55. ஆஸவக்க²யஞாணனித்³தே³ஸோ

107. கத²ம் சதுஸட்டி²யா ஆகாரேஹி திண்ணன்னம் இந்த்³ரியானம் வஸிபா⁴வதா பஞ்ஞா ஆஸவானம் க²யே ஞாணம்? கதமேஸம் திண்ணன்னம் இந்த்³ரியானம்? அனஞ்ஞாதஞ்ஞஸ்ஸாமீதிந்த்³ரியஸ்ஸ அஞ்ஞிந்த்³ரியஸ்ஸ அஞ்ஞாதாவிந்த்³ரியஸ்ஸ.

அனஞ்ஞாதஞ்ஞஸ்ஸாமீதிந்த்³ரியம் கதி டா²னானி க³ச்ச²தி, அஞ்ஞிந்த்³ரியம் கதி டா²னானி க³ச்ச²தி, அஞ்ஞாதாவிந்த்³ரியம் கதி டா²னானி க³ச்ச²தி? அனஞ்ஞாதஞ்ஞஸ்ஸாமீதிந்த்³ரியம் ஏகம் டா²னம் க³ச்ச²தி – ஸோதாபத்திமக்³க³ம். அஞ்ஞிந்த்³ரியம் ச² டா²னானி க³ச்ச²தி – ஸோதாபத்திப²லம், ஸகதா³கா³மிமக்³க³ம், ஸகதா³கா³மிப²லம், அனாகா³மிமக்³க³ம், அனாகா³மிப²லம், அரஹத்தமக்³க³ம். அஞ்ஞாதாவிந்த்³ரியம் ஏகம் டா²னம் க³ச்ச²தி – அரஹத்தப²லம்.

ஸோதாபத்திமக்³க³க்க²ணே அனஞ்ஞாதஞ்ஞஸ்ஸாமீதிந்த்³ரியஸ்ஸ ஸத்³தி⁴ந்த்³ரியம் அதி⁴மோக்க²பரிவாரம் ஹோதி, வீரியிந்த்³ரியம் பக்³க³ஹபரிவாரம் ஹோதி, ஸதிந்த்³ரியம் உபட்டா²னபரிவாரம் ஹோதி, ஸமாதி⁴ந்த்³ரியம் அவிக்கே²பபரிவாரம் ஹோதி, பஞ்ஞிந்த்³ரியம் த³ஸ்ஸனபரிவாரம் ஹோதி, மனிந்த்³ரியம் விஜானனபரிவாரம் ஹோதி, ஸோமனஸ்ஸிந்த்³ரியம் அபி⁴ஸந்த³னபரிவாரம் ஹோதி, ஜீவிதிந்த்³ரியம் பவத்தஸந்ததாதி⁴பதேய்யபரிவாரம் ஹோதி. ஸோதாபத்திமக்³க³க்க²ணே ஜாதா த⁴ம்மா ட²பேத்வா சித்தஸமுட்டா²னம் ரூபம் ஸப்³பே³வ குஸலா ஹோந்தி, ஸப்³பே³வ அனாஸவா ஹோந்தி, ஸப்³பே³வ நிய்யானிகா ஹோந்தி, ஸப்³பே³வ அபசயகா³மினோ ஹோந்தி, ஸப்³பே³வ லோகுத்தரா ஹோந்தி, ஸப்³பே³வ நிப்³பா³னாரம்மணா ஹோந்தி. ஸோதாபத்திமக்³க³க்க²ணே அனஞ்ஞாதஞ்ஞஸ்ஸாமீதிந்த்³ரியஸ்ஸ இமானி அட்டி²ந்த்³ரியானி ஸஹஜாதபரிவாரா ஹோந்தி, அஞ்ஞமஞ்ஞபரிவாரா ஹோந்தி, நிஸ்ஸயபரிவாரா ஹோந்தி, ஸம்பயுத்தபரிவாரா ஹோந்தி, ஸஹக³தா ஹோந்தி, ஸஹஜாதா ஹோந்தி, ஸம்ஸட்டா² ஹோந்தி, ஸம்பயுத்தா ஹோந்தி. தேவ தஸ்ஸ ஆகாரா சேவ ஹோந்தி பரிவாரா ச.

ஸோதாபத்திப²லக்க²ணே அஞ்ஞிந்த்³ரியஸ்ஸ ஸத்³தி⁴ந்த்³ரியம் அதி⁴மோக்க²பரிவாரம் ஹோதி, வீரியிந்த்³ரியம் பக்³க³ஹபரிவாரம் ஹோதி, ஸதிந்த்³ரியம் உபட்டா²னபரிவாரம் ஹோதி, ஸமாதி⁴ந்த்³ரியம் அவிக்கே²பபரிவாரம் ஹோதி, பஞ்ஞிந்த்³ரியம் த³ஸ்ஸனபரிவாரம் ஹோதி, மனிந்த்³ரியம் விஜானனபரிவாரம் ஹோதி, ஸோமனஸ்ஸிந்த்³ரியம் அபி⁴ஸந்த³னபரிவாரம் ஹோதி, ஜீவிதிந்த்³ரியம் பவத்தஸந்ததாதி⁴பதேய்யபரிவாரம் ஹோதி. ஸோதாபத்திப²லக்க²ணே ஜாதா த⁴ம்மா ஸப்³பே³வ அப்³யாகதா ஹோந்தி, ட²பேத்வா சித்தஸமுட்டா²னம் ரூபம் ஸப்³பே³வ அனாஸவா ஹோந்தி, ஸப்³பே³வ லோகுத்தரா ஹோந்தி, ஸப்³பே³வ நிப்³பா³னாரம்மணா ஹோந்தி. ஸோதாபத்திப²லக்க²ணே அஞ்ஞிந்த்³ரியஸ்ஸ இமானி அட்டி²ந்த்³ரியானி ஸஹஜாதபரிவாரா ஹோந்தி, அஞ்ஞமஞ்ஞபரிவாரா ஹோந்தி, நிஸ்ஸயபரிவாரா ஹோந்தி, ஸம்பயுத்தபரிவாரா ஹோந்தி, ஸஹக³தா ஹோந்தி, ஸஹஜாதா ஹோந்தி, ஸம்ஸட்டா² ஹோந்தி, ஸம்பயுத்தா ஹோந்தி. தேவ தஸ்ஸ ஆகாரா சேவ ஹோந்தி பரிவாரா ச.

ஸகதா³கா³மிமக்³க³க்க²ணே …பே… ஸகதா³கா³மிப²லக்க²ணே…பே… அனாகா³மிமக்³க³க்க²ணே…பே… அனாகா³மிப²லக்க²ணே…பே… அரஹத்தமக்³க³க்க²ணே அஞ்ஞிந்த்³ரியஸ்ஸ ஸத்³தி⁴ந்த்³ரியம் அதி⁴மோக்க²பரிவாரம் ஹோதி…பே… ஜீவிதிந்த்³ரியம் பவத்தஸந்ததாதி⁴பதேய்யபரிவாரம் ஹோதி. அரஹத்தமக்³க³க்க²ணே ஜாதா த⁴ம்மா ட²பேத்வா சித்தஸமுட்டா²னம் ரூபம் ஸப்³பே³வ குஸலா ஹோந்தி, ஸப்³பே³வ அனாஸவா ஹோந்தி, ஸப்³பே³வ நிய்யானிகா ஹோந்தி, ஸப்³பே³வ அபசயகா³மினோ ஹோந்தி, ஸப்³பே³வ லோகுத்தரா ஹோந்தி, ஸப்³பே³வ நிப்³பா³னாரம்மணா ஹோந்தி. அரஹத்தமக்³க³க்க²ணே அஞ்ஞிந்த்³ரியஸ்ஸ இமானி அட்டி²ந்த்³ரியானி ஸஹஜாதபரிவாரா ஹோந்தி, அஞ்ஞமஞ்ஞபரிவாரா ஹோந்தி, நிஸ்ஸயபரிவாரா ஹோந்தி, ஸம்பயுத்தபரிவாரா ஹோந்தி, ஸஹக³தா ஹோந்தி, ஸஹஜாதா ஹோந்தி, ஸம்ஸட்டா² ஹோந்தி, ஸம்பயுத்தா ஹோந்தி. தேவ தஸ்ஸ ஆகாரா சேவ ஹோந்தி பரிவாரா ச.

அரஹத்தப²லக்க²ணே அஞ்ஞாதாவிந்த்³ரியஸ்ஸ ஸத்³தி⁴ந்த்³ரியம் அதி⁴மோக்க²பரிவாரம் ஹோதி, வீரியிந்த்³ரியம் பக்³க³ஹபரிவாரம் ஹோதி, ஸதிந்த்³ரியம் உபட்டா²னபரிவாரம் ஹோதி, ஸமாதி⁴ந்த்³ரியம் அவிக்கே²பபரிவாரம் ஹோதி, பஞ்ஞிந்த்³ரியம் த³ஸ்ஸனபரிவாரம் ஹோதி, மனிந்த்³ரியம் விஜானனபரிவாரம் ஹோதி, ஸோமனஸ்ஸிந்த்³ரியம் அபி⁴ஸந்த³னபரிவாரம் ஹோதி, ஜீவிதிந்த்³ரியம் பவத்தஸந்ததாதி⁴பதேய்யபரிவாரம் ஹோதி. அரஹத்தப²லக்க²ணே ஜாதா த⁴ம்மா ஸப்³பே³வ அப்³யாகதா ஹோந்தி, ட²பேத்வா சித்தஸமுட்டா²னம் ரூபம் ஸப்³பே³வ அனாஸவா ஹோந்தி, ஸப்³பே³வ லோகுத்தரா ஹோந்தி, ஸப்³பே³வ நிப்³பா³னாரம்மணா ஹோந்தி. அரஹத்தப²லக்க²ணே அஞ்ஞாதாவிந்த்³ரியஸ்ஸ இமானி அட்டி²ந்த்³ரியானி ஸஹஜாதபரிவாரா ஹோந்தி, அஞ்ஞமஞ்ஞபரிவாரா ஹோந்தி, நிஸ்ஸயபரிவாரா ஹோந்தி, ஸம்பயுத்தபரிவாரா ஹோந்தி, ஸஹக³தா ஹோந்தி, ஸஹஜாதா ஹோந்தி, ஸம்ஸட்டா² ஹோந்தி, ஸம்பயுத்தா ஹோந்தி. தேவ தஸ்ஸ ஆகாரா சேவ ஹோந்தி பரிவாரா ச. இதி இமானி அட்ட²ட்ட²கானி சதுஸட்டி² ஹோந்தி.

ஆஸவாதி கதமே தே ஆஸவா? காமாஸவோ, ப⁴வாஸவோ, தி³ட்டா²ஸவோ, அவிஜ்ஜாஸவோ. கத்தே²தே ஆஸவா கீ²யந்தி? ஸோதாபத்திமக்³கே³ன அனவஸேஸோ தி³ட்டா²ஸவோ கீ²யதி, அபாயக³மனீயோ காமாஸவோ கீ²யதி, அபாயக³மனீயோ ப⁴வாஸவோ கீ²யதி, அபாயக³மனீயோ அவிஜ்ஜாஸவோ கீ²யதி. ஏத்தே²தே ஆஸவா கீ²யந்தி. ஸகதா³கா³மிமக்³கே³ன ஓளாரிகோ காமாஸவோ கீ²யதி, ததே³கட்டோ² ப⁴வாஸவோ கீ²யதி, ததே³கட்டோ² அவிஜ்ஜாஸவோ கீ²யதி. ஏத்தே²தே ஆஸவா கீ²யந்தி. அனாகா³மிமக்³கே³ன அனவஸேஸோ காமாஸவோ கீ²யதி, ததே³கட்டோ² ப⁴வாஸவோ கீ²யதி, ததே³கட்டோ² அவிஜ்ஜாஸவோ கீ²யதி. ஏத்தே²தே ஆஸவா கீ²யந்தி. அரஹத்தமக்³கே³ன அனவஸேஸோ ப⁴வாஸவோ கீ²யதி, அனவஸேஸோ அவிஜ்ஜாஸவோ கீ²யதி. ஏத்தே²தே ஆஸவா கீ²யந்தி. தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘சதுஸட்டி²யா ஆகாரேஹி திண்ணன்னம் இந்த்³ரியானம் வஸிபா⁴வதா பஞ்ஞா ஆஸவானம் க²யே ஞாணம்’’.

ஆஸவக்க²யஞாணனித்³தே³ஸோ பஞ்சபஞ்ஞாஸமோ.