56-63. ஸச்சஞாணசதுக்கத்³வயனித்³தே³ஸோ

108. கத²ம் பரிஞ்ஞட்டே² பஞ்ஞா து³க்கே² ஞாணம், பஹானட்டே² பஞ்ஞா ஸமுத³யே ஞாணம், ஸச்சி²கிரியட்டே² பஞ்ஞா நிரோதே⁴ ஞாணம், பா⁴வனட்டே² பஞ்ஞா மக்³கே³ ஞாணம்? து³க்க²ஸ்ஸ பீளனட்டோ² ஸங்க²தட்டோ² ஸந்தாபட்டோ² விபரிணாமட்டோ² பரிஞ்ஞாதட்டோ²; ஸமுத³யஸ்ஸ ஆயூஹனட்டோ² நிதா³னட்டோ² ஸஞ்ஞோக³ட்டோ² பலிபோ³த⁴ட்டோ² பஹானட்டோ²; நிரோத⁴ஸ்ஸ நிஸ்ஸரணட்டோ² விவேகட்டோ² அஸங்க²தட்டோ² அமதட்டோ² ஸச்சி²கிரியட்டோ²; மக்³க³ஸ்ஸ நிய்யானட்டோ² ஹேதுட்டோ² த³ஸ்ஸனட்டோ² ஆதி⁴பதேய்யட்டோ² பா⁴வனட்டோ². தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘பரிஞ்ஞட்டே² பஞ்ஞா து³க்கே² ஞாணம், பஹானட்டே² பஞ்ஞா ஸமுத³யே ஞாணம், ஸச்சி²கிரியட்டே² பஞ்ஞா நிரோதே⁴ ஞாணம், பா⁴வனட்டே² பஞ்ஞா மக்³கே³ ஞாணம்’’.

109. கத²ம் து³க்கே² ஞாணம், து³க்க²ஸமுத³யே ஞாணம், து³க்க²னிரோதே⁴ ஞாணம், து³க்க²னிரோத⁴கா³மினியா படிபதா³ய ஞாணம்? மக்³க³ஸமங்கி³ஸ்ஸ ஞாணம் து³க்கே² பேதம் ஞாணம், து³க்க²ஸமுத³யே பேதம் ஞாணம், து³க்க²னிரோதே⁴ பேதம் ஞாணம், து³க்க²னிரோத⁴கா³மினியா படிபதா³ய பேதம் ஞாணம்.

தத்த² கதமம் து³க்கே² ஞாணம்? து³க்க²ம் ஆரப்³ப⁴ யா உப்பஜ்ஜதி பஞ்ஞா பஜானனா விசயோ பவிசயோ த⁴ம்மவிசயோ ஸல்லக்க²ணா உபலக்க²ணா பச்சுபலக்க²ணா பண்டி³ச்சம் கோஸல்லம் நேபுஞ்ஞம் வேப⁴ப்³யா சிந்தா உபபரிக்கா² பூ⁴ரி மேதா⁴ பரிணாயிகா விபஸ்ஸனா ஸம்பஜஞ்ஞம் பதோதோ³ பஞ்ஞா பஞ்ஞிந்த்³ரியம் பஞ்ஞாப³லம் பஞ்ஞாஸத்த²ம் பஞ்ஞாபாஸாதோ³ பஞ்ஞாஆலோகோ பஞ்ஞாஓபா⁴ஸோ பஞ்ஞாபஜ்ஜோதோ பஞ்ஞாரதனம் அமோஹோ த⁴ம்மவிசயோ ஸம்மாதி³ட்டி² – இத³ம் வுச்சதி து³க்கே² ஞாணம். து³க்க²ஸமுத³யம் ஆரப்³ப⁴…பே… து³க்க²னிரோத⁴ம் ஆரப்³ப⁴…பே… து³க்க²னிரோத⁴கா³மினிம் படிபத³ம் ஆரப்³ப⁴ யா உப்பஜ்ஜதி பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி² – இத³ம் வுச்சதி து³க்க²னிரோத⁴கா³மினியா படிபதா³ய ஞாணம். தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘து³க்கே² ஞாணம், து³க்க²ஸமுத³யே ஞாணம், து³க்க²னிரோதே⁴ ஞாணம், து³க்க²னிரோத⁴கா³மினியா படிபதா³ய ஞாணம்’’.

ஸச்சஞாணசதுக்கத்³வயனித்³தே³ஸோ தேஸட்டி²மோ.