35. பரினிப்³பா³னஞாணனித்³தே³ஸோ

86. கத²ம் ஸம்பஜானஸ்ஸ பவத்தபரியாதா³னே பஞ்ஞா பரினிப்³பா³னே ஞாணம்? இத⁴ ஸம்பஜானோ நேக்க²ம்மேன காமச்ச²ந்த³ஸ்ஸ பவத்தம் பரியாதி³யதி, அப்³யாபாதே³ன ப்³யாபாத³ஸ்ஸ பவத்தம் பரியாதி³யதி, ஆலோகஸஞ்ஞாய தி²னமித்³த⁴ஸ்ஸ பவத்தம் பரியாதி³யதி, அவிக்கே²பேன உத்³த⁴ச்சஸ்ஸ பவத்தம் பரியாதி³யதி, த⁴ம்மவவத்தா²னேன விசிகிச்சா²ய…பே… ஞாணேன அவிஜ்ஜாய… பாமோஜ்ஜேன அரதியா … பட²மேன ஜா²னேன நீவரணானம் பவத்தம் பரியாதி³யதி…பே… அரஹத்தமக்³கே³ன ஸப்³ப³கிலேஸானம் பவத்தம் பரியாதி³யதி.

அத² வா பன ஸம்பஜானஸ்ஸ அனுபாதி³ஸேஸாய நிப்³பா³னதா⁴துயா பரினிப்³பா³யந்தஸ்ஸ இத³ஞ்சேவ சக்கு²பவத்தம் பரியாதி³யதி, அஞ்ஞஞ்ச சக்கு²பவத்தம் ந உப்பஜ்ஜதி. இத³ஞ்சேவ ஸோதபவத்தம்…பே… கா⁴னபவத்தம்… ஜிவ்ஹாபவத்தம்… காயபவத்தம்… மனோபவத்தம் பரியாதி³யதி, அஞ்ஞஞ்ச மனோபவத்தம் ந உப்பஜ்ஜதி. இத³ம் ஸம்பஜானஸ்ஸ பவத்தபரியாதா³னே பஞ்ஞா பரினிப்³பா³னே ஞாணம். தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘ஸம்பஜானஸ்ஸ பவத்தபரியாதா³னே பஞ்ஞா பரினிப்³பா³னே ஞாணம்’’.

பரினிப்³பா³னஞாணனித்³தே³ஸோ பஞ்சதிம்ஸதிமோ.