா நீவரணா.

நீவரணாதி, கேனட்டே²ன நீவரணா? நிய்யானாவரணட்டே²ன நீவரணா. கதமே தே நிய்யானா? நேக்க²ம்மம் அரியானம் நிய்யானம். தேன ச நேக்க²ம்மேன அரியா நிய்யந்தி. காமச்ச²ந்தோ³ நிய்யானாவரணம். தேன ச காமச்ச²ந்தே³ன நிவுதத்தா நேக்க²ம்மம் அரியானம் நிய்யானம் நப்பஜானாதீதி – காமச்ச²ந்தோ³ நிய்யானாவரணம். அப்³யாபாதோ³ அரியானம் நிய்யானம். தேன ச அப்³யாபாதே³ன அரியா நிய்யந்தி. ப்³யாபாதோ³ நிய்யானாவரணம். தேன ச ப்³யாபாதே³ன நிவுதத்தா அப்³யாபாத³ம் அரியானம் நிய்யானம் நப்பஜானாதீதி – ப்³யாபாதோ³ நிய்யானாவரணம். ஆலோகஸஞ்ஞா அரியானம் நிய்யானம். தாய ச ஆலோகஸஞ்ஞாய அரியா நிய்யந்தி. தி²னமித்³த⁴ம் நிய்யானாவரணம். தேன ச தி²னமித்³தே⁴ன நிவுதத்தா ஆலோகஸஞ்ஞம் அரியானம் நிய்யானம் நப்பஜானாதீதி – தி²னமித்³த⁴ம் நிய்யானாவரணம். அவிக்கே²போ அரியானம் நிய்யானம். தேன ச அவிக்கே²பேன அரியா நிய்யந்தி. உத்³த⁴ச்சம் நிய்யானாவரணம். தேன ச உத்³த⁴ச்சேன நிவுதத்தா அவிக்கே²பம் அரியானம் நிய்யானம் நப்பஜானாதீதி – உத்³த⁴ச்சம் நிய்யானாவரணம். த⁴ம்மவவத்தா²னம் அரியானம் நிய்யானம். தேன ச த⁴ம்மவவத்தா²னேன அரியா நிய்யந்தி. விசிகிச்சா² நிய்யானாவரணம். தாய ச விசிகிச்சா²ய நிவுதத்தா த⁴ம்மவவத்தா²னம் அரியானம் நிய்யானம் நப்பஜானாதீதி – விசிகிச்சா² நிய்யானாவரணம். ஞாணம் அரியானம் நிய்யானம். தேன ச ஞாணேன அரியா நிய்யந்தி. அவிஜ்ஜா நிய்யானாவரணம். தாய ச அவிஜ்ஜாய நிவுதத்தா ஞாணம் அரியானம் நிய்யானம் நப்பஜானாதீதி – அவிஜ்ஜா நிய்யானாவரணம். பாமோஜ்ஜம் அரியானம் நிய்யானம். தேன ச பாமோஜ்ஜேன அரியா நிய்யந்தி. அரதி நிய்யானாவரணம். தாய ச அரதியா நிவுதத்தா பாமோஜ்ஜம் அரியானம் நிய்யானம் நப்பஜானாதீதி – அரதி நிய்யானாவரணம். ஸப்³பே³பி குஸலா த⁴ம்மா அரியானம் நிய்யானம். தேஹி ச குஸலேஹி த⁴ம்மேஹி அரியா நிய்யந்தி. ஸப்³பே³பி அகுஸலா த⁴ம்மா நிய்யானாவரணா. தேஹி ச அகுஸலேஹி த⁴ம்மேஹி நிவுதத்தா குஸலே த⁴ம்மே அரியானம் நிய்யானம் நப்பஜானாதீதி – ஸப்³பே³பி அகுஸலா த⁴ம்மா நிய்யானாவரணா. இமேஹி ச பன நீவரணேஹி விஸுத்³த⁴சித்தஸ்ஸ ஸோளஸவத்து²கம் ஆனாபானஸ்ஸதிஸமாதி⁴ம் பா⁴வயதோ க²ணிகஸமோதா⁴னா.

ஸோளஸஞாணனித்³தே³ஸோ து³தியோ.