34. நிரோத⁴ஸமாபத்திஞாணனித்³தே³ஸோ

83. கத²ம் த்³வீஹி ப³லேஹி ஸமன்னாக³தத்தா தயோ ச ஸங்கா²ரானம் படிப்பஸ்ஸத்³தி⁴யா ஸோளஸஹி ஞாணசரியாஹி நவஹி ஸமாதி⁴சரியாஹி வஸிபா⁴வதா பஞ்ஞா நிரோத⁴ஸமாபத்தியா ஞாணம்?

த்³வீஹி ப³லேஹீதி த்³வே ப³லானி – ஸமத²ப³லம், விபஸ்ஸனாப³லம். கதமம் ஸமத²ப³லம்? நேக்க²ம்மவஸேன சித்தஸ்ஸேகக்³க³தா அவிக்கே²போ ஸமத²ப³லம். அப்³யாபாத³வஸேன சித்தஸ்ஸேகக்³க³தா அவிக்கே²போ ஸமத²ப³லம். ஆலோகஸஞ்ஞாவஸேன சித்தஸ்ஸேகக்³க³தா அவிக்கே²போ ஸமத²ப³லம். அவிக்கே²பவஸேன சித்தஸ்ஸேகக்³க³தா அவிக்கே²போ ஸமத²ப³லம்…பே… படினிஸ்ஸக்³கா³னுபஸ்ஸீ அஸ்ஸாஸவஸேன சித்தஸ்ஸேகக்³க³தா அவிக்கே²போ ஸமத²ப³லம். படினிஸ்ஸக்³கா³னுபஸ்ஸீ பஸ்ஸாஸவஸேன சித்தஸ்ஸேகக்³க³தா அவிக்கே²போ ஸமத²ப³லம்.

ஸமத²ப³லந்தி கேனட்டே²ன ஸமத²ப³லம்? பட²மேன ஜா²னேன நீவரணே ந கம்பதீதி – ஸமத²ப³லம். து³தியேன ஜா²னேன விதக்கவிசாரே ந கம்பதீதி – ஸமத²ப³லம். ததியேன ஜா²னேன பீதியா ந கம்பதீதி – ஸமத²ப³லம். சதுத்தே²ன ஜா²னேன ஸுக²து³க்கே² ந கம்பதீதி – ஸமத²ப³லம். ஆகாஸானஞ்சாயதனஸமாபத்தியா ரூபஸஞ்ஞாய படிக⁴ஸஞ்ஞாய நானத்தஸஞ்ஞாய ந கம்பதீதி – ஸமத²ப³லம். விஞ்ஞாணஞ்சாயதனஸமாபத்தியா ஆகாஸானஞ்சாயதனஸஞ்ஞாய ந கம்பதீதி – ஸமத²ப³லம். ஆகிஞ்சஞ்ஞாயதனஸமாபத்தியா விஞ்ஞாணஞ்சாயதனஸஞ்ஞாய ந கம்பதீதி – ஸமத²ப³லம். நேவஸஞ்ஞானாஸஞ்ஞாயதனஸமாபத்தியா ஆகிஞ்சஞ்ஞாயதனஸஞ்ஞாய ந கம்பதீதி – ஸமத²ப³லம். உத்³த⁴ச்சே ச உத்³த⁴ச்சஸஹக³தகிலேஸே ச க²ந்தே⁴ ச ந கம்பதி ந சலதி ந வேத⁴தீதி – ஸமத²ப³லம். இத³ம் ஸமத²ப³லம்.

கதமம் விபஸ்ஸனாப³லம்? அனிச்சானுபஸ்ஸனா விபஸ்ஸனாப³லம். து³க்கா²னுபஸ்ஸனா விபஸ்ஸனாப³லம். அனத்தானுபஸ்ஸனா விபஸ்ஸனாப³லம். நிப்³பி³தா³னுபஸ்ஸனா விபஸ்ஸனாப³லம். விராகா³னுபஸ்ஸனா விபஸ்ஸனாப³லம். நிரோதா⁴னுபஸ்ஸனா விபஸ்ஸனாப³லம். படினிஸ்ஸக்³கா³னுபஸ்ஸனா விபஸ்ஸனாப³லம். ரூபே அனிச்சானுபஸ்ஸனா விபஸ்ஸனாப³லம் …பே… ரூபே படினிஸ்ஸக்³கா³னுபஸ்ஸனா விபஸ்ஸனாப³லம். வேத³னாய…பே… ஸஞ்ஞாய… ஸங்கா²ரேஸு… விஞ்ஞாணே… சக்கு²ஸ்மிம்…பே… ஜராமரணே அனிச்சானுபஸ்ஸனா விபஸ்ஸனாப³லம்…பே… ஜராமரணே படினிஸ்ஸக்³கா³னுபஸ்ஸனா விபஸ்ஸனாப³லம்.

விபஸ்ஸனாப³லந்தி கேனட்டே²ன விபஸ்ஸனாப³லம்? அனிச்சானுபஸ்ஸனாய நிச்சஸஞ்ஞாய ந கம்பதீதி – விபஸ்ஸனாப³லம். து³க்கா²னுபஸ்ஸனாய ஸுக²ஸஞ்ஞாய ந கம்பதீதி – விபஸ்ஸனாப³லம். அனத்தானுபஸ்ஸனாய அத்தஸஞ்ஞாய ந கம்பதீதி – விபஸ்ஸனாப³லம். நிப்³பி³தா³னுபஸ்ஸனாய நந்தி³யா ந கம்பதீதி – விபஸ்ஸனாப³லம். விராகா³னுபஸ்ஸனாய ராகே³ ந கம்பதீதி – விபஸ்ஸனாப³லம். நிரோதா⁴னுபஸ்ஸனாய ஸமுத³யே ந கம்பதீதி – விபஸ்ஸனாப³லம். படினிஸ்ஸக்³கா³னுபஸ்ஸனாய ஆதா³னே ந கம்பதீதி – விபஸ்ஸனாப³லம். அவிஜ்ஜாய ச அவிஜ்ஜா ஸஹக³தகிலேஸே ச க²ந்தே⁴ ச ந கம்பதி ந சலதி ந வேத⁴தீதி – விபஸ்ஸனாப³லம். இத³ம் விபஸ்ஸனாப³லம்.

தயோ ச ஸங்கா²ரானம் படிப்பஸ்ஸத்³தி⁴யாதி கதமேஸம் திண்ணன்னம் ஸங்கா²ரானம் படிப்பஸ்ஸத்³தி⁴யா? து³தியம் ஜா²னம் ஸமாபன்னஸ்ஸ விதக்கவிசாரா வசீஸங்கா²ரா படிப்பஸ்ஸத்³தா⁴ ஹோந்தி. சதுத்த²ம் ஜா²னம் ஸமாபன்னஸ்ஸ அஸ்ஸாஸபஸ்ஸாஸா காயஸங்கா²ரா படிப்பஸ்ஸத்³தா⁴ ஹோந்தி. ஸஞ்ஞாவேத³யிதனிரோத⁴ம் ஸமாபன்னஸ்ஸ ஸஞ்ஞா ச வேத³னா ச சித்தஸங்கா²ரா படிப்பஸ்ஸத்³தா⁴ ஹோந்தி. இமேஸம் திண்ணன்னம் ஸங்கா²ரானம் படிப்பஸ்ஸத்³தி⁴யா.

84. ஸோளஸஹி ஞாணசரியாஹீதி கதமாஹி ஸோளஸஹி ஞாணசரியாஹி? அனிச்சானுபஸ்ஸனா ஞாணசரியா, து³க்கா²னுபஸ்ஸனா ஞாணசரியா, அனத்தானுபஸ்ஸனா ஞாணசரியா, நிப்³பி³தா³னுபஸ்ஸனா ஞாணசரியா, விராகா³னுபஸ்ஸனா ஞாணசரியா, நிரோதா⁴னுபஸ்ஸனா ஞாணசரியா, படினிஸ்ஸக்³கா³னுபஸ்ஸனா ஞாணசரியா, விவட்டனானுபஸ்ஸனா ஞாணசரியா, ஸோதாபத்திமக்³கோ³ ஞாணசரியா, ஸோதாபத்திப²லஸமாபத்தி ஞாணசரியா, ஸகதா³கா³மிமக்³கோ³ ஞாணசரியா, ஸகதா³கா³மிப²லஸமாபத்தி ஞாணசரியா, அனாகா³மிமக்³கோ³ ஞாணசரியா, அனாகா³மிப²லஸமாபத்தி ஞாணசரியா, அரஹத்தமக்³கோ³ ஞாணசரியா, அரஹத்தப²லஸமாபத்தி ஞாணசரியா – இமாஹி ஸோளஸஹி ஞாணசரியாஹி.

85. நவஹி ஸமாதி⁴சரியாஹீதி கதமாஹி நவஹி ஸமாதி⁴சரியாஹி? பட²மம் ஜா²னம் ஸமாதி⁴சரியா, து³தியம் ஜா²னம் ஸமாதி⁴சரியா, ததியம் ஜா²னம் ஸமாதி⁴சரியா, சதுத்த²ம் ஜா²னம் ஸமாதி⁴சரியா, ஆகாஸானஞ்சாயதனஸமாபத்தி…பே… விஞ்ஞாணஞ்சாயதனஸமாபத்தி… ஆகிஞ்சஞ்ஞாயதனஸமாபத்தி… நேவஸஞ்ஞானாஸஞ்ஞாயதனஸமாபத்தி ஸமாதி⁴சரியா. பட²மம் ஜா²னம் படிலாப⁴த்தா²ய விதக்கோ ச விசாரோ ச பீதி ச ஸுக²ஞ்ச சித்தேகக்³க³தா ச…பே… நேவஸஞ்ஞானாஸஞ்ஞாயதனஸமாபத்திம் படிலாப⁴த்தா²ய விதக்கோ ச விசாரோ ச பீதி ச ஸுக²ஞ்ச சித்தேகக்³க³தா ச – இமாஹி நவஹி ஸமாதி⁴சரியாஹி.

வஸீதி பஞ்ச வஸியோ. ஆவஜ்ஜனவஸீ, ஸமாபஜ்ஜனவஸீ, அதி⁴ட்டா²னவஸீ, வுட்டா²னவஸீ, பச்சவேக்க²ணாவஸீ. பட²மம் ஜா²னம் யத்தி²ச்ச²கம் யதி³ச்ச²கம் யாவதிச்ச²கம் ஆவஜ்ஜதி; ஆவஜ்ஜனாய த³ந்தா⁴யிதத்தம் நத்தீ²தி – ஆவஜ்ஜனவஸீ. பட²மம் ஜா²னம் யத்தி²ச்ச²கம் யதி³ச்ச²கம் யாவதிச்ச²கம் ஸமாபஜ்ஜதி; ஸமாபஜ்ஜனாய த³ந்தா⁴யிதத்தம் நத்தீ²தி – ஸமாபஜ்ஜனவஸீ. பட²மம் ஜா²னம் யத்தி²ச்ச²கம் யதி³ச்ச²கம் யாவதிச்ச²கம் அதி⁴ட்டா²தி; அதி⁴ட்டா²னே த³ந்தா⁴யிதத்தம் நத்தீ²தி – அதி⁴ட்டா²னவஸீ. பட²மம் ஜா²னம் யத்தி²ச்ச²கம் யதி³ச்ச²கம் யாவதிச்ச²கம் வுட்டா²தி; வுட்டா²னே த³ந்தா⁴யிதத்தம் நத்தீ²தி – வுட்டா²னவஸீ. பட²மம் ஜா²னம் யத்தி²ச்ச²கம் யதி³ச்ச²கம் யாவதிச்ச²கம் பச்சவேக்க²தி; பச்சவேக்க²ணாய த³ந்தா⁴யிதத்தம் நத்தீ²தி – பச்சவேக்க²ணாவஸீ.

து³தியம் ஜா²னம்…பே… நேவஸஞ்ஞானாஸஞ்ஞாயதனஸமாபத்திம் யத்தி²ச்ச²கம் யதி³ச்ச²கம் யாவதிச்ச²கம் ஆவஜ்ஜதி; ஆவஜ்ஜனாய த³ந்தா⁴யிதத்தம் நத்தீ²தி – ஆவஜ்ஜனவஸீ. நேவஸஞ்ஞானாஸஞ்ஞாயதனஸமாபத்திம் யத்தி²ச்ச²கம் யதி³ச்ச²கம் யாவதிச்ச²கம் ஸமாபஜ்ஜதி…பே… அதி⁴ட்டா²தி… வுட்டா²தி… பச்சவேக்க²தி; பச்சவேக்க²ணாய த³ந்தா⁴யிதத்தம் நத்தீ²தி – பச்சவேக்க²ணாவஸீ. இமா பஞ்ச வஸியோ. தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘த்³வீஹி ப³லேஹி ஸமன்னாக³தத்தா தயோ ச ஸங்கா²ரானம் படிபஸ்ஸத்³தி⁴யா ஸோளஸஹி ஞாணசரியாஹி நவஹி ஸமாதி⁴சரியாஹி வஸீபா⁴வதா பஞ்ஞா நிரோத⁴ஸமாபத்தியா ஞாணம்’’.

நிரோத⁴ஸமாபத்திஞாணனித்³தே³ஸோ சதுத்திம்ஸதிமோ.