10. மண்ட³பேய்யகதா²

238. ‘‘மண்ட³பேய்யமித³ம், பி⁴க்க²வே, ப்³ரஹ்மசரியம். ஸத்தா² ஸம்முகீ²பூ⁴தோ தித⁴த்தமண்டோ³ [திவிதோ⁴ மண்டோ³ (ப³ஹூஸு) அட்ட²கதா² ஓலோகேதப்³பா³]. ஸத்த²ரி ஸம்முகீ²பூ⁴தே தே³ஸனாமண்டோ³, படிக்³க³ஹமண்டோ³, ப்³ரஹ்மசரியமண்டோ³’’.

கதமோ தே³ஸனாமண்டோ³? சதுன்னம் அரியஸச்சானம் ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம் [உத்தானிகம்மம் (க.)], சதுன்னம் ஸதிபட்டா²னானம்…பே… சதுன்னம் ஸம்மப்பதா⁴னானம்… சதுன்னம் இத்³தி⁴பாதா³னம்… பஞ்சன்னம் இந்த்³ரியானம்… பஞ்சன்னம் ப³லானம்… ஸத்தன்னம் போ³ஜ்ஜ²ங்கா³னம்… அரியஸ்ஸ அட்ட²ங்கி³கஸ்ஸ மக்³க³ஸ்ஸ ஆசிக்க²னா தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம் – அயம் தே³ஸனாமண்டோ³.

கதமோ படிக்³க³ஹமண்டோ³? பி⁴க்கூ² பி⁴க்கு²னியோ உபாஸகா உபாஸிகாயோ தே³வா மனுஸ்ஸா யே வா பனஞ்ஞேபி கேசி விஞ்ஞாதாரோ – அயம் படிக்³க³ஹமண்டோ³.

கதமோ ப்³ரஹ்மசரியமண்டோ³? அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴ – அயம் ப்³ரஹ்மசரியமண்டோ³.

239. அதி⁴மோக்க²மண்டோ³ ஸத்³தி⁴ந்த்³ரியம், அஸ்ஸத்³தி⁴யம் கஸடோ; அஸ்ஸத்³தி⁴யம் கஸடம் ச²ட்³டே³த்வா ஸத்³தி⁴ந்த்³ரியஸ்ஸ அதி⁴மோக்க²மண்ட³ம் பிவதீதி – மண்ட³பேய்யம். பக்³க³ஹமண்டோ³ வீரியிந்த்³ரியம், கோஸஜ்ஜம் கஸடோ; கோஸஜ்ஜம் கஸடம் ச²ட்³டே³த்வா வீரியிந்த்³ரியஸ்ஸ பக்³க³ஹமண்ட³ம் பிவதீதி – மண்ட³பேய்யம். உபட்டா²னமண்டோ³ ஸதிந்த்³ரியம், பமாதோ³ கஸடோ; பமாத³ம் கஸடம் ச²ட்³டே³த்வா ஸதிந்த்³ரியஸ்ஸ உபட்டா²னமண்ட³ம் பிவதீதி – மண்ட³பேய்யம். அவிக்கே²பமண்டோ³ ஸமாதி⁴ந்த்³ரியம், உத்³த⁴ச்சம் கஸடோ; உத்³த⁴ச்சம் கஸடம் ச²ட்³டே³த்வா ஸமாதி⁴ந்த்³ரியஸ்ஸ அவிக்கே²பமண்ட³ம் பிவதீதி – மண்ட³பேய்யம். த³ஸ்ஸனமண்டோ³ பஞ்ஞிந்த்³ரியம், அவிஜ்ஜம் கஸடோ; அவிஜ்ஜம் கஸடம் ச²ட்³டே³த்வா பஞ்ஞிந்த்³ரியஸ்ஸ த³ஸ்ஸனமண்ட³ம் பிவதீதி – மண்ட³பேய்யம்.

அஸ்ஸத்³தி⁴யே அகம்பியமண்டோ³ ஸத்³தா⁴ப³லம், அஸ்ஸத்³தி⁴யம் கஸடோ; அஸ்ஸத்³தி⁴யம் கஸடம் ச²ட்³டே³த்வா ஸத்³தா⁴ப³லஸ்ஸ அஸ்ஸத்³தி⁴யே அகம்பியமண்ட³ம் பிவதீதி – மண்ட³பேய்யம். கோஸஜ்ஜே அகம்பியமண்டோ³ வீரியப³லம், கோஸஜ்ஜம் கஸடோ; கோஸஜ்ஜம் கஸடம் ச²ட்³டே³த்வா வீரியப³லஸ்ஸ கோஸஜ்ஜே அகம்பியமண்ட³ம் பிவதீதி – மண்ட³பேய்யம். பமாதே³ அகம்பியமண்டோ³ ஸதிப³லம், பமாதோ³ கஸடோ; பமாத³ம் கஸடம் ச²ட்³டே³த்வா ஸதிப³லஸ்ஸ பமாதே³ அகம்பியமண்ட³ம் பிவதீதி – மண்ட³பேய்யம். உத்³த⁴ச்சே அகம்பியமண்டோ³ ஸமாதி⁴ப³லம், உத்³த⁴ச்சம் கஸடோ; உத்³த⁴ச்சம் கஸடம் ச²ட்³டே³த்வா ஸமாதி⁴ப³லஸ்ஸ உத்³த⁴ச்சே அகம்பியமண்ட³ம் பிவதீதி – மண்ட³பேய்யம். அவிஜ்ஜாய அகம்பியமண்டோ³ பஞ்ஞாப³லம், அவிஜ்ஜா கஸடோ; அவிஜ்ஜம் கஸடம் ச²ட்³டே³த்வா பஞ்ஞாப³லஸ்ஸ அவிஜ்ஜாய அகம்பியமண்ட³ம் பிவதீதி – மண்ட³பேய்யம்.

உபட்டா²னமண்டோ³ ஸதிஸம்போ³ஜ்ஜ²ங்கா³, பமாதோ³ கஸடோ; பமாத³ம் கஸடம் ச²ட்³டே³த்வா ஸதிஸம்போ³ஜ்ஜ²ங்க³ஸ்ஸ உபட்டா²னமண்ட³ம் பிவதீதி – மண்ட³பேய்யம். பவிசயமண்டோ³ த⁴ம்மவிசயஸம்போ³ஜ்ஜ²ங்கோ³, அவிஜ்ஜா கஸடோ; அவிஜ்ஜம் கஸடம் ச²ட்³டே³த்வா த⁴ம்மவிசயஸம்போ³ஜ்ஜ²ங்க³ஸ்ஸ பவிசயமண்ட³ம் பிவதீதி – மண்ட³பேய்யம். பக்³க³ஹமண்டோ³ வீரியஸம்போ³ஜ்ஜ²ங்கோ³, கோஸஜ்ஜம் கஸடோ; கோஸஜ்ஜம் கஸடம் ச²ட்³டே³த்வா வீரியஸம்போ³ஜ்ஜ²ங்க³ஸ்ஸ பக்³க³ஹமண்ட³ம் பிவதீதி – மண்ட³பேய்யம். ப²ரணமண்டோ³ பீதிஸம்போ³ஜ்ஜ²ங்கோ³, பரிளாஹோ கஸடோ; பரிளாஹம் கஸடம் ச²ட்³டே³த்வா பீதிஸம்போ³ஜ்ஜ²ங்க³ஸ்ஸ ப²ரணமண்ட³ம் பிவதீதி – மண்ட³பேய்யம். உபஸமமண்டோ³ பஸ்ஸத்³தி⁴ஸம்போ³ஜ்ஜ²ங்கோ³, து³ட்டு²ல்லம் கஸடோ; து³ட்டு²ல்லம் கஸடம் ச²ட்³டே³த்வா பஸ்ஸத்³தி⁴ஸம்போ³ஜ்ஜ²ங்க³ஸ்ஸ உபஸமமண்ட³ம் பிவதீதி – மண்ட³பேய்யம். அவிக்கே²பமண்டோ³ ஸமாதி⁴ஸம்போ³ஜ்ஜ²ங்கோ³, உத்³த⁴ச்சம் கஸடோ; உத்³த⁴ச்சம் கஸடம் ச²ட்³டே³த்வா ஸமாதி⁴ஸம்போ³ஜ்ஜ²ங்க³ஸ்ஸ அவிக்கே²பமண்ட³ம் பிவதீதி – மண்ட³பேய்யம். படிஸங்கா²னமண்டோ³ உபேக்கா²ஸம்போ³ஜ்ஜ²ங்கோ³, அப்படிஸங்கா² கஸடோ; அப்படிஸங்க²ம் கஸடம் ச²ட்³டே³த்வா உபேக்கா²ஸம்போ³ஜ்ஜ²ங்க³ஸ்ஸ படிஸங்கா²னமண்ட³ம் பிவதீதி – மண்ட³பேய்யம்.

த³ஸ்ஸனமண்டோ³ ஸம்மாதி³ட்டி², மிச்சா²தி³ட்டி² கஸடோ; மிச்சா²தி³ட்டி²ம் கஸடம் ச²ட்³டே³த்வா ஸம்மாதி³ட்டி²யா த³ஸ்ஸனமண்ட³ம் பிவதீதி – மண்ட³பேய்யம். அபி⁴னிரோபனமண்டோ³ ஸம்மாஸங்கப்போ, மிச்சா²ஸங்கப்போ கஸடோ; மிச்சா²ஸங்கப்பம் கஸடம் ச²ட்³டே³த்வா ஸம்மாஸங்கப்பஸ்ஸ அபி⁴னிரோபனமண்ட³ம் பிவதீதி – மண்ட³பேய்யம். பரிக்³க³ஹமண்டோ³ ஸம்மாவாசா, மிச்சா²வாசா கஸடோ; மிச்சா²வாசம் கஸடம் ச²ட்³டே³த்வா ஸம்மாவாசாய பரிக்³க³ஹமண்ட³ம் பிவதீதி – மண்ட³பேய்யம். ஸமுட்டா²னமண்டோ³ ஸம்மாகம்மந்தோ, மிச்சா²கம்மந்தோ கஸடோ; மிச்சா²கம்மந்தம் கஸடம் ச²ட்³டே³த்வா ஸம்மாகம்மந்தஸ்ஸ ஸமுட்டா²னமண்ட³ம் பிவதீதி – மண்ட³பேய்யம். வோதா³னமண்டோ³ ஸம்மாஆஜீவோ, மிச்சா²ஆஜீவோ கஸடோ; மிச்சா²ஆஜீவம் கஸடம் ச²ட்³டே³த்வா ஸம்மாஆஜீவஸ்ஸ வோதா³னமண்ட³ம் பிவதீதி – மண்ட³பேய்யம். பக்³க³ஹமண்டோ³ ஸம்மாவாயாமோ, மிச்சா²வாயாமோ கஸடோ; மிச்சா²வாயாமம் கஸடம் ச²ட்³டே³த்வா ஸம்மாவாயாமஸ்ஸ பக்³க³ஹமண்ட³ம் பிவதீதி – மண்ட³பேய்யம். உபட்டா²னமண்டோ³ ஸம்மாஸதி, மிச்சா²ஸதி கஸடோ; மிச்சா²ஸதிம் கஸடம் ச²ட்³டே³த்வா ஸம்மாஸதியா உபட்டா²னமண்ட³ம் பிவதீதி – மண்ட³பேய்யம். அவிக்கே²பமண்டோ³ ஸம்மாஸமாதி⁴, மிச்சா²ஸமாதி⁴ கஸடோ; மிச்சா²ஸமாதி⁴ம் கஸடம் ச²ட்³டே³த்வா ஸம்மாஸமாதி⁴ஸ்ஸ அவிக்கே²பமண்ட³ம் பிவதீதி – மண்ட³பேய்யம்.

240. அத்தி² மண்டோ³, அத்தி² பேய்யம், அத்தி² கஸடோ. அதி⁴மோக்க²மண்டோ³ ஸத்³தி⁴ந்த்³ரியம், அஸ்ஸத்³தி⁴யம் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். பக்³க³ஹமண்டோ³ வீரியிந்த்³ரியம், கோஸஜ்ஜம் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். உபட்டா²னமண்டோ³ ஸதிந்த்³ரியம், பமாதோ³ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். அவிக்கே²பமண்டோ³ ஸமாதி⁴ந்த்³ரியம், உத்³த⁴ச்சம் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். த³ஸ்ஸனமண்டோ³ பஞ்ஞிந்த்³ரியம், அவிஜ்ஜா கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம்.

அஸ்ஸத்³தி⁴யே அகம்பியமண்டோ³ ஸத்³தா⁴ப³லம், அஸ்ஸத்³தி⁴யம் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். கோஸஜ்ஜே அகம்பியமண்டோ³ வீரியப³லம், கோஸஜ்ஜம் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். பமாதே³ அகம்பியமண்டோ³ ஸதிப³லம், பமாதோ³ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். உத்³த⁴ச்சே அகம்பியமண்டோ³ ஸமாதி⁴ப³லம், உத்³த⁴ச்சம் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். அவிஜ்ஜாய அகம்பியமண்டோ³ பஞ்ஞாப³லம், அவிஜ்ஜா கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம்.

உபட்டா²னமண்டோ³ ஸதிஸம்போ³ஜ்ஜ²ங்கோ³, பமாதோ³ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். பவிசயமண்டோ³ த⁴ம்மவிசயஸம்போ³ஜ்ஜ²ங்கோ³, அவிஜ்ஜா கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். பக்³க³ஹமண்டோ³ வீரியஸம்போ³ஜ்ஜ²ங்கோ³, கோஸஜ்ஜம் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். ப²ரணமண்டோ³ பீதிஸம்போ³ஜ்ஜ²ங்கோ³, பரிளாஹோ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். உபஸமமண்டோ³ பஸ்ஸத்³தி⁴ஸம்போ³ஜ்ஜ²ங்கோ³, து³ட்டு²ல்லம் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். அவிக்கே²பமண்டோ³ ஸமாதி⁴ஸம்போ³ஜ்ஜ²ங்கோ³, உத்³த⁴ச்சம் கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். படிஸங்கா²னமண்டோ³ உபேக்கா²ஸம்போ³ஜ்ஜ²ங்கோ³, அபடிஸங்கா² கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம்.

த³ஸ்ஸனமண்டோ³ ஸம்மாதி³ட்டி², மிச்சா²தி³ட்டி² கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். அபி⁴னிரோபனமண்டோ³ ஸம்மாஸங்கப்போ, மிச்சா²ஸங்கப்போ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். பரிக்³க³ஹமண்டோ³ ஸம்மாவாசா, மிச்சா²வாசா கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். ஸமுட்டா²னமண்டோ³ ஸம்மாகம்மந்தோ, மிச்சா²கம்மந்தோ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். வோதா³னமண்டோ³ ஸம்மாஆஜீவோ, மிச்சா²ஆஜீவோ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். பக்³க³ஹமண்டோ³ ஸம்மாவாயாமோ, மிச்சா²வாயாமோ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். உபட்டா²னமண்டோ³ ஸம்மாஸதி, மிச்சா²ஸதி கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம். அவிக்கே²பமண்டோ³ ஸம்மாஸமாதி⁴, மிச்சா²ஸமாதி⁴ கஸடோ; யோ தத்த² அத்த²ரஸோ த⁴ம்மரஸோ விமுத்திரஸோ – இத³ம் பேய்யம்.

த³ஸ்ஸனமண்டோ³ ஸம்மாதி³ட்டி²… அபி⁴னிரோபனமண்டோ³ ஸம்மாஸங்கப்போ… பரிக்³க³ஹமண்டோ³ ஸம்மாவாசா… ஸமுட்டா²னமண்டோ³ ஸம்மாகம்மந்தோ… வோதா³னமண்டோ³ ஸம்மாஆஜீவோ… பக்³க³ஹமண்டோ³ ஸம்மாவாயாமோ… உபட்டா²னமண்டோ³ ஸம்மாஸதி… அவிக்கே²பமண்டோ³ ஸம்மாஸமாதி⁴.

உபட்டா²னமண்டோ³ ஸதிஸம்போ³ஜ்ஜ²ங்கோ³… பவிசயமண்டோ³ த⁴ம்மவிசயஸம்போ³ஜ்ஜ²ங்கோ³… பக்³க³ஹமண்டோ³ வீரியஸம்போ³ஜ்ஜ²ங்கோ³… ப²ரணமண்டோ³ பீதிஸம்போ³ஜ்ஜ²ங்கோ³… உபஸமமண்டோ³ பஸ்ஸத்³தி⁴ஸம்போ³ஜ்ஜ²ங்கோ³… அவிக்கே²பமண்டோ³ ஸமாதி⁴ஸம்போ³ஜ்ஜ²ங்கோ³… படிஸங்கா²னமண்டோ³ உபேக்கா²ஸம்போ³ஜ்ஜ²ங்கோ³.

அஸ்ஸத்³தி⁴யே அகம்பியமண்டோ³ ஸத்³தா⁴ப³லம்… கோஸஜ்ஜே அகம்பியமண்டோ³ வீரியப³லம்… பமாதே³ அகம்பியமண்டோ³ ஸதிப³லம்… உத்³த⁴ச்சே அகம்பியமண்டோ³ ஸமாதி⁴ப³லம்… அவிஜ்ஜாய அகம்பியமண்டோ³ பஞ்ஞாப³லம்.

அதி⁴மோக்க²மண்டோ³ ஸத்³தி⁴ந்த்³ரியம்… பக்³க³ஹமண்டோ³ வீரியிந்த்³ரியம்… உபட்டா²னமண்டோ³ ஸதிந்த்³ரியம்… அவிக்கே²பமண்டோ³ ஸமாதி⁴ந்த்³ரியம்… த³ஸ்ஸனமண்டோ³ பஞ்ஞிந்த்³ரியம்.

ஆதி⁴பதேய்யட்டே²ன இந்த்³ரியா மண்டோ³, அகம்பியட்டே²ன ப³லா மண்டோ³, நிய்யானட்டே²ன போ³ஜ்ஜ²ங்கா³ மண்டோ³, ஹேதுட்டே²ன மக்³கோ³ மண்டோ³, உபட்டா²னட்டே²ன ஸதிபட்டா²னா மண்டோ³, பத³ஹனட்டே²ன ஸம்மப்பதா⁴னா மண்டோ³, இஜ்ஜ²னட்டே²ன இத்³தி⁴பாதா³ மண்டோ³, தத²ட்டே²ன ஸச்சா மண்டோ³, அவிக்கே²பட்டே²ன ஸமதோ² மண்டோ³, அனுபஸ்ஸனட்டே²ன விபஸ்ஸனா மண்டோ³, ஏகரஸட்டே²ன ஸமத²விபஸ்ஸனா மண்டோ³, அனதிவத்தனட்டே²ன யுக³னத்³தா⁴ மண்டோ³, ஸம்வரட்டே²ன ஸீலவிஸுத்³தி⁴ மண்டோ³, அவிக்கே²பட்டே²ன சித்தவிஸுத்³தி⁴ மண்டோ³, த³ஸ்ஸனட்டே²ன தி³ட்டி²விஸுத்³தி⁴ மண்டோ³, முத்தட்டே²ன விமோக்கோ² மண்டோ³, படிவேத⁴ட்டே²ன விஜ்ஜா மண்டோ³, பரிச்சாக³ட்டே²ன விமுத்தி மண்டோ³, ஸமுச்சே²த³ட்டே²ன க²யே ஞாணம் மண்டோ³, படிப்பஸ்ஸத்³த⁴ட்டே²ன அனுப்பாதே³ ஞாணம் மண்டோ³, ச²ந்தோ³ மூலட்டே²ன மண்டோ³, மனஸிகாரோ ஸமுட்டா²னட்டே²ன மண்டோ³, ப²ஸ்ஸோ ஸமோதா⁴னட்டே²ன மண்டோ³, வேத³னா ஸமோஸரணட்டே²ன மண்டோ³, ஸமாதி⁴ பமுக²ட்டே²ன மண்டோ³, ஸதி ஆதி⁴பதேய்யட்டே²ன மண்டோ³, பஞ்ஞா ததுத்தரட்டே²ன மண்டோ³, விமுத்தி ஸாரட்டே²ன மண்டோ³, அமதோக³த⁴ம் நிப்³பா³னம் பரியோஸானட்டே²ன மண்டோ³தி.

சதுத்த²பா⁴ணவாரோ.

மண்ட³பேய்யகதா² நிட்டி²தா.

மஹாவக்³கோ³ பட²மோ.