43. பதே³ஸவிஹாரஞாணனித்³தே³ஸோ

94. கத²ம் ஸமோத³ஹனே பஞ்ஞா பதே³ஸவிஹாரே ஞாணம்? மிச்சா²தி³ட்டி²பச்சயாபி வேத³யிதம், மிச்சா²தி³ட்டி²வூபஸமபச்சயாபி வேத³யிதம். ஸம்மாதி³ட்டி²பச்சயாபி வேத³யிதம், ஸம்மாதி³ட்டி²வூபஸமபச்சயாபி வேத³யிதம். மிச்சா²ஸங்கப்பபச்சயாபி வேத³யிதம், மிச்சா²ஸங்கப்பவூபஸமபச்சயாபி வேத³யிதம். ஸம்மாஸங்கப்பபச்சயாபி வேத³யிதம், ஸம்மாஸங்கப்பவூபஸமபச்சயாபி வேத³யிதம்…பே… மிச்சா²விமுத்திபச்சயாபி வேத³யிதம், மிச்சா²விமுத்திவூபஸமபச்சயாபி வேத³யிதம். ஸம்மாவிமுத்திபச்சயாபி வேத³யிதம், ஸம்மாவிமுத்திவூபஸமபச்சயாபி வேத³யிதம். ச²ந்த³பச்சயாபி வேத³யிதம், ச²ந்த³வூபஸமபச்சயாபி வேத³யிதம். விதக்கபச்சயாபி வேத³யிதம், விதக்கவூபஸமபச்சயாபி வேத³யிதம். ஸஞ்ஞாபச்சயாபி வேத³யிதம், ஸஞ்ஞாவூபஸமபச்சயாபி வேத³யிதம்.

ச²ந்தோ³ ச அவூபஸந்தோ ஹோதி, விதக்கோ ச அவூபஸந்தோ ஹோதி, ஸஞ்ஞா ச அவூபஸந்தா ஹோதி, தப்பச்சயாபி வேத³யிதம். ச²ந்தோ³ ச வூபஸந்தோ ஹோதி, விதக்கோ ச அவூபஸந்தோ ஹோதி, ஸஞ்ஞா ச அவூபஸந்தா ஹோதி, தப்பச்சயாபி வேத³யிதம். ச²ந்தோ³ ச வூபஸந்தோ ஹோதி, விதக்கோ ச வூபஸந்தோ ஹோதி, ஸஞ்ஞா ச அவூபஸந்தா ஹோதி, தப்பச்சயாபி வேத³யிதம். ச²ந்தோ³ ச வூபஸந்தோ ஹோதி, விதக்கோ ச வூபஸந்தோ ஹோதி, ஸஞ்ஞா ச வூபஸந்தா ஹோதி, தப்பச்சயாபி வேத³யிதம். அப்பத்தஸ்ஸ பத்தியா அத்தி² ஆஸவம், தஸ்மிம்பி டா²னே அனுப்பத்தே தப்பச்சயாபி வேத³யிதம். தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘ஸமோத³ஹனே பஞ்ஞா பதே³ஸவிஹாரே ஞாணம்’’.

பதே³ஸவிஹாரஞாணனித்³தே³ஸோ தேசத்தாலீஸமோ.