50. இத்³தி⁴வித⁴ஞாணனித்³தே³ஸோ

101. கத²ம் காயம்பி சித்தம்பி ஏகவவத்தா²னதா ஸுக²ஸஞ்ஞஞ்ச லஹுஸஞ்ஞஞ்ச அதி⁴ட்டா²னவஸேன இஜ்ஜ²னட்டே² பஞ்ஞா இத்³தி⁴விதே⁴ ஞாணம்? இத⁴ பி⁴க்கு² ச²ந்த³ஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி, வீரியஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி, சித்தஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி, வீமம்ஸாஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி. ஸோ இமேஸு சதூஸு இத்³தி⁴பாதே³ஸு சித்தம் பரிபா⁴வேதி பரித³மேதி, முது³ம் கரோதி கம்மனியம். ஸோ இமேஸு சதூஸு இத்³தி⁴பாதே³ஸு சித்தம் பரிபா⁴வேத்வா பரித³மேத்வா முது³ம் கரித்வா கம்மனியம் காயம்பி சித்தே ஸமோத³ஹதி, சித்தம்பி காயே ஸமோத³ஹதி, காயவஸேன சித்தம் பரிணாமேதி, சித்தவஸேன காயம் பரிணாமேதி, காயவஸேன சித்தம் அதி⁴ட்டா²தி, சித்தவஸேன காயம் அதி⁴ட்டா²தி; காயவஸேன சித்தம் பரிணாமேத்வா சித்தவஸேன காயம் பரிணாமேத்வா காயவஸேன சித்தம் அதி⁴ட்ட²ஹித்வா சித்தவஸேன காயம் அதி⁴ட்ட²ஹித்வா ஸுக²ஸஞ்ஞஞ்ச லஹுஸஞ்ஞஞ்ச காயே ஓக்கமித்வா விஹரதி. ஸோ ததா²பா⁴விதேன சித்தேன பரிஸுத்³தே⁴ன பரியோதா³தேன இத்³தி⁴வித⁴ஞாணாய சித்தம் அபி⁴னீஹரதி அபி⁴னின்னாமேதி. ஸோ அனேகவிஹிதம் இத்³தி⁴வித⁴ம் பச்சனுபோ⁴தி.

102. ஏகோபி ஹுத்வா ப³ஹுதா⁴ ஹோதி, ப³ஹுதா⁴பி ஹுத்வா ஏகோ ஹோதி; ஆவிபா⁴வம் திரோபா⁴வம்; திரோகுட்டம் [திரோகுட்³ட³ம் (ஸ்யா.)] திரோபாகாரம் திரோபப்³ப³தம் அஸஜ்ஜமானோ க³ச்ச²தி, ஸேய்யதா²பி ஆகாஸே; பத²வியாபி உம்முஜ்ஜனிமுஜ்ஜம் கரோதி, ஸேய்யதா²பி உத³கே; உத³கேபி அபி⁴ஜ்ஜமானே க³ச்ச²தி, ஸேய்யதா²பி பத²வியம்; ஆகாஸேபி பல்லங்கேன கமதி [சங்கமதி (ஸ்யா.) தீ³. நி. 1.238 பஸ்ஸிதப்³பா³] ஸேய்யதா²பி பக்கீ² ஸகுணோ இமேபி சந்தி³மஸூரியே ஏவம்மஹித்³தி⁴கே ஏவம்மஹானுபா⁴வே பாணினா பராமஸதி [பரிமஸதி (ஸ்யா.)] பரிமஜ்ஜதி; யாவ ப்³ரஹ்மலோகாபி காயேன வஸம் வத்தேதி. தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘காயம்பி சித்தம்பி ஏகவவத்தா²னதா ஸுக²ஸஞ்ஞஞ்ச லஹுஸஞ்ஞஞ்ச அதி⁴ட்டா²னவஸேன இஜ்ஜ²னட்டே² பஞ்ஞா இத்³தி⁴விதே⁴ ஞாணம்’’.

இத்³தி⁴வித⁴ஞாணனித்³தே³ஸோ பஞ்ஞாஸமோ.