44-49. ச²விவட்டஞாணனித்³தே³ஸோ

95. கத²ம் அதி⁴பதத்தா பஞ்ஞா ஸஞ்ஞாவிவட்டே ஞாணம்? நேக்க²ம்மாதி⁴பதத்தா பஞ்ஞா காமச்ச²ந்த³தோ ஸஞ்ஞாய விவட்டதீதி – அதி⁴பதத்தா பஞ்ஞா ஸஞ்ஞாவிவட்டே ஞாணம். அப்³யாபாதா³தி⁴பதத்தா பஞ்ஞா ப்³யாபாத³தோ ஸஞ்ஞாய விவட்டதீதி – அதி⁴பதத்தா பஞ்ஞா ஸஞ்ஞாவிவட்டே ஞாணம். ஆலோகஸஞ்ஞாதி⁴பதத்தா பஞ்ஞா தி²னமித்³த⁴தோ ஸஞ்ஞாய விவட்டதீதி – அதி⁴பதத்தா பஞ்ஞா ஸஞ்ஞாவிவட்டே ஞாணம். அவிக்கே²பாதி⁴பதத்தா பஞ்ஞா உத்³த⁴ச்சதோ ஸஞ்ஞாய விவட்டதீதி – அதி⁴பதத்தா பஞ்ஞா ஸஞ்ஞாவிவட்டே ஞாணம். த⁴ம்மவவத்தா²னாதி⁴பதத்தா பஞ்ஞா விசிகிச்சா²ய ஸஞ்ஞாய விவட்டதீதி – அதி⁴பதத்தா பஞ்ஞா ஸஞ்ஞாவிவட்டே ஞாணம். ஞாணாதி⁴பதத்தா பஞ்ஞா அவிஜ்ஜாய ஸஞ்ஞாய விவட்டதீதி – அதி⁴பதத்தா பஞ்ஞா ஸஞ்ஞாவிவட்டே ஞாணம். பாமோஜ்ஜாதி⁴பதத்தா பஞ்ஞா அரதியா ஸஞ்ஞாய விவட்டதீதி – அதி⁴பதத்தா பஞ்ஞா ஸஞ்ஞாவிவட்டே ஞாணம். பட²மஜ்ஜா²னாதி⁴பதத்தா பஞ்ஞா நீவரணேஹி ஸஞ்ஞாய விவட்டதீதி – அதி⁴பதத்தா பஞ்ஞா ஸஞ்ஞாவிவட்டே ஞாணம்…பே… அரஹத்தமக்³கா³தி⁴பதத்தா பஞ்ஞா ஸப்³ப³கிலேஸேஹி ஸஞ்ஞாய விவட்டதீதி – அதி⁴பதத்தா பஞ்ஞா ஸஞ்ஞாவிவட்டே ஞாணம். தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘அதி⁴பதத்தா பஞ்ஞா ஸஞ்ஞாவிவட்டே ஞாணம்’’.

96. கத²ம் நானத்தே பஞ்ஞா சேதோவிவட்டே ஞாணம்? காமச்ச²ந்தோ³ நானத்தம், நேக்க²ம்மம் ஏகத்தம். நேக்க²ம்மேகத்தம் சேதயதோ காமச்ச²ந்த³தோ சித்தம் விவட்டதீதி – நானத்தே பஞ்ஞா சேதோவிவட்டே ஞாணம். ப்³யாபாதோ³ நானத்தம், அப்³யாபாதோ³ ஏகத்தம். அப்³யாபாதே³கத்தம் சேதயதோ ப்³யாபாத³தோ சித்தம் விவட்டதீதி – நானத்தே பஞ்ஞா சேதோவிவட்டே ஞாணம். தி²னமித்³த⁴ம் நானத்தம், ஆலோகஸஞ்ஞா ஏகத்தம். ஆலோகஸஞ்ஞேகத்தம் சேதயதோ தி²னமித்³த⁴தோ சித்தம் விவட்டதீதி – நானத்தே பஞ்ஞா சேதோவிவட்டே ஞாணம்…பே… ஸப்³ப³கிலேஸா நானத்தம், அரஹத்தமக்³கோ³ ஏகத்தம். அரஹத்தமக்³கே³கத்தம் சேதயதோ ஸப்³ப³கிலேஸேஹி சித்தம் விவட்டதீதி – நானத்தே பஞ்ஞா சேதோவிவட்டே ஞாணம். தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘நானத்தே பஞ்ஞா சேதோவிவட்டே ஞாணம்’’.

97. கத²ம் அதி⁴ட்டா²னே பஞ்ஞா சித்தவிவட்டே ஞாணம்? காமச்ச²ந்த³ம் பஜஹந்தோ நேக்க²ம்மவஸேன சித்தம் அதி⁴ட்டா²தீதி – அதி⁴ட்டா²னே பஞ்ஞா சித்தவிவட்டே ஞாணம். ப்³யாபாத³ம் பஜஹந்தோ அப்³யாபாத³வஸேன சித்தம் அதி⁴ட்டா²தீதி – அதி⁴ட்டா²னே பஞ்ஞா சித்தவிவட்டே ஞாணம். தி²னமித்³த⁴ம் பஜஹந்தோ ஆலோகஸஞ்ஞாவஸேன சித்தம் அதி⁴ட்டா²தீதி – அதி⁴ட்டா²னே பஞ்ஞா சித்தவிவட்டே ஞாணம்…பே… ஸப்³ப³கிலேஸே பஜஹந்தோ அரஹத்தமக்³க³வஸேன சித்தம் அதி⁴ட்டா²தீதி – அதி⁴ட்டா²னே பஞ்ஞா சித்தவிவட்டே ஞாணம். தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘அதி⁴ட்டா²னே பஞ்ஞா சித்தவிவட்டே ஞாணம்’’.

98. கத²ம் ஸுஞ்ஞதே பஞ்ஞா ஞாணவிவட்டே ஞாணம்? ‘‘சக்கு² ஸுஞ்ஞம் அத்தேன வா அத்தனியேன வா நிச்சேன வா து⁴வேன வா ஸஸ்ஸதேன வா அவிபரிணாமத⁴ம்மேன வா’’தி யதா²பூ⁴தம் ஜானதோ [பஜானதோ (ஸ்யா.)] பஸ்ஸதோ சக்கா²பி⁴னிவேஸதோ [காமாபி⁴னிவேஸதோ (ஸ்யா.) அட்ட²கதா² ஓலோகேதப்³பா³] ஞாணம் விவட்டதீதி – ஸுஞ்ஞதே பஞ்ஞா ஞாணவிவட்டே ஞாணம். ‘‘ஸோதம் ஸுஞ்ஞம்…பே… கா⁴னம் ஸுஞ்ஞம்… ஜிவ்ஹா ஸுஞ்ஞா… காயோ ஸுஞ்ஞோ… மனோ ஸுஞ்ஞோ அத்தேன வா அத்தனியேன வா நிச்சேன வா து⁴வேன வா ஸஸ்ஸதேன வா அவிபரிணாமத⁴ம்மேன வா’’தி யதா²பூ⁴தம் ஜானதோ பஸ்ஸதோ மனாபி⁴னிவேஸதோ ஞாணம் விவட்டதீதி – ஸுஞ்ஞதே பஞ்ஞா ஞாணவிவட்டே ஞாணம். தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘ஸுஞ்ஞதே பஞ்ஞா ஞாணவிவட்டே ஞாணம்’’.

99. கத²ம் வோஸக்³கே³ பஞ்ஞா விமோக்க²விவட்டே ஞாணம்? நேக்க²ம்மேன காமச்ச²ந்த³ம் வோஸஜ்ஜதீதி – வோஸக்³கே³ பஞ்ஞா விமோக்க²விவட்டே ஞாணம். அப்³யாபாதே³ன ப்³யாபாத³ம் வோஸஜ்ஜதீதி – வோஸக்³கே³ பஞ்ஞா விமோக்க²விவட்டே ஞாணம். ஆலோகஸஞ்ஞாய தி²னமித்³த⁴ம் வோஸஜ்ஜதீதி – வோஸக்³கே³ பஞ்ஞா விமோக்க²விவட்டே ஞாணம். அவிக்கே²பேன உத்³த⁴ச்சம் வோஸஜ்ஜதீதி – வோஸக்³கே³ பஞ்ஞா விமோக்க²விவட்டே ஞாணம். த⁴ம்மவவத்தா²னேன விசிகிச்ச²ம் வோஸஜ்ஜதீதி – வோஸக்³கே³ பஞ்ஞா விமோக்க²விவட்டே ஞாணம்…பே… அரஹத்தமக்³கே³ன ஸப்³ப³கிலேஸே வோஸஜ்ஜதீதி – வோஸக்³கே³ பஞ்ஞா விமோக்க²விவட்டே ஞாணம். தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘வோஸக்³கே³ பஞ்ஞா விமோக்க²விவட்டே ஞாணம்’’.

100. கத²ம் தத²ட்டே² பஞ்ஞா ஸச்சவிவட்டே ஞாணம்? து³க்க²ஸ்ஸ பீளனட்ட²ம் ஸங்க²தட்ட²ம் ஸந்தாபட்ட²ம் விபரிணாமட்ட²ம் பரிஜானந்தோ விவட்டதீதி – தத²ட்டே² பஞ்ஞா ஸச்சவிவட்டே ஞாணம். ஸமுத³யஸ்ஸ ஆயூஹனட்ட²ம் நிதா³னட்ட²ம் ஸஞ்ஞோக³ட்ட²ம் பலிபோ³த⁴ட்ட²ம் பஜஹந்தோ விவட்டதீதி – தத²ட்டே² பஞ்ஞா ஸச்சவிவட்டே ஞாணம். நிரோத⁴ஸ்ஸ நிஸ்ஸரணட்ட²ம் விவேகட்ட²ம் அஸங்க²தட்ட²ம் அமதட்ட²ம் ஸச்சி²கரோந்தோ விவட்டதீதி – தத²ட்டே² பஞ்ஞா ஸச்சவிவட்டே ஞாணம். மக்³க³ஸ்ஸ நிய்யானட்ட²ம் ஹேதுட்ட²ம் த³ஸ்ஸனட்ட²ம் ஆதி⁴பதேய்யட்ட²ம் பா⁴வேந்தோ விவட்டதீதி – தத²ட்டே² பஞ்ஞா ஸச்சவிவட்டே ஞாணம்.

ஸஞ்ஞாவிவட்டோ, சேதோவிவட்டோ, சித்தவிவட்டோ, ஞாணவிவட்டோ, விமோக்க²விவட்டோ, ஸச்சவிவட்டோ. ஸஞ்ஜானந்தோ விவட்டதீதி – ஸஞ்ஞாவிவட்டோ. சேதயந்தோ விவட்டதீதி – சேதோவிவட்டோ. விஜானந்தோ விவட்டதீதி – சித்தவிவட்டோ. ஞாணம் கரோந்தோ விவட்டதீதி – ஞாணவிவட்டோ. வோஸஜ்ஜந்தோ விவட்டதீதி – விமோக்க²விவட்டோ. தத²ட்டே² விவட்டதீதி – ஸச்சவிவட்டோ.

யத்த² ஸஞ்ஞாவிவட்டோ, தத்த² சேதோவிவட்டோ. யத்த² சேதோவிவட்டோ, தத்த² ஸஞ்ஞாவிவட்டோ. யத்த² ஸஞ்ஞாவிவட்டோ சேதோவிவட்டோ தத்த² சித்தவிவட்டோ. யத்த² சித்தவிவட்டோ, தத்த² ஸஞ்ஞாவிவட்டோ சேதோவிவட்டோ. யத்த² ஸஞ்ஞாவிவட்டோ சேதோவிவட்டோ சித்தவிவட்டோ, தத்த² ஞாணவிவட்டோ. யத்த² ஞாணவிவட்டோ, தத்த² ஸஞ்ஞாவிவட்டோ சேதோவிவட்டோ சித்தவிவட்டோ. யத்த² ஸஞ்ஞாவிவட்டோ சேதோவிவட்டோ சித்தவிவட்டோ ஞாணவிவட்டோ, தத்த² விமோக்க²விவட்டோ. யத்த² விமோக்க²விவட்டோ, தத்த² ஸஞ்ஞாவிவட்டோ சேதோவிவட்டோ சித்தவிவட்டோ ஞாணவிவட்டோ. யத்த² ஸஞ்ஞாவிவட்டோ சேதோவிவட்டோ சித்தவிவட்டோ ஞாணவிவட்டோ விமோக்க²விவட்டோ, தத்த² ஸச்சவிவட்டோ. யத்த² ஸச்சவிவட்டோ, தத்த² ஸஞ்ஞாவிவட்டோ சேதோவிவட்டோ சித்தவிவட்டோ ஞாணவிவட்டோ விமோக்க²விவட்டோ. தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘தத²ட்டே² பஞ்ஞா ஸச்சவிவட்டே ஞாணம்’’.

ச²விவட்டஞாணனித்³தே³ஸோ நவசத்தாலீஸமோ.